དགེ་འདུན་པ་ཞིག་བསད་པ།

འབྲས་སྤུངས་དགོན་པའི་དགེ་འདུན་པ་ཞིག་ལ་རྒྱ་གཞུང་གིས་ཉེས་རྡུང་ཚད་མེད་བཏང་མཐར་བཙོན་ཁང་ནང་འདས་གྲོངས་སུ་ཕྱིན་འདུག

ཕྱི་ཚེས་ ༡༠ ཉིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གསལ་བསྒྲགས་སྤེལ་བ་ལྟར་ན། ལོ་སྔོན་མར་འབྲས་སྤུངས་དགོན་པའི་དགེ་འདུན་པ་རྣམས་ཀྱི་ཞི་བའི་ངོ་རྒོལ་གྱི་ལས་འགུལ་ཁྲོད་མཉམ་ཞུགས་གནང་མཁན་དགེ་འདུན་པ་ངག་དབང་འོད་དཔལ་ལགས། རྒྱ་གཞུང་གིས་སྐབས་དེའི་ངོ་རྒོལ་གྱི་ལས་འགུལ་ནང་ཞུགས་པའི་ཉེས་མིང་འོག་འཛིན་བཟུང་བཙོན་འཇུག་བྱས་ཡོད་པ་དང་། ཁོང་གི་ནང་མིས་ཁོ་རང་བཙོན་ཁང་གང་དུ་བཅུག་པ་དང་ཤི་གསོན་གྱི་གནས་ཚུལ་སོགས་རྩ་བ་ནས་ཤེས་རྟོགས་བྱུང་མེད་ནའང་། འདི་ལོའི་ཕྱི་ཟླ་ ༨ པའི་ཟླ་དཀྱིལ་ཞིག་ལ་གློ་བུར་དུ་ལྷ་སར་ཡོད་པའི་ཁོང་གི་སྤུན་མཆེད་ལ་སྐུ་ཕུང་རྩིས་སྤྲོད་བྱས་ཡོད་འདུག

ཞིབ་ཕྲའི་གནས་ཚུལ་ལྟར་ན། རྒྱ་གཞུང་གིས། དགེ་འདུན་པ་ངག་དབང་འོད་དཔལ་ལགས་ལ་དོ་དམ་བཙོན་འཇུག་གི་སྐབས་ཉེས་རྡུང་ཚད་མེད་བཏང་སྟེ་ནད་གཅོང་ཆགས་ཡོད་ནའང་། སྨན་བཅོས་ཀྱི་མཐུན་རྐྱེན་སོགས་ཅི་ཡང་མ་སྤྲད་པར་སྡུག་བསྔལ་མྱངས་ཡོད་པ་དང་། ཁོ་ལ་བཙོན་ཁང་ནས་མནར་གཅོད་ཚད་ལས་བརྒལ་བ་བཏང་བའི་རྐྱེན་གྱིས་བཙོན་འཇུག་བྱེད་སའི་དོ་དམ་ཁང་དུ་འདས་གྲོངས་སུ་ཕྱིན་ཡོད་འདུག་ལ། ཁོང་དང་མཉམ་དུ་འཛིན་བཟུང་བྱས་པའི་ཁོང་གི་སྤུན་མཆེད་རྒན་པ་གྲྭ་བསམ་འགྲུབ་ལགས་དུས་ད་ལྟའང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་རྟོགས་མེད་པར་ལྷག་ཡོད་འདུག

དགེ་འདུན་པ་ངག་དབང་འོད་དཔལ་ལགས་ནི། ལྷ་ས་འཕན་པོའི་མཚོ་སྟོད་གྲོང་ཚོ་ནས་སྐྱེས་ཤིང་། ཁོང་གི་ཆུང་དུས་ཀྱི་སྐྱ་མིང་ལ་སྐལ་ལྡན་ཟེར་ལ།  ཕྱིས་སུ་ལྷ་ས་འབྲས་སྤུངས་དགོན་པའི་ནང་འཛུལ་ཏེ་གྲྭ་བ་བྱས་ཡོད་འདུག