རྒྱ་གཞུང་གིས་ནག་ཆུ་ས་ཁུལ་གྱི་སྒེར་བཙུགས་སློབ་གྲྭ་གཉིས་སྒོ་རྒྱག་ཏུ་བཅུག་འདུག
ཕྱི་ཚེས་ ༢༢ ཉིན་གནས་ཚུལ་འབྱོར་བ་ལྟར་ན། ༡༩༩༧ ལོར་ལྷ་སའི་ནག་ཆུ་ས་ཁུལ་སྤེ་རོའུ་རྫོང་གི་མཁན་པོ་བློ་བཟང་སྙན་གྲགས་ལགས་ཀྱིས་ནག་ཆུ་རྫོང་པད་དགའ་ཞང་གི་ཉེ་འགྲམ་དུ་པད་དགའ་ཤེས་རིག་སློབ་གྲྭ་ཞེས་པའི་སློབ་གྲྭ་ཞིག་སྒེར་ངོས་ནས་གསར་འཛུགས་གནང་ཡོད་པ་དང་། དེ་ཡང་མཁན་པོ་མཆོག་གིས། ཡུལ་དེའི་འབྲོག་པ་མང་ཚོགས་ཀྱི་བསམ་བློའི་གོ་རྟོགས་མཐོར་འདེགས་དང་། ལྷག་པར་འབྲོག་ཁུལ་གྱི་གཞོན་སྐྱེས་གང་མང་ཞིག་ལ་བོད་མི་རིགས་རང་གི་སྲོལ་རྒྱུན་རིག་གནས་དང་ལག་རྩལ། སྨན་རྩིས། བོད་མིའི་ཆོས་དང་རིག་གཞུང་ཡུལ་སྲོལ་གོམས་གཤིས་སོགས་ཀྱི་བག་ཆགས་བཟང་བོ་ཞིག་འཇགས་པར་བྱ་ཆེད་བོད་རིགས་སློབ་མ་ ༢༠༠ ལྷག་བསྡུ་རུབ་བྱས་ཏེ། མི་རབས་གསར་བ་སྐྱེད་སྲིང་ལ་དམིགས་ཏེ་བཙུགས་པ་ཞིག་ཡིན་པ་དང་། སློབ་གྲྭའི་ནང་སུམ་དག་རྟགས་གསུམ་དང་བོད་ཀྱི་སྨན་རྩིས་ཤེས་བྱ། རི་མོ་དང་འཚེམ་བཟོ། རྒྱ་ཡིག དབྱིན་ཇི་སོགས་ཀྱི་སློབ་སྦྱོང་སྤྲོད་ཀྱིན་ཡོད་འདུག དེ་ལྟར་ཡང་། རྒྱ་གཞུང་གིས། ཁོང་གིས་བཙུགས་པའི་སྒེར་བཙུགས་སློབ་གྲྭ་དེའི་ནང་མི་རིགས་ཁ་བྲལ་གྱི་ལས་འགུལ་སྤེལ་གྱིན་པར་ངོས་འཛིན་བྱས་ཏེ་ཉེ་ཆར་སློབ་གྲྭ་སྒོ་བརྒྱབས་ཡོད་པ་རེད།
དེ་བཞིན། ནག་ཆུ་སོག་རྫོང་གི་མཁན་པོ་བསྟན་འཛིན་ཐབས་མཁས་ལགས་ཀྱིས་ཀྱང་། བོད་མི་རིགས་ཀྱི་སྲོལ་རྒྱུན་གྱི་ལག་ཤེས་རིག་གནས་དེ་དག་མི་ཉམས་རྒྱུད་འཛིན་བྱ་བར་དམིགས་ཏེ། རང་ཉིད་སྒེར་ངོས་ནས་ནག་ཆུ་རྫོང་ཐོག་ཏུ་ནག་ཆུ་ལག་ཤེས་སློབ་གྲྭ་ཞེས་པ་ཞིག་གསར་འཛུགས་གནང་ཡོད་པ་དང་། སློབ་གྲྭའི་ནང་བོད་རིགས་སློབ་མ་ ༣༠༠ ལྷག་བསྡུ་རུབ་ཀྱིས་ལག་ཤེས་གཙོར་བྱས་པའི་ནང་ཆོས་དང་སྲོལ་རྒྱུན་རིག་གཞུང་གི་སློབ་གསོ་སྤྲོད་ཀྱིན་ཡོད་སྟབས། རྒྱ་གཞུང་གིས། ཁོང་ཚོས་སྒྲུབ་པའི་བྱ་བ་དེ་དག་ཁ་བྲལ་གྱི་བྱ་འགུལ་ཞིག་ཡིན་པར་ངོས་འཛིན་བྱས་ཡོད་པ་མ་ཟད། ཏཱ་ལའི་བླ་མའི་དམིགས་འབེན་ལྟར་སྒྲུབ་ཀྱིན་པའི་ཉེས་མིང་འོག་སློབ་གྲྭ་སྒོ་བརྒྱབས་ཡོད་འདུག
གོང་གསལ་གྱི་སློབ་གྲྭ་དེ་གཉིས་ནི་སྤྱི་ལོ་ ༡༩༩༧ ལོར་དུས་མཉམ་དུ་གསར་འཛུགས་གནང་ཡོད་འདུག་ལ། ༢༠༠༩ ལོའི་ཕྱི་ཟླ་ ༢ པའི་ནང་རྒྱ་གཞུང་གིས་དུས་མཉམ་དུ་བཙན་གྱིས་སྒོ་བརྒྱབས་ཡོད་འདུག
རེད་བསམ། བཅོས་རོགས།
གསར་འགྱུར་འདི་ཉེ་ཆར་བོད་ནས་གསར་དུ་འབྱོར་བའི་ས་གནས་མི་སྣ་ཞིག་གིས་འགྲེལ་བརྗོད་གནང་བ་ཞིག་རེད། གང་ལྟར། ང་ཚོས་དོ་སྣང་བྱ་ཡུལ་ཞིག་རེད་ལ། དོ་སྣང་བྱ་དགོས་པ་ཞིག་ཀྱང་རེད་བསམ་ལ། འདི་ཡང་རྒྱ་ནག་ཐབས་ཇུས་ཤིག་གི་མཇུག་འབྲས་རེད་བསམ་གྱི་འདུག
བོད་མི་མང་གི་སྤྱི་འཐུས་ཚོ། སོག་རླུང་འཕར་བ་གོ་འདུག་ལ། ད་ལྟའི་ཆར་ཨ་གར་སོ་ལྔ་མཆོད་ཀྱིན་ཡོད་པ་དེ་ཡང་གོ་འདུག
དངོས་གནས་བོད་ནང་ནས་འདིར་དོ་སྣང་ག་ཚོད་ཙམ་བྱེད་ཀྱིན་ཡོད་པ་དེ་རྟོགས་ཐུབ་པ་མ་ཡིན་ནམ།།
སློབ་མ་སུམ་བརྒྱ་ལྷག་ཡོད་པའི་སློབ་གྲྭ་ཞིག་སྒོ་བརྒྱབས་ཏེ་ཟླ་ངོ་བདུན་ལྷག་འགོར་རྗེས་ད་གཟོད་གོ་བ་རེད། དངོས་གནས་བཤད་མི་ཤེས་པ་རེད། དོ་སྣང་མ་བྱས་པས་ལན་པ་འདྲ། འཛམ་གླིང་རང་བཞིན་དང་རྒྱལ་ཁབ་དང་མི་རིགས་གཞན་ཞིག་གི་གནས་ཚུལ་ཡིན་ན་ང་ཚོས་ལམ་སང་གོ་ཐུབ་པ་མ་ཟད། དེའི་ཐད་ལ་བགྲོ་གླེང་དང་ཇུས་གཏོགས་བྱེད་མཁན་ཡང་ཧ་ཅང་མང་གི བོད་དང་འབྲེལ་བའི་དོན་དག་ཅིག་དང་འདི་ལྟ་བུ་ནི་དུས་ཚོད་ཀྱི་ཡུན་ཚད་ཅིག་ལོང་དགོས་པ་འདྲ། ཨ་ཁུ་རིན་ཆེན་བཟང་པོའི་གློག་བརྙན་ལྟ་བུ་ལོ་གཅིག་ལྷག་འགོར་ཡང་ད་དུང་བདེ་སྲུང་གི་ཁང་སྦུགས་སུ་ཉར་བསྡད་ཡོད་པ་རེད། ཕལ་ཆེར་དུས་ཚོད་མ་རན་པས་ཡིན་སྲིད།