ཐེངས་འདིའི་ས་ཡོམ་གྱི་འབྲུག་ཤར་ཕྱོགས་སུ་གནོད་སྐྱོན་ཚབས་ཆེན་བྱུང་ཡོད་ནའང་། ང་ཚོ་བཙན་བྱོལ་བོད་མི་ཚོར་ས་ཡོམ་གྱི་གནོད་པ་ཅི་ཡང་བྱུང་མེད། ཅེས་འབྲུག་ཡུལ་ས་གནས་མགོ་འཛིན་གྱིས་བརྗོད་བྱུང།
ཕྱི་ཚེས་ ༢༡ ཉིན་འབྲུལ་ཡུལ་དུ་ས་ཡོམ་ཤུགས་ཚད་ ༦་༣ ཅན་ཞིག་བརྒྱབས་ཏེ་ད་ལྟའི་ཆར་མི་ ༡༣ རྐྱེན་ལམ་དུ་ཕྱིན་ཡོད་པ་གསལ་རྟོགས་བྱུང་ཡོད་པ་་དང་། ས་གནས་མི་མང་གི་སྡོད་ཁང་མང་པོ་ཞིག་ལ་གཏོར་བཤིག་ཚབས་ཆེན་ཐེབས་ཡོད་ཚུལ་བརྗོད་ཡོད་པ་མ་ཟད། ཐེངས་འདིའི་ས་ཡོམ་གྱིས་རང་བྱུང་གནོད་འཚེ་ཡིས་འབྲུག་ཡུལ་གྱི་ཁྱིམ་འཚེས་རྒྱལ་ཁབ་བྷང་ལ་ཌེ་ཤི་དང་རྒྱ་གར་སོགས་ལའང་གནོད་སྐྱོན་སླེབས་ཡོད་འདུག་ལ། བོད་ནང་གི་ལྷ་སའི་ལྷོ་ཁ་ས་ཁུལ་གྱི་ལྷོ་བྲག་རྫོང་དང་མཚོ་སྨད་རྫོང་། མཚོ་སྣ་རྫོང་སོགས་སུའང་ས་ཡོམ་གྱི་ཚོར་ཤུགས་དྲག་པོ་བྱུང་ཡོད་པ་དང་། ལྷ་ས་གྲོང་ཁྱེར་དུའང་ས་ཡོམ་འདིའི་ཚོར་སྣང་ཤུགས་ཆེར་བྱུང་ཚུལ་བརྗོད་ཡོད་འདུག ད་ལྟའི་ཆར་ཡང་འབྲུག་ཡུལ་གྱི་ལམ་ཁ་མང་པོ་འགག་ཡོད་པ་དང་། གནས་སྟངས་སྐྱོ་བོ་ཡིན་ཚུལ་བརྗོད་ཡོད་སྟབས། འདི་གའི་གསར་ཁང་གིས་འབྲུག་ཡུལ་ཏུ་ཡོད་པའི་བཙན་བྱོལ་བོད་མིའི་གནས་སྟངས་གང་འདྲ་ཆགས་ཡོད་མེད་ཤེས་རྟོགས་ཆེད་ཐད་ཀར་ཁ་པར་བརྒྱུད་འབྲུག་ཡུལ་དུ་གནས་སྡོད་བཙན་བྱོལ་བོད་མིའི་གཞིས་མགོ་རྡོ་རྗེ་རྒྱལ་པོ་ལགས་སུ་བཀའ་འདྲི་ཞུས་པར། ཁོང་གིས། ཐེངས་འདིའི་ས་ཡོམ་དེ་ཕྱི་ཚེས་ ༢༡ ཉིན་གྱི་ཉིན་གུང་གི་ཆུ་ཚོད་ ༢ དང་སྐར་མ་ ༤༣ ཐོག་བྱུང་བ་དང་། དེ་ཡང་ས་ཡོམ་བྱུང་ཡུལ་གྱི་ས་ཁུལ་གཙོ་བོ་འབྲུག་ཤར་ཕྱོགས་ཀྱི་བཀྲ་ཤིས་སྒང་རྫོང་དང་མོན་སྒང་རྫོང་། ལྷུན་རྩེ་རྫོང་སོགས་རྫོང་ཁག་ ༦ གི་ནང་བྱུང་སྟེ། དེ་རིང་གནས་ཚུལ་སྤེལ་གསལ་ལ་མི་ ༡༣ འདས་གྲོངས་སུ་ཕྱིན་འདུག་ལ། མི་ ༣༥ ལྷག་ལ་རྨས་སྐྱོན་ཚབས་ཆེན་ཕོག་ཡོད་འདུག སྡོད་ཁང་ ༢༠༠ ལྷག་ལ་གཏོར་བཅོམ་ཚབས་ཆེན་བྱུང་སྟེ་ཅི་ཡང་མེད་པའི་གནས་སུ་གྱར་ཡོད་པ་མ་ཟད། སྡོད་ཁང་ ༡༢༣༥ གཏོར་བཅོམ་བྱུང་ཡོད་པ་དང་། སློབ་གྲྭ་ཁག་ ༡༥ ལ་གནོད་སྐྱོན་བཟོས་ཡོད་འདུག དེ་ལྟ་ནའང། འབྲུག་ཡུལ་དུ་ཡོད་པའི་བཙན་བྱོལ་བོད་མིའི་གཞིས་སྒར་འཇིགས་མེད་རབ་བརྟན་གླིང་དང་ཀུན་དགའ་རབ་བརྟན་གླིང་སོགས་གཞིས་གྲོང་ཁག་བདུན་གྱི་མི་སྣ་ ༡༧༠༠ ལྷག་ཡོད་པ་དེ་དག་ལ་ཐེངས་འདིིིའི་དོན་རྐྱེན་ཁྲོད་གནོད་འཚེ་ཅི་ཡང་བྱུང་མེད། རྒྱུ་མཚན་གཙོ་བོ་ནི། ཐེངས་འདིའི་ས་ཡོམ་གྱི་བྱུང་ཡུལ་དང་བར་ཐག་རིང་བའི་རྐྱེན་གྱིས་མ་བྱུང་བ་རེད། ཅེས་དང་། ཁ་སང་འབྲུག་རྒྱལ་པོའི་གཟིམ་དཔོན་ཡིག་ཚང་གི་མི་སྣ་སོགས་ཆེད་དུ་གནོད་འཚེ་ཐེབས་ཡུལ་ཏུ་ཕེབས་ཏེ་གཟིགས་སྐོར་དང་འབྲུག་རྒྱལ་ཁབ་ངོས་ནས་མཐུན་རྐྱེན་གང་ལེགས་སྐྲུན་གྱི་འདུག ཅེས་བརྗོད་བྱུང།
རང་བྱུང་ཁམས་ཀྱི་གཡོ་འགུལ་འདི་འདྲ་ལ་སུས་ཡ་ལེན་བྱེད་ནུས། དཔལ་འབྱོར་ལ་འདོད་རྔམ་ཇི་ཙམ་བྱས་ན་རང་བྱུང་ཁམས་ལ་གོད་ཆགས་དེ་ཙམ་ཆེ་ངེས་རེད།
http://www.facebook.com/video/video.php?v=281979720576#/tsurtem?ref=name
http://www.facebook.com/video/video.php?v=281979720576
༸གོང་ས་མཆོག་གི་བྱིན་རླབས་ཡིན་རྒྱུ་རེད།
རང་བྱུང་ཁམས་ལ་ཡང་ཐུབ་ཚོད་མི་འགྲོ་བ་ད་ནི་དངོས་སུ་མིག་གི་མཐོང་རྒྱུ་འདུག ད་འགྲོ་བ་མི་འདི་ཚོས་སེམས་ཆུང་མ་བྱས་པ་ཡིན་ན། འབྱུང་བ་བཞིའི་གནོད་འཚེ་ལྡོག་ཐུབ་མཁན་ཞིག་ད་ལྟ་བར་དུ་མི་ཡུལ་དུ་ཡོད་ཚོད་བཤད་དཀའ་མོ་ཡིན།
དེས་ན་ལྷ་ཁ་ཕྱོགས་སུ་གནོད་སྐྱོན་འདྲ་བྱུང་ཡོད་དམ། རང་བྱུང་ཁམས་ལ་བྱམས་སེམས་ཡོད་ནི་མ་རེད། རྡ་རམ་ས་ལར་དེ་འདྲ་ས་ཡོམ་འབྱུང་ཨི་ཡོང་མི་ཤེས་མོད་ང་ཚོ་ཚང་མས་ངེས་པར་གཟབ་དགོས།།
མི་ལ་གནོད་པ་མ་བྱུང་ན་བཟང་གི ད་ལོ་ད་རང་བྱུང་ཁམས་ཆེན་མོ་འདི་ཡང་སྨྱོང་བཏང་ནི་འདྲ་ཞིག ག་ས་གང་ནས་ངན་རྐྱང་རྐྱང་གོ་ཡོང་གི
ས་ཡོམ་དེ་འདྲ་རྡ་རམ་ས་ལར་མི་ཡོང་བར་སྨོན།