ཟླ་འདིའི་ཚེས་ ༣༠ ཉིན་ཧྥ་རན་སིའི་གྲོས་ཚོགས་འཐུས་མི་ ༥ ལས་གྲུབ་པའི་སྐུ་ཚབ་ཚོགས་ཆུང་ཞིག་བཞུགས་སྒར་དྷ་རམ་ས་ལར་ཆེད་བཅར་གྱིས་བོད་མིའི་དབུ་ཁྲིད་༧གོང་ས་མཆོག་ལའང་མཇལ་འཕྲད་ཞུ་འཆར་ཡོད་འདུག ཐེངས་འདིའི་སྐུ་ཚབ་ཚོགས་ཆུང་དེའི་སྣེ་ཁྲིད་པ་ནི། ཧྥ་རན་སའི་ཤར་ཕྱོགས་ཧྥ་རན་ཆི་ཀོམ་ཊི་Franche Comti མངའ་སྡེའི་བློན་ཆེན་ཇིན་ཧྥ་རན་ཀོས་ཧམ་བྷར་ཊ་ Jean Francois Humbert མཆོག་ཡིན་ཞིང་། ཁོང་ ༡༩༩༨ ལོའི་ཟླ་ ༩ བར་གྲོས་ཚོགས་འཐུས་མིར་འོས་འདེམས་དང་། ༢༠༠༨ འོས་འདེམས་ཁྲོད་སླར་ཡང་བདམས་ཐོན་བྱུང་བ་ཞིག་ཡིན་འདུག ཕྱི་ལོ་ ༢༠༠༥ ལོར་ཁོང་བཞུགས་སྒར་དུ་ཐོག་མར་གཞུང་འབྲེལ་གཟིགས་སྐོར་དུ་ཕེབས་ཡོད་པ་དང་། ཐེངས་འདི་ནི་གཟིགས་སྐོར་གཉིས་པ་དེ་ཆགས་ཡོད་འདུག
ཐེངས་འདིའི་ཧྥ་རན་སིའི་གྲོས་ཚོགས་འཐུས་མིའི་སྐུ་ཚབ་ཚོགས་ཆུང་དེའི་ཁྲོད་སྤྱི་ཚོགས་སྡེ་ཚན་དང་བོད་དོན་དྲིལ་བསྒྲགས་སྡེ་ཚན་བཅས་ཀྱི་འཐུས་མི་ཡོད་འདུག་ལ། ཁོང་ཚོ་དང་མཉམ་དུ་ཧྥ་རན་སིའི་བོད་གཞུང་སྐུ་ཚབ་དོན་གཅོད་ཁང་གི་དྲུང་ཆེ་དབང་བོ་ལགས་ཀྱང་ཕྱག་རོགས་སུ་བཅར་རྒྱུ་ཡིན་འདུག ཉིན་བདུན་རིང་གི་གཟིགས་སྐོར་སྐབས། ༸རྒྱལ་དབང་ཀརྨ་པ་མཆོག་དང་བཀའ་ཁྲི་ཟམ་གདོང་རིན་པོ་ཆེ། བོད་གཞུང་གི་ལས་ཁུངས་ཁག་དང་སྤྱི་འཐུས་གྲོས་ཚོགས། གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་བཅས་ལ་མཇལ་འཕྲད་གནང་རྒྱུ་ཡིན་པ་མ་ཟད། བཞུགས་སྒར་ཁུལ་གྱི་བོད་ཀྱི་ཆོས་རིག་བསྟི་གནས་ཁང་དང་། སློབ་གྲྭ་ཁག་ཅིག་ཏུའང་ཕེབས་འཆར་ཡོད་འདུག
