ན་གཞོན་གསུམ་འཛིན་བཟུང་།

ཟླ་མགོ་འདིར་ཁམས་སོག་རྫོང་ནས་འཇུས་པའི་ན་གཞོན་གསུམ་གར་སོང་ཆ་མེད་དུ་གྱུར་འདུག

མིང་བརྗོད་འདོད་མེད་པ་ཞིག་གིས་ནང་ནས་གནས་ཚུལ་མཁོ་སྤྲོད་བྱས་དོན། ཕྱི་ཟླ་ ༡༠ པའི་ཚེས་ ༡ ཉིན་ཏེ། རྒྱ་ནག་གི་རྒྱལ་སྟོན་དུས་ཆེན་ཉིན། ཁམས་སོག་རྫོང་ར་རྟ་གྲོང་ཚོ་ནས་ཡིན་པའི་རང་ལོ་ ༢༥ སོན་པའི་རྒྱལ་སེང་དང་། རང་ལོ་ ༢༤ སོན་པའི་ཉི་མ་དབང་ཕྱུག རང་ལོ་ ༢༥ སོན་པའི་ཡེ་ཤེས་ནམ་མཁའ་བཅས་ན་གཞོན་གསུམ་རྒྱ་གཞུང་གིས་འཛིན་བཟུང་གིས་ནག་ཆུ་ས་ཁུལ་དུ་ཁྲིད་ནས་ད་ལྟ་གར་སོང་ཆ་མེད་དུ་གྱུར་ཡོད་འདུག  ཁོང་གསུམ་ནི་རྒྱུན་དུ་དྲ་རྒྱ་བལྟ་ཀློག་བྱེད་མཁན་གྱི་གྲས་ཡིན་སྟབས་རྒྱ་གཞུང་གིས་ཁོང་གསུམ་གྱི་ཟིན་བྲིས་དང་།  ཁེའུ་ཁེའུ་དྲ་ཐོག་གླེང་མོལ་སོགས་ཀྱི་ནང་དུ་༧གོང་ས་མཆོག་གི་སྐུ་པར་དང་བཀའ་སློབ་བཅུག་ཡོད་པ་དང་། དེ་བཞིན་ཕྱིའི་རྒྱལ་ཁབ་ཁག་ཏུ་འབྲེལ་བ་འདུག་ཚུལ་གྱི་ཉེས་མིང་བཏགས་ནས་འཛིན་བཟུང་བཙན་འཁྲིད་བྱས་ཡོད་པ་མ་ཟད། ཁོང་གསུམ་གར་ཡོད་གང་ཁྲིད་ཀྱི་གནས་ཚུལ་ཅི་ཡང་ཕྱིར་བསྒྲགས་མ་བྱས་པར་བརྟེན་ནང་མི་སྤུན་མཆེད་རྣམས་ཀྱིས་ཁོང་གསུམ་གྱི་ད་ལྟའི་གནས་སྟངས་ཤེས་རྟོགས་བྱ་ཐབས་བྲལ་་ཡོད་པ་རེད།

ཉེ་ལམ་སོག་རྫོང་ཁུལ་དུ་རྒྱལ་གཅེས་ཆོས་གཅེས་ཀྱི་བསམ་བློའི་སློབ་གསོ་ཟེར་བ་ཤུགས་ཆེ་རུ་བཏང་ནས། གྲོང་གསེབ་ཁག་ལ་ཉིན་ལྟར་ཚོགས་འདུར་ཡོང་དགོས་པའི་བཙན་བཀའ་བཏང་ནས་ཞིང་འབྲོག་གི་ལས་ཀ་འཐུས་ཤོར་ཡོང་གིན་ཡོད་པ་མ་ཟད། རྫོང་ཐོག་སོགས་ཡར་མར་དུ་འགྲོ་སྐབས་སུ་ངོ་སྤྲོད་ལག་འཁྱེར་ཡོད་མེད་ཞིབ་བཤེར་བྱས་ཏེ་མང་ཚོགས་ལ་སུན་གཙེར་དང་དམ་དྲག་ཆེན་པོ་བྱེད་བཞིན་པ་དང་། ལྷག་པར་དུ་དྲ་རྒྱའི་བརྒྱུད་ལམ་ཁག་ལ་དམ་དྲག་དང་སྟངས་འཛིན་ནན་པོས་སྐོར་གཡེང་བྱེད་ཀྱིན་ཡོད་འདུག  དེ་བཞིན་སོག་ཙན་དན་དགོན་པའི་གྲྭ་མང་རྣམས་ལོ་ལྟར་དབྱར་གནས་གྲོལ་རྗེས་སུ་སྤྲོ་གསེང་གཏོང་བའི་ལུགས་སྲོལ་སྔར་ནས་ཡོད་ཀྱང་། ད་ལོ་སྤྲོ་གསེང་དེ་གཏོང་བཅུག་མེད་པ་མ་ཟད། གུང་སེང་དུའང་མ་བཏང་བར་ཉིན་ལྟར་རྒྱལ་གཅེས་ཆོས་གཅེས་སློབ་གསོའི་ཚོགས་འདུ་འཚོགས་བཅུག་སྟེ་དམ་དྲག་ཤུགས་ཆེར་བྱེད་བཞིན་ཡོད་འདུག