ཨོ་བྷ་མའི་ངར་སློང་གི་ཁྱད་ཆོས། འཇིགས་མེད་བློ་གྲོས།

ཨོ་བྷ་མར་རྒྱལ་སྤྱིའི་གཞོན་སྐྱེས་ལ་སེམས་ངར་སློང་བའི་ཁྱད་ཆོས་མང་།

ངས་འདིར་སྤྲོ་སྣང་སློང་བའི་གནས་ཚུལ་གཉིས་དཀྱུས་གཅིག་ལ་བཤད་རྒྱུ་ཡིན། ད་ལན་ཨོ་བྷ་མ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་གཏན་འཁེལ་བའི་གནད་དོན་དེ་གཅིག་ཡིན། སྤྱི་ཚོགས་ནང་གསར་འགྱུར་འདི་ཧོབ་སྟེ་ཐོན་པ་དང་མང་པོ་ཞིག་འདྲོག་འགོ་ལངས་གྲབས་བྱེད་ཀྱིན་འདུག ཞིབ་ཚགས་ཀྱིས་བསམ་ན་སྤྲོ་སྣང་དང་སེམས་ངར་སྐྱེ་དགོས་པའི་གནད་དོན་ཞིག་ལས་འདྲོག་འགོ་ལངས་དགོས་པའི་གནད་དོན་ཞིག་ཕལ་ཆེར་མེད་ངེས་ཡིན།   འོན་ཀྱང་ཨ་རིའི་དམག་དོན་གོ་ལག་ཀྱི་བཟོ་གྲྭ་ཆེན་པོ་དེ་ཚོའི་འབྱོར་བདག་གྲོད་ལུག་པའི་རིགས་ལ་གནས་ཚུལ་འདི་ཁོང་ཁྲོ་སློང་རྐྱེན་ཞིག་ཏུ་གྱུར་ངེས་གཏན་རེད། གང་ཡིན་ཟེར་ན་སྲིད་འཛིན་སྔོན་མ་རྣམས་ཀྱི་སྲིད་འཛིན་ལས་ཐོག་སྐབས་རྒྱུན་སྲོལ་ལྟར་ཁ་ཐག་རིང་སའི་ལུང་པ་ཞིག་ཏུ་བསྙད་འདོགས་ཀྱི་རྒྱུ་རྐྱེན་སྙིང་རྗེ་པོ་དེ་འདྲ་བཙལ་ནས་དམག་འཁྲུགས་རེ་སློང་སྲོལ་ཡོད་པ་ལྟར་ད་ལན་ཨོ་བྷ་མས་ཞི་བདེའི་དེད་དཔོན་གྱི་མིང་བྱང་འདིའི་འོག་ནས་གཡུལ་འགྱེད་ཀྱི་འུར་ཟིང་ཞིག་སློང་དཀའ་བ་ཡིན་སྟབས་ཁོང་ཚོའི་ཚོང་ལས་ཀྱི་འགྲོ་སྒོ་ཞིག་འདི་ལྟར་འཇམ་ཐིང་ཐིང་གིས་སྒོ་བརྒྱབ་དགོས་པར་གྱུར་པས་རེད།

དེ་བཞིན་ཨོ་བྷ་མ་རང་ཉིད་དང་ཕོ་བྲང་དཀར་པོའི་ལས་སྣེ་བ་མང་དག་ཅིག་ཀྱང་ཨི་རག་དང་ཨབ་གྷན་གྱི་དམག་ཐབས་ཐད་བྱ་དཀའ་བྱེད་གཏད་ཀྱི་དཀའ་ཁག་ཅིག་གི་ནང་ལྷུངས་སུ་བཅུག་ཡོད་པར་ངོས་འཛིན་བྱས་ཆོག ལས་དོན་གྱི་གྲུབ་འབྲས་ཀྱི་ཕྱོགས་ནས་བཤད་ན་ཨོ་བྷ་མར་ཞི་བདེའི་དེད་དཔོན་གྱི་མཚན་བྱང་འདི་སྔ་དྲགས་ཐག་ཆོད་པ་དངོས་ཡོད་ཡིན། འོན་ཀྱང་གྲུབ་འབྲས་ཀྱི་གནད་དོན་དེ་ལས་འབྱུང་འགྱུར་གྱི་ཁོ་པའི་གོམ་འགྲོས་བསྟེན་སྟངས་དེ་གལ་ཆེ་བ་ཡིན་སྟབས་ད་ལན་གྱི་གཟེངས་རྟགས་འདིར་འཇིག་རྟེན་ཞི་བདེར་འཁྲིད་པའི་ཁྱད་ནུས་ལྡན་ལ། ད་ལན་གྱི་གཟེངས་རྟགས་འདིར་ཁོར་ཡུག་དྭངས་གཙང་བཟོ་བའི་ཁྱད་ནུས་ལྡན་ཡོད། སྡོམ་ཚིག་གིས་བཤད་ན་ཞི་བདེའི་དེད་དཔོན་གྱི་མཚན་བྱང་འདིས་ཨོ་བྷ་མའི་ལས་དོན་གང་ལ་ཡང་སྟངས་འཛིན་བྱེད་ངེས་ཡིན་ཅིང་ཨོ་བྷ་མས་ཀྱང་མིང་བྱང་འདི་གདོང་ལ་བཏགས་ནས་རྒྱལ་སྤྱིའི་མི་མང་གི་མིག་མདུན་ནས་ངོ་ཚ་ཉོ་ངེས་ཀྱི་ལས་དོན་ཞིག་བསྒྲུབ་ཐུབ་ཀྱི་མ་རེད།

བཤད་སྟངས་དང་ལས་སྟངས་འགའ་རེས་ཀྱང་རྒྱལ་སྤྱིའི་སྤྱི་ཚོགས་ལ་ཡོ་འཁྱོམ་གཏོང་བའི་ནུས་ཤུགས་ཡོད་མཁན་གྱི་མི་སྣ་ཞིག་ནོ་བེལ་ཞི་བདེའི་གཟེངས་རྟགས་ཚོགས་ཆུང་གིས་གུས་བཀུར་གྱི་ལམ་ནས་འདི་ལྟར་དམ་ལ་བཏགས་ཤིང་། ཁོང་ཚོའི་རྣམ་དཔྱོད་ཀྱི་ཐབས་འཕྲུལ་འདིས་རྒྱལ་སྤྱིའི་སྤྱི་ཚོགས་ལ་འཆར་སྣང་གསར་པ་ཞིག་དང་ཁོར་ཡུག་གསར་པ་ཞིག་བསྐྲུན་འགོ་བརྩམས་པར་ངོས་འཛིན་བྱེད་ཆོག

དུས་རབས་ཉི་ཤུ་པ་དེ་ཧིཌ་ལར་དང་སི་ཏ་ལན།   མའོ་ཙེ་ཏུང་སོགས་ཀྱི་སྣེ་འཁྲིད་འོག་ཏུ་ཤོར་ཏེ་འཇིག་རྟེན་གྱི་མི་རྣམས་ཀྱིས་ལྷ་སྒྲུང་དང་ཆོས་ལུགས་ཀྱི་གསུང་རབ་ཏུ་འཁོད་པའི་དམྱལ་བའི་སྡུག་བསྔལ་དྲག་པོ་དེ་རང་གི་ལུས་སེམས་ཀྱི་ཚོར་བ་ངོ་མས་དངོས་སུ་མྱངས་ཤིང་།  དུས་རབས་ཀྱི་དགུན་ཟླ་གྲང་མོ་འདིའི་ངར་ཟིལ་ད་ལྟ་ཡང་ཡལ་མེད།

འོན་ཀྱང་དུས་རབས་ཉེར་གཅིག་པ་འདིའི་སྣེ་འཁྲིད་པའི་གྲལ་ཏུ་ད་ལྟའི་ཨོ་བྷ་མ་ཁོང་གིས་ཤུངས་རྐྱེན་ཆེས་ཆེ་བའི་གནས་བབ་ཀྱི་ཐོག་ནས་འགྲེངས་ཡོད་ཅིང་དུས་རབས་འདི་ཉིད་ཁ་ཕྱོགས་གང་དུ་འགྱུར་མིན་ཡང་ཁོང་ཚོའི་བསམ་སྟངས་དང་ལས་སྟངས་ལ་རག་ལས་པ་རེད།  

འཛམ་གླིང་ཤར་ནུབ་ཀྱི་འབྱུང་འགྱུར་གྱི་ཁ་ལོ་སྐོར་མཁན་གཞོན་ནུ་ཁྲི་ཁྲག་མང་པོའི་སེམས་ཁོང་དུ་ཐེངས་འདིའི་ཨོ་བྷ་མའི་གཟེངས་རྟགས་འདིས་རྒྱལ་སྤྱིའི་ནང་དོན་དམ་གྱི་ཆབ་སྲིད་པ་ཞིག་གི་གནས་བབ་གསར་པ་ཞིག་དང་ཆབ་དཔལ་རིག་གསུམ་གྱི་ལས་དོན་ཐད་ཀྱི་རིན་ཐང་གསར་པ་ཞིག་ངོས་འཛིན་བྱེད་མགོ་བརྩམས་ཡོད་པར་ཚོད་དཔག་བྱེད་ཐུབ།

འདིས་དུས་རབས་ཉེར་གཅིག་པའི་ཁ་ཕྱོགས་ཕུག་བསམ་ལྡན་པའི་ཕྱོགས་སུ་བསྒྱུར་བར་སྐུལ་འདེད་རླབས་ཆེན་བྱས་ཡོད།
དེར་བརྟེན་ང་ཚོས་འདྲོགས་འགོ་ལངས་རྒྱུའི་ཚབ་ལ་དགའ་སྤྲོའི་ཐལ་མོ་བརྡེབ་དགོས་པ་མ་ཡིན་ནམ།   

གནས་ཚུལ་གཉིས་པ་དེ་ང་ཚོའི་བོད་རིགས་གཞོན་སྐྱེས་བློ་བཟང་སེང་གེ་ཉིས་སྟོང་བཅུ་གཅིག་ལོའི་བཀའ་ཁྲིར་བསླེབ་རྒྱུའི་རེ་བ་ཡོད་པ་འདི་ཡིན། ང་ཚོ་རྟེན་འབྲེལ་ལ་གལ་ཆེར་བརྩི་བའི་རྒྱུན་སྲོལ་ཡོད་པའི་མི་རིགས་ཤིག་ཡིན་པའི་ཆ་ནས་བཤད་ན་ཨོ་བྷ་མ་དང་བློ་བཟང་སེང་གེར་སློབ་སྦྱོང་བྱེད་ཡུལ་དང་ཆེད་ལས་ཀྱི་ངོ་བོ། གཤིས་ཀའི་འཁྱེར་ཕྱོགས་སོགས་ཆ་གང་ཐད་ནས་འདྲ་བའི་ཆ་ཧ་ཅང་མང་སྟབས་ཨོ་བྷ་མའི་རླུང་རྟའི་འཕུར་ཤུལ་ནས་ཁོང་གི་རླུང་རྟ་དང་སྙན་གྲགས་ཀྱང་མཉམ་གཅིག་ཏུ་རྒྱས་རྒྱུའི་རྟེན་འབྲེལ་ཡོད་པར་བརྩི་ཆོག

ཉིས་སྟོང་བཅུ་གཅིག་ནི་མི་རབས་རྙིང་པ་དང་གསར་པའི་དབར་ཆབ་སྲིད་ཀྱི་འགན་དབང་རྩིས་སྤྲོད་རྩིས་ལེན་གྱི་དུས་སྐབས་ཡིན།

ཉིས་སྟོང་བཅུ་གཅིག་ནི་མི་རབས་གསར་པས་བོད་པའི་གནད་དོན་རྒྱལ་སྤྱིའི་ཐོག་གསོན་པོར་རྒྱུན་ཉར་ཐུབ་མིན་ཐད་ཚོད་ལྟ་ཐེངས་ཤིག་བྱེད་རྒྱུའི་གོ་སྐབས་ཡིན།

ཉིས་སྟོང་བཅུ་གཅིག་ནི་རང་གི་སྲོལ་རྒྱུན་རིག་གཞུང་དང་བསམ་བཞིན་དང་བསམ་བཞིན་མ་ཡིན་པའི་ཐོག་ནས་ཁ་ཐག་ཇེ་རིང་དུ་འགྲོ་བའི་མི་རབས་གསར་པས་ཕ་མེས་ཀྱི་གོམས་སྲོལ་རྒྱུན་ཉར་ཐུབ་མིན་ཐད་ཚོད་ལྟ་ཐེངས་གཅིག་བྱེད་པའི་དུས་སྐབས་ཤིག་ཡིན།
ཉིས་སྟོང་བཅུ་གཅིག་ནི་རྒྱ་གཞུང་གིས་ང་ཚོའི་མི་རབས་རྒན་པ་རྫོགས་ཤུལ་ནས་བོད་པའི་གནས་ཚུལ་ཡལ་འགྲོ་ཟེར་བའི་དམའ་འབེབ་ལ་ལན་འདེབས་ཚ་པོ་ཞིག་བརྒྱག་རྒྱུའི་དུས་སྐབས་ཡིན།

ཉིས་སྟོང་བཅུ་གཅིག་ནི་སྲོལ་རྒྱུན་གྱི་ལྟ་སྟངས་དང་འབྲེལ་བའི་ཆབ་དཔལ་རིག་གསུམ་གྱི་ལམ་སྲོལ་ལ་ཏོག་ཙམ་མགོ་གནོན་བྱས་ཏེ་རྒྱལ་སྤྱིའི་སྤྱི་ཚོགས་ནང་བོད་བཙན་བྱོལ་གཞུང་ངོས་ལེན་ཡོང་བའི་ལས་དོན་ཤུགས་ཆེར་སྤེལ་རྒྱུའི་དུས་སྐབས་ཡིན།

ཉིས་སྟོང་བཅུ་གཅིག་ནི་ངེས་གཏན་མེད་པའི་རྒྱ་གར་ནང་གི་གཞིས་ཆགས་ཁག་སྲ་བརྟན་རྒྱུན་གནས་ཟེར་བའི་མཁྲེགས་འཛིན་དེ་ལྷོད་དུ་བཏང་ནས་ཨ་རིའམ་དེ་མིན་གྱི་ཡོ་རོབ་ཀྱི་ཡུལ་གྲུ་ཞིག་ཏུ་བོད་པའི་ངོ་བོ་རྒྱུན་སྲུང་ཐུབ་ཆེད་གཞིས་ཆགས་སམ་བོད་པའི་གྲོང་སྡེ་ཞིག་གསར་བསྐྲུན་བྱེད་པའི་ལས་དོན་ཤུགས་ཆེར་སྤེལ་རྒྱུའི་དུས་སྐབས་ཡིན།
 
ཉིས་སྟོང་བཅུ་གཅིག་ནི་ཨ་སྒོར་དང་ཡོ་སྒོར་གསོག་མཁན་རྣམ་པས་ཀྱང་རང་གི་ལས་དུས་ལས་དགོངས་པ་ཞུས་ཏེ་འོས་ཤོག་བླུག་ཏུ་འགྲོ་རྒྱུའི་དུས་སྐབས་ཡིན།

ཉིས་སྟོང་བཅུ་གཅིག་ནི་རི་ཁྲོད་ཀྱི་སྒོམ་ཆེན་པ་རྣམ་པས་ཀྱང་ཡུད་ཙམ་ཏིང་འཛིན་ལས་བཞེངས་ཏེ་འོས་ཤོག་བླུག་ཏུ་ཕེབས་རྒྱུའི་དུས་སྐབས་ཡིན།

ཉིས་སྟོང་བཅུ་གཅིག་ནས་བཅོ་ལྔའི་བར་གྱི་དུས་ཡུན་ནང་རང་རེའི་སྲོལ་རྒྱུན་རིག་གཞུང་ལ་རེག་དུག་གི་ནད་གཞི་འགོས་རྒྱུའི་ཉེན་ཚབས་ཤིག་མེད་སྟབས་ཐེངས་དེའི་བཀའ་ཁྲིར་རང་གི་རིག་གཞུང་ལ་རྒྱུས་མངའ་ཡོད་པ་དང་བོད་ཡིག་ཤེས་མཁན་ཞིག་དགོས་པ་ཞེས་པའི་བློ་ཐུང་གི་ཁྱད་ཆོས་དེ་ཚོ་ཚང་དགོས་པའི་མཁྲེགས་འཛིན་མ་བྱེད་རོགས།