བོད་དུ་ཕྱི་གླིང་འགྲུལ་བསྐྱོད་པ་ཚོ་འགོག་དགོས་པའི་སྐད་ཆ་ཞིག་ང་ཚོས་བཤད་མྱོང་མེད་ཟེར།
ཟླ་འདིའི་ཚེས་ ༢༥ ཉིན་གསར་ལམ་ཁག་ནས་གནས་ཚུལ་སྤེལ་བ་ལྟར་ན། རེས་གཟའ་ཕུར་བུའི་ཉིན་བོད་ལྗོངས་ཡུལ་སྐོར་འགྲིམ་འགྲུལ་འཛིན་སྐྱོང་ཁང་གིས། ཉེ་ཆར་རྒྱ་ནག་གི་དུས་དྲན་སྲུང་གཙི་དང་འབྲེལ་བའི་ལས་གཞི་ཁག་ལ་འགལ་རྐྱེན་མི་ཡོང་སླད། བོད་ཁུལ་དུ་ཕྱི་གླིང་ཡུལ་སྐོར་བ་འགྲུལ་བསྐྱོད་བྱ་རྒྱུར་བཀག་སྡོམ་བྱས་པའི་དོན་རྐྱེན་དེ་བདེན་པ་མིན་ཚུལ་འགྲེལ་བརྗོད་བྱས་ཡོད་པ་རེད། ལྗོངས་ཡུལ་སྐོར་འགྲིམ་འགྲུལ་འཛིན་སྐྱོང་ལས་ཁང་གྱི་མགྲིན་ཚབ་པ་ལི་ལི་ཤན་གྱི་བཤད་དོན། དེ་འདྲའི་གསལ་བསྒྲགས་ཤིག་ད་བར་བཏང་ཡོད་པ་མ་རེད་ལ། ང་ཚོས་དུས་རྒྱུན་ཏུ་བོད་དུ་འགྲུལ་བསྐྱོད་བྱེད་མཁན་ཕྱི་གླིང་བ་ཚོར་ཕེབས་བསུ་ཞུ་གིན་ཡོད། ད་བར་ང་ཚོས་འགྲིམ་འགྲུལ་ལས་ཁང་གི་ལས་བྱེད་པ་ཚོར་ཕྱི་རྒྱལ་བ་མི་རེ་ངོ་རེའི་འགྲིམ་འགྲུལགྱི་བཀོད་སྒྲིག་དུས་ཐོག་བྱེད་དགོས་པར་བཤད་པ་ལས། ཕྱི་གླིང་ཡུལ་སྐོར་བའི་འགྲུལ་བསྐྱོད་ལག་འཁྱེར་ངོས་ལེན་བྱེད་མི་དགོས་པ་ནམ་ཡང་བཤད་མེད། ལར་ནས་ཡུལ་སྐོར་བ་ཚོ་བོད་དུ་ཕྱོགས་བསྐྱོད་སྐབས་ངེས་པར་དུ་རྒྱ་ནག་ཕྱོགས་ནས་ཆོག་མཆན་ཞུ་དགོས་ཀྱི་ཡོད་པ་རེད་ཅེས་བཤད་ཡོད་པ་རེད།
