ང་ཚོས་རང་གི་སྲོག་རྩ་ལྟ་བུའི་སྐད་དང་ཡི་གེ་འདིར་དོ་སྣང་མ་བྱས་པ་ཡིན་ན། མ་འོངས་བོད་གཞིས་བྱེས་མཉམ་འཛོམས་ཀྱི་སྐལ་བ་ཞིག་ལྡན་པ་ཡིན་ན་ང་ཚོ་བཙན་བྱོལ་བོད་པ་ཚོ་ངོ་ཚ་དགོས་པའི་གནས་སུ་གྱར་ངེས་རེད་ཟེར།
འདས་པའི་བདུན་ཕྲག་འདིའི་ནང་འདི་གའི་གསར་འགོད་པས་ཉེ་ཆར་བོད་ནས་གསར་དུ་འབྱོར་ཞིང་ཕ་ཡུལ་ཀན་ལྷོ་ཧོར་གཙང་ནས་ཡིན་པའི་བསོད་ནམས་ལགས་སུ་ད་ལྟའི་བོད་ནང་གི་ཛ་དྲག་གི་གནས་སྟངས་ལ་གཞིགས་པའི་བོད་སྐད་དང་བོད་ཡིག་གི་ཉམས་ཆག་སྐོར་ལ་བཀའ་འདྲི་ཞུས་པར། ཁོང་གིས་ཐོག་མར་རང་ཉིད་ངོ་སྤྲོད་དང་འབྲེལ་བརྗོད་དོན། ང་རང་གངས་ལྗོངས་ཤེས་རིག་ནོར་བུའི་གླིང་གི་སྐབས་བཅུ་གཉིས་པའི་མཐར་ཕྱིན་སློབ་མ་ཡིན་ལ། སྔོན་མ་ནས་བོད་སྐད་ཡིག་གི་དར་རྒུད་དང་འཇིགས་ཉེན་ལ་ནམ་རྒྱུན་དོ་སྣང་བྱས་བསྡད་མཁན་ཞིག་ཡིན། ངས་ད་ལྟའི་དུས་རབས་འདི་དང་ང་ཚོའི་མི་རབས་འདིའི་དུས་སྐབས་ཀྱི་བོད་སྐད་ཡིག་གི་ཉམས་རྒུད་གླེང་བ་ཡིན་ན། ཧ་ཅང་ཉག་ཕྲ་བའི་གནས་སུ་གྱར་འདུག་བསམ། ང་རང་བཙན་བྱོལ་དུ་མ་འབྱོར་བའི་ཡར་སྔོན་ང་བོད་ནང་གི་ས་ཁུལ་འགར་སོང་སྟེ། བོད་སྐད་དང་བོད་ཡིག་གི་གནས་སྟངས་སྐོར་ལ་རྒྱུས་ལོན་བྱས་པ་ཡིན། བོད་ནང་ལ་མཚོན་ན། བོད་སྐད་བོད་ཡིག་སྲུང་སྐྱོབ་ཐད་མི་སྒེར་ནས་བཟུང་དོ་སྣང་བྱེད་ཀྱིན་འདུག དཔེར་ན། ལོ་སྔོན་མར་གསེར་རྟ་ས་ཁུལ་ཏུ་མཁན་ཆེན་ཚུལ་ཁྲིམས་བློ་གྲོས་མཆོག་གིས་གངས་ཅན་རིས་མཛོད་ཅེས་བོད་ཡིག་གི་ཚིག་མཛོད་ཅིག་པར་སྐྲུན་བྱས་ཏེ་བོད་ཀྱི་ཐ་སྙད་མང་པོ་དག་བསྒྲིགས་བྱས་ཡོད་པ་དང་། བོད་ནང་དུ་ནུས་པ་མི་དམན་པ་ཞིག་ཐོན་ཡོད་པ་དང་། དེ་བཞིན། གངས་ལྗོངས་ཤེས་རིག་གླིང་ལ་མཚོན་ནའང་སྐབས་དགུ་བ་ནས་བཟུང་ཕ་སྐད་དུང་གི་སྒྲ་དབྱངས་དང་རྒྱུན་བཀོལ་ཐ་སྙད་ཕྱོགས་བསྒྲིགས་སོགས་ཕ་སྐད་ཕྱོགས་ཀྱི་དཔེ་དེབ་གང་མང་ཞིག་སྤྱི་ཚོགས་ལ་བཀྲམས་ཏེ། བོད་རང་གི་ཕ་སྐད་སྲུང་སྐྱོབ་དང་རྒྱུད་འཛིན་ཀྱི་ཐད་ལ་ནུས་པ་གང་ཡོད་བཏོན་དང་འདོན་གྱིན་ཡོད་འདུག་ལ། མཚོ་སྔོན་བོད་སྐད་རླུང་འཕྲིན་དང་བརྙན་འཕྲིན། དེ་མིན་མཚོ་སྔོན་ཕྱོགས་ཀྱི་ས་ཁུལ་གཞན་པ་ཁག་ཅིག་ཏུ་བོད་ཡིག་ལ་དོ་སྣང་ཤུགས་ཆེ་རུ་འགྲོ་བཞིན་པའི་གནས་སྟངས་ཆགས་འདུག དེ་ཡང་གཙོ་བོ། གང་ཟག་སྒེར་བ་དང་སྒེར་གཉེར་སློབ་གྲྭ། དེ་མིན་དགོན་སྡེ་ཁག་ཏུ་དོ་སྣང་ཤུགས་ཆེར་བྱེད་ཀྱིན་ཡོད་པ་ལས། རྒྱལ་གཉེར་སློབ་གྲྭར་མཚོན་ན་ཕ་སྐད་ཕྱོགས་ཀྱི་དོ་སྣང་མེད་པ་དང་། སློབ་སྦྱོང་གི་ཁ་དབུགས་དང་སློབ་ཁྲིད་ཀྱི་སྤུས་ཚད། སློབ་མའི་གྲུབ་འབྲས་སོགས་གང་ཅིའི་ཐད་ནས་ཀྱང་འདུ་ཤེས་བཟང་བོ་ཞིག་ཆགས་ཐུབ་ཀྱིན་མེད་པའི་གནས་སྟངས་དང་དཀའ་ངལ་ཞིག་རང་བཞིན་གྱིས་ཆགས་འདུག ཅེས་ཁོང་གིས་མུ་མཐུད་བརྗོད་དོན། བླ་བྲང་ཕྱོགས་ནས་བཤད་ན་བླ་བྲང་དགོན་པ་དང་ཉེ་བའི་ས་ཁུལ་ཁག་ཅིག་བཟང་བ་ལས། གཞན་པའི་ས་ཁུལ་དུ་དེ་འདྲའི་དོ་སྣང་མེད་པའི་ཚོད་དུ་གནས་འདུག་ལ། ང་རང་དངོས་སུ་ཕྱིན་ས་སྐུ་འབུམ་དགོན་པའི་ཉེ་ཁུལ་གྱི་ས་ཆ་དེ་དག་གི་གནས་སྡོོད་བོད་མི་ཚོས་བསང་ཕུལ་བ་དང་དུང་འབུད་པའི་ཆོས་ལུགས་ཀྱི་ཆོ་ག་ཁག་ཅིག་རྒྱུད་འཛིན་བྱས་པ་ལས། བོད་སྐད་བཤད་མི་ཤེས་པ་དང་བོད་ལྭ་གྱོན་མི་ཤེས་པའི་གནས་སྟངས་ཆགས་འདུག དེ་བཞིན་མཚོ་སྔོན་གྱི་ཞོན་ཧྭ་ས་ཁུལ་དང་བླ་བྲང་གི་ཧོར་གཙང་ཉེ་ཁུལ་སོགས་ས་ཆ་གང་མང་ཞིག་ཏུ་བོད་ཡིག་དང་བོད་སྐད་ཀྱི་དོ་སྣང་མེད་པ་མ་ཟད། བོད་རང་གི་ཕལ་སྐད་ཀྱི་གདངས་ནས་བཟུང་སྟེ་ཉམས་རྒུད་དུ་འགྲོ་བཞིན་པ་གསལ་བོ་རེད། ཅེས་བརྗོད་བྱུང་།
ཡང་ཁོང་གིས། ད་ལྟ་གནས་སྟངས་འདི་ལྟ་བུ་ཞིག་གྱུར་དོན་ཐད་བརྗོད་དོན། ང་རང་གིས་བསམ་ན་ང་ཚོའི་བོད་སྐད་དང་བོད་ཡིག་གི་གནས་སྟངས་འདི་ལྟ་བུ་ཞིག་ཏུ་གྱུར་དོན་གཙོ་བོ། ང་ཚོ་བོད་ཀྱི་ཤེས་ལྡན་པ་དང་གཞི་རིམ་མང་ཚོགས་ཀྱི་བར་ཐག་རིང་བ་དང། དེ་དག་ཕན་ཚུན་ལ་གོ་བརྡ་གསལ་བོ་ཞིག་མ་འཕྲོད་པའི་དབང་གིས་གནས་སྟངས་འདི་ཆགས་པ་རེད་ལ། ལྷག་པར་ཏུ་རྒྱལ་གཉེར་སློབ་འབྲིང་དང་སློབ་ཆེན་གྱི་སློབ་མ། ད་དུང་གྲོང་ཁྱེར་དུ་ཚོང་ལས་གཉེར་བཞིན་པའི་བོད་མི་དེ་དག་གིས་ནམ་རྒྱུན་བསྲེས་ལྷད་ཅན་གྱི་སྐད་བེད་སྤྱོད་བྱས་པ་དང་། དེ་དག་གི་ཤན་ཤུགས་རིམ་བཞིན་སྤྱི་ཚོགས་ཀྱི་གཞི་རིམ་མང་ཚོགས་སུ་སླེབས་ཏེ། ཨག་གསར་ལ་དགའ་བའི་མི་ཚོས་རིམ་བཞིན་དེ་དག་གི་ལད་ཟློས་བྱས་སྟབས། བསྲེས་ལྷད་ཅན་གྱི་སྐད་ཆ་རྒྱུན་འབྱམས་དང་གོམ་ལོབས་སུ་སོང་སྟེ། ད་ལྟའི་ཆར་ས་ཆ་གང་མང་ཞིག་ཏུ་ཕ་སྐད་ངོ་མ་དང་རྒྱ་སྐད་ངོ་མ་གང་ཡིན་དབྱེ་འབྱེད་བྱ་དགོས་བའི་གནས་སུ་ལྷག་འདུག ཅེས་དང་། ད་ལྟའི་བར་ངས་བཙན་བྱོལ་སྤྱི་ཚོགས་ནི་བོད་སྐད་དང་བོད་ཡིག་གི་ཐད་ནས་བོད་ཁུལ་ལས་ལྷག་པའི་དོ་སྣང་དང་རྒྱུད་འཛིན་བྱེད་ཀྱིན་པ་ཞིག་ལ་ངོས་འཛིན་བྱས་པ་ཡིན། འོན་ཀྱང་། ང་རང་འདིར་སླེབས་པ་དང་གནས་སྟངས་དང་གནས་ཚུལ་གང་མང་ཞིག་ཤེས་རྟོགས་བྱུང་རྗེས་བཙན་བྱོལ་སྤྱི་ཚོགས་ཀྱི་བོད་སྐད་དང་བོད་ཡིག་གི་འཇིག་ཉེན་དེ་བོད་ནང་ཁུལ་ལས་ལྷག་པའི་ཛ་དྲག་གི་གནས་སུ་གྱར་འདུག་བསམ་པ་དྲན་སོང་ལ། གལ་སྲིད། ང་ཚོས་རང་གི་སྲོག་རྩ་ལྟ་བུའི་སྐད་དང་ཡི་གེ་འདིར་དོ་སྣང་མ་བྱས་པ་ཡིན་ན། མ་འོངས་བོད་གཞིས་བྱེས་མཉམ་འཛོམས་ཀྱི་སྐལ་བ་ཞིག་ལྡན་པ་ཡིན་ན་ང་ཚོ་བཙན་བྱོལ་བོད་པ་ཚོ་ངོ་ཚ་དགོས་པའི་གནས་སུ་གྱར་ངེས་རེད་ལ། འདི་ལྟ་བུའི་གནས་སྟངས་ཤིག་ཏུ་གྱུར་ཡོད་པ་ང་རང་གི་བློ་ཡུལ་ཏུ་མི་ཤོང་བ་ཞིག་རེད། རྒྱུ་མཚན་ནི་ང་ཚོ་བཙན་བྱོལ་བ་ཆགས་དགོས་དོན་དང་ཆགས་རྐྱེན་སོགས་ལ་གཞིགས་ན་ང་རང་ཉིད་བློ་ཕམ་གྱི་གནས་སུ་ལྷག་སོང། ཅེས་བརྗོད་བྱུང།།
དེ་བདེན་པ་རེད་།དངོས་ནས་བསམ་ཚུལ་ཡག་པོ་འདུག
དེ་བདེན་པ་རེད། དེང་གི་ཆར་ང་རང་ཚོའི་བོད་ཀྱི་སྐད་ཡིག་འདི་བཞིན་བཀོལ་སྤྱོད་བྱེད་མཁན་དཀོན་ད་ུའགྲོ་བཞིན་འདུག་ལ་། བཀོལ་སྤྱོད་བྱེད་མཁན་དེ་ཚོས་ཀྱང་ནན་ཟབ་ཀྱིས་མ་ཡིན་པར། རང་སྣང་གང་ཤར་དང་ཁ་ནས་གང་ཐོན་ཡིན་འདུག་ལ། ལྷག་པར་བོད་སྐད་གཙང་མ་ཞིག་དང་བོད་ཀྱི་བརྡ་སྤྲོད་དང་མཐུན་པ་ཞིག་ཤིན་ཏུ་ནས་དཀོན། ད་དུང་བཙན་བྱོལ་ནང་གི་བོད་མི་མང་དག་ཤིག་ནུབ་ཕྱོགས་ཨ་རིའི་ཡུལ་དུ་རང་ཉིད་ཀྱི་ཁྱིམ་ཚང་རྒྱུ་ནོར་ཡོངས་རྫོགས་གཏའ་མར་བཞག་ནས་བསྐྱོད་ཐཱུབ་རྒྱུ་ཐབས་ཤེས་སྣ་ཚོགས་བྱེད་ཅིང། ནུབ་ཕྱོགས་ཨ་རིའི་ཡུལ་དུ་སྐྱེས་ཤིང་ཚར་ལོངས་བྱུང་བའི་བོད་ཕྲུག་རྣམས་ཕ མ་གཉིས་བོད་པ་རེད་ཟེར་བ་མ་གཏོགས། དོན་གྱི་ཐོག་བོད་པའི་སྐད་དང་ལོ་རྒྱུས། ཡུལ་སྲོལ་གོམས་གཤིས་ཐཱུན་མོང་མ་ཡིན་པ་རྣམས་ཡོངས་སུ་དོར་ཞིང་། མགོ་སེར་རྣམས་ཀྱི་བྱེད་སྟངས་བྱེད་ཀྱི་ཡོད་ལ། བོད་ཡིག་མཐོང་དུས་ཞེ་མེར་ལངས་ཤིང། བོད་ཡིག་སྦྱོང་དུས་མགོ་བོ་ཡང་ན་ཡི་ཡོད། དེར་བརྟེན་ངེད་ཚོ་ལོ་གཞོན་སྤུན་གྲོགས་རྣམས་ཀྱི་དུས་ནས་དུས་སུ་རང་ཉིད་ཀྱི་བུ་ཕྲུག་དང་སྤུན་གཉེན་ཚན་རྣམས་ཀྱི་བོད་ཀྱི་སྐད་ཡིག་དང་བྱམས་སྙིང་རྗེའི་རང་བཞིན་ལྡན་པའི་ཐཱུན་མིན་གྱི་གཤིས་ཀ་འདི་བཞིན་བསླབ་དགོས་པ་ཤིན་ཏུ་ནས་གལ་ཆེན་ཞིག་ཏུ་རྩིས་ནས་ལག་ལེན་བསྟར་རོགས་ཞེས་ཞུ་རྒྱུ་ཡིན།
བོད་ཀྱི་སྐད་ཡིག་རྒྱལ་ལོ། བོད་རྒྱལ་ལོ།
ཧོར་གཙང་བསོད་ནམས་ལགས་་་་་་་་་་་སྐུ་ཉིད་བཙན་བྱོལ་དུ་འབྱོར་བ་ལ་སྙིང་དབུས་ནས་དགའ་བསུ་ཡོད་་་་་་་་་སྐུ་ཉིད་ལ་ད་ལྟ་བོད་སྤྱི་སེམས་སླད་མེད་ཞིག་འདུག་པ་དེ་ཡང་དབྱིན་དཀྲུག་གྱི་ལས་དོན་གཉེར་བཞིན་པའི་ཨ་མདོའི་སྤྱི་མཐུས་གྱི་ཁོངས་ནས་བསྟན་འཛིན་མགོན་པོ་སོགས་ཀྱི་གཞན་དབང་དུ་མ་སོང་བ་དྲངས་བདེན་གྱི་ལམ་ནས་གཞིས་བྱེས་བོད་མིའི་རང་གཤིས་ངོམ་ཐུབ་པ་བྱེད་རྒྱུའི་རེ་བ་ཞུ་
བོད་ཡིག་བོད་སྐད་བོད་མིའི་སྲོག་རྩ་ཡིན་ཞེས་དེང་སང་ཕལ་ཆེར་བརྒྱད་བཅུའི་རྒད་པོ་མན་ཆད་དང་ལོ་བརྒྱད་བྱིས་པ་ཡིན་ཆད་ཀྱི་མ་ཎི་བཞིན་བགྲང་གི་ཡོད་པ་འདྲ། ཡིན་ན་མགོ་སེར་དང་འགྲོག་ན་བོད་སྐདབརླག་། སྐྲ་སེར་དང་ཐུག་ན་བོད་ཡིག་བརྗེད། ད་ཡིན་ན་ཤུ་་་་་་་་་་་་་་་་་་་་་་་་་་་་་་་་་་་
ཧོར་གཙང་བསོད་ནམས་ལགས་སུ་བཀྲ་ཤིས་བདེ་ལེགས་ཡོད། དངོས་གནས་ཁོང་གི་བསམ་ཚུལ་དེ་ཡག་པོ་རེད་འདུག བོད་མི་རིགས་ཟེར་བ་འདི་མུ་མཐུད་དེ་གནས་ཐུབ་མི་
ཐུབ་ཟེར་བ་དེ་གཙོ་བོ་གཅིག་སྐད་ཡིག་གཉིས་ཀ་ཡིན་པ་རེད། མ་འོངས་པར་ང་ཚོའི་མི་
རིགས་ཀྱི་ཆས་གོས་སྤྱོད་ལམ་ཇི་ལྟ་བུ་ཞིག་ཆགས་རུང་སོ་སོའི་སྐད་ཡིག་གི་རང་རྐང་མ་ཉམས་པར་གནས་ཐུབ་ཚེ་བོད་མི་རིགས་འདི་ལོ་སྟོང་གི་བར་དུ་རྒྱ་མའི་འོག་ཏུ་གནས་
སྡོད་བྱེད་དགོས་བྱུང་ན་ཡང་བོད་ཅེས་མཛུབ་མོ་བཙུགས་ས་ངོ་མ་དེ་མུ་མཐུད་དེ་
གནས་ཡོད་པ་རེད། དེ་མིན་སྐད་ཡིག་ཉམས་པའི་ཚར་བའི་རྗེས་ལ་ང་ཚོ་རང་དབང་ཞིག་ཐོབ་པའི་དབང་དུ་བྱས་ན་ཡང་རྒྱ་མི་རིགས་དང་དབྱེ་འབྱེད་མེད་པ་ཞིག་ཏུ་གྱུར་
ཟིན་པ་རེད། སྐད་ཡིག་སྲུང་སྐྱོབ་ཀྱི་ཐབས་ལམ་འདི་བོད་མི་གཞིས་བྱེས་གཉིས་ཀའི་འབད་བརྩོན་ངེས་བར་དུ་བྱེད་དགོས་པ་གལ་ཆེན་པོ་ཡིན་པ་ནི་ཚང་མས་ཤེས་བཞིན་པ་རེད། ཡིན་ན་ཡང་དེའི་ཐབས་ལམ་གང་འདྲ་བྱེད་དགོས་མིན་ལ་བསམ་མནོ་གཏོང་རྒྱུ་
ལས་གལ་ཆེ་བའི་ལས་ཀ་ཞིག་བོད་པ་མཚོན་ན་མེད་པ་ལྟ་བུ་ཆགས་ཡོད་པ་རེད།
ང་ཚོས་དོན་མེད་འཐེན་ཁྱེར་དང་ཕྱོགས་ཞེན་གྱི་རིགས་འདི་དོར་ནས་རང་རང་གི་སྒྲུབ་ཐུབ་རྒྱུའི་ལས་ཀ་ཞིག་ལ་འབད་བརྩོན་བྱེད་རྒྱུ་ཡིན་པ་མ་གཏོགས་སོ་སོའི་མི་ནུས་པའི་ལས་ཀ་ཞིག་དང་ཡོང་རྒྱུ་མེད་པའི་སྐད་ཆ་ཞིག་བཤད་བསྡད་ན་གང་ཡང་ཕན་གྱི་མ་རེད། འོན་ཀྱང་སྐད་ཡིག་སྲུང་སྐྱོབ་འདི་གཙོ་བོ་བོད་ནང་གི་ནུས་ཤུགས་འདོན་དགོས་པ་ལས་བཙན་བྱོལ་ནང་ནས་དཀའ་ལས་ཁག་པོ་རེད། བཙན་བྱོལ་བོད་མིའི་གནས་ཡུལ་མིའི་ལུང་པ་ཡིན་ཙང་གནས་ཡུལ་རྒྱལ་ཁབ་དང་ཡུལ་མི་དུང་ཕྱུར་མང་པོའི་ནང་དུ་བོད་པ་གྲོང་སྡེ་རེ་ཟུང་གི་སྐད་ཡིག་ནི་བེད་སྤྱོད་མེད་པ་དང་ཁང་པའི་ཕྱི་ལོག་ལ་སླེབས་དུས་ནས་སྐད་ཡིག་འདི་ལ་བདག་པོ་རྒྱག་མཁན་མེད་པ་ལྟ་བུ་ཆགས་ཡོད་པ་རེད། རྒྱུ་མཚན་དེ་ལྟ་བུས་གནས་སྟངས་འོག་བཙན་བྱོལ་བོད་མི་ལ་ཐུགས་ཁག་ཡོད་མ་རེད། གཞོན་སྐྱེས་མང་པོ་ཞིག་གིས་བོད་སྐད་བོད་ཡིག་ལ་དེ་ཙམ་མོས་པ་མེད་པའི་རྒྱུ་མཚན་གཙོ་གཅིག་དེ་རེད། བོད་ནང་ལྟ་བུ་ལ་མཚོན་ན་གང་ལྟར་ཡང་བོད་མི་ས་ཡ་དྲུག་གནས་སྡོད་བྱེད་སའི་ལུང་པ་ཞིག་ཡིན་དུས་བོད་སྐད་དང་བོད་ཡིག་གི་འཁོར་ཡུག་མི་དམན་པ་ཙམ་ཞིག་
ཏན་ཏན་ཡོད་པ་རེད། བོད་ནང་ནས་ནུས་པ་གཙོ་བོ་འདོན་དགོས་པ་རེད་ལ་བོད་པའི་སྐད་ཡིག་གི་འཁོར་ཡུག་གང་མང་མང་ཞིག་བསྐྲུན་པའི་ཐབས་ཤེས་བྱེད་དགོས་པའི་དུས་སུ་བབ་ཡོད་པ་རེད།
སྐུ་ཉིད་ལ་བདེ་ལེགས་ཞུ
སྐུ་ཉིད་བཙན་བྱོལ་དུ་འབྱོར་བ་ལ་སྙིང་དབུས་ནས་དགའ་བ་ཡིན། རང་དབང་གི་ལུང་བ་རུ་འབྱོར་བ་རེད། ད་ནི་སྐུ་ཉིད་ཀྱིས་གནད་འགག་མི་ཉུང་བ་ཞིག་གསུངས་པ་དེ་བཞིན་དུ། རང་ཉིད་བཙན་བྱོལ་བ་ཞེས་པའི་མིང་འདི་ཐོག་ཚར་བ་སེམས་སུ་བཟུང་དེ་འབད་རྒྱུ་དེ་ནི་བདག་གི་རེ་སྐུལ་ཡིན།
སྐུ་ཉིད་ཀྱིས་གསུངས་པ་དེ་དག་ནི་དངོས་འབྲེལ་ཆགས་ཡོད་པ་རེད། ད་ནི་དེ་དག་ལ་འགྱུར་བ་ཞིག་གཏོང་ཐུབ་མཁན་དང་འགྱུར་བ་གཏོང་རྒྱུར་འུ་ཅག་བོད་མི་ཡོད་དོ་ཅོག་ལ་འགན་ཞིག་ཡོད་པ་རེད་ལགས།