ཆུ་དཀྲོགས་ནས་མར་མི་ལོན། ཆུ་སྐྱེས་སྒྲོལ་མ།

༡ ང་རང་གི་ལྟ་སྟངས་ལ། བོད་ཀྱི་བུད་མེད་སྐོར་གླེང་མཁན་དང་བགྲོ་གླེང་གནང་མཁན་མང་པོ་ཞིག་གིས། བུད་མེད་ཀྱི་ཐོབ་ཐང་ཟེར་བ་ཞིག་གླེང་ནས་བསྡད་ཡོད་པར་མཐོང༌། ངས་བལྟས་ན། བོད་ཀྱི་བུད་མེད་གླེང་བའི་བརྗོད་གཞིའི་ཁྱབ་ཁོངས་དེ་ཐོབ་ཐང་ཁོ་ན་གླེང་བ་ཙམ་ལས། དེ་ལས་བརྒལ་ནས་གླེང་རྒྱུ་མེད་པ་དེ་འདྲ་གང་ཡང་མ་རེད།

༢ ངའི་འདོད་ཚུལ་དང་ལྟ་ཚུལ་ལ། བུད་མེད་ཚོས་ཐོབ་ཐང་མི་འདུག ཐོབ་ཐང་རྩོད་དགོས་རེད་ཞེས་སྡུག་སྐད་རྒྱག་པ་ལས་གང་ཡོད་ཀྱི་ཐོབ་ཐང་དེ་བེད་སྤྱོད་ཡག་པོ་ཞིག་གཏོང་དགོས་རེད་སྙམ། བོད་བཙན་བྱོལ་སྤྱི་ཚོགས་འདིར། ལས་ཀྱི་སྣེ་མོ་མང་དག་ཅིག་ལ་བུད་མེད་མ་སླེབས་པ་མི་འདུག་སྙམ། འོན་ཀྱང༌། བཙན་བྱོལ་དུ་གནས་པའི་བུད་མེད་མང་པོ་ཞིག་གིས་གང་ཡོད་པའི་ཐོབ་ཐང་དེ་སླ་བཅོས་བྱས་ནས་ཞག་སྐྱེལ་ཉིན་སྐྱེལ་བྱས་འབྲས་ལ་རིམ་བཞིན་སྤྱི་ཚོགས་ཀྱིས་མཐོང་མ་སྤྲད་པ་རེད། དེར་བརྟེན་ནས་ཐོབ་ཐང་མི་འདུག་སྙམ་པ་དང་རྩོད་དགོས་པའི་བསམ་བློ་ཞིག་ངམ་ངམ་ཤུགས་ཀྱིས་བྱུང་བར་མངོན། དེས་ན་ང་ཚོས་ཐོབ་ཐང་མ་གླེང་གོང་ལ་གང་ཡོད་ཀྱི་ཐོབ་ཐང་དེ་བེད་སྤྱོད་ཡག་པོ་ཞིག་གཏང་དགོས་ཀྱི་འདུག་སྙམ་པ་བྱུང༌།

༣ དེ་བཞིན་ཕོ་མོ་འདྲ་མཉམ་ཞེས་པ་དེའང་ཁྲིམས་ལུགས་ཤིག་གམ། ཡང་ན་ཡིག་ཆ་ཞིག་ནང་འདྲ་མཉམ་ཞེས་བཀོད་པ་ཙམ་ལས་རྩ་བའི་ཆར་འདྲ་མཉམ་ཡོང་མི་ཐུབ་པ་མིག་ལྡན་ཀུན་གྱིས་མ་དཔྱད་ཀྱང་ལོས་ཤེས། འདྲ་མཉམ་ཞེས་པ་ནི་བརྒྱ་ཆ་ལྔ་བཅུ་ལྔ་བཅུ་ཆ་བགོས་བྱས་ན་དེ་འདྲ་མཉམ་རེད། འོན་ཀྱང་དེ་ཡོང་ཐབས་རྩ་བ་ནས་མེད། དེ་ནི་སྐྱེས་པ་ཚོས་ཐུབ་པའི་ལས་མང་དག་ཅིག་བུད་མེད་ཚོས་བྱེད་ཐུབ་ཐབས་མེད་པ་ཞིག་དང༌། དེ་བཞིན་བུད་མེད་ཚོས་ཐུབ་པའི་ལས་མང་དག་ཅིག་ཀྱང་སྐྱེས་པོ་ཚོས་མི་ཐུབ་པས་ཤེས། དཔེར་ན། རྡོ་བཟོ་མཁས་པ་ཞིག་གིས་ལྷ་བཟོ་མཁས་པ་ཇི་བཞིན་མི་ཡོང་བ་དང་ཡོངས་སུ་མཚུངས། འོན་ཀྱང་གང་ལ་སུ་འཇོན་གྱི་ལས་ལ་ལྷག་བསམ་རྣམ་དག་གིས་འཇུག་དུས་རང་བཞིན་གྱིས་ཕོ་མོ་འདྲ་མཉམ་རེད། དེར་བརྟེན་ལུས་ཁམས་ཆགས་སྟངས་སོགས་གང་ས་ཅི་ཐད་ནས་ཕོ་མོ་འདྲ་མཉམ་སྔ་ནས་ད་བར་བྱུང་མེད། དེ་ན་ང་ཚོས་ཕོ་མོ་འདྲ་མཉམ་དང༌། ཕོ་མཆོག་མོ་དམན་རྩོད་ནས་ཅི་བྱེད། བོད་པའི་ཁ་དཔེར་༼ཆུ་དཀྲོགས་ནས་མར་མི་ལོན་༽ཞེས་པའི་དཔེ་དང་མི་མཚུངས་སམ།

༤ བོད་པའི་སྤྱི་ཚོགས་ནང༌། རྒྱ་གར་ནང་གི་བུད་མེད་བཞིན་ཁྱོ་ག་ཤི་རྗེས། ཆུང་མ་ས་སྦས་གཏོང་བ་དང༌། ཡང་ན་མཉམ་དུ་མེ་སྲེག་གཏོང་བ། དེ་བཞིན་རྒྱ་ནག་དུ་ཆ་བཞག་ཀྱང་བུད་མེད་ཚོའི་རྐང་པ་ཀོ་བ་རློན་པའི་ནང་ཀོ་བཏུམས་བརྒྱབ་པའི་༼རྒྱ་མོ་རྐང་རིལ་༽ཞེས་འབོད་པ་སོགས་ཀྱི་ལོ་རྒྱུས་ཡོད་པ་དེ་འདྲ་ང་ཚོའི་ལོ་རྒྱུས་ནང་བྱུང་མྱོང་མེད། དེ་བཞིན་མི་རིགས་ནག་པོར་མཚོན་ནའང༌། སྔ་རབས་བུད་མེད་ཚོའི་ཐོབ་ཐང་དེ་ཧ་ཅང་སྐྱོ་བ་ཡོད། བོད་པའི་བུད་མེད་ཚོེར་དེ་ལྟ་བུའི་ཐབས་སྐྱོ་བའི་གནས་ལ་ལྷུང་མེད་པའང་བུད་མེད་རྣམས་ནས་མཁྱེན་དགོས་པར་མཐོང༌།

༥ ད་ལྟ་ང་རང་ཚོ་འཚོ་སྡོད་བྱེད་སའི་རྒྱ་གར་ལུང་པ་ལྟ་བུར་མཚོན་ན། གཞུང་ཞབས་བུད་མེད་དང༌། སློབ་གྲྭ་ཁག་གི་དགེ་རྒན། སྨན་པ་སོགས་མ་གཏོགས། བུད་མེད་མང་ཆེ་བས་ནང་ལས་དང་ཕྲུ་གུ་གསོ་སྐྱོང་གི་ལས་གཉེར་པ་ལས།་མཐའ་ན་ཚོང་ཁང་ནང་དུའང་བུད་མེད་ཚོང་དཔོན་མིག་ལམ་དུ་མངོན་དཀོན་པ་ཞིག་མ་ཡིན་ནམ། བོད་པའི་བུད་མེད་ནི་དེ་ལྟར་མ་ཡིན་པར་ལས་ཀྱི་སྣེ་མོ་ཀུན་ལ་འཛེགས་ནས་ཡོད་པས་ན་ཐོབ་ཐང་ཟེར་བ་ཞིག་རྩོད་དགོས་པར་དང་གླེང་དགོས་པ་ཅི་ཡོད།

༦ རྒྱ་གར་བའི་ཁྱིམ་ཚང་ནང་གི་མནའ་མ་ཞིག་ལ་ཆ་བཞག་ན། ཕྲུ་གུ་བུ་ཞིག་སྐྱེས་མ་ཐུབ་ཚེ་གནའ་མ་དེ་ཁྱིམ་ཚང་ནང་ཐོབ་ཐང་མེད་ཁར་ཁྱིམ་མི་ཀུན་གྱིས་བརྙས་ནས་མི་ཚེ་འཁྱོལ་དཀའ། བྱིས་པ་མའི་ཁོག་པའི་ནང་ཡོད་དུས་ནས་བུ་མོ་ཞིག་ཡིན་པ་ཤེས་ཚེ་མི་ལུས་ལེན་རྒྱུའི་ཐོབ་ཐང་ཡང་ཧ་ལམ་མེད་པ་ལྟ་བུ་རེད། འོན་ཀྱང་བོད་པའི་བུད་མེད་ཚོས་དེ་ལྟ་བུའི་སྡུག་བསྔལ་མྱོང་མི་དགོས་པ་དང༌། བྱིས་པ་བཙས་རྗེས། མ་དེ་ཉིད་ལ་ཁྱིམ་མི་ཀུན་ནས་བྱམས་སྐྱོང་དང་བལྟ་སྐྱོང་གང་ཡག་བྱེད་ཀྱི་ཡོད། དེར་བརྟེན་བུད་མེད་ཚོས་ཐོབ་ཐང་རྩོད་དགོས་དོན་ཨེ་ཡོད་སྙམ།

༧ ལུང་ཚན་མི་འདྲ་བའི་དབར་ལ་བུད་མེད་ཀྱི་ཐོབ་ཐང་དང་ལྟ་སྤྱོད་མི་མཐུན་པ་རེ་ཡོད་སྲིད་པ་རེད། དེ་ནི་༼ལུང་པ་རེ་ལ་ཆ་ལུགས་རེ། བླ་མ་རེ་ལ་ཆོས་ལུགས་རེ་༽ཞེས་པའི་དཔེ་ལྟར་བོད་མདོ་དབུས་ཁམས་གསུམ་གྱི་བུད་མེད་ཚོའི་གནས་སྟངས་ཕྲན་བུ་མི་འདྲ་བ་ཡོད་སྲིད་ཀྱང་རྩ་བའི་ཆ་ནས་གནམ་ས་ལྟ་བུའི་བར་ཁྱད་ཨེ་ཡོད། དབུས་ཕྱོགས་ལ་མཚོན་ན། བུད་མེད་ཚོའི་ཐོབ་ཐང་ནི་ཧ་ལམ་སྐྱེས་པ་ཚོ་དང་འདྲ་མཉམ་ཡོད། དུས་དེང་སང་བོད་བཙན་བྱོལ་སྤྱི་ཚོགས་ལ་མཚོན་ན། ༼དམངས་ལ་བདེ་སྐྱིད་སྤྲད་ན། རྒྱལ་པོ་བཙུན་མས་བྱས་ཀྱང་ཆོག༽ཞེས་པའི་གཏམ་དཔེ་ལྟར་བུད་མེད་རང་ཉིད་ནས་ཐུབ་ན་མདུན་ཕྱོགས་ཀྱི་འགྲོ་ལམ་དེ་ཧ་ཅང་རྒྱ་ཆེན་པོ་ཞིག་ཡིན། དེས་ན་ང་ཚོར་མ་ཐོབ་པར་ལྷག་བསྡད་པ་ཞིག་དང་བརྩད་ནས་ལེན་དགོས་པའི་གནད་དོན་ཞིག་ཨེ་ཡོད་སྙམ།

༨ ད་བར་བོད་ཀྱི་བུད་མེད་ཚོགས་པ་སོགས་ནས་དབུ་འཁྲིད་པའི་བུད་མེད་ཚོས། བོད་བསྟན་པ་ཆབ་སྲིད་ཀྱི་ཆེད་དུ་ཕྱག་ལས་མི་ཉུང་བ་ཞིག་གནང་ནས་འབྲས་བུའང་མིན་དམན་པ་ཞིག་ཐོབ་ཡོད། དེར་དུས་ནམ་ཡང་རྗེས་སུ་ཡི་རང་ཞུ་བཞིན་ཡོད། འོན་ཀྱང་ཐོབ་ཐང་ཞེས་པ་དེ་ནི་ཚོགས་པ་ཞིག་གི་ངོས་ནས་རྩོད་དགོས་པའི་གནད་དོན་ཞིག་ཨེ་ཡིན། མཐོན་པོའི་ཁྲི་ལ་བཞུགས་པ། དཔེར་ན། དབུ་བུད་མེད་ཀྱི་བཀའ་བློན་དང་སྤྱི་འཐུས་ཚོགས་གཙོས་མཚོན་ཐོབ་ཐང་ཡོད་དུས་ལས་ཆུང་ཚག་དག་ལ་ལྟ་ཅི། བུད་མེད་ཚོགས་པ་སོགས་བུད་མེད་ཀྱི་དབུ་ཁྲིད་རྣམ་པས་གཞོན་སྐྱེས་བུད་མེད་ཚོར་དམིགས་པའི་སློབ་གསོའི་ལས་འགུལ་དང༌། མ་འོངས་བོད་ཀྱི་བུ་ཕྲུག་རྣམས་རང་མི་རིགས་ཀྱི་ཡ་རབས་གོམས་གཤིས་དང༌། སྐད་ཡིག་རིག་གཞུང་སོགས་ལ་བྱང་ཆུབ་པའི་ཤེས་འཇོན་གཉིས་ལྡན་གྱི་བུ་ཕྲུག་ཞིག་སྐྱེད་བསྲིང་ཐད། དང་ཐོག་ནང་གི་ཨ་མ་རྣམས་དེ་ལྟའི་སྤུས་ཀ་ལྡན་པ་ཞིག་དགོས་པས། ཨ་མ་ཚོར་སློབ་གསོ་དང་སྦྱོང་བརྡར། ཟབ་སྦྱོང་སོགས་ལ་དམིགས་ནས་ལས་འགུལ་གང་མང་ཞིག་སྤེལ་དགོས་པ་དེ་ཁ་ཚ་དགོས་བཏུགས་ཡིན་པ་ལས་ཐོབ་ཐང་རྩོད་རྒྱུ་དེ་ཁ་ཚ་དགོས་གཏུགས་མིན་པར་སྙམ།

༩ དེ་བཞིན་རྒྱ་གར་གྱི་མཐོ་རིམ་སློག་གྲྭ་ཁག་ཐོན་མཁན་གྱི་བུད་མེད་ཚོར་མཚོན་ན། ཧ་ལམ་བོད་ཡིག་ཐོག་གཏོང་ཡིག་ཆ་ཚང་བ་ཞིག་ཀྱང་འབྲི་ཤེས་མཁན་ཞིག་ཀྱང་མེད་ཅེས་བཤད་ན་ཧམ་པ་ཆེ་དྲགས་ཨེ་ཡོད། བུད་མེད་ཚོགས་པ་སོགས་ནས་ད་བར་ཟབ་སྦྱོང་མང་དག་ཞིག་སྤེལ་གྱི་ཡོད་མོད། འོན་ཀྱང་གོང་ཞུས་ཀྱི་བུད་མེད་ཚོེར་དམིགས་པའི་རིག་གཞུང་ཡར་རྒྱས་དང༌། བུད་མེད་རྩོམ་པ་པོ་སྐྱེད་བསྲིང་གི་ཆེད་དུ་ད་བར་ཟབ་སྦྱོང་སྤེལ་བ་གོ་ཐོས་མ་བྱུང༌། གཅིག་བྱས་ན་ང་རང་ཐོས་རྒྱ་དང་མཐོང་རྒྱ་ཆུང་བས་ལན་སྲིད། གཞོན་སྐྱེས་ཚོ་ནི་ང་ཚོའི་རེ་ཡུལ་ཡིན་ལ། གཞོན་སྐྱེས་ཚོ་ནི་ང་ཚོའི་མ་འོངས་པའང་ཡིན་ཕྱིར། ཁོང་རྣམ་པར་སྦྱོང་བརྡར་སྤྲོད་རྒྱུ་དེ་བོད་སྤྱི་ཚོགས་ཡོངས་ཀྱི་འོས་འདན་དང༌། བུད་མེད་རྒན་གྲས་རྣམས་ཀྱི་ལས་འགན་ཡིན། དེ་ན་བུད་མེད་ཀྱི་ཐོབ་ཐང་རྩོད་པ་ལས་དེ་འདྲའི་རིོགས་ཀྱི་བྱེད་སྒོ་སྤེལ་ན་ཅི་མ་རུང༌།

༡༠ ང་ཚོས་བོད་ཀྱིོ་བུད་མེད་ཚོའི་སེམས་ཁམས་སྐོར་བརྗོད་གཞིར་བཟུང་ནས་གླེང་ན་མི་ཆོག་པ་མེད། དཔེར་ན། བོད་པའི་བུད་མེད་སྤྱིའི་གཤིས་སྤྱོད་དང་འབྲེལ་བའི་སེམས་ཁམས་དང༌། དེའི་བྱམས་བརྩེའི་ནུས་པ། ཁ་རྒྱུན་ལ་བོད་པའི་བུད་མེད་ཚོ་ནི་༼ངང་རྒྱུད་ཆུ་ལས་རིང་བ་དང་གཤིས་རྒྱུད་བལ་ལས་འཇམ་པ་༽ཞེས་བཤད་སྲོལ་ཡོད། དེ་ལྟའི་མ་བྱམས་སེམས་ཅན་ཞིག་ཡིན་ན། དེས་གསོ་སྐྱོང་གནང་བའི་ཕྲུ་གུ་དེའང་རང་བཞིན་གྱིས་བྱམས་དང་སྙིང་རྗེ་ལྡན་པ་ཞིག་འོས་ཡོད། དེ་ལྟའི་བརྗོད་གཞི་བཟུང་ནས་བགྲོ་གླེང་དང་ཤེས་འཇོན་དང་ཉམས་མྱོང་ལྡན་པའི་མི་སྣ་གདན་འདྲེན་ཞུས་ནས་སློབ་གསོའི་ལས་འགུལ་སྤེལ་ན། དུས་ནམ་ཞིག་རང་བཞིན་གྱི་དཔའ་མཛངས་ལྡན་པའི་བུད་མེད་ཁྱུ་ཞིག་གསོ་སྐྱོང་བྱེད་ཐུབ། དེས་ན། ཐོབ་ཐང་རྩོད་པའི་བགྲོ་གླེང་གོ་སྒྲིག་ཞུ་པ་ལས་གོས་ཞུས་བུད་མེད་ཀྱི་ཤེས་ཡོན་སྐོར་སོགས་ལ་བགྲོ་གླེང་གྲ་སྒྲིག་རེ་གནང་ན་ཅི་མ་རུང༌།

ཡིད་ལ་གང་ཤར་མཛུབ་མོའི་རྩེ་ནས་ཤོར།།

སུ་དང་གང་ལའང་འཐབ་ཆེད་བྲིས་མེད་པས།།

གཞན་གྱིས་བཀླགས་ནས་ཡིད་ལ་ཕོག་གྱུར་ན།།

བཟོད་པར་འཚལ་ཞེས་སྙིང་ནས་རབ་ཏུ་གསོལ།།