ཨོ་བྷ་མས་ཉིན་དང་པོར་བོད་དོན་གླེང་མི་འདུག

དེ་རིང་སྔ་དྲོ་སྲིད་འཛིན་ཨོ་བྷ་མ་མཆོག་གིས་སྔོན་ཆད་ཁོང་སྲིད་འཛིན་ལ་ལངས་དུས་ཀྱི་གྲགས་ཆེ་བའི་ཚོགས་འདུ་སྐོང་ལུགས་ལྟར། ཧྲང་ཧེ་རུ་རྒྱ་ནག་གི་མ་འོངས་པའི་དབུ་ཁྲིད་དག་དང་མཉམ་དུ་གྲོང་བརྡལ་ཚོགས་ཁང་གི་ཚོགས་འདུ་ལྟ་བུའི་ཚོགས་འདུ་ཞིག་འཚོགས་ཡོད་པ་རེད།

ཚོགས་འདུ་མ་འཚོགས་པའི་སྔོན་ལ་ཁོང་ཧྲང་ཧེ་ཡི་གྲོང་ཁྱེར་སྤྱི་ཁྱབ་པ་ཡུ་ཀྲེན་ཧྲིན་དང་དམར་ཤོག་ཚོགས་པའི་དྲུང་ཆེ་མཉམ་དུ་ཐུག་འཕྲད་བྱས་ཡོད།  དེ་རིང་ཉིང་གུང་རྒྱབ་ལ་ཁོང་པེ་ཅིན་དུ་ཕེབས་རྒྱུ་ཡིན་པ་དང་། དེར་སྲིད་འཛིན་ཧུའུ་ཅིན་ཐའོ་ལ་ཐུག་འཕྲད་བྱ་རྒྱུ་ཡིན་ལ། སྐབས་འདིར་བརྗོད་གཞི་གཙོ་བོ་ནི་ཚོང་དོན་ཡིན་པར་ཚོད་དཔག་བྱེད་ཀྱིན་ཡོད་པ་རེད། ཁོང་གཉིས་ཀྱི་གྲོས་མོལ་མཇུག་སྒྲིལ་རྗེས་སྲིད་འཛིན་གཉིས་ཀྱིས་མཉམ་འབྲེལ་གསར་འགོད་གསལ་བསྒྲགས་སྐྱོང་རྒྱུ་རེད། པེ་ཅིན་དུ་སྲིད་འཛིན་ཨོ་བྷ་མ་ཞོར་དུ་རྒྱ་ནག་མི་དམངས་ཚོགས་ཁང་ཆེན་མོའི་ནང་གཟིགས་སྐོར་གནང་རྒྱུ་རེད།

ཧྲང་ཧེ་རུ་གསུང་བཤད་གནང་སྐབས་ཁོང་གིས། ཝ་ཤིན་ཊོན་གྱིས་པེ་ཅིན་གྱི་ཡར་རྒྱས་ལ་འགོག་རྐྱེན་བཟོ་གིན་མེད། དེ་ལས་ལྡོག་སྟེ་ང་ཚོས་རྒྱ་ནག་འདི་རྒྱལ་ཁབ་ཀྱི་སྤྱི་ཚོགས་ཁྲོད་སྟོབས་ཆེན་དང་ཕྱུག་པོ། གྲུབ་འབྲས་ལྡན་པའི་ཚོགས་མི་ཞིག་སྟེ། སྟོབས་ཤུགས་མ་ནོར་བ་ཞིག་དང་མི་སྒེར་གྱི་གསར་གཏོད་ལ་བསམ་བློ་གཏོང་ཐུབ་མཁན་གྱི་རྒྱལ་ཁབ་ཅིག་ཏུ་འགྱུར་བར་དགའ་བསུ་ཞུ་བཞིན་ཡོད་ཅེས་དང་། ང་ཚོས་རྒྱལ་ཁབ་གཞན་ཞིག་གི་སྟེང་ལ་སྲིད་གཞུང་གཞན་ཞིག་གི་ལམ་ལུགས་དེ་འགེལ་རྒྱུའི་ཐབས་ལམ་འཚོལ་གྱིན་མེད། དེ་བཞིན་དུ་ང་ཚོས་རང་གི་ལངས་ཕྱོགས་སུ་བཟུང་བའི་རྩ་དོན་དེ་ནི་ང་ཚོའི་རྒྱལ་ཁབ་ལ་ཐུན་མོང་མ་ཡིན་པ་ཞིག་ཡིན་པའི་ཡིད་ཆེས་ཀྱང་བྱེད་ཀྱིན་མེད། ང་ཚོས་སྨྲ་བརྗོད་རང་དབང་དང་དད་འདུན། གནས་ཚུལ་གྱི་འགྲོ་རྒྱུགས། སྲིད་དོན་ལ་མཉམ་ཞུགས་ལ་སོགས་པ་ནི་ཡོངས་ཁྱབ་ཀྱི་རིན་ཐང་ཞིག་ལ་ལྟ་གིན་ཡོད། འདི་དག་ནི་མི་ཚང་མར་འདྲ་མཉམ་གྱིས་ཐོབ་དགོས་ཤིང་། འདིའི་ནང་དུ་གྲངས་ཉུང་མི་རིགས་དང་ཆོས་བརྒྱུད་ཀྱི་གྲངས་ཉུང་མི་རིགས་སོགས་ཨ་རི་དང་རྒྱ་ནག་གིས་གཙོས་པའི་རྒྱལ་ཁབ་གང་དུ་ཡོད་ཚད་ལ་ཁྱབ་མཉམ་ཡིན་དགོས་པ་རེད་ཅེས་བརྗོད་འདུག

འགྲོ་བ་མིའི་ཐོབ་ཐང་ལྟ་ཞིབ་ཁང་གི་ཨེ་ཤ་ཡའི་ཞིབ་འཇུག་པ་ ནེ་ཁོ་ལ་སུ་བྷེ་ཁོ་ལིན་ གྱིས་བཤད་དོན། ཨོ་བྷ་མས་གོ་སྐབས་ཤིག་ཤོར་བ་རེད། ཁོང་གིས་གནད་དོན་འདི་རྒྱལ་སྤྱིའི་ཁྲིམས་ཀྱི་ཚད་གཞིའི་གནད་དོན་ཡིན་པར་མ་གླེང་སྲིད་དོན་རིག་གཞུང་གི་སྒྲོམ་གཞིའི་གནད་དོན་ཅིག་ཡིན་པར་བཤད་སོང་། གལ་ཆེ་ཤོས་ནི་རྒྱ་ནག་གཞུང་ལ་ཚད་ངེས་ཅན་གྱི་གནོན་ཤུགས་སྤྲད་དེ་ཁོང་ཚོའི་འགོག་སྡོམ་བྱེད་སྟངས་དག་ལ་ཚོད་འཛིན་བྱེད་དགོས་པ་རེད། ཁྱོད་ཀྱིས་ཁ་ཐུག་ལ་དེ་ཤུགས་ངེས་ཅན་ཞིག་གི་ཐོག་ནས་བཤད་མ་ཐུབ་ཚེ་དེ་འགྲུབ་གི་མ་རེད། ཚོགས་འདུ་འདིའི་སྟེང་ལ་དེ་བྱུང་མ་སོང་། གང་སྒྲུབ་དགོས་པ་ནི་རྒྱབ་ཁབ་འདིའི་ནང་དུ་ག་རེ་འབྱུང་བཞིན་པ་དེ་དག་ནང་དུ་ཚུད་པར་བྱས་ནས་གླེང་དགོས་པ་རེད་ཅེས་བཤད་འདུག

རྒྱ་ནག་གི་དྲ་དམངས་དག་གིས་ཉིན་འདིར་གདམ་གསེས་ཀྱིས་ཨོ་བྷ་མའི་ཚོགས་འདུ་ལ་ཞུགས་མཁན་རྣམས་ལ། ཁོང་རྗེས་མ་ཕྱིར་ལོག་ན་ཏཱ་ལའི་བླ་མར་མཇལ་འཕྲད་གནང་མི་ཆོག་པའི་སྐོར་གླེང་དགོས་ཚུལ་བརྒྱུད་བསྐུལ་བྱས་ཡོད་འདུག དེ་བཞིན་རྒྱ་ནག་གི་ཟིན་བྲིས་པ་དག་གི་ནང་དུ། ཨོ་བྷ་མ་མཆོག་གིས་ཁོང་ནི་གནས་ཚུལ་གུ་ཡངས་ལ་རྒྱབ་སྐྱོར་བྱེད་མཁན་ཞིག་ཡིན་པར་བཤད་པ་ཙམ་མ་གཏོགས། ཐེངས་འདིའི་ཚོགས་འདུ་ལ་དོན་སྙིང་ཅི་ཡང་མི་འདུག་ཚུལ་བཤད་མཁན་ཡང་འདུག

གཟའ་ཉི་མའི་ཉིན་སྲིད་འཛིན་ཨོ་བྷ་མ་མཆོག་ཆར་བ་ཟམ་ཟིམ་ཞིག་གི་ཁྲོད་ཧྲང་ཧེ་རུ་བབ་ཡོད་འདུག ཁོང་རྒྱ་ནག་ལ་མ་འབྱོར་བའི་སྔོན་ལ་རྒྱ་ནག་གཞུང་གིས་སྲིད་འཛིན་ཨོ་བྷ་མ་ནི་མི་རིགས་ནག་པོ་ཡིན་པ་དང་། ཁོང་ནི་ ཨབ་ར་ཧམ་ ལིན་ཁོན་མཆོག་ལ་མོས་གུས་ཅན་ཞིག་ཡིན་སྟབས། རྒྱ་ནག་གིས་བོད་འདི་བྲན་གཡོག་ལམ་ལུགས་ལས་བཅིངས་འགྲོལ་བཏང་བ་འདིར་དགའ་མོས་བྱེད་དགོས་པ་ཞིག་རེད་ཅེས་བཤད་ཡོད་པ་རེད།

རྒྱ་ནག་གི་ཕྱི་སྲིད་བློན་ཆེན་ཆིན་ཀང་གིས་གསར་འགོད་འདུ་འཛོམས་ཤིག་གི་སྟེང་བཤད་དོན། ཁོང་ནི་མི་རིགས་ནག་པོའི་རིགས་རྒྱུད་ཀྱི་སྲིད་འཛིན་ཅིག་རེད། ཁོང་གིས་བྲན་གཡོག་ལམ་ལུགས་རྩ་གཏོར་གྱི་ལས་འགུལ་དང་ལས་འགུལ་འདིའི་ནང་ལིན་ཁོན་མཆོག་གིས་གལ་གནད་ཀྱི་ནུས་པ་ག་ཚོད་ཅིག་བཏོན་ཡོད་པ་བསམ་ཤེས་ཐུབ་གི་རེད། དེར་བརྟེན། ང་ཚོའི་རེ་བ་ཡིན་ན་སྲིད་འཛིན་ཨོ་བྷ་མ་མཆོག་གིས་རྒྱལ་ཁབ་གཞན་གྱི་དབུ་ཁྲིད་རྣམས་དང་མཚུངས་པར། རྒྱ་ནག་གི་རྒྱལ་ཁབ་བདག་དབང་གི་སྲུང་སྐྱོབ་དང་ས་ཁོངས་གཅིག་གྱུར་གྱི་ལངས་ཕྱོགས་འདི་ལ་གོ་རྟོགས་གཏིང་ཟབ་མོ་ཞིག་ལོན་ཡོད་པ་རེད་འདོད།

བོད་དོན་རྒྱབ་སྐྱོར་བ་དང་། འགྲོ་བ་མིའི་ཐོབ་ཐང་དང་དམངས་གཙོའི་ལས་འགུལ་བ་དག་གིས་འབོད་སྐུལ་ཅི་ཙམ་ཞུས་པར་མ་ལྟོས་པར། སྲིད་དོན་དཔྱད་བརྗོད་མང་པོ་ཞིག་གིས་ཐེངས་འདིར་ཨོ་བྷ་མ་མཆོག་གིས་བོད་ཀྱི་གནད་དོན་དང་ཞིན་ཅང་། དེ་བཞིན་རྒྱ་ནག་ནང་གི་འགྲོ་བ་མིའི་ཐོབ་ཐང་དང་དམངས་གཙོ། སྨྲ་བརྗོད་རང་དབང་སོགས་ཀྱི་ཐད་སྔར་གྱི་སྲིད་འཛིན་དག་དང་བསྡུར་ན་ཞེ་དྲག་ཅིག་གླེང་རྒྱུ་མིན་པའི་ཚོད་དཔག་བྱས་ཡོད་པ་རེད།