རྒྱ་ནག་འཐབ་ཕྱོགས་གཅིག་གྱུར་གྱི་འབྲེལ་ཡོད་ལས་བྱེད་ནས་་ཕྱི་ཕྱོགས་ཀྱི་གསར་འགོད་པར་རྒྱ་བོད་འབྲེལ་མོལ་བསྐྱར་གསོ་དགོས་ན་བོད་ཕྱོགས་ནས་དོན་ཚན་གསུམ་ཁས་ལེན་དགོས་ལུགས་བཤད་ཡོད་པ་རེད།དེའི་ཁ་གཏད་དུ། བཙན་བྱོལ་བོད་གཞུང་གིས་རྒྱ་ནག་ལ་དུས་ཚོད་ནར་འགྱངས་བྱེད་རྒྱུའི་ཀུན་སློང་ལས་བོད་དོན་ཐག་གཅོད་བྱེད་པའི་ལྷག་བསམ་མེད་ཚུལ་བཤད་ཡོད་པ་རེད།
རྒྱ་ནག་འཐབ་ཕྱོགས་གཅིག་གྱུར་ཁང་གི་འགན་འཛིན་གཞོན་པ་ཀྲའོ་ཝེ་ཆོན་གྱིས་ད་ལོ་ཟླ་ ༩ པའི་ཚེས་ ༢༢ ཉིན་འཇར་མན་གྱི་ focus གསར་ཤོག་གིས་བོད་དོན་དང་ཏཱ་ལའི་བླ་མའི་སྐོར་ནས་དྲིས་པའི་བཅར་འདྲི་དང་ལེན་བྱས་པ་དེའི་གཏམ་གླེང་གི་ནང་དོན་གཙོ་བོ་དེ་ཕྱི་ཚེས་ ༡༥ ཉིན་ཀྲུང་གོའི་བོད་ལྗོངས་ཆ་འཕྲིན་ལྟེ་གནས་ཞིབ་ཕྲར་བཀོད་ཡོད་པ་རེད།
ཀྲའོ་ཝེ་ཆོན་གྱིས་རྒྱ་བོད་གཉིས་ཀྱིས་འབྲེལ་མོལ་དེ་བསྐྱར་དུ་སྒོ་ཕྱེ་ཆོག་གི་རེད། ཡིན་ཡང་ང་ཚོས་ཏཱ་ལ་བླ་མ་ཁོ་ནའི་མདུན་ལམ་ཆེད་གྲོས་བསྡུར་བྱེད་རྒྱུ་ཡིན་ཟེར་ལ། ཁོས་འབྲེལ་མོལ་བསྐྱར་གསོ་བྱེད་རྒྱུར་ཆ་རྐྱེན་གསུམ་བཏོན་སོང་།
ཆ་རྐྱེན་དང་པོ་ནི། བཙན་བྱོལ་བོད་གཞུང་གིས་ན་ནིང་གི་འབྲེལ་མོལ་ནར་འགྱངས་སུ་བཏང་བར་གསལ་བཤད་བྱ་དགོས་པ། གཉིས་པ། བོད་གཞུང་གི་ཆབ་སྲིད་ལས་རིམ་ཁག་ལ་ངོ་རྒོལ་དང་དེར་བསྒྱུར་བཅོས་དགོས་རྒྱུ། གསུམ་པ། ཏཱ་ལས་བླ་མས་རྒྱ་ནག་དང་རྒྱལ་ཁབ་གཞན་གྱི་འབྲེལ་བ་བཟང་པོར་མནོ་བསམ་བཏང་ནས་འཛམ་གླིང་ཡུལ་གྲུ་ཁག་ལ་ཕེབས་རྒྱུ་མཚམས་འཇོག་དགོས་རྒྱུ་སོགས་བཀོད་ཡོད་འདུག
དེར་བཙན་བྱོལ་བོད་གཞུང་གི་ཐའེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་ལན་འདེབས་གནང་དོན། ང་ཚོས་ལྷག་བསམ་རྣམ་དག་གི་ཀུན་སློང་དེ་ཕྱི་ལ་བསྟན་པ་ཡིན། ད་དུང་རྒྱ་ཕྱོགས་ནས་འབྲེལ་མོལ་བསྐྱར་གསོའི་འདུན་པ་མེད་ན། ང་ཚོས་ཕན་ཚུན་བར་ཟློས་གར་འཁྲབ་དགོས་དོན་མི་འདུག་ཟེར།
ཁོང་གིས་མུ་མཐུད་དོན། གལ་སྲིད་བོད་དོན་ཐག་བཅད་པ་ཡིན་ན། བཙན་བྱོལ་བོད་གཞུང་གིས་གླེང་གིན་ཡོད་པ་ལྟར་བོད་བཙན་བྱོལ་གཞུང་འདི་ཕྱིར་བསྡུ་བྱེད་རྒྱུ་ཡིན་པ་རེད། དེ་དུས་བཙན་བྱོལ་གཞུང་གི་ལས་ཁུངས་ཁག་ཚང་མ་མེད་པ་ཆགས་སོང་བ་རེད། གལ་ཏེ་གནད་དོན་ཐག་མ་བཅད་པར་མུ་མཐུད་ལྷག་བསྡད་པ་ཡིན་ན། བཙན་བྱོལ་བོད་གཞུང་མུ་མཐུད་གནས་ཀྱི་རེད་ལ། བོད་མི་རིགས་ཀྱི་རང་དབང་འཐབ་རྩོད་དེ་ཡང་མུ་མཐུད་གནས་གི་རེད་ཅེས་ལན་བཏབས་འདུག
ད་རེས་རྒྱ་ནག་གིས་གཏོན་པའི་ཆ་རྐྱེན་གསུམ་པོ་དེས་རྒྱ་ནག་རང་གི་ངན་འཚང་ཕྱི་རུ་གཏོན་པ་དང་འདྲ། གང་ཡིན་ཞེས་ན། རྒྱ་ནག་ནང་ཁུལ་ལ་རང་དབང་མེད་པ་དེ་ཕྱི་རུ་མངོན་ནས་ཕྱིའི་རང་དབང་ལུང་པར་གནས་པའི་སྐྱེས་བུ་གང་ཞིག་ཡིན་རུང་རང་དབང་གི་འགྲོ་བསྐྱོད་ལ་བྱུས་ཏོག་བྱེད་པ་དེས་རང་ཉིད་ལ་རང་དབང་མེད་པ་དེ་ཕྱི་རུ་མངོན་པ་གཏོགས་གཞན་གང་ཡང་མེད་པ་རེད། ཡིན་ན་ཡང་། མི་མང་པོ་ཞིག་གིས་སེམས་འཕྲལ་དང་གནད་དོན་དེའི་ཐོག་ལ་གླེང་སློང་ཡང་བྱེད་མ་ནུས་པར་འདུག མི་ཁ་ཤས་ལ་དེ་ལྟར་འགྲེལ་བཤད་བྱེད་སྐབས་དེ་འདྲ་ཡིན་རྒྱུ་མ་རེད་ཟེར་བཞིན་འདུག
དོན་གཅོད་ཟླ་བ་ཚེ་རིང་མཆོག་གིས་རང་མི་རིགས་གིས་ཚབ་བྱས་ཏེ་ད་རེད་རྒྱ་ནག་ལ་གསུང་ལན་ཡག་པོ་ཞིག་་གནང་འདུག་་་ཐུགས་རྗེ་ཆེ་ཞུ།།
རྒྱ་ནག་འཐབ་ཕྱོགས་གཅིག་གྱུར་ཁང་གི་བློན་ཆེན་གཞོན་པ་ཀྲུའུ་ཝེ་ཆོན་གྱིས་ད་ཕན་ལ་བོད་རྒྱ་འབྲེལ་མོལ་བསྐྱར་གསོ་བྱུང་ནས་ཁྱོན་བསྡོམས་པའི་འབྲེལ་མོལ་ཐེངས་དགུ་གནང་ཟིན་པའི་བཀའ་མོལ་ཚང་མ་བརྗེད་པ་འདྲ། ཁོ་པ་ལོ་རྒས་དབང་གིས་དྲན་པ་བརྗེད་པ་ཡིན་དབང་དུ་བཏང་ན། རྐུབ་བཀྱག་བཞག་ནས་འགྲོ་ན་ཡག་གི་རེད། འོན་ཀྱང་ངས་ཀྲུའུ་ཝེ་ཆོན་གྱིས་དྲན་པ་བརྗེད་པ་རྩ་བ་ནས་ཚོར་གྱི་མེད། དེ་ལས་ལྡོག་སྟེ་ཁོ་པས་སོ་སོའི་གྲོད་ཁོག་གི་དོན་དུ་ཟོག་རྫུ་འཁྲབ་པའི་ལེ་ཚན་ཞིག་ཏུ་མཐོང་། རྣམ་པ་ཚོས་སྐད་ཆ་འདི་ལ་གཟིགས་དང་། ཀྲུའུ་ཝེ་ཆོན་གྱིས། “ང་ཚོས་ཏཱ་ལ་བླ་མ་ཁོ་ནའི་མདུན་ལམ་ཆེད་གྲོས་བསྡུར་བྱེད་རྒྱུ་ཡིན།” ཞེས་པ་ཨུ་ཚུགས་མཐར་སྐྱེལ་བྱས་འདུག རྩ་བས་གནས་དོན་དེ་དག་འབྲེལ་མོལ་ཁག་བརྒྱུད་ནས་གསལ་པོ་བཟོས་ཟིན། ད་དུང་རྒྱ་དཔོན་དེ་དག་གིས་ཡ་རབས་དང་གཡོ་སྒྱུ་ཚད་ལས་བརྒལ་བ་འཁྲབ་ཀྱི་འདུག དེ་དག་གི་གཡོ་སྒྱུ་ལ་སུ་གང་གིས་འགྲན་བཟོད་དམ།
ཆ་རྐྱེན་དེ་དག་ནི། བློ་གཟུ་བོར་གནས་པའི་གང་ཟག་སུས་བལྟས་ཀྱང་། བྱབ་ཆུང་གི་སྐད་ཆ་འབའ་ཞིག་ལས་ལན་འདེབས་བྱ་དགོས་པའི་སྐད་ཆ་ཞིག་མ་མཐོང་། འོན་ཀྱང་རྒྱལ་སྤྱིའི་སྟེང་དུ་དགོས་དབང་གིས་ལན་འདེབས་ཕུལ་བར་བསྔགས་བརྗོད་ཞུ།
ལྷོ་ཕྲུག་སྣ་བོ་ཆེ་ལགས་ཀྱིས་བཙན་བྱོལ་བོད་གཞུང་འདི་བོད་མི་རིགས་གཅིག་པུའི་ཧུར་བརྩོན་ལ་རག་ལས་པ་ཞིག་མིན་པར་རྒྱལ་སྤྱིའི་སྤྱི་ཚོགས་ཀྱི་ངོས་ནས་ངོས་འཛིན་ཡོད་མེད་ཀྱི་གནད་དོན་དང་འབྲེལ་བ་ཡོད་པ་ཞིག་རེད་ཅེས་གསུངས་ཀྱང་དོན་དངོས་ཐོག་དེ་ནི་རྒྱལ་སྤྱིའི་སྤྱི་ཚོགས་ཀྱི་ངོས་ནས་ངོས་འཛིན་ཡོད་མེད་ལ་རག་ལས་ཞིག་མ་རེད།
བཙན་བྱོལ་བོད་གཞུང་འདི་བོད་མི་རིགས་ཡོངས་ཀྱི་ངོས་འཛིན་ཡོད་མེད་དེར་ཐུག་ཡོད། ད་བར་མི་ལོ་ཧྲིལ་པོ་ལྔ་བཅུའི་རིང་ཕྱི་ནང་བོད་རིགས་ཡོངས་ཀྱིས་གཅིག་གྱུར་ངང་ཁ་ཞེ་སྙིང་མེད་ཀྱིས་སྒོ་ནས་བཙན་བྱོལ་གཞུང་འདི་བོད་མི་ཡོངས་ཀྱི་ངོས་འཛིན་དང་། ཡིད་ཆེས། ཆ་འཇོག་ཡོད་པའི་ཚད་ལྡན་གི་བོད་གཞུང་གཅིག་ཏུ་ངོས་འཛིན་བྱེད་བཞིན་ཡོད་པ་དེར་ཐུག་ཡོད།
ཀྲའོ་ཝན་ཆོན་གྱིས་འབྲེལ་མོལ་བསྐྱར་གསོའི་ཆ་རྐྱེན་གསུམ་གྱི་ཐད་ལ་གསལ་བཤད་བྱས་པ་ནི་གཞི་འཛིན་དང་ཁུངས་ལུང་གཏན་ནས་མེད་པའི་སྐད་ཆ་ཞིག་རེད།
དང་པོ། བཙན་བྱོལ་བོད་གཞུང་གིས་ན་ནིང་གི་འབྲེལ་མོལ་ནར་འགྱངས་སུ་བཏང་བར་གསལ་བཤད་བྱེད་དགོས་པ་ཞེས་པའི་འབྲེལ་མོལ་ལ་དོན་འབྲས་མ་སོན་པར་མུ་མཐུད་ནར་འགྱངས་སུ་གཏོང་མཁན་ནི་རྒྱ་ནག་སྲིད་གཞུང་ཡིན་སྟབས་ཁྱེད་ཚོས་བཙན་བྱོལ་བོད་གཞུང་ལ་གསལ་བཤད་བྱེད་དགོས་པ་ཞིག་རེད།
གཉིས་པ། བོད་གཞུང་གི་ཆབ་སྲིད་ལས་རིམ་དང་དེར་བསྒྱུར་བཅོས་དགོས་རྒྱུ་ཞེས་པའི་ཐད་ལ་བཙན་བྱོལ་བོད་གཞུང་གིས་རྒྱ་བོད་འབྲེལ་མོལ་གྱི་ཁོར་ཡུག་བསྐྲུན་ནས་ད་བར་ཕྱི་གསལ་ནང་གསལ་གྱི་ཆབ་སྲིད་ལས་རིམ་ཁག་ལ་ཁ་ཞེ་སྙིང་མེད་ཀྱིས་འབྲེལ་ལམ་བཟུང་བཞིན་ཡོད།
གསུམ་པ། འབྲེལ་མོལ་སླར་གསོ་བྱེད་ཆོག་ཀྱང་༸ ཏྭ་ལའི་བླ་མ་ཁོ་ནའི་མདུན་ལམ་ཆེད་གྲོས་བསྡུར་བྱེད་རྒྱུ་ཞེས་པའི་ཐད་སྐྱབས་མགོན་ཏྭ་ལའི་བླ་མའི་མདུན་ལམ་ནི་འཛམ་གླིང་ས་གཞི་ཆེན་པོ་ལྟར་ཡངས་ཤིང་རྒྱ་ཆེ་བ་ཞིག་ཡིན་ལ་ལྷག་དོན་བོད་མི་གཅིག་གི་མདུན་ལམ་ཡིན་སྟབས་དེར་གྲོས་མོལ་བྱེད་དགོས་དོན་གང་ལྷག་མེད།
འོན་ཀྱང་གྲོས་བསྡུར་དང་གླེང་སློང་གཅིག་རང་བྱེད་དགོས་པ་དེ་བོད་མི་རིགས་ཀྱིས་མདུན་ལམ་ལ་ངེས་པར་གྲོས་བསྡུར་བྱེད་དགོས་པ་ཞིག་ཆགས་ཡོད། གང་ཡིན་ཟེར་ན་བོད་མི་རིགས་ཡོངས་ཀྱི་མདུན་ལམ་ཐད་གཉིས་ཕན་དབུ་མའི་ལམ་གྱི་ཐོག་གྲོས་བསྡུར་དོན་ཕན་ལྡན་པ་ཞིག་མ་བྱུང་ཚེ་བོད་ཀྱི་གདན་དོན་འདི་བོད་མི་རིགས་ཡོངས་ཀྱི་གནད་དོན་ཞིག་ཡིན་སྟབས་མུ་མཐུད་ནས་གནས་ངེས་རེད།
ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་ལན་ཡག་པོ་བཏབ་པར་སྙིང་ཐག་པ་ནས་ཐུགས་རྗེ་ཞུ
རྒྱ་བོད་གཉིས་ཀྱི་འབྲེལ་མོལ་གནང་བ་དང་། མ་གནང་གཉིས་ལ་ད་ལྟ་ཁྱད་པར་གང་ཡང་མེད། གནང་ཡང་རྒྱ་ནག་གི་ཕྱོགས་ནས་ཡ་ལན་བྱེད་མི་སྲིད་པ་ཞིག་རེད། དེ་སྔོན་གནང་བ་རྣམས་ནི་རྒྱལ་སྤྱི་ལ་གདོང་པ་སྟོན་རྒྱུ་དང་། དུས་ཚོད་ཡུན་རིང་དུ་བཏང་ནས་རྒྱལ་བ་རིན་པོ་ཆེ་དགོངས་པ་རྫོགས་སྒུགས་བྱེད་པ་ཞིག་མིན་ནམ་སྙམ། དེ་སྔོན་རྒྱ་ནག་གིས་བྱ་བྱེད་ལ་བལྟས་ན་ཤེས། དེ་མིན་ན་འཛམ་གླིང་རྒྱལ་སྤྱིས་གནོན་ཤུགས་སྤྲོད་ན་ཕན་པ་ཡོང་སྲིད་ཀྱང་། རྒྱལ་ཁབ་རྣམས་ཀྱིས་སོ་སོར་དགེ་ཕན་ལ་ལྟ་མཁན་ལས་བོད་དོན་ཤ་ཚ་གནང་མཁན་ཕལ་ཆེར་མེད། དཔེར་ན་དབྱིན་ཇི་སྲིད་གཞུང་དང་ཨ་རིའི་སྲིད་འཛིན་ཨ་བྷ་མ་གཉྀས་ཀྱིས་གནང་སྟངས་ལ་དཔག་ན་ཤེས་ཐུབ།
སྐུ་ཞབས་ཟླ་བ་ཚེ་རིང་ལགས་ཀྱིས་ལན་འདེབས་ཡག་པོ་བྱས་འདུག་ད་དུང་མུ་ཐུད་གནད་དུ་གནོན་པའི་ལན་འདེབས་ཡོང་བས་རེ་བ་ཡོད།
༧་གོང་ས་མཆོག་གི་ཕྱི་རྒྱལ་ཁག་གི་མཛད་འཕྲིན་ལ་རྒྱ་ནག་མིག་ཚ་བཞིན་འདུག་
བཙན་བྱོལ་བོད་གཞུང་གནས་དང་མི་གནས་དེ་བོད་རིགས་གཅིག་པོའི་ཧུར་བརྩོན་ལ་རག་ལས་པ་ཞིག་མིན་པར་རྒྱལ་སྤྱིའི་སྤྱི་ཚོགས་ཀྱི་ངོས་འཛིན་ཡོད་མེད་ཀྱི་གནད་དོན་དང་འབྲེལ་བ་ཡོད་པ་ཞིག་རེད།
དེར་བརྟེན་བཙན་བྱོལ་གཞུང་ངོས་ལེན་ཡོང་བའི་ལས་འགུལ་ཛ་དྲག་གིས་སྤེལ་རྒྱུ་ནི་ཁ་ཚ་དགོས་གཏུགས་ཀྱི་གནད་དོན་ཡིན།
རྒྱ་དམར་འདིས་གཏམ་བཤད་གང་བྱས་ཀྱང་ཚང་མ་གཡོ་རྫུན་མ་གཏོགས་མེད་པ་གསལ་བོ་རེད། ད་ཡང་འཛམ་གླིང་གི་མདུན་དུ་བོད་རྒྱའི་གྲོས་མོལ་ཡག་པོ་མ་བྱུང་བའི་ནག་ཉེས་དེ་བོད་པ་དང་གོང་ས་མཆོག་གི་མགོར་འཇོག་འདོད་པ་ལས་གཞན་པའི་དམིགས་ཡུལ་ཞིག་ནམ་ཡང་མེད་ངེས་རེད། ད་དུང་ཏཱ་ལའི་བླ་མ་འཛམ་གླིང་ཡུལ་གྲུ་གཞན་དུ་ཕེབས་པ་ལ་སྔོན་འགོག་གི་ཆ་རྐྱེན་ཞིག་འཇོག་སྟངས་ལ་ལྟོས་དང་ལྷག་བསམ་རྣམ་དག་མིན་ལ་གསལ་ལྟོན་བྱས་པ་རེད།