ལྕགས་ལམ་བཟོ་འཆར།

མཚོ་སྔོན་རྒྱ་ཡིག་དྲ་བའི་ཐོག་གནས་ཚུལ་ཐོན་པ་ལྟར་ན། ད་ལོའི་ལོ་མཇུག་ཙམ་ལ་མཚོ་སྔོན་ན་གོར་མོ་ནས་ཀན་སུའུ་ཏུན་ཧོང་བར་མེ་འཁོར་ལྕགས་ལམ་བཟོ་སྐྲུན་བྱ་འཆར་ཡོད་པ་དང་། ལས་གཞི་དེའི་སྔོན་འགྲོའི་གྲ་སྒྲིག་དང་འཆར་འགོད་ཀྱི་རིམ་པ་སྔར་ནས་མགོ་འཛུགས་བྱས་ཟིན་ཡོད་འདུག ལས་གཞི་དེ་ནི་རྒྱ་ནག་དབུས་བཅོས་བསྒྱུར་གོང་སྤེལ་ལས་ཁུངས་ཀྱི་ཆོག་མཆན་དང་། མཚོ་སྔོན་ཞིང་ཆེན་བཅོས་བསྒྱུར་གོང་སྤེལ་ལས་ཁུངས་ཀྱི་བཀའ་རྒྱའི་འོག་གི་ལས་གཞི་གལ་ཆེན་གྲས་ཡིན་སྐོར་བཀོད་འདུག ན་གོར་མོ་ནས་ཏུན་ཧོང་བར་གྱི་ལྕགས་ལམ་དེའི་སྤྱིའི་རིང་ཚད་ལ་སྤྱི་ལེ་ ༤༦༨ ལྷག་ཡིན་པ་དང་། དེས་མཚོ་སྔོན་མངའ་ཁོངས་ཀྱི་སྤྱི་ལེ་ ༢༣༥ ལྷག་དང་ཀན་སུའུ་མངའ་ཁོངས་ཀྱི་སྤྱི་ལེ་ ༢༢༨ ལྷག་ཟིན་གྱིན་ཡོད་འདུག ལྕགས་ལམ་གྱི་འཆར་འགོད་རིམ་པ་ནི་རྒྱ་ནག་གི་ལྕགས་ལམ་འཆར་འགོད་རིམ་པ་དང་པོའི་གྲས་ཡིན་པ་དང་། ད་ལྟའི་འཆར་གཞི་ལྟར་ན་མེ་འཁོར་གྱི་མགྱོགས་ཚད། དུས་ཚོད་རེར་སྤྱི་ལེ་ ༡༦༠ ཙམ་ལ་རྒྱུགས་ཐུབ་པའི་སྔོན་རྩིས་བརྒྱབས་ཡོད་འདུག ལས་གཞི་དེར་སྤྱིའི་མ་དངུལ་རྒྱ་སྒོར་དུང་ཕྱུར་བརྒྱ་དང་བཞི་  ༡༠༤ གཏོང་རྒྱུ་ཡིན་འདུག