གསར་སྙིང་།

༧གོང་ས་མཆོག་གིས་ཕྱི་ཚེས་ ༩ ཉིན་དྷ་སའི་ནུར་པུར་ཉེ་འགྲམ་ནས་སྒེར་གཉེར་སློབ་གྲྭ་ཞིག་གི་རླངས་འཁོར་གཡང་དུ་ལྷུང་སྟེ་སློབ་ཕྲུག་ ༢༣ ཚུད་པའི་མི་ ༢༧ རྐྱེན་འདས་སུ་ཕྱིན་པར་ཐུགས་སྨོན་མཛད་འདུག་་་

ཨ་རི་གཞུང་གིས་མེག་སི་ཀོ་(Mexico)རྒྱལ་མཚམས་ཀྱི་རྩིག་གྱང་བསླང་མ་ཚར་བར་དུ་མཐའ་མཚམས་མངའ་སྡེ་ཁག་ནས་ལྟ་སྲུང་དམག་མི་མང་པོ་འགྲེམས་འཇོག་བྱས་ཏེ་དམ་དྲག་ཤུགས་ཆེན་བྱེད་ཀྱི་ཡོད་འདུག  ་་་

སྐབས་༢༤ པའི་རྒྱལ་ཡུམ་ཆེན་མོའི་དྲན་རྟེན་གསེར་གྱི་གཟེངས་རྟགས་རྐང་རྩེད་སྤོ་ལོའི་གཏིང་རྩོད་འགྲན་སྡུར་ཁྲོད་མོན་གྷོ་རུ་ཁག་གིས་སྤོ་ལོ་ ༢ བླུགས་ཏེ་གསེར་གྱི་གཟེངས་རྟགས་ཐོབ་ཡོད་འདུག  ་་་

ལྷོ་ཀོ་རི་ཡའི་སྲིད་འཛིན་ཟུར་པ་ཕར་ཅིན་ཧའེ་ལ་ལོ་ ༢༤ ཡི་བཙོན་འཇུག་ཁྲིམས་ཐག་བཅད་དེ་ཉིན་གསུམ་ལས་མ་འགོར་བར་སྲིད་འཛིན་ཟུར་པ་ལི་མིང་བྷག་ལ་ཞིབ་བཤེར་བྱེད་ཀྱི་ཡོད་པའི་གནས་ཚུལ་ཐོན།་་་

ཨ་རིའི་སྲིད་འཛིན་ཊོམ་ཕུ་དང་བྱང་ཀོ་རི་ཡའི་སྲིད་འཛིན་ཀེམ་ཇོང་ཨན་གཉིས་དངོས་སུ་ཐུག་འཕྲད་བྱེད་པར་གྲ་སྒྲིག་བྱེད་བཞིན་ཡོད་འདུག་་་

ཨ་རིའི་ནེའུ་ཡོག་ཏུ་ཡོད་པའི་སྲིད་འཛིན་ཊོམ་ཕུའི་ལས་ཁུངས་དང་སྡོད་གནས་སོགས་ཡོད་པའི་ཊོམ་ཕུ་ཁང་རྩེག་ལ་མེ་སྐྱོན་ཤོར་ཏེ་མི་གཅིག་རྐྱེན་འདས་དང་མེ་གསོད་རུ་ཁག་གི་མི་དྲུག་ལ་རྨས་སྐྱོན་ཕོག་ཡོད་འདུག  ་་་

རྒྱ་གར་ཀོལ་ཀ་ཏ་ནས་ཡིན་པའི་ཀོ་ལས་བཟོ་སྐྲུན་པ་ཞིག་གིས་རང་གི་ཨ་མའི་ཕུང་པོ་འཁྱག་སྒམ་ནང་བཅུག་སྟེ་ལོ་ངོ་གསུམ་ཕྱིན་རྗེས་ཉེན་རྟོག་པས་འཛིན་བཟུང་བྱས་ཡོད་འདུག  ་་་

རྒྱ་ནག་ནང་སྦྲུམ་སྦུག་ཚན་རྩལ་ལ་བརྟེན་ནས་ཕྲུ་གུ་གསོ་ཆེད་སྐྱེས་པའི་ཁམས་དཀར་མང་པོ་ཞལ་འདེབས་ཀྱི་མིང་ཐོག་ནས་འཚོལ་སྡུད་བྱས་ཏེ་ནག་ཚོང་བྱེད་ཀྱི་ཡོད་འདུག་་་