ངག་དབང་ཚེ་རིང་། ཝར་ན།
ཐོག་དང་པོ་རང་གི་གསལ་བཤད་ཅིག་ཞུས་ན་གོང་གི་བརྗོད་གཞི་འདི་གླེང་དགོས་དོན་གཙོ་བོ་དེ་གླང་པོ་ཆེའི་མཆེ་བར་དཀར་པོ་ངོམ་པ་ལྟར་མ་ཡིན་པར་རང་ཉིད་མགོ་ནག་རྩམ་གཟན་གཤའ་མ་ཞིག་དང་དུས་རབས་འདིའི་བོད་རིགས་གཞོན་སྐྱེས་ཤིག་ཡིན་པ། ཁྱད་པར་དུ་མ་འོངས་པའི་མགོ་ཁྲིད་ཅིག་ཡིན་པའི་ཆ་ནས་དེ་ལྟ་བུའི་བརྗོད་བྱར་མགོ་བོ་མ་གཡེང་ག་མེད་ཆགས་སོང༌། འདིར་རང་གིས་བཤད་འདོད་པ་ནི་རང་རེའི་གཞི་རིམ་མང་ཚོགས་ཀྱིས་བཀའ་བློན་ཁྲི་པ་དེ་གལ་ཆེ་ཚུལ་དང་བཀའ་བློན་ཁྲི་པ་དེར་འོས་ཆོས་སམ་ཆ་རྐྱེན་ཅི་འདྲ་ཞིག་དགོས་མིན་ཤེས་དགོས་པ་དང་། དེ་དང་འབྲེལ་ནས་མང་ཚོགས་ལ་རེ་འབོད་ཕྲན་བུ་ཞིིག་བཅས་གཙོ་བོ་དོན་དག་གསུམ་ཐོག་འཆད་རྒྱུ་ཡིན།
དེ་ཡང་དང་པོ་ང་ཚོའི་བཀའ་བློན་ཁྲི་པ་དེ་ཉིད་གལ་ཆེ་ཚུལ་ཐོག་བཤད་པ་ཡིན་ན་ཉི་མ་མེད་པའི་སྐབས་ཟླ་བས་འཇིག་རྟེན་སྐྱོང་བའི་དཔེ་ལྟར་རང་ཅག་གི་བཀའ་བློན་ཁྲི་པ་དེ་ནི་དེ་ལས་ཀྱང་གལ་ཆེ་བ་དང་གནད་ཆེ་བ་ཞིག་མཐོང་གི་འདུག གང་ལགས་ཟེར་ན་ད་ལྟའི་ཆར་བོད་ཀྱི་གནས་སྟངས་དང་འཛམ་གླིང་གི་འགྱུར་འགྲོས་རེ་རེ་ལ་བསམ་ན་དངོས་གནས་ང་ཚོའི་ས་མཐོའི་ཁ་བ་དཀར་པོའི་ཡུལ་འདིི་དམར་པོ་རྒྱ་ཡིས་ཁེངས་ནས་གངས་ལྗོངས་ནི་མེ་ཏོག་གི་སྐྱེད་ཚལ་དང་རྫས་མཚོན་གྱི་བཟོ་གྲྭ་ཞིག་ཏུ་སྐྲུན་ཞིང་བོད་རིགས་རྣམས་སྲན་མ་གཏོར་བ་བཞིན་འཛམ་གླིང་ས་ཕྱོགས་གང་སར་ཁ་འཐོར་དུ་ཕྱིན་ནས་འཛམ་གླིང་མི་མང་ཚོས་བོད་དང་བོད་མི་ཟེར་བ་ཞིག་རྙེད་པར་དཀའ་བའི་དུས་འདིར་རང་ཅག་བོད་མི་རེ་རེ་ལ་ཁུར་དུ་འཁྲི་པའི་འོས་འགན་དང་དེ་བཞིན་རང་རེ་བཙན་བྱོལ་གཞུང་གི་ལས་ཀྱི་སྣེ་མོར་གཏོགས་པའི་གཞུང་ཞབས་པ་རྣམས་ལ་སྨྲོས་མ་དགོས་པ་ཞིག་རེད་ལ། ཁྱད་པར་དུ་རང་ཅག་གི་བཀའ་བློན་ཁྲི་པར་མཚོན་ན་ཁྱིམ་ཚང་ཞིག་གི་ཕ་ལྟ་བུ་ཞིག་ཡིན་པས་དེ་བས་ཀྱང་གླེང་མི་དགོས་པ་ཞིག་ཡིན། ཁྱིམ་ཚང་དེ་ཉིད་ཁྱིམ་མཚེས་གཞན་ལས་ལྷག་པ་ཞིག་འབྱུང་དང་མི་འབྱུང་། ཁྱིམ་ཚང་དེ་ཁྱིམ་མཚེས་གཞན་དང་འདྲ་བར་ནང་གི་འཚོ་བ་བཀྲ་ཤིས་བ་དང་ཕུན་སུམ་ཚོགས་པ་མ་ཟད། ནང་མིའི་ཀུན་སྤྱོད་སོགས་ལེགས་པོ་ཡོང་དང་མི་ཡོང་བཅས་ནི་གཙོ་བོ་ཕས་འཇོན་ཐང་དང་ལྷག་བསམ། གཤིས་སྤྱོད་སོགས་ལ་རག་ལས་པ་བཞིན། རླུང་ནག་ཁྲོད་ཀྱི་མར་མེ་ལྟ་བུའི་བོད་འདི་འཛམ་གླིང་སྟེང་འཆི་བ་ལས་སྐྱོབ་ཐུབ་དང་མི་ཐུབ་ཀྱང་ངེད་ཅག་གི་བཀའ་བློན་ཁྲི་པར་རག་ལས་སོ། མདོར་ན་རང་ཅག་གི་བཀའ་བློན་ཁྲི་པ་ནི་རང་ཅག་བོད་ཕྱི་ནང་གཉིས་ཀྱི་བོད་མིའི་འཚོ་བའི་རེ་འདོད་དང་མ་འོངས་པའི་ཁ་བའི་རྨི་ལམ། ད་ལྟའི་མིག་ལྟོས་བཅས་འདི་དང་མ་འོངས་གཉིས་ཀྱི་བོད་མིའི་བདེ་དོན་སྒྲུབ་མཁན་ཞིག་ཡིན་པའི་ཆ་ནས་ཧ་ཅང་གི་གལ་ཆེན་པོ་ཞིག་རེད་བསམ་གྱི་འདུག འོན་ཀྱང་མཛོ་སུམ་ཅུར་རྭ་ཁ་དྲུག་ཅུ་དང་། མི་སུམ་ཅུར་བསམ་བློ་སུམ་ཅུ་ཡོད་པའི་ཆ་ནས་བརྗོད་ཚུལ་མི་འདྲ་བ་སྣ་ཚོགས་ཡོང་སྲིད་པ་ནི་ཆོས་ཉིད་ཡིན།
གཉིས་པ། བཀའ་བློན་ཁྲི་པ་ཇི་ལྟར་གདམ་དགོས་མིན་ཐོག་རང་གི་ལྟ་ཚུལ་ཅུང་ཙམ་གླེང་ན། ཞི་མི་དཀར་ནག་གང་ཡིན་ཡང་ཙི་ཙི་གསོད་ཐུབ་ན་འགྲིག་གི་ཡོད་པའི་དཔེ་ལྟར། བོད་ཀྱི་བདེན་མཐའ་གསལ་དུ་གཏོང་ཐུབ་མཁན་ཞིག་བྱུང་ན་སྐྱེ་ཕོ་མོ་གང་ཡིན་རུང་ཁྱད་མེད། དེ་ཡང་ཉི་མ་ལྟ་བུའི་གཟི་བརྗིད་དང་ཡོན་ཏན་ཕུན་སུམ་ཚོགས་པའི་མི་སྣ་ཞིག་གླིང་འདིར་རྙེད་མི་སྲིད་ཀྱང་ཟླ་བ་ལྟ་བུའི་གཟི་བརྗིད་དང་ཡོན་ཏན་ཚང་བ་ཞིག་དགོས་པ་ནི་བོད་ཕྱི་ནང་གཉིས་ཀྱི་མང་ཚོགས་ཀྱི་རེ་འདོད་རེད་ལ། དེ་ལྟ་བུ་ཞིག་དགོས་པ་ཞིག་ཀྱང་རེད། འོ་ན་དེ་ལྟ་བུའི་བཀའ་བློན་ཁྲི་པ་ཞིག་ཡོང་དང་མི་ཡོང་ནི་གཙོ་བོ་གཞི་རིམ་མང་ཚོགས་ཀྱིས་འོས་མི་ཇི་ལྟར་གདམ་དགོས་མིན་དེར་ཐུག་འདུག་བསམ་གྱི་འདུག དེ་ཡང་བཀའ་བློན་ཁྲི་པའི་འོས་མིར་བཞེངས་པའི་ཤེས་ཡོན་ཅན་ཇི་སྙེད་ཅིག་ཡོད་པའི་ནང་ནས་གཙོ་བོ་གང་ཟག་དེའི་མགོན་པོ་གང་ཉིད་ཀྱི་ཟབ་པ་དང་རྒྱ་ཆེ་བའི་དགོངས་དོན་གང་ཡིན་པ་རྣམས་རྟོགས་པའི་གདེང་ཚོད་དང་། དེ་སོ་སོས་ལག་ལེན་དུ་བསྟར་བར་ཐེ་ཚོམ་སྤུ་ཙམ་ཡང་མི་གཡོ་བ་ཞིག་ཡོད་མེད། གང་ཟག་དེ་ལ་འདབ་ཤོག་གཉིས་ལྡན་གྱི་ཤེས་ཡོན་ཚད་དང་ལྡན་པ་ཞིག་ཡོད་མེད། གང་ཟག་དེའི་འདས་པའི་དུས་སུ་གཞུང་ཞབས་ཐོག་ཞབས་ཞུ་ཇི་ལྟར་ཞུས་ཡོད་མེད་དང་། དུས་ཡུན་དེའི་རིང་ནུས་པ་ཇི་ལྟར་ཐོན་མིན། གང་ཟག་དེའི་འདས་པའི་མི་ལོ་ལྔ་བཅུའི་ནང་གི་འགྱུར་བ་དང་ལྷག་པར་དུ་རྒྱ་གཞུང་གི་ཆབ་སྲིད་འགྱུར་བའི་ཐད་གསལ་གསལ་ཐིང་ཐིང་མཁྱེན་གི་ཡོད་མེད། ཁྱད་པར་དུ་གང་ཟག་དེ་ལྷག་བསམ་དང་དྲང་བདེན། ཞི་བདེ་དང་བདེན་པའི་ལམ་དུ་བསྐྱོད་ཐུབ་མཁན་ཞིག་ཡིན་མིན། དེ་ལྟར་གང་ཟག་སུ་དང་སུ་ཡིན་ཡང་བཀའ་བློན་ཁྲི་པའི་ཞབས་སྟེགས་སྟེང་དུ་ཞུགས་འདོད་ཡོད་རིགས་ལ་མ་མཐར་ཆ་རྐྱེན་འདི་ལྟ་བུ་ཞིག་ཚང་དགོས་ཀྱི་རེད་བསམ་གྱི་འདུག
གསུམ་པ། གཞི་རིམ་མང་ཚོགས་ལ་རང་གི་བསམ་ཚུལ་དང་སྦྲགས་ནས་རེ་འབོད་ཕྲན་བུ་ཞིག་ཞུ་འདོད་བྱུང༌། ང་ཚོ་གཞི་རིམ་མང་ཚོགས་ཀྱིས་བཀའ་བློན་ཁྲི་པ་དེ་གལ་ཏེ་གོང་དུ་ཞུས་པ་ལྟར་གལ་ཆེན་པོ་ཞིག་དང་གནད་ཆེན་པོ་ཞིག་མཐོང་གི་ཡོད་ན། ད་ནི་དངོས་གནས་གང་ཡང་དྲན་རྒྱུ་མེད་པའི་གཉིད་ལ་ཞུགས་པ་ལྟར་མ་ཡིན་པར། རང་ངོས་ནས་འགན་འཁྲི་ཁུར་དུ་བཞེས་ཏེ། དེ་ལྟ་བུའི་གང་ཟག་ཞིག་ང་ཚོའི་སྤྱི་ཚོགས་ནང་བཙལ་ནས་ངེས་པར་དུ་རྙེད་དགོས་པ་དང་། རྙེད་ནས་འདེམས་དགོས་པའི་དུས་ལ་ཤར་འདུག་བསམ། གང་ལྟར་བཀའ་ཁྲི་ནི་ང་ཚོ་མང་ཚོགས་ཀྱི་རེད་ལ། མང་ཚོགས་ཀྱིས་ལོངས་སུ་སྤྱོད་བྱ་ཞིག་ཀྱང་རེད། དེ་ཉིད་རིན་ཐང་ཅན་ཞིག་དང་འོད་དུ་འཚེར་བའི་ནོར་བུ་ཞིག་ཡིན་དགོས་པར་འདོད་ན་དང་པོ་ནས་ནོར་བུའི་ནོར་ཉམས་ཆོད་དགོས་པ་བཞིན། གཞི་རིམ་མང་ཚོགས་ཀྱིས་ཀྱང་བཀའ་ཁྲི་ཡག་པོ་ཞིག་བསམ་ན་མི་སྣ་མང་པོ་ཞིག་གི་དབུས་ནས་རྩེ་ཕུད་ཀྱིི་མི་སྣ་ཞིག་འདེམས་ཐུབ་དགོས་པ་ནི་ཤིན་ཏུ་གལ་ཆེན་པོར་སྣང་མོད། འོན་ཀྱང་ད་ལྟའི་ཆར་རང་གི་མཐོང་སྣང་ལ་གཞིགས་ན་སྤྱི་ཚོགས་ཁྲོད་བཀའ་ཁྲི་འོས་འདེམས་སྐོར་མང་ཚོགས་ནས་དེ་ཙམ་དོ་ཁུར་མེད་པ་མ་ཟད་བྱིས་པའི་སྣང་བ་བཞིན་རྩེད་མོར་མགོ་བོ་གཡེང་གིན་འདུག དེ་ནི་ཧ་ཅང་གི་སེམས་སྐྱོ་དགོས་པ་ཞིག་དང་ཡིད་ཕམ་དགོས་པ་ཞིག་རེད་ལ་ཤིན་ཏུ་ནས་ཡིད་གདུང་དགོས་པ་ཞིག་ཀྱང་མ་རེད་དམ།
ད་ནི་བཀའ་ཁྲི་འདེམས་སྟངས་འདེམས་ལུགས་ཀྱི་ཐོག་ལ་བསླབ་བྱ་བརྒྱབ་ནས་མ་བསྡད་པར། གཙོ་བོ་ཤེས་འཇོན་ལྡན་པའི་མི་སྣ་གང་དྲགས་དྲགས་མི་དམངས་ལ་ངོ་སྤྲོད་གནང་རྒྱུ་ཚད་ལ་སླེབས་འདུག གང་ལྟར་འོས་ཆོས་ཚང་བའི་འོས་མི་ཕུལ་བྱུང་དེ་འདྲ་བཙལ་ནས་མི་དམངས་ལ་མི་དེ་དག་གི་ལོ་རྒྱུས་ངོ་སྤྲོད་གནང་རྒྱུ་གལ་ཆེ་བ་རེད། གྲོགས་པོ་ཁྱེད་རང་གི་ངོས་ནས་བཀའ་ཁྲིར་དྲགས་ཤོས་མི་སུ་འདྲ་ཞིག་མཐོང་གི་དེ་ཤེས་འདོད་པ་ལས། འོས་འདེབས་སྐོར་གྱི་བསླབ་བྱ་འདྲ་བོ་འདྲ་བོ་མང་པོ་བྲིས་པས་ཕན་པ་ཆུང་བར་འདོད་།
ཉིད་ཀྱིས་ཚོར་བའི་སྟེང་ནས་ཕུལ་བར་དགའ་བསུ་ཞུ།ཡིན་ཡང་ཉིད་ཀྱི་ཉི་མ་ལྟའི་གཟི་བརྗིད་དང་ཡོན་ཏན་ཕུན་སུམ་ཚོགས་པ་ཞིག་མི་སྲིད་ཞུས་གསུངས་བ་ནི་ཉིད་ཀྱི་རང་མི་རིག་ལ་མཐོང་ག་འདྲ་ཞིག་བཞག་ཡོད་ལ།ཁྱེད་རང་གི་འོས་ཆོས་འཚང་བའི་མི་ཞིག་ངོས་མི་འཛིན་པ་ཅི་ཡིན།