སྐུ་སྒེར་ཡིག་ཚང་གི་དྲ་རྒྱར་བསྐྱར་བཅོས།

བོད་ནང་གི་བོད་མི་ཚོས་དྲ་རྒྱ་འདིའི་སྟེང་ནས་༧གོང་ས་མཆོག་གི་མཛད་འཆར་རྣམས་ཀློག་ཐུབ་ཀྱི་མི་འདུག་ཚུལ་གྱི་བསམ་ཚུལ་བཏོན་ཡོད་པ་དང་། བྱེས་བཞུགས་བོད་མི་ཚོས་ཀྱང་བོད་ཡིག་གི་ལམ་ནས་གནས་ཚུལ་དག་ཀློག་འདོད་པ་ཡིན། དྲ་རྒྱའི་སྟེང་དུ་བོད་རྒྱ་དབྱིན་གསུམ་ངེས་པར་དུ་ཚང་དགོས་པ་ཡིན། བོད་ཡིག་ཡོད་དགོས་པ་ནི་དེ་ལས་ཀྱང་གལ་ཆེ་ཤོས་ཤིག་རེད། གལ་ཏེ་བོད་ཡིག་གི་ལམ་ནས་ཀློག་མི་ཐུབ་པ་དང་བོད་ཡིག་བཀོད་མེད་པ་ཡིན་ན་ང་ཚོས་སྐུ་སྒེར་ཡིག་ཚང་ལ་ངོ་རྒོལ་བྱ་རྒྱུའམ་མ་འགྲིགས་པ་མེད། ༧གོང་ས་མཆོག་ནི་འཛམ་གླིང་སྤྱིའི་ཞི་བདེའི་དེད་དཔོན་དང་། ཡང་སྒོས་བོད་མི་ས་ཡ་དྲུག་གི་མགོན་སྐྱབས་ཡིན་པ་སོང་བས་བོད་མི་ཚོས་ཀྱང་ཁོང་གི་མཛད་འཕྲིན་རྣམས་བོད་ཡིག་ཁོ་ནའི་ལམ་ནས་ཀློག་འདོད་པ་ཡིན། དཔེར་ན། རྒྱ་གཞུང་གི་བོད་ཀྱི་གནད་དོན་སྐོར་གླེང་འདོད་སྐབས། རྒྱ་གཞུང་གིས་ཏྰ་ལའི་བླ་མ་སྒེར་གྱི་གནད་དོན་མ་གཏོགས་བོད་ཀྱི་གནད་དོན་ཞེས་བརྗོད་མྱོང་མེད་ཅིང་བརྗོད་འདོད་མེད་ལ། གལ་ཏེ་སྐུ་སྒེར་ཡིག་ཚང་གི་དྲ་རྒྱའི་སྟེང་དུ་བོད་ཡིག་ཙམ་ཡང་མེད་ན་རྒྱ་གཞུང་གི་ཡོད་ཚད་སྒེར་གྱི་གནད་དོན་བཤད་པ་དེར་རྒྱབ་སྐྱོར་དུ་སོང་བ་ཞིག་ཀྱང་མཐོང་གིན་འདུག སྤྱིར་དྲ་རྒྱ་དེའི་སྟེང་དུ་བོད་ཡིག་ཡོད་པ་ཡིན་ན་མཛེས་རྒྱན་དུ་མཐོང་བ་ལས་ཚེར་མ་ལྟ་བུ་ཞིག་མཐོང་ག་ལ་སྲིད།

གཞུང་ཞབས་པ་དག་གིས་ཀྱང་དབྱིན་སྐད་བཤད། གཞུང་གི་ལས་ཁུངས་དག་གིས་ཀྱང་དབྱིན་ཡིག་འབྲི། གཞུང་གི་སློབ་གྲྭ་ཁག་ཏུ་ཡང་དབྱིན་ཡིག་བསླབ། བྱེས་སྡོད་བོད་མི་དག་གིས་ཀྱང་རང་སྐད་བརྗེད། མདོར་བསྡུས་ནས་བཤད་ན། བོད་ཡིག་འདི་བོད་མི་རང་གིས་རྩ་བརླག་ཏུ་གཏོང་བཞིན་འདུག

ཏྰ་ལའི་བླ་མའི་དྲ་རྒྱ་འདི་བོད་ཡིག་ཏུ་མེད་པར་རྒྱུ་མཚན་མང་སྟེ།
གཅིག སྐུ་སྒེར་ཡིག་ཚང་གི་ལས་གཙོ་རྣམས་པ་བོད་ཡིག་ལ་དུང་བ་མེད་པ།
གཉིས། སྐུ་སྒེར་ཡིག་ཚང་གི་ལས་བྱེད་པ་རྣམས་བོད་མི་རིགས་ལ་ཤ་ཞན་མེད་པ།
གསུམ། སྐུ་སྒེར་ཡིག་ཚང་གིས་༸གོང་ས་མཆོག་གི་ཚོང་རྫས་ཁོ་ན་བྱེད་འདོད་པ།
བཞི། སྐུ་སྒེར་ཡིག་ཚང་གིས་དམངས་ཀྱི་སེམས་ཁམས་ལ་རྒྱུས་ལོན་བྱེད་མ་འདོད་པ།
ལྔ། སྐུ་སྒེར་ཡིག་ཚང་གིས་བོད་པ་རྣམས་སྐད་ཡིག་དང་རིག་གཞུང་གི་སྐྱབས་བཅོལ་བ་ཡིན་པ་བརྗེད་ཟིན་པ།
དྲུག སྐུ་སྒེར་ཡིག་ཚང་གིས་གཞིས་བཞུགས་བོད་རིགས་རྣམས་ཀྱིས་བོད་ཡིག་གི་ཆེད་དུ་རང་སྲོག་ཀྱང་གཏོང་བཞིན་ཡོད་པ་དོ་སྣང་མ་བྱས་པ།
བདུན། སྐུ་སྒེར་ཡིག་ཚང་གིས་གཞིས་བཞུགས་བོད་རིགས་ཡོངས་ཀྱིས་༸གོང་ས་མཆོག་ གི་མཛད་འཕྲིན་མཐའ་དག་བོད་ཡིག་གི་ལམ་ནས་ཀློག་འདོད་ཡོད་པ་མ་དྲན་པ།
བརྒྱད། སྐུ་སྒེར་ཡིག་ཚང་གིས་བོད་ཡིག་འདི་རང་སྐད་ཡིན་པ་ཡང་བརྗེད་ཟིན་པ།
གང་ལྟར། སྐུ་སྒེར་ཡིག་ཚང་གིས་༸གོང་ས་མཆོག་གི་མཛད་འཕྲིན་རྣམས་བོད་ཡིག་གི་ལམ་ནས་དྲ་ཐོག་ཏུ་མ་སྤེལ་བར་མཐའ་གཅིག་ཏུ་བློ་ཕམ་ཡོད། གལ་སྲིད་དྲ་རྒྱ་ཇུས་འགོད་པ་དེ་ཕྱི་རྒྱལ་བ་ཞིག་ཡིན་ན། དེའི་ཚབ་ཏུ་བོད་རིགས་ཤིག་བདམས་ན་ཅིས་མི་ཆོག འོན་ཀྱང་། དབང་ཆ་ཡོད་མེད་དང་། འབྱོར་བ་ཆེ་ཆུང་གིས། རང་གི་རྩ་བའི་བླའི་མཛད་འཕྲིན་དག་ཀྱང་རང་སྐད་སྟེང་ཀློག་ཐུབ་མ་སོང་།

སྐུ་སྒེར་ཡིག་ཚང་གི་དྲ་རྒྱར་བསྐྱར་བཅོས་ག་འདྲ་བྱས་ན་ཡང་། དེའི་ནང་བོད་ཡིག་གི་ལེ་ཚན་ཞིག་མེད་པ་ཡིན་ན་གནད་འགག་གང་ཡང་མཐོང་གི་མི་འདུག སྐུ་སྒེར་ཡིག་ཚང་གིས་༧གོང་ས་མཆོག་བོད་ཀྱི་ཏཱ་ལའི་བླ་མ་ཡིན་པར་འདོད་ཀྱི་ཡོད་ན། སྐུ་ཡིག་དྲ་རྒྱའི་ནང་བོད་ཡིག་ངེས་པར་དུ་ཡོད་དགོས་པ་ཞིག་རེད། དེ་མིན་བོད་མིའི་དབུ་ཁྲིད་ཀྱི་ལས་ཁུངས་ངོས་ནས་བོད་ཀྱི་རིག་གཞུང་གི་སྲོག་རྩ་ལ་སྣང་མེད་བཏང་བའི་བཟོ་འདྲ་མཐོང་ཡོང་།

སྐུ་སྒེར་ཡིག་ཚང་གི་དྲ་རྒྱ་ Dalailama.com བསྐྱར་བཅོས་གནང་བར་འཚམས་འདྲི་ཡོད། འོན་ཀྱང་དེ་དག་བོད་ཡིག་གི་ཐོག་ཏུའང་ཡོད་དགོས་པ་ཞིག་ནི། དཔྱོད་ལྡན་ཀུན་གྱིས་གླེང་དང་གླེང་བཞིན་པ་རེད། དེ་སྔོན་དྲ་ཐོག་ནས་གནས་ཚུལ་མང་པོ་གླེང་ཚར་བ་རེད། དོན་དངོས་སུ་དཔལ་ལྡན་སྐུ་སྒེར་ཡིག་ཚང་ལ་ཡིག་ཐོག་དང་ངག་ཐོག་གཉིས་ཀའི་ཐོག་ནས་རེ་སྐུལ་ཞུ་མཁན་ཡང་བྱུང་ཡོད་ཚོད་རེད། ཅི་སྟེ། ད་དུང་བོད་ཡིག་ཐོག་ཏུ་༸གོང་ས་ཏཱ་ལའི་བླ་མའི་དྲ་རྒྱ་ཞེས་པ་ཞིག་གསར་བཟོ་གནང་མ་ཐུབ་ཚེ། སྐོམ་པ་ཆུ་འདོད་ལྟར་གནས་པའི་བོད་ཡིག་ཀློག་པ་པོ་ཚོ་ད་དུང་སྐྱོ་སྣང་ངང་དུ་གནས་དགོས་པ་ཞིག་མ་རེད་དམ།།

དྲ་རྒྱ་བསྐྱར་བཅོས་མ་གཏོགས་བོད་ཡིག་ཐོག་གསར་བཟོ་གནང་ཡོད་མེད་གསལ་ཁ་མི་འདུག ཕལ་ཆེར་བོད་ཡིག་ཐོག་ཁག་ཙམ་རེད་སྙམ།

བོད་ཡིག་ཡོད་རྒྱུ་རེད། ད་ཡིན་ན་བོད་ཡིག་ཡོད་པར་ཤོག་ཅིག

གྲགས་པ་རྒྱ་མཚོ་བདེན་པ་རེད་་་་་་་་་་བོད་ཡིག་སྡེ་ཚན་ངེས་པར་དྲྭ་རྒྱའི་ནང་ཡོད་གལ་མཐོང་།

འཇིག་རྟེན་ཁ་དཔེ་ལ་མི་བལྟ་བའི་མིག་ཡོད་ཏེ་རང་ལ་བལྟ་བའི་མེ་ལུང་དགོས་ཞེས་པ་ལྟར་རེད། བོད་མི་ཚང་མས་བོད་ཡིག་མཁོ་སྤྱོད་དགོས་ན་ཐོག་མར་དབུ་ནས་ལེགས་པོ་ཞིག་ཡོང་དགོས།

སྐུ་སྒེར་ཡིག་ཚང་གི་ལས་བྱེད་་ཚང་མ་ལ་ཐུགས་རྗེ་ཆེ།