བསོད་ནམས་ཚེ་རིང་།

བསོད་ནམས་ཚེ་རིང་།

ཚོང་འབྲེལ་དང་། ཆབ་སྲིད། རྒྱལ་ཁབ་ཀྱི་ཆེ་མཐོང་། ཐོན་དངོས་ཕྱིར་འདྲེན་གྱི་གོ་སྐབས་དང་། རྒྱལ་ཁབ་ཀྱི་ཕྱི་འབྲེལ་སོགས་འཇིག་རྟེན་གཙང་མའི་སྒོ་ནས་ཡིན་ནའང་རེད། ཆོས་ལུགས་ཁོ་ནའི་ཐོག་ནས་བཤད་པ་ཡིན་ནའང་རེད། གནས་ཚུལ་གང་གི་ཐོག་ནས་བལྟས་པ་ཡིན་ན། རྒྱ་གར་རང་གི་ཕ་མེས་ཀྱི་ཤུལ་བཞག་ནང་པ་སངས་རྒྱས་པའི་ཆོས་ལུགས་སྣང་མེད་དུ་དོར་བ་ནི། རྒྱ་གར་གྱི་གུན་གསབ་མི་ཐུབ་པའི་གྱོང་གུད་ཆེ་ཤོས་ཤིག་རེད།
ཆོས་ལུགས་དང་གཏན་ནས་མ་འདྲེས་པ། འཇིག་རྟེན་གྱི་ཚོང་འབྲེལ་གཙང་མའི་སྒོ་ནས་མནོ་བསམ་ཞིག་བཏང་ན། ལུམ་བཱི་ནི་དང་རྡོ་རྗེ་གདན་ལ། གསེར་གྱི་གཏེར་ཁ་ཞིག་གི་ཁེ་ཕན་དང་ནུས་པ་ཏན་ཏན་མངའ། ཉེ་ཆར་ང་རང་རྡོ་རྗེ་གདན་ལ་སྡོད་ཡུན་ཐུང་ངུའི་ཚེ། ཕྱིའི་རྒྱལ་ཁབ་ཀྱི་དབུ་ཁྲིད་མཐོན་པོ་གཉིས་རྡོ་རྗེ་གདན་ལ་གུས་ཕྱག་དང་བཅས་གཟིགས་སྐོར་དུ་ཕེབས་སོང་། ཕྱི་རྒྱལ་གྱི་མཐོ་རིམ་དཔོན་པོ་དང་། ཆེས་མཐོའི་དམག་དཔོན། དེ་བཞིན་གྲགས་ཅན་མི་སྣ་དེ་དག་རྡོ་རྗེ་གདན་ལ་ཕེབས་དོན་དེ། གྲོས་མོལ་དང་ཚོགས་འདུ་གང་གི་ཆེད་དུ་མ་ཡིན་པར། རྡོ་རྗེ་གདན་ལ་ཕྱག་སྐོར་དང་། མཆོད་འབུལ་བྱེད་རྒྱུ་ཉག་གཅིག་གི་ཆེད་དུ་ཕེབས་པ་རེད། གཞན་ཡུ་རོབ་དང་། ཨོ་སི་ཏྲི་ལི་ཡ། ཨ་མི་རི་ཀ རྒྱ་ནག། ལྷོ་དང་། ཤར་ལྷོའི་ཤར་ཕྱོགས་ཀྱི་རྒྱལ་ཁབ་ཀྱིས་གཙོས་འཛམ་གླིང་གང་སར་ནས་ལོ་ལྟར། རྡོ་རྗེ་གདན་སོགས་སུ་གནས་སྐོར་བ་སྟོང་ཚོ་མང་པོ་རྒྱུན་ལྡན་དུ་ཕེབས་ཀྱི་ཡོད་པ་རྣམས་ཀྱང་། ཕྱག་སྐོར་དང་། མཆོད་འབུལ་ཁོ་ནའི་ཆེད་དུ་ཡིན་པ་ནི་སྨྲོས་མ་དགོས་པ་རེད།
གལ་སྲིད་ཆབ་སྲིད་དང་འབྲལ་མི་ཐུབ་པའི་དབང་དུ་བཏང་ན། རྡོ་རྗེ་གདན་གཙོས་རྒྱ་གར་དུ་ཡོད་པའི་གནས་ཆེན་རྣམས་ནི། ཕྱི་འབྲེལ་སྲིད་ཇུས་ལ་ངེས་པར་དུ་དགོས་མཁོ་ཆེ་ཤོས་ཀྱི་ཅ་དངོས་དག་རེད། གནས་ཆེན་འདི་རྣམས་ནི། ཆོས་ལུགས་འཐེན་ཁྱེར་གྱི་ཆབ་སྲིད། ཚོགས་པ་དུམ་བུར་གཏོང་ཐབས་ཀྱི་སྲིད་ཇུས་། དོགས་ཟོན་ཆེན་པོ་དགོས་པའི་བོད་ཀྱི་གནས་དོན་ལས་ཆེར་འདས་པའི་ཆབ་སྲིད་ལ་དགོས་མཁོ་ཅན་གྱི་ལག་ཆ་དག་རེད། བསྡུས་ནས་ཞུས་ན། གནས་ཆེན་འདི་དག ནང་པའི་ཆོས་བརྒྱུད་གང་ནས་བྱུང་ནའང་ཁྱད་པ་མེད་པར། ཚང་མའི་ངོར་བྱིན་རླབས་དང་གལ་འགངས་ཆེན་པོ་ཅན་ཤ་སྟག་ཡིན་པ་དང་། རྫོགས་པའི་སངས་རྒྱས་ཀྱིས་གསུངས་པའི་ཆོས་ཀྱི་སྙིང་པོ་དག ནམ་ཡང་བརྗེད་དུ་མི་བཅུག་པའི་འགྱུར་མེད་ཀྱི་དྲན་རྟེན་རྣམས་ཡིན། །

ཕུལ་བྱུང་ཟིན་བྲིས་པ།

Welcome Back!

Login to your account below

Retrieve your password

Please enter your username or email address to reset your password.

Add New Playlist