དེ་རིང་སུད་སི་བོད་མིའི་གྲོགས་པོ་ཚོགས་པ་དང་སུད་སི་དང་ལི་ཆི་ས་ཊན་བོད་རིགས་སྤྱི་ཚོགས། སུད་སི་བོད་ཀྱི་བུད་མེད་ལྷན་ཚོགས་བཅས་ཀྱི་གོ་སྒྲིག་འོག རྒྱ་ནག་གི་རྒྱལ་བཙུགས་དུས་ཆེན་ཉིན་ངོ་རྒོལ་བྱས་ཡོད་པ་རེད།
སུད་སིའི་བོད་དོན་ལས་འགུལ་བ་རྣམས་ཀྱིས་བཤད་དོན། རྒྱ་ནག་དམར་ཤོག་བཙུགས་པ་ནས་བཟུང་བོད་ལ་གཏུམ་སྤྱོད་ཀྱིས་བཙན་གནོན་བྱས་ལ། བཙན་གནོན་དེའི་རྗེས་ཀྱི་དཔལ་འབྱོར་འཛུགས་སྐྲུན་ཞེས་པའི་སྐབས་སུ་བོད་མི་རྣམས་ཀྱིས་རང་གི་རྒྱལ་ཁབ་ཏུ་མི་རིགས་རང་ནི་དབུལ་ཕོངས་སུ་གྱུར་ཡོད་པ་ཤེས་ལ། རྒྱ་ནག་གཞུང་གི་རྒྱབ་སྐྱོར་འོག་རྒྱ་མི་འབོར་ཆེན་བོད་ནང་ཡོང་སྟེ་བོད་མི་རྣམས་སྤྱི་ཚོགས་ཀྱི་མཐར་འདེད་ཀྱིན་པ་མ་ཟད། རང་གི་ལུང་པ་ནས་གྲངས་ཉུང་མི་རིགས་ཆགས་ཡོད་པ་རེད་ཅེས་དང་། སུད་བོད་གྲོགས་པོའི་ཚོགས་པའི་ཚོགས་གཙོ་སྐུ་ཞབས་སྟག་ཚང་བཀྲ་ཤིས་ལགས་ཀྱིས་བརྗོད་དོན། ང་ཚོས་སུད་སིར་གནས་བཞུགས་སྲིད་དོན་པ་རྣམས་དང་དམངས་གཙོའི་བསམ་བློ་ཡོད་མཁན་རྣམས་ལ་བོད་ཀྱི་གནད་དོན་ཐོག་ཁ་ཡོད་ལག་ཡོད་ཀྱི་རྒྱབ་སྐྱོར་གནང་རྒྱུའི་རེ་སྐུལ་ཞུ་གིན་ཡོད་ལ། སྲིད་དོན་པ་དང་མནའ་འབྲེལ་ལྷན་ཚོགས་ཁག་གིས་བོད་དོན་ལ་རྒྱབ་སྐྱོར་བྱེད་པར་མི་ལྷོད་པ་དང་རྒྱ་ནག་གི་མདུན་ནས་གཉའ་མི་ཞུམ་པའི་རེ་བ་ཡོད་ཅེས་འབོད་སྐུལ་ཞུས་ཡོད་པ་རེད།
