བོད་ནང་གི་གནས་སྟངས་ནི་མུ་མཐུད་ནས་འཇིགས་སྣང་ཅན་ཞིག་རེད།

ཟླ་འདིའི་ཚེས་ ༢ ཉིན་སུད་སིའི་ཆ་འཕྲིན་ལྟེ་གནས་ཀྱིས་༧གོང་ས་མཆོག་གི་ཡུ་རོབ་སྐུ་ཚབ་སྐལ་བཟང་རྒྱལ་མཚན་མཆོག་ལ་ཉེ་ཆར་༧གོང་ས་མཆོག་ལ་སུད་སིའི་གཞུང་འབྲེལ་མི་སྣ་དག་གིས་མཇལ་འཕྲད་གནང་རྒྱུ་མིན་སྐོར་ཐག་གཅོད་གནང་བའི་ཐད་ལ་དགོངས་ཚུལ་ཅི་ཡོད་སོགས་ཀྱི་བཅར་འདྲི་ཞུས་ཡོད་པ་རེད།

སུད་སིའི་ཆ་འཕྲིན། ཐེངས་འདིར་༧གོང་ས་མཆོག་སུད་སིར་ཆིབས་བསྒྱུར་སྐབས་སུད་སིའི་གཞུང་འབྲེལ་མི་སྣ་ཁག་ཁོང་ལ་མཇལ་རྒྱུ་མིན་པའི་ཐག་གཅོད་གནང་ཡོད་པའི་ཐད་ཁྱེད་རང་ལ་དགོངས་ཚུལ་ཅི་བྱུང་།

སྐལ་བཟང་རྒྱལ་མཚན། ༧གོང་ས་མཆོག་གིས་ག་དུས་ཡིན་ནའང་མགྲོན་འབོད་གནང་མཁན་གྱི་རྒྱལ་ཁབ་དེར་དཀའ་ངལ་སྤྲོད་རྒྱུའི་ཐུགས་འདུན་ཡོད་པ་མ་རེད། གཞུང་ཁ་ཤས་ཀྱིས་༧གོང་ས་མཆོག་ལ་གཞུང་འབྲེལ་གྱི་མཇལ་འཕྲད་མ་གནང་ཡང་གནད་འགག་ཆེན་པོ་མ་རེད། འོན་ཀྱང་གུས་པ་སུད་སིའི་བོད་པ་ཞིག་ཡིན་པའི་ཆ་ནས་ད་ཐེངས་ཀྱི་སུད་སིའི་གཞུང་ཕྱོགས་ཀྱི་ཐག་གཅོད་ལ་བློ་ཕམ་ཆེན་པོ་བྱུང། འདི་ནི་ཕན་ཐོགས་ཡོད་པ་ཞིག་མ་རེད། གང་ཡིན་ཟེར་ན། དེས་རྒྱ་ནག་གི་དཔོན་རིགས་ཚོར་བོད་དང་གྲངས་ཉུང་མི་རིགས་ཀྱི་ཐོག་ཏུ་འཛིན་པའི་སྲིད་ཇུས་ལ་བསམ་བློ་བསྐྱར་དུ་གཏོང་དགོས་པའི་གོ་བརྡ་ཅི་ཡང་གཏོང་ཐུབ་མེད་པས་རེད། ང་རང་གི་ཡིད་ཆེས་ནི་རྒྱལ་སྤྱིའི་སྤྱི་ཚོགས་ཀྱིས་ངེས་པར་དུ་རྒྱ་ནག་གཞུང་ལ་བོད་དོན་གྱི་དཀའ་རྙོག་འདི་མཉའ་གནོན་གྱི་འོག་ནས་མིན་པར་འབྲེལ་མོལ་དང་གྲོལ་མོལ་གྱི་ལམ་ནས་སེལ་དགོས་པའི་གསལ་བཤད་བྱེད་དགོས་པ་དེ་ཡིན། ང་རང་སུད་སིའི་བོད་པ་ཞིག་གི་ངོས་ནས་བཤད་ན། ཐེངས་འདིའི་ཐག་གཅོད་དེའང་སུད་སི་གཞུང་གི་འདོད་འདུན་མ་རེད། གང་ཡིན་ཟེར་ན། སུད་སི་ནི་མི་རིགས་ཀྱི་ཆེ་མཐོང་དང་། རང་དབང་དང་དམངས་གཙོ་སོགས་ཀྱི་ཐོག་ལ་མཛད་རྗེས་མང་པོ་བཞག་མྱོང་བའི་གྲགས་ཅན་གྱི་རྒྱལ་ཁབ་ཞིག་ཡིན་པས། ༸གོང་ས་མཆོག་དང་གཞུང་འབྲེལ་མཇལ་མོལ་མི་གནང་རྒྱུ་དེ་ནི་ངའི་བསམ་པར་རྒྱལ་སྤྱིའི་སྤྱི་ཚོགས་ཀྱི་མདུན་དུ་ཁོང་ཚོའི་མཚན་མཐོང་ལ་ཕལ་ཆེར་གནོད་སྐྱོན་ཕོག་སྲིད་པ་ཞིག་རེད།

སུད་སིའི་ཆ་འཕྲིན། ༧གོང་ས་མཆོག་གིས་དབུ་འཁྲིད་པའི་བཙན་བྱོལ་བོད་གཞུང་དང་རྒྱ་ནག་གཞུང་བར་ལ་སླར་ཡང་འབྲེལ་མོལ་ཡོང་བར་ཐབས་ལམ་གང་ཡོད་པ་རེད།
སྐལ་བཟང་རྒྱལ་མཚན། ༧གོང་ས་མཆོག་གིས་དབུ་འཁྲིད་པའི་བཙན་བྱོལ་གཞུང་གི་ལངས་ཕྱོགས་ལ་ནམ་ཡང་འགྱུར་བ་ཡོད་པ་མ་རེད། ང་ཚོས་དུས་ཀུན་ཏུ་རྒྱ་ནག་སྐམ་ས་ཆེན་མོའི་ནང་དུ་མཉམ་གནས་ཐོག ཚད་མཐོའི་རང་སྲིད་རང་སྐྱོང་ལ་ལོངས་སྤྱོད་རྒྱུར་དགོས་འདུན་འདོན་གྱིན་ཡོད། རྒྱ་ནག་གཞུང་ཕྱོགས་ནས་ཤེས་དགོས་པ་ཞིག་ནི་བོད་ནང་གི་གནད་དོན་དང་འབྲེལ་བའི་ཐོག་དུས་ནམ་ཞིག་གྲོས་མོལ་བྱེད་འདོད་ཡོད་ན། ང་ཚོའི་ཕྱོགས་ནས་འབྲེལ་མོལ་ཞུ་རྒྱུར་གྲ་སྒྲིག་ཡོད། ང་ཚོས་ད་ལྟའི་ཆར་རྒྱ་ཕྱོགས་ནས་བརྡ་ལན་བཟང་པོ་ཞིག་ཡོང་རྒྱུར་ངང་སྒུག་བྱེད་བཞིན་ཡོད།

སུད་སིའི་ཆ་འཕྲིན། ཁྱེད་རང་གིས་ད་ལྟའི་བོད་ནང་གི་གནས་སྟངས་ཐད་ག་རེ་གོ་གི་འདུག
སྐལ་བཟང་རྒྱལ་མཚན། བོད་ནང་གི་གནས་སྟངས་ནི་མུ་མཐུད་ནས་འཇིགས་སྣང་ཅན་ཞིག་རེད། བོད་ནང་གི་ཕྱོགས་མཐའ་ཀུན་དུ་དམག་མི་སྤོར་འཇོག་གིས་གང་སར་དམ་དྲག་ཤུགས་ཆེ་ཡོད་པས་ཡུལ་སྐོར་བ་ཚོ་དང་ཕྱི་མི་འགྲུལ་བསྐྱོད་བྱེད་ཆོག་གི་མེད། ཉིན་རེ་བཞིན་བོད་མི་ཚོ་འཛིན་བཟུང་གིས་ཁྲིམས་ཐག་ལྗིད་མོ་དག་གཅོད་ཀྱིན་པ་གོ་ཐོས་བྱུང་། ཉེ་ཆར་གྱི་གནས་ཚུལ་ལ་ལྟར་ན། ཉེ་ཆར་རྒྱ་གཞུང་གིས་གྲོང་གསེབ་ཀྱིས་གཙོས་པའི་ས་གནས་དག་ལ་པར་ཆས་བཙུགས་ནས་མང་ཚོགས་ཀྱི་བྱ་འགུལ་ལ་སོ་མྱུལ་བྱེད་ཀྱིན་ཡོད་པ་དང། ས་ཆ་འགའ་ཞིག་ཏུ་ས་གནས་གཅིག་ནས་གཞན་དུ་འགྲོ་བསྐྱོད་བྱེད་པར་དགོངས་འཁྲོལ་ཞུ་དགོས་ཀྱི་ཡོད་འདུག

སུད་སིའི་ཆ་འཕྲིན། ༧གོང་ས་མཆོག་གི་སྐུ་ནའི་བབ་ཀྱི་དབང་གིས་ཁོང་གི་རྗེས་འཇུག་པའི་སྐོར་གྱི་གནད་དོན་དེ་ཚོར་ཤུགས་རྣོ་བ་ཞིག་ཏུ་འགྱུར་གྱིན་ཡོད་པ་རེད། གལ་སྲིད་ཁོང་མ་བཞུགས་ཚེ་ཁྱེད་རང་ལ་མ་འོངས་པའི་བོད་ཐོག་ཏུ་སེམས་འཁུར་གང་ཡོད།
སྐལ་བཟངརྒྱལ་མཚན། གལ་སྲིད་ཁོང་མི་བཞུགས་པའི་དུས་ཤིག་ཤར་ཚེ་དེ་ནི་བོད་མི་རིགས་ལ་མཚོན་ན་གྱོང་ཆེན་པོ་ཞིག་རེད། འདི་ལ་དོགས་པ་ཡོད་པ་མ་རེད། ༧གོང་ས་མཆོག་དང་བཙན་བྱོལ་བོད་གཞུང་གིས་མ་འོངས་པའི་དོན་དུ་ད་ལྟ་ནས་སྒྲིག་འཛུགས་ཁག་དང། སྤྱི་ཚོགས་དེ་ཡང་དག་པའི་མང་གཙོ་ཅན་དུ་བཟོ་བསྐྲུན་བྱ་བར་འབད་པ་ཧུར་བསྐྱེད་བྱེད་མུས་སུ་རེད། སྤྱིར་མ་འོངས་པའི་གནད་དོན་དེ་མི་སྒེེར་བ་གཅིག་ལ་བརྟེན་མེད་པར་བོད་མི་མི་རེ་ངོ་རེས་འགན་འཁུར་དགོས་པ་ཞིག་ཡིན། ༢༠༠༡ ལོ་ནས་བཟུང་ང་ཚོས་འོས་ཤོག་གི་ལམ་ནས་རང་གི་ཆབ་སྲིད་ཀྱི་དབུ་ཁྲིད་དེ་འདེམས་བསྒྲུགས་བྱེད་ཀྱིན་ཡོད་པས། ངའི་བསམ་པར་ང་ཚོར་ཚད་ལྡན་གྱི་མང་གཙོ་ཞིག་ཡོད་དྲན་གྱི་ཡོད་ལ། ༸གོང་ས་མཆོག་ལ་ཆ་མཚོན་ནའང་སྐུ་ཁམས་གསལ་ཐང་ཡིན་པས། ཁོང་ཉིད་མ་མཐའ་ཡང་རྒྱ་ནག་དམར་ཤོག་ཚོགས་པའི་གནས་ཡུན་ལས་ལྷག་པ་ཞིག་འཚོ་བཞུགས་གནང་རྒྱུར་ང་ཚོར་བློ་ཐག་ཆོད་པོའི་ཡིད་ཆེས་ཡོད།

སུད་སིའི་ཆ་འཕྲིན། ༡༩༦༣ ལོར་ཁྱེད་རང་དགུང་ལོ་ ༡༡ ཡིན་པ་དང། ཁྱེད་རང་གིས་གཙོས་པའི་བོད་ཕྲུག་དྭ་ཕྲུག་རྣམས་ལ་སུད་སིའི་གཞུང་ནས་སྐྱབས་བཅོལ་བའི་ལག་འཁྱེར་སྤྲད་ནས་ད་བར་ལོ་ངོ་ ༤༠ ལྷག་ཙམ་འདིར་བཞུགས་པ་རེད། དེ་འདྲ་ཡིན་དུས་ཁྱེད་རང་སུད་སི་དང་བོད་གཉིས་ལ་འབྲེལ་ལམ་གང་འདྲ་ཡོད།
སྐལ་བཟང་རྒྱལ་མཚན། སུད་སིའི་གཞུང་ནས་ང་ལ་འཚོ་བ་སྐྱེལ་ཡུལ་གཉིས་པ་ཞིག་སྤྲད་པ་རེད། ང་ལ་མཚོན་ན་ཁོང་ཚོ་ནི་ཞེ་དྲག་གི་བཀའ་དྲིན་ཆེན་པོ་ཡིན། སུད་སི་ནི་རང་དབང་དང་མང་གཙོའི་ལོ་རྒྱུས་ཡུན་རིང་ལྡན་ཞིང་མི་རིགས་ལ་ཆེ་མཐོང་སྤྲོད་པའི་གོམས་སྲོལ་བཟང་པོ་ཞིག་ཡོད་པས། དེས་ངའི་དམིགས་ཡུལ་དང་ངའི་བརྩི་མཐོང་ལ་ཤུགས་རྐྱེན་ཆེན་པོ་སྤྲད་ཡོད་པ་དང། སྤྱིར་ང་སུད་སིར་འཚར་ལོངས་བྱུང་ཡང། གཙོ་བོ་བོད་མིའི་སྤྱི་ཚོགས་ནང་དུ་འཚོ་བ་སྐྱེལ་བ་དང་ལྷག་པར་དུ་ང་ལ་བོད་ཀྱི་ནང་ཆོས་དང། སྐད་ཡིག ལོ་རྒྱུས་བསླབ་མཁན་གྱི་ཆོས་དགེ་ཞིག་ཀྱང་ཡོད་པས། ནང་ཆོས་ཀྱི་ལྟ་གྲུབ་དང་དེའི་རིན་ཐང་དེ་ནི་ངའི་མི་ཚེའི་ནང་ཆེས་མེད་དུ་མི་རུང་བའི་ཆ་ཤས་ཤིག་ཡིན། དེ་བཞིན་དུ་སུད་བོད་གཉིས་ཀྱི་ཐུན་མོང་གི་འདྲ་ཡུལ་ནི་ཚོར་བ་དང་བསམ་བློ་གཏོང་ཕྱོགས་ཀྱི་ཐད་ནས་རེད་འདུག དཔེར་ན། ཡུལ་མི་གཉིས་པོས་སོ་སོ་མཐོ་སྒང་གི་མི་རིགས་ཤིག་ཡིན་པའི་ཚོར་བ་རྣོན་པོ་ཡོད་པ་དང། རྒྱལ་ཁབ་ཆུང་ཆུང་ཡིན་པ་དང་ཁྱིམ་མཚེས་རྒྱལ་ཁབ་ཆེན་པོ་རེའི་བར་དུ་ཡོད་པའི་རྒྱུ་མཚན་གྱིས་རང་ཉིད་ལ་ཐུན་མིན་གྱི་ངོས་འཛིན་ཞིག་ཡོད་པར་སྤོབས་སེམས་སྐྱེ་བ་སོགས་རེད། ང་ལ་སུད་སི་ནི་རང་གི་ཕ་ཡུལ་ཡིན་པ་དང་ཧ་ཅང་གི་བདེ་འཇགས་ཀྱི་ཚོར་སྣང་ཞིག་འདུག ངའི་བྱིས་པ་ཚོ་འདིར་སྐྱེས་ཤིང་འདི་ནས་སློབ་གྲྭར་ཕྱིན་པ་རེད། སུད་སི་ནི་དོན་ངོ་མར་བཤད་ན་ངའི་ཕ་ཡུལ་གཉིས་པ་དེ་ཡིན།

གསར་འགོད་པ། ནོར་བུ་ཚེ་རིང་གིས་ཕབ་སྒྱུར་བྱས།