བཀའ་ཁྲིའི་འོས་གཞིའི་སྐོར་གྱི་བསམ་ཚུལ། གནམ་ལྕགས།

གནམ་ལྕགས་ཀྱིས་སྤེལ།

     དེང་སང་བཙན་བྱོལ་སྤྱི་ཚོགས་ཁྲོད་ཉིས་སྟོང་བཅུ་གཅིག་གི་བཀའ་བློན་ཁྲི་བའི་སྐོར་གྱི་ཟང་ཟིང་དུ་གྱུར་བའི་སྐབས་འདིར། མི་མང་བོ་ཞིག་གིས་བཀའ་ཁྲིའི་སྐོར་གྱི་བསམ་ཚུལ་དང་རྩོམ་ཡིག་སྤེལ་གྱིན་འདུག་ལ། དེའི་ཁྲོད་དུ་བཀའ་ཁྲིའི་འོས་གཞི་ཡང་མང་བོ་ཞིག་ཐོན་བཞིན་ཡོད། ངས་དེ་དག་ལས་འོས་གཞི་བདམས་པའི་བསམ་ཚུལ་རིགས་གསུམ་དུ་བགར་ཏེ་བརྗོད་པར་འདོད་ལ། དེའི་ཁྲོད་ནས་རང་གིས་མཐོང་བའི་འོས་གཞི་དེ་ཡང་དམིགས་བཀར་གྱིས་བརྗོད་འདོད་བྱུང༌།
 
                     གཅིག དད་པའི་རྗེས་སུ་འབྲངས་པའི་མང་ཚོགས་དང་བཀའ་ཁྲིའི་འོས་གཞི།

མི་མང་བོ་ཞིག་གིས་དེང་གི་ལས་ཐོགས་བཀའ་ཁྲི་མཁས་དབང་ཟམ་གདོང་རིན་པོ་ཆེ་མཆོག་བསྐྱར་དུ་འདེབས་དགོས་པ་དང༌། ཁོང་མ་ཕེབས་པ་ཡིན་ན་འདས་པའི་ལོ་ངོ་བཅུའི་རིང་གི་གྲུབ་འབྲས་དག་ཆུ་ལ་སྐྱུར་བ་འདྲ་བའི་སྐད་ཆ་བཤད་ཀྱིན་འདུག ད་དུང་རང་རེའི་གཞུང་གི་བཀའ་ཁྲི་འོས་འདེམས་ཀྱི་ལམ་ལུགས་ལའང་རང་གི་དད་པ་དང་དག་སྣང་གིས་བརྩི་བཀུར་མ་བྱས་ཀྱང་མི་སྐྱོན་པའི་བསམ་ཚུལ་འཛིན་གྱིན་ཡོད། དེའི་རིགས་ནི་སྐྱ་སེར་གཉིས་ཀྱི་ཁྲོད་དུ་ཡོད་ལ། འདི་ནི་མཁས་དབང་ཟམ་གདོང་བསྐྱར་དུ་བཀའ་ཁྲིར་ཕེབས་དགོས་པའི་བསམ་ཚུལ་འཛིན་མཁན་དག་ཡིན། མདོར་བསྡུས་ན་བསམ་ཚུལ་འདི་ནི་དད་པ་དང་དག་སྣང་གི་དབང་དུ་གྱུར་བའི་སྐྱེ་བོའི་རིགས་ཡིན།
 
                     གཉིས། ཛ་དྲག་དང་ཉེན་ཁ་མཐོང་བའི་མང་ཚོགས་དང་དེའི་བཀའ་ཁྲིའི་འོས་གཞི།
 
བོད་ཀྱི་ལོ་རྒྱུས་དང་རིག་གཞུང་གི་ཛ་དྲག་དང་ཉེན་ཁ་མཐོང་བའི་མང་ཚོགས་ཀྱི་རིགས་ཤིག་གིས། དེང་སང་གི་རང་རེའི་བཀའ་ཁྲི་ནི་དངོས་གནས་གནད་འགག་ཅིག་ཏུ་མཐོང་སྟེ་གཡོ་ཟོལ་མེད་པར་དྲང་བདེན་གྱིས་སྐད་ཆ་བཤད་ཀྱིན་ཡོད། དེའི་རིགས་ནི་རང་རང་གིས་འཁུར་འོང་བའི་འོས་གཞིའི་འདས་པའི་ལོ་རྒྱུས་དང་བྱས་རྗེས་ལ་བལྟས་ནས་ཉམས་མྱོང་སོགས་ཕུན་སུམ་ཚོགས་པའི་མི་སྣ་བདམས་ཀྱི་འདུག ངས་བལྟས་ན་ང་ཚོའི་སྤྱི་ཚོགས་ཁྲོད་མི་ཤེས་འཇོན་ལྡན་པ་མེད་པ་མིན་ལ། དེ་དག་ངོས་ཟིན་དགོས་ན་རང་རང་གི་རྒྱུད་ཀྱི་དད་པ་དང་དག་སྣང་གིས་མཐོང་བའི་བྱ་དངོས་དེ་དོར་ཐུབ་དགོས་པ་ཡིན། དེ་དང་འབྲེལ་བའི་རང་གི་ལུང་ཚན་དང་ཆོས་རྒྱུད་ཀྱི་རྩ་བ་དེ་ཡང་དོར་ཐུབ་དགོས་པ་ཡིན། དེ་ལྟ་བུའི་མི་ཞིག་གིས་ད་གཟོད་བོད་རང་གི་རྒྱལ་ཁབ་ཀྱི་འཇིག་ཉེན་ཁོ་ན་དེ་མཐོང་ཐུབ་པ་ཡིན། ད་ལྟའི་དུས་སྐབས་འདིར་དེ་མཐོང་ཡོད་པའི་མང་ཚོགས་དང་དེ་དག་གིས་བདམས་པའི་བཀའ་ཁྲིའི་འོས་གཞི་ནི་བཀྲས་མཐོང་བསྟན་འཛིན་རྒྱལ་དང་རྒྱལ་རི་བློ་གྲོས་རྒྱལ་མཚན་གཉིས་རེད། འདི་ནི་ཆོལ་ཁ་དང་ལུང་ཚན། ཆོས་ལུགས་དང་གྲུབ་མཐའི་རྒྱ་ལས་ཐར་བའི་གང་ཟག་དག་གི་རང་བཞིན་ཡིན།
 
                                       གསུམ། ཞེན་ཁོག་གིས་བཙལ་བའི་བཀའ་ཁྲིའི་འོས་གཞི།

ཉེ་སྔོན་བོད་ཀྱི་བང་ཆེན་གྱི་དྲ་རྒྱའི་སྟེང་མི་ཁ་ཤས་ཀྱིས་བསྟན་འཛིན་བརྩོན་འགྲུས་འོས་གཞིར་བདམས་པ་དང༌། ཡང་མི་ཁ་ཤས་ཀྱིས་བློ་བཟང་སེང་གེ་བདམས་པ། ཡང་ཁ་ཤས་ཀྱིས་རྔ་བ་ཚེ་རྒྱམ་བདམས་པ་སོགས་ནི་ཆགས་སྡང་ཁོ་ནའི་གཏམ་ལས་བོད་རང་གི་ཆག་འཇིགས་ལ་བསམ་བློ་བཏང་བ་ཞིག་རྩ་བ་ནས་མིན། འདི་འདྲའི་སྐབས་སུ་རང་གི་རྒྱལ་ཁབ་དང་མི་རིགས་བསམ་མཁན་ཞིག་ཡིན་ན་ངེས་པར་དུ་གཟབ་ཙམ་གནང་དགོས་པ་དང༌། ལྷག་པར་དུ་རང་རེའི་ྋགོང་ས་ཡིན་བཞིན་ནོར་བུའི་ཐུགས་སྨོན་དང་མཐུན་པ་ཞིག་མ་ཡོང་བར་ཆོལ་ཁ་དང་ཆོས་ལུགས་ཀྱི་དབང་དུ་སོང་བའི་བཀའ་ཁྲི་ཞིག་སླེབས་པ་ཡིན་ན། དེ་དུས་རང་གི་ཁ་ཕོར་ནང་ལ་རང་གིས་སྐྱག་པ་བླུག་པ་ལས་གང་ཡང་མེད་པ་ཆགས་འགྲོ་བས། མི་རང་རང་གི་ངོས་ནས་ལྷག་བསམ་རྣམ་པར་དག་པས་བོད་སྤྱི་ལ་ཕན་པའི་ལས་ཀ་བྱེད་པ་དང་སྐད་ཆ་བཤད་རྒྱུ་ནི་ཁ་ཚ་དགོས་གཏུགས་ཆགས་ཡོད།
     

འདི་ལྟར་ངས་མཐོང་བའི་བཀའ་ཁྲིའི་འོས་གཞིའི་སྐོར་གྱི་བསམ་ཚུལ་རགས་བསྡུས་འདི་ནི་དུས་ཡུན་གང་འཚམས་ཤིག་གི་རིང་བཙན་བྱོལ་གྱི་ཤེས་ཡོན་པ་ཚོས་བཀའ་ཁྲིའི་སྐོར་གྱི་རྩོམ་ཡིག་དག་བཀླགས་པའི་མྱོང་ཚོར་ཙམ་ཡིན་ལ། རང་གིས་མཐོང་བའི་འོས་གཞི་ལེགས་ཤོས་དང་བསམ་ཚུལ་འདོན་མཁན་གྱི་ལྷག་བསམ་རྣམ་པར་དག་ཤོས་ནི་སྐུ་ངོ་བཀྲས་མཐོང་བསྟན་འཛིན་རྣམ་རྒྱལ་ལགས་ཡིན་ལ། ད་དུང་མི་ཤས་ཀྱིས་མི་ཚང་ཆེན་པོའམ་སྐུ་དྲག་གི་རྒྱུད་པའི་སྐོར་ཞིག་བཤད་ཀྱིན་ཡོད་པ་ནི་སྦལ་བས་གནམ་མཐོང་གི་དཔེ་ལས་མེད་པས་གླེང་གཞིར་མི་འོས་པས་རེ་ཞིག་བཞག་པ་ཡིན། འདས་པའི་ལོ་རྒྱུས་དང་བྱས་རྗེས་སོགས་བཀྲས་མཐོང་བསྟན་འཛིན་རྣམ་རྒྱལ་ལས་ལྷག་ཅིག་རང་རེའི་བཙན་བྱོལ་ནང་ཡོད་ན་ངེས་པར་ཕྱི་ལ་འབུད་དགོས་པའི་དུས་ལ་སླེབས་ཡོད་པ་ལས་ད་ཡོད་ཀྱི་བཀའ་ཁྲིའི་འོས་གཞི་དག་ལས་འདི་ལས་ལྷག་ཅིག་མ་མཐོང༌།
        

རང་གི་དཔོན་པོ་རང་གིས་བདམས་པའི་སྐལ་བ་བཟང་བོ་འདི་འདྲའི་འོག་ནས་མི་ཚང་མས་རང་རེའི་སྤྱི་ཚོགས་ཁྲོད་ཤེས་འཇོན་གཉིས་ལྡན་གྱི་མི་ཞིག་སུ་ཡིན་པ་དེ་རང་གི་དཔོན་པོར་བདམས་རྒྱུ་ལས་ཆོལ་ཁ་དང་ཆོས་ལུགས་ཀྱི་ཞེན་ཁོག་ལ་བཅོལ་ན་རང་གཞན་གཉིས་ཕོངས་ཀྱི་རྒྱུ་ལས་མེད་པས། གང་ཟག་རང་རང་གི་ལྷག་བསམ་རྣམ་པར་དག་པ་དང་རང་གི་རྒྱལ་ཁབ་དང་མི་རིགས་ཀྱི་ཆེད་ཁོ་ནར་བསམ་བློ་གཏོང་རྒྱུ་གལ་ཆེན་པོ་ཡིན། གོང་གི་སྐད་ཆ་དག་ནི་ང་གནམ་ལྕགས་ཟེར་བའི་མི་ཆུང་ཆུང་ཞིག་གི་ལྷག་བསམ་རྣམ་དག་གི་གཏམ་ཡིན་ལ། འདིའི་ནང་དུ་དགའ་སྡུག་ཆགས་སྡང་གི་དྲི་ཙམ་ཙམ་མེད་པ་སྲུང་མ་དམར་ནག་གཉིས་དཔང་བཙུགས་ཀྱིས་མནའ་བསྐྱལ་ཆོག