༄༅། །དར་བ་དང་རྒུད་པ་ནི་ལོ་རྒྱུས་ཀྱི་རང་བཞིན་ཡིན་ཞིང་། གཅེས་སུ་འོས་པའི་ཕ་ཡུལ་གངས་ལྗོངས་ཀྱང་ལོ་རྒྱུས་ཀྱི་སྤྲིན་གསེབ་ནས་ཡལ་ལ་ཉེ་བའི་དེ་རིང་། རང་གི་མངོན་འདོད་དང་། རྟོག་འགྱུའི་རི་མོ་རྣམས་དབྱངས་གསལ་སོ་བཞིས་དྲངས་ཏེ། དྲ་གྲོགས་རྣམས་ཀྱི་སྤྱན་ལམ་དུ་བསྟར་ན་འདོད། འདི་ནི་འདས་ཟིན་པའི་ཁ་སང་གི་ཆེད་དུ་དང་། ཡང་ན་དེ་རིང་། འབྱུང་ལ་ཉེ་བའི་མ་འོངས་པ་དེའི་ཆེད་དུ་ཅི་ལ་མིན། ཁོ་བོས་བསམ་གཞིགས་གང་མང་གི་བརྒྱུད་རིམ་ཁྲོད། མེས་པོའི་ཤ་གསེང་རུས་གསེང་ནས་བཞུར་མྱོང་བའི་ཟུངས་ཁྲག་དང།་
དཀའ་སྡུག་རྔུལ་ཁྲག་ལས་གྲུབ་པའི་ཤེས་རིག་གི་སྙིང་བཅུད་
འདི་སྙིང་ལྟར་གཅེས་དགོས་པའི་གཏན་ཚིགས་ཤིག་རྙེད་སོང་།
དེའི་སླད་དུ་ལོ་ཟླ་སྨག་གི་ཟོས་པའི་མཚན་གཞུང་འདིར་
འོད་སྟོང་ལྡན་པའི་ཉི་གཞོན་ཞིག་བསུ་ན་འདོད།