ཉེ་ལམ་རྒྱ་ནག་སྤྱི་བདེ་ཚན་པས་རྒྱ་ནག་ཧི་པེ་ཞིང་ཆེན་ཧྲི་ཅ་ཀྲཱོང་ས་ཁུལ་གྱི་ཆང་གསོལ་ཁང་དང་། མགྲོན་ཁང་སོགས་སུ་བོད་དང་ཡུ་གུར་མི་རིགས་ཀྱི་མགྲོན་པོར་སྣེ་ལེན་བྱ་མི་ཆོག་པའི་བཀའ་རྒྱ་བཏང་ཡོད་འདུག
ཧྥ་རན་སིའི་གསར་སྤེལ་ཁང་གིས་གནས་ཚུལ་སྤེལ་དོན་ལྟར་ན། རྒྱ་ནག་ཉེན་རྟོག་ཚན་པས་རྒྱ་ནག་ཧྲི་ཅ་ཀྲོང་གྲོང་ཁྱེར་གྱི་ཆང་གསོལ་ཁང་དང་གསོལ་མགྲོན་ཁང་སོགས་སུ་བོད་དང་ཡུ་གུར་མི་རིགས་གྱི་མགྲོན་པོ་སྣེ་ལེན་བྱེད་མི་ཆོག་པའི་བཀའ་རྒྱ་བཏང་པར་བརྟེན། ད་ལྟ་གྲོང་ཁྱེར་དེའི་གསོལ་མགྲོན་ཁང་དག་གིས་བོད་དང་ཡུ་གུར་མི་རིགས་ཡིན་པའི་མགྲོན་པོ་རྣམས་ལ་སྣེ་ལེན་བྱེད་ཀྱིན་ཡོད་ཚོད་མི་འདུག་ལ། གསར་སྤེལ་ཁང་གི་གསར་འགོད་པས་ས་གནས་དེ་གའི་ཉེན་རྟོག་ལས་ཁུངས་སུ་ཁ་པར་བརྒྱུད་གནས་ཚུལ་དེའི་ཐད་སྐད་ཆ་དྲིས་པར། མིང་བརྗོད་མི་འདོད་པའི་ཉེན་རྟོག་པ་ཞིག་གིས། ཁྲིམས་མཐུན་སྤྱི་དམངས་ཡིན་ཞིང་མི་སེར་ཐོབ་ཐང་ལག་ཁྱེར་ཡོད་ན་བསྡད་ཆོག་ཚུལ་དང་། གནད་དོན་དེའི་དམིགས་བསལ་གྱི་རེ་བ་ནན་མོ་བཏོན་མེད་ལུགས་བརྗོད་ཡོད་འདུག
ཡིན་ནའང་། གསར་འགོད་པས་ཁ་པར་བརྒྱུད་གྲོང་ཁྱེར་དེའི་གསོལ་མགྲོན་ཁང་ཞིག་གི་མི་སྣར་སྐད་ཆ་དྲིས་པར། ཉེ་སྔོན་ཉེན་རྟོག་པ་ཡོང་ནས་བོད་དང་ཡུ་གུར་མི་རིགས་ལ་སྣེ་ལེན་བྱ་མི་ཆོག་པའི་བཀའ་རྒྱ་དངོས་སུ་བཏང་བྱུང་ཞེས་བརྗོད་ཡོད་འདུག གཞན་ཡང་། སྔར་ལོའི་པེ་ཅིན་ཨོ་རྩེད་ཀྱི་སྐབས་སུའང་། དེ་མཚུངས་ཀྱི་གསལ་བཀའ་རྒྱའི་བརྡ་སྦྱོར་སྤེལ་ཡོད་པར་བརྟེན། པེ་ཅིན་ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་དཔོན་ཆེན་མོ་གཞོན་པ་ཡིས་ལིས་ཧཱ་མའོ་སོགས་འགྲོ་བ་མིའི་ཐོབ་ཐང་དོན་གཉེར་ཅན་དག་གིས་ངོ་རྒོལ་བྱས་ཡོད་ལ། ཡིས་ལིས་ཧཱ་མའོ་མཆོག་ ༧་༥ ཤིན་ཅང་གི་ཞི་བའི་གྱེན་ཡངས་དང་འབྲེལ་བ་ཡོད་ཚུལ་བརྗོད་དེ་ད་ལྟ་བཙོན་འཇུག་བཀག་སྡོམ་བྱས་ཡོད་པ་རེད།
