ཡོད་ཚད་ཚན་རིག་དབང་བཙན་པ་བྱ་དགོས་དོན་མེད། འབྲོང་ངུར་ཆོས་རྗེ།

དེ་ཡང་བོད་ཀྱི་གཏམ་དཔེར། མ་ཤོད་ཟེར་མི་མེད་དུས། ཨ་ཕོ་གང་བཤད་རེད་བཞག ཟེར་བ་ལྟར་ཉེ་ཆར་བོད་ཀྱི་དུས་བབ་གསར་ཤོག་འདོན་ཐེངས་ ༤༥༢ ཐོག་དགེ་བཤེས་ལྷག་རྡོར་ཟེར་བ་ཞིག་གི་བསམ་འཆར་དེས་མཚོན་ཚན་རིག་ཏོག་ཙམ་ཐོས་སྦྱངས་མྱོང་བའི་གང་ཟག་ཞིག་ཡིན་ནས་བཟུང་ཕལ་ཆེར་དེ་ལྟར་སྨྲ་སྲིད་མོད། སྤྱིར་ཁྱོད་ཀྱིས་ཕྱི་དངོས་པོའི་ཐོག་ནས་རྗེས་ལུས་ཞེས་པ་དེ་ནང་ཆོས་ལ་བརྟེན་ནས་ཁ་ཡོད་ལག་ཡོད་ཀྱི་གནམ་གྲུ་དང་རླངས་འཁོར་གློག་ཀླད་སོགས་ཕྱི་དངོས་པོའི་ཡར་རྒྱས་ཕུན་སུམ་ཚོགས་པ་འདི་དག་གསར་བསྐྲུན་མེད་པ་དེར་བརྟེན་རྗེས་ལུས་ཞེས་མིང་བཏགས་ན་ངས་ལགས་སོ་ལོས་ཞུ། དེ་ལྟར་ཁས་བླངས་པས་ནང་ཆོས་ཀྱི་གཟི་བརྗིད་སྤུ་ཉག་ཙམ་ཡང་ཆུང་དུ་འགྲོ་མི་སྲིད་དེ། རིག་གནས་སོ་སོར་ཐུན་མིན་ཁྱད་ཆོས་རེ་ཡོད་ཅིང་དེ་ཀུན་འགྲོ་བའི་ཉེར་མཁོ་ཡིན་པས་སོ། །དཔེར་ན་གསོ་བ་རིག་པ་བཞིན།  འོན་ཀྱང་ཁྱོད་ཀྱིས་གང་ལ་བརྗོད་པ་ནི་ངས་གསལ་པོར་དཔོག་ཐུབ་ཀྱིན་འདུག་པས། སངས་རྒྱས་ཀྱིས་གསུངས་པ་ནོར་འདུག་གམ་ཁྱོད་ཀྱིས་གསུངས་པ་ནོར་འདུག་ངས་གསལ་བཤད་༼དགེ་བཤེས་དག་ཀྱང་མགོ་འཁོར་ན་གཞན་ལྟ་ཅི་སྨོས་དེའི་ཕྱིར་རང་གཞན་ཀུན་མགོ་བསྐོར་མ་ཐེབས་པའི་ཆེད་འདི་མ་བྲིས་ཀ་མེད་ཆགས།༽ཅིག་བྱེད་ཆོག དེ་ཡང་གླེན་པའི་ལྷག་བསམ་ཅན་ཁྱེད་ནང་པར་ཁས་འཆེ་བ་ཞིག་གིས་དེ་ལྟར་བཤད་པ་དེས་ནང་ཆོས་ཆ་ཚང་ཆུ་ལ་གཡུགས་པ་མ་ཤེས་སམ། སངས་རྒྱས་ཀྱིས་ཕྱི་དངོས་པོའི་འགྲེལ་བཤད་གནང་བ་དེ་དག་དཔེ་དང་བཅས་༼དཔེ་དེ་ཡང་རང་གི་ཨ་མའི་ཕོར་པ་བཞག་འདུག༽ནོར་འཁྲུལ་དང་རྗེས་ལུས་ཡིན་པར་ཁས་ལེན་དགོས་ཟེར་བ་ནི། དོན་དུ་ཡུལ་གྱི་གནས་ཚུལ་ཇི་བཞིན་མ་མཁྱེན་པ་རེད་ཅེས་བརྗོད་པ་ནི་ལྟ་ཅི་སྨོས། དེ་ལྟར་ན་ང་ཚོས་རྣམ་མཁྱེན་ཡེ་ཤེས་ཞེས་ཁུངས་གཏུག་ས་ཡོད་ན་མེད་ན་དེ་ད་ནི་བརླག་ཚར། མངོན་གྱུར་ཕྱི་སྣོད་ཀྱི་བཀོད་དབྱིབས་ཆེ་ཆུང་སོགས་གང་འདྲ་ཡོད་མེད་ཙམ་ཡང་ཇི་བཞིན་མ་རྟོགས་པའི་ཤེས་པ་ཞིག་གིས་ད་དུང་ཤེས་བྱ་ཐམས་ཅད་མཁྱེན་རྒྱུ་དང་དེ་ཡང་མངོན་སུམ་ལག་མཐིལ་དུ་སྐྱུ་རུ་ར་བཞག་པ་ལྟར་མཁྱེན་ཟེར་བ་དེ་དག་ཇི་ལྟར་འཐད་དམ། ཁྱོད་ལྟར་ན་མངོན་གྱུར་ཙམ་ལའང་རྨོངས་པའི་གང་ཟག་ཅིག་ལ་ང་ཚོས་སྐྱབས་གནས་དང་བློས་ཐུབ་ཡིད་ཆེས་བྱེད་ཀྱིན་ཡོད་ཅེས་དོན་གྱིས་ཁྱབ་བསྒྲགས་བྱས་པ་རེད། རང་གི་མདུན་ན་ཡོད་པའི་ཁང་པ་ཡང་མི་མཐོང་བའི་མི་ཞིག་གིས་ཐག་རིང་གི་སྤུ་ཉག་གསལ་བར་མཐོང་ཟེར་ན་གད་མོའི་གནས་ཁོ་ན་མ་ཡིན་ནམ། དེར་བརྟེན་ཁྱོད་ཀྱི་སྐད་ཆ་དེ་ངོམ་རིན་ཡོད་པ་ཞིག་གཏན་ནས་མིན། བརྗོད་རྒྱུ་མང་ཡང་དེ་ཙམ་བྱས།

འོ་ན་རི་མཚོ་གླིང་སོགས་ཀྱི་རྣམ་གཞག་གསུངས་པ་རྣམས་ཇི་ལྟར་བྱ་སྙམ་ན། སངས་རྒྱས་ཀྱིས་སྤྱིར་འཇིག་རྟེན་གྱི་བཀོད་པ་མ་ངེས་པ་སྣ་ཚོགས་གསུངས་ཡོད་ཅེས་པ་ནི་ཡོངས་སུ་གྲགས་མོད། དེང་དཔེ་མཚོན་དུ་བཞག་ན། མཛོད་ལས་བསྟན་པའི་འཇིག་རྟེན་རྣམ་གཞག་རྣམས་ཚན་རིག་པས་བལྟས་སྐབས་མ་མཐོང་བར་བརྟེན་མང་པོ་ཞིག་གིས། ཁ་ཐུག་མ་བཤད་ཀྱང་དོན་དུ་དེ་ནི་སངས་རྒྱས་ཀྱིས་དངོས་ཡོད་གནས་ཚུལ་མ་རྟོགས་པར་བརྫུན་གསུངས་འདུག་བསམ་གྱིན་ཡོད་ལ་དེ་ལྟར་དངོས་སུ་བརྗོད་མ་ཕོད་ཀྱང་དོན་དུ་༼དངོས་ཡོད་གནས་ཚུལ་དང་བདེན་པ་བཤད་མཁན་གང་ནས་བྱུང་ཡང༌། དེ་ངེས་པར་དུ་དང་ལེན་བྱ་དགོས།༽ཞེས་སོགས་ཀྱི་ཚིག་ཟུར་ནས་འཐོན་པ་རེད།  འདི་ལ་ཕྱོགས་གཉིས་ནས་འགྲེལ་བསམ་བྱར་ཡོད་པ་ཞིག་སྟེ། དང་པོ་སྒྲུབ་ཕྱོགས་ནས་བཤད་ན་སངས་རྒྱས་ཀྱིས་དེ་ལྟར་གསུངས་པ་ནི་དེའི་ཚེ་དེའི་དུས་ཀྱི་བཀོད་པ་ལ་བསམ་ནས་དེའི་ཚེ་དེའི་དུས་ཀྱི་གདུལ་བྱ་རྣམས་ལ་གསུངས་པ་ལས། གང་གསུངས་པའི་བཀོད་དབྱིབས་དེ་དག་ལ་འགྱུར་བ་འགྲོ་མི་སྲིད་ཅེས་གསུངས་མེད། ད་དུང་མི་རྟག་པའི་རྣམ་གཞག་རྒྱ་ཆེར་གསུངས་པས་དོན་གྱིས་འགྱུར་བ་འགྲོ་ངེས་པར་ཞལ་གྱིས་བཞེས་ཤིང་མ་ཟད་དེ་དག་གི་རྒྱུ་སེམས་ཅན་གྱི་ལས་ལའང་གྱུར་བ་ཤིན་ཏུ་ཆེན་པོ་འགྲོ་བཞིན་པ་མངོན་སུམ་ཡིན་པས་སོ།། དཔེར་ན་སངས་རྒྱས་ཀྱིས་སངས་རྒྱས་ཟིན་པའི་རྗེས་སུ། སུ་ལ་བསྟན་ཀྱང་གོ་བར་མི་འདུག་པས། །མི་སྨྲ་ནགས་འདབས་ཉིད་དུ་གནས་པར་བྱ། །ཞེས་གསུངས་ནས་རྡོ་རྗེ་གདན་རང་དུ་ཞག་བདུན་ཕྲག་བདུན་བཞུགས་པ་རེད། ལུང་འདིས་དེའི་ཚེ་བྱང་ཆུབ་ཤིང་ཡོད་སའི་ས་ཆ་འདི་ནགས་ཚལ་ཞིག་ཡིན་པ་གསལ་པོར་བསྟན་ཀྱང་གྲོང་འཁྱེར་ཆུང་ཆུང་ཞིག་ཆགས་ཟིན། དེང་སང་ཚན་རིག་པས་འཕྲུལ་ཆས་འབུམ་ཕྲག་བཙུགས། གནམ་བསྐོར་ས་བསྐོར་ཁྲི་ཕྲག་ནས་ཁྲི་ཕྲག་བྱས་ནའང་གནས་དེར་ནགས་ཚལ་མཐོང་མི་སྲིད། དེ་ལ་ཁྱོད་ཚོས་འགྲེལ་བཤད་ཇི་ལྟར་བྱེད། དེ་བཞིན་ལོ་རྒྱུས་ནང་རྒྱ་གར་གྱི་གྲོང་ཁྱེར་ཆེན་པོ་དྲུག་ཅེས་གསུངས་པའང་ལོ་རྒྱུས་རྩོམ་པ་པོ་དང་ལོ་རྒྱུས་དེ་ཀུན་རྗེས་ལུས་རེད་ནོར་འདུག་ཅེས་སྨྲ་ནུས་སམ། གང་ཡིན་ཟེར་ན་དེང་སང་རྒྱ་གར་གྱི་གྲོང་ཁྱེར་ཆེན་པོ་བཞི་པོ་དང་མཉམ་བསྡུར་ཞིག་མཛོད་དང༌། དཔེ་མཚོན་ཙམ་ཡིན།

གཉིས་པ་དགག་ཕྱོགས་ནས་བཤད་ན། ང་ཚོས་དེང་སང་མཐོང་མི་ཐུབ་པས་སྔོན་ཆད་ཀྱང་དེ་ལྟར་མ་རེད་ཟེར་ནམ་ཡང་མི་ཐུབ་ལ། སྔོན་དུས་དེ་འདྲ་ཡོད་ན་དེང་ཡང་དེ་འདྲ་ཡོད་དགོས་བསམ་པ་དང་དེང་སང་དེ་འདྲ་མེད་པ་ཅི་རེད་ཅེས་འདྲི་བ་འདོན་པ་ཆ་ཚང་བྱབ་ཆུང་རེད། ད་དུང་ཚན་རིག་པས་མ་མཐོང་བའི་རྒྱུ་མཚན་བཀོད་པའང་ཤིན་ཏུ་ཐ་ཆད་དེ། རིག་པའི་དབང་ཕྱུག་གིས། མ་མཐོང་ཕྱིར་ན་མེད་པ་མིན། །ཞེས་པའི་གནས་ཚུལ་འཇལ་བྱེད་ཀྱི་རིགས་པ་དེ་རྩོད་ར་གྲུ་བཞི་ཁོ་ནའི་ནང་ཁ་བདེ་པོ་ཆགས་པའི་ཆེད་གསུངས་པ་མ་རེད། ང་ཚོས་ཚན་རིག་རྒས་པོ་ཚོའི་རྩར་ཡང་རིགས་པ་འདི་བེད་སྤྱོད་གཏོང་དགོས། རྩོད་རའི་ནང་རྩོད་པ་ལྟར་ཐལ་ཐལ་ཕྱིར་ཕྱིར་ཟེར་དགོས་དོན་མེད། ཟེར་ནའང་གོ་ཐུབ་ཀྱི་ཨེ་ཡོད། དེ་བས་བགྲོ་གླེང་དང་དྲི་བ་དྲིས་ལན་གྱི་ཚུལ་དུ་གོ་བདེའི་ལམ་ནས་མི་སྣང་བ་མ་དམིགས་པའི་རིགས་ལམ་བེད་སྤྱོད་གཏོང་དགོས། དེ་ནི་ཡུལ་གྱི་གནས་ཚུལ་མངོན་སུམ་ཁོ་ནས་ནམ་ཡང་འཇལ་མི་ཐུབ་ཅེས་དན་རྟགས་བཏོན་བྱེད་ཅིག་རེད། དཔེར་ན། ཚན་རིག་རྒན་པོ་ཁོ་རང་ལ་སྤོ་བོ་དང་རྨོ་མོ་སོགས་ཡོད་མེད་སྐད་ཆ་དྲི་ན་ཁོ་སྨྱོན་པ་ཞིག་ཡིན་ན་མ་གཏོགས་ཡོད་ཅེས་ལན་བཏབ་ངེས། དེ་ནས། ཁྱེད་རང་ལ་ཡབ་མེས་དེ་དག་ཡོད་མ་རེད། ང་ཚོས་མཐོང་གི་མི་འདུག འོ་ན་ཁྱེད་ཚོས་འཕྲུལ་ཆས་རིན་ཐང་ཆེ་རིགས་ཆེ་ཚད་བེད་སྤྱད་ནས་ང་ཚོར་མངོན་སུམ་དུ་སྟོན་དང༌། དེ་མིན་ང་ཚོས་ཁས་ལེན་གྱི་མིན་སོགས་ཕྱེད་རྩེད་མོ་དང་ཕྱེད་གནད་རྩ་ལྡན་པའི་དྲི་བ་འདི་འདྲ་བཀོད་དགོས། དྲི་བ་གནད་བསྡུས་འདི་དག་ནང་པར་ཁས་འཆེ་བ་དེ་དག་ལའང་འདྲི་འདོད། དེ་མིན་སྐད་ཆ་བཤད་སྐབས་རང་ཉིད་ཀྱི་གནས་བབ་ངོས་ཟིན་ཐོག་རང་ཉིད་ཀྱི་བརྗོད་རྒྱུའི་ཚིག་ཚུན་ཆད་ལ་དོ་སྣང་བྱེད་དགོས། གོང་ས་མཆོག་གིས་མངོན་པ་མཛོད་ནས་འཇིག་རྟེན་བསྟན་པའི་ལེའུའི་བསྐོར་གསུངས་པ་དེ་དག་ཀྱང་བདག་ཅག་གི་སྟོན་པ་ལྟར་ཐབས་མཁས་ཐུགས་རྗེ་གནང་བ་མ་གཏོགས་སངས་རྒྱས་དང་སངས་རྒྱས་གཉིས་པས་ཡུལ་གྱི་གནས་ཚུལ་ལ་འཁྱོག་བརྗོད་གནང་འདུག་ཅེས་ནམ་ཡང་གསུངས་མི་སྲིད། དེ་ནི་ཚན་རིག་དང་ནང་ཆོས་གཉིས་མཉམ་བགྲོད་བྱེད་ཐུབ་ན་གཅིག་ཕན་གཅིག་གྲོགས་ཀྱིས་སེམས་ཅན་ལ་ཕན་བདེ་བསྐྲུན་ཐུབ་པས་ན་ཚན་རིག་པ་རྣམས་དགའ་མགུ་བསྐྱེད་པ་དང་ང་རང་ཚོས་ཚན་རིག་ལ་དོ་སྣང་བྱ་ཕྱིར་གསུངས་པར་འདོད་ལ་སྐྱོན་སྤོང་ཇི་ལྟར་བྱ་དགོས་པའི་སྔོན་བརྡ་ཙམ་ཞིག་ཏུ་ཟད། དེར་བརྟེན་ཚང་མས་ཁོང་ལྟ་བུའི་རྣམ་དཔྱོད་ཡོད་མདོག་མདོག་བྱས་ནས་འདྲ་མིན་བཤད་པ་ཡིན་ན་དེ་ནི་རང་མཚང་ཕྱི་ལ་བཏོན་པ་མ་ཟད་སྤྱི་ཚོགས་ལ་འགན་མ་འཁུར་བར་ངོས་འཛིན་བྱ་རྒྱུ་ཡིན།  དེར་བརྟེན་སོ་སོའི་བསམ་ཚུལ་ཡིན་ནའང་རྒྱུ་མཚན་རྣམ་དག་ཡོད་པ་ཞིག་དང་ངེས་ཤེས་ཡོད་པ་ཞིག་བཤད་དགོས་ཀྱི་འཁྱོག་བརྗོད་དང་ལོག་བཤད་གང་དྲན་ཆ་ཚང་བརྗོད་ག་ལ་རུང༌། ད་དུང་ཚགས་ཤོག་ནང་ལ་དེ་བས་མི་རུང༌། ཁྱོད་ཀྱི་བསམ་ཚུལ་དེ་ལོག་བཤད་ཡིན་པ་ནི་ངས་གོང་དུ་བློ་སྐྱེད་ཕུལ་བ་དེས་ཤེས་མི་ནུས་སམ། ནང་ཆོས་ནས་གསུངས་པ་དེ་དག་ལ་འགྲེལ་བཤད་རྒྱག་རྒྱུ་མེད་ན་གནས་ཚུལ་ཁག་ཁག་རེད་ནོར་འདུག་ཟེར་ནའང་ཆོག་མོད། གོང་སོང་ལྟར་འགྲེལ་བཤད་རྒྱག་རྒྱུ་ཡོད་པ་ལ་ཡོད་པར་ངོ་སྤྲོད་ན་ནང་པའི་གཟི་བརྗིད་ཡིན། འགྲེལ་བཤད་རྒྱག་རྒྱུ་ཡོད་ནའང་ང་ཚོས་ནོར་བར་ཁས་ལེན་དགོས་དོན་མེད་ལ། ཡོད་ཚད་ཚན་རིག་དབང་བཙན་པ་བྱ་དགོས་དོན་ཡང་མེད། ཁོ་ཚོའང་མི་ཡིན་པས་གོ་བརྡ་སྤྲོད་ལོས་ཆོག

ཡང་སྙིང་འུ་ཅག་ཤཱཀྱའི་རྗེས་འཇུག་རྣམས་ཀྱིས་ནང་ཆོས་ལས་ནོར་ན་ནོར་བའི་རྒྱུ་མཚན་རྣམ་དག་མ་མཐོང་བཞིན་དུ་སྟོན་པ་དང་བསྟན་པའི་ནོར་འཁྲུལ་དུ་ཁས་ལེན་དགོས་དོན་ཅི། ད་ནི་ང་ཚོ་གནའ་དེང་ཤེས་ཡོན་ཟུང་འབྲེལ་གྱི་སྟོབས་ཤུགས་རྒྱས་བཞིན་པའི་གཞོན་སྐྱེས་ཚོས་རང་གི་ནང་ཆོས་དང་རང་གི་སྐད་ཡིག་རིག་གཞུང་ལ་སྟངས་འཛིན་ནན་པོ་བྱ་ཐུབ་དགོས་པ་ནི་ང་ཚོས་སློབ་སྦྱོང་དང་མཐོང་རྒྱ་བསྐྱེད་པའི་ཉིང་དགོས་ཡིན། གཞན་གྱི་ཟེར་ཚད་ལ་རྒྱུགས་དྲགས་ན་ནམ་ཞིག་ང་ཚོའི་མི་རིགས་འདི་གཞི་འཛིན་ས་མེད་པ་ཞིག་ཆགས་ངེས། གནས་ཚུལ་འདི་ལ་སུས་ཀྱང་མནོ་བསམ་ཞིབ་བཞེས་ཀྱི་རེ་བ་ཡོད།། །།