ཀླུ་སྨྱོན།
ཕྱག་འཚལ་བསྐལ་པའི་མཐའ་མར་མེ་ལྟར། །འབར་བའི་ཕྲེང་བའི་དབུས་ན་གནས་མ། །
—སྒྲོལ་བསྟོད་ལས་དྲངས།
གཞི་རྩའི་ཆ་ནས་ཆེས་ཐོག་མའི་དུས་སུ་འགྲོ་བ་མི་དང་དུད་འགྲོ་ཁ་ཁ་འབྱེད་སྤྱད་དེ་ཕལ་ཆེར་མེ་རེད། ང་ཚོའི་མེས་པོ་གོང་མ་ཚོས་མེ་ཡི་རིན་ཐང་སྟེ། རང་ལུས་ལ་དྲོད་སྟེར་བ་དང་། ཟས་རིགས་གཡོ་སྐོལ་བྱེད་ཐུབ་པ། གཞན་གྱི་རྒོལ་བ་ལས་ཟློག་ཐུབ་པ། མུན་པ་གསལ་ནུས་པ། སྲ་མཁྲེགས་དངོས་པོ་བཞུ་ཐུབ་པ་སོགས། མདོར་ན་མེ་ཡི་ཡོན་ཏན་རེ་རེ་བཞིན་གཅིག་རྗེས་གཉིས་མཐུད་དུ་རྟོགས་པ་ལ་བརྟེན། ཐོག་མར་གློག་འཁྱུགས་ཏེ་ཤིང་སྡོང་སོགས་མེ་རུ་བསྲེགས་པའི་མེ་ཡི་འཁྲིས་སུ་བཅར་བ་དང་། དེ་རྗེས་ཤིང་སྐམ་པོའི་སྟེང་དུ་མུ་ཟི་ཆགས་པ་དག་གཙུབ་བརྡར་ལས་བྱུང་བའི་མེ་སོན་བེད་སྤྱོད་བྱེད་མགོ་བརྩམས་པ་དང་། མཐའ་མར་རང་ཉིད་ཀྱི་ལག་འགུལ་ཏེ་གཙུབ་ཤིང་བཟོས་པ་དང་། དེ་རྗེས་ལྕགས་དང་རྡོའི་བར་དུ་སྤྲ་སྐམ་བཞག་ནས་མེ་སྦོར་བའི་ཐབས་ལམ་རྨད་དུ་བྱུང་བ་ཞིག་རྙེད་པ་རེད།
མེ་སོན་འདི་འགྲོ་བ་མིའི་སྤྱི་ཚོགས་ཁྲོད་བསླེབས་པ་དང་མཉམ་དུ་འགྲོ་བ་མིའི་རིགས་ཀྱི་ཉིན་རེའི་འཚོ་བ་དེ་ཡང་རྦད་དེ་དུད་འགྲོ་སེམས་ཅན་ལས་ཐ་དད་དུ་བསྐྱོད་མགོ་བཙུགས་པ་རེད་ལ། དེས་འགྲོ་བ་མིའི་རིགས་ལ་འཛད་མཐའ་མེད་པའི་རིག་གཞུང་སྣ་ཚོགས་ཀྱི་སྒོ་མོ་ཡང་ཕྱེས་པ་རེད། མེ་ཡིས་འགྲོ་བ་མིའི་རིགས་ཀྱི་འཚོ་བའི་ཆུ་ཚད་ཧ་ཅང་ཚད་མཐོར་བསྐྱལ་བ་དེས་དྲངས་ཏེ། མཐའ་མར་གློག་ཅེས་པའི་ནུས་ལྡན་སྟབས་བདེའི་དངོས་པོ་ཞིག་ཀྱང་འགྲོ་བ་མིའི་རིག་གཞུང་གི་གཏིང་ཟབ་ཤོས་སུ་འཛུལ་བྱུང་།
རྩ་བའི་ཆ་ནས་མེ་དང་གློག་གཉིས་ཀྱི་ནུས་པ་ལ་འདྲ་ས་མང་པོ་ཞིག་ཡོད་ལ། དེ་གཉིས་ཀྱི་མཐུན་འགྱུར་དང་རོགས་རམ་ལ་བརྟེན་ནས་འགྲོ་བ་མིའི་རིགས་འདི་ས་སྟེང་གི་འགྲན་ཟླ་མེད་པའི་མཐོ་རིམ་སྲོག་ཆགས་སུ་ཐོལ་བརྒལ་བྱུང་བ་རེད། ཐོལ་བརྒལ་འདིས་ང་ཚོར་ལུས་སེམས་ལ་བདེ་སྐྱིད་མང་པོ་ཞིག་བསྐྲུན་བྱུང་། ང་ཚོ་ངོམ་པ་མེད་པའི་བདེ་སྐྱིད་ཅིག་གི་ཀློང་དུ་ཁྲིད་སོང་། བདེ་སྐྱིད་དེས་ང་ཚོའི་ཡོད་ཚད་སྟབས་བདེ་བཟོས་བྱུང་ལ། བདེ་སྐྱིད་དེས་ང་ཚོའི་འཚོ་བར་གནོད་སྐྱོན་ཡང་བཟོས་སོང་། དེ་ནི་མེ་དང་གློག་གིས་བཟོས་པའི་ཐོན་རྫས་མང་དྲགས་པ་འདི་རེད། དེ་ནི་མེ་དང་གློག་གིས་ང་ཚོའི་གཅེས་པའི་ཚེ་སྲོག་འཕྲོག་བཞིན་པ་འདི་རེད།
ནམ་རྒྱུན་འཚོ་བའི་ཁྲོད་དུ་གཏམ་དཔེ་འམ་སྡོམ་ཚིག་ཅིག་ཡོད་པ་སྟེ། མེ་དང་མཉམ་དུ་རྩེད་མོ་མ་རྩེ་ཞེས་པ་དེར་གཞིགས་ཚེ། མེ་ཡི་ཡོན་ཏན་རྨད་དུ་བྱུང་བའི་རྒྱབ་ཕྱོགས་སུ་འཇིགས་སུ་རུང་བའི་མཆེ་སྡེར་ཞིག་ཀྱང་བསྐུངས་བསྡད་ཡོད་པ་ཚོར་ཐུབ། ལྷག་པར་དུ་འབྲོག་པ་རོང་སྒྱུར་དང་རོང་བ་རྒྱ་སྒྱུར་གྱི་དུས་ཚོད་འདི་ལ། མེ་ཡིས་ང་ཚོར་སྤྲད་པ་ལས་ཁྱེར་བ་ཡང་ཉུང་ཉུང་ཞིག་ག་ལ་ཡིན།
འདས་པའི་མི་ལོ་འབུམ་ཕྲག་གི་རིང་ལ་མེ་ཡིས་ང་ཚོའི་ཕ་མེས་ཡང་མེས་ཚོར་འཛད་མཐའ་མེད་པའི་སྟོབས་ཤུགས་དང་ཉམས་པ་མེད་པའི་བླ་སྲོག་ཅིག་བསྩལ་མྱོང་བ་བདེན་པ་རེད། བདེན་པ་འདིའི་གཟི་འོད་ཀྱིས་ང་ཚོའི་ལུས་པོ་དང་རྣམ་ཤེས་ལ་ཡང་དུད་འགྲོ་སེམས་ཅན་དང་མི་འདྲ་བའི་ནུས་པ་དང་གོ་སྐབས་མང་པོ་ཞིག་བསྐྲུན་བྱུང་། གོ་སྐབས་དེ་སྤྱད་ནས་ང་ཚོ་ཡང་ཕ་མེས་ཡང་མེས་ཚོའི་བཞུད་ལམ་དུ་ཚ་ཚ་འུར་འུར་ངང་བསྐྱོད་མགོ་བརྩམས་བྱུང་།
ཉིས་སྟོང་བརྒྱད་ནས་མེ་ཡི་སྨྱོ་ཧམ་ཞིག་གང་སར་འབར་བྱུང་། དེ་ནི་བཀྲེས་ལྟོགས་ཀྱིས་གཟིར་བའི་སྤྱང་ལྟོགས་ཤིག་བག་ཡངས་སུ་རྒྱུ་བའི་ལུག་ཁྱུའི་ནང་དུ་བརྒྱུགས་པ་དང་འདྲ་བྱུང་། གདུག་རྩུབ་ཅན་གྱི་མེ་འདིས། ཧམ་སེམས་ཅན་གྱི་མེ་འདིས། སྙིང་རྗེ་མེད་པའི་མེ་འདིས། ངའི་ཕུ་ནུ་མིང་སྲིང་མང་པོ་ཞིག་གི་ཚེ་སྲོག་འཕྲོགས་སོང་། ངའི་ཕུ་ནུ་མིང་སྲིང་དེ་དག་བཞུད་ཤུལ་དུ་ལུས་པ་ནི། ཀེང་རུས་དཀར་པོ་ཞིག་དང་དུ་བ་བན་བུན་ཞིག་རེད། དེ་ནི་མེ་ཡི་རྐང་རྗེས་རེད། དེ་ནི་མེ་ཡི་ཟློས་གར་རེད། དེ་ནི་མེ་ཡི་གྲིབ་ནག་རེད། དེ་ནི་མེ་ཡི་ལྡོག་འོད་རེད།
སྨྱོ་ཧམ་ཆེ་བའི་མེ་འདིའི་འདོད་པ་ལས་སླ་བོར་མི་ཚིམ་པ་འདྲ་སྟེ། མེ་འདི་གངས་རིའི་ལྗོངས་ནས་བརྒལ་ཏེ་ཧི་མ་ལ་ཡའི་ཕ་རོལ་ཏུ་བསླེབས་སོང་། མེ་འདིས་བཙན་བྱོལ་བོད་མིའི་འཚོ་རྟེན་གལ་ཆེ་བ་ཞིག་སྟེ། གྱོན་ཆས་ཀྱི་ཁྲོམ་ར་རེ་རེ་བཞིན་བསྲེགས་བྱུང་། བོད་མི་མང་པོའི་དཀའ་སྡུག་གི་རྔུལ་ཆུ་རེ་རེ་བཞིན་བསྲེགས་བྱུང་། ཕུ་ནུ་མང་པོའི་མི་ཚེ་གཅིག་གི་འཚོ་རྟེན་རེ་རེ་བཞིན་བསྲེགས་བྱུང་།
སྔོན་ཆད་བོད་ན་ཡོད་དུས། དབྱར་དགུན་སྟོན་དཔྱིད་མེད་པར། ཉིན་མཚན་དབྱེ་བ་མེད་མར། ངས་ལོ་ཟླ་དུ་མ་ཞིག་མེ་དང་མཉམ་དུ་བསྐྱལ་བ་ཡིན། ལྷག་པར་དུ་དགུན་གསུམ་ཁ་བ་དཀར་པོ་འབབ་དུས། སྟོན་གསུམ་རླུང་དམར་འུར་འུར་གཡུག་དུས། ང་མེ་ཡི་དྲོད་ཁོལ་གྱིས་རང་ཉིད་ལ་བདེ་སྐྱིད་དང་འོད་སྣང་སྦྱིན་དུ་བཅུག་པ་དང་། ངས་མེ་ཡི་བྱིན་རླབས་དང་གཟི་འོད་ཀྱིས་རང་ཉིད་ལ་ཚེ་སྲོག་དང་ལང་ཚོ་སྩལ་དུ་བཅུག་པ་ལགས།
ཡིན་ཡང་། ལོ་ཟླ་མང་པོ་ཞིག་འདས་པའི་དེ་རིང་། མེ་ཡིས་མང་པོ་མང་པོ་ཞིག་བསྲེགས་པའི་དེ་རིང་། མེ་ཡིས་ཕུ་ནུ་མིང་སྲིང་མང་པོ་ཞིག་བསྲེགས་པའི་དེ་རིང་། ང་ངོ་མ་མེ་ཡི་འཁྲིས་སུ་བཅར་མི་འདོད། ངའི་གཟུགས་པོ་འཁྱགས་ཤིང་ལག་པ་འདར་ཡང་། ང་ངོ་མ་མེ་ཡི་འོད་ལ་སྐྲག་གི ངས་གཞི་ནས་མེ་ཡི་གདུག་རྩུབ་མཐོང་བྱུང་།
མེ་ནི་མེ་ཡིན་པས། གཏན་ཚིགས་རིག་པ་བ་ཚོས་ཚ་ཞིང་སྲེག་པ་མེ་ཡི་མཚན་ཉིད་དུ་བཞག ཇི་སྲིད་མེ་ཡི་འབར་རྫས་མ་རྫོགས་བར་དུ། མེ་ཡིས་རང་གི་མཚན་ཉིད་འདི་འདོར་རྩིས་མེད་པ་འདྲ། ཇི་སྲིད་འགྲོ་བ་མིའི་རིགས་འདི་མ་རྫོགས་པ་དེ་སྲིད་དུ། མེ་འདིས་རང་གི་སྨྱོ་གར་འཁྲབ་མཚམས་འཇོག་བྱེད་རྩིས་མེད་པ་འདྲ། ཇི་སྲིད་བོད་མི་རིགས་འདི་མེ་དང་རིང་དུ་གྱེས་ན་མ་གཏོགས། མེ་འདིས་ང་ཚོ་བཞག་ནས་འགྲོ་རྩིས་མེད་པ་འདྲ།
རྒྱ་ཆེ་ས་ནས་གླེང་ན། མེ་འདིས་ངའི་སྤུན་ཟླ་ཚོའི་ལུས་པོ་དང་འཚོ་རྟེན་བསྲེགས་པ་ཙམ་མ་ཡིན་པར། མེ་འདིས་བོད་ཁམས་ཧྲིལ་བོ་དང་རྒྱལ་ཁམས་ཚང་མ། མདོར་ན་རི་རབ་དང་རྩྭ་ཐང་། རྒྱ་མཚོ་དང་གཙང་པོ། མཇུག་མཐར་སའི་གོ་ལ་དང་དེའི་མཐའ་སྐོར་གྱི་རྒྱུ་སྐར་ཚང་མ་ཡང་གསོན་སྲེག་བྱེད་རྒྱུ་ཡིན་པ་འདྲ་སྟེ། བསྐལ་པ་མེ་ཡིས་འཇིག་ཅེས་པའི་ལུང་བསྟན་ཞིག་ལ་ང་ཚོས་ཡིད་ཆེས་བྱེད།
མེ་འདིས། ངའི་གཞུང་རྒྱུད་དྲང་བའི་འབྲོག་པ་བསྲེགས་ཟིན། ངའི་སེམས་རྒྱུད་དཀར་པའི་ཞིང་པ་བསྲེགས་ཟིན། ད་ནི། མེ་འདིས་མུ་མཐུད་དེ། ངའི་བྱིན་རླབས་ཅན་གྱི་བླ་མ་བསྲེག་སྲིད། ངའི་ཡོན་ཏན་ཅན་གྱི་མཁས་པ་བསྲེག་སྲིད། ངའི་འཇོན་ཐང་ཅན་གྱི་དཔོན་པོ་བསྲེག་སྲིད། ངའི་སྟོབས་འབྱོར་ལྡན་པའི་ཚོང་བ་བསྲེག་སྲིད། ངའི་ལྷག་བསམ་ཅན་གྱི་དགེ་རྒན་བསྲེག་སྲིད། ངའི་ཤེས་རིག་བཀྲ་བའི་སློབ་མ་བསྲེག་སྲིད། ངའི་དམ་ཚིག་གཙང་བའི་ཆོས་གྲོགས་བསྲེག་སྲིད། ངའི་བྱམས་སེམས་ཅན་གྱི་ཕ་མ་བསྲེག་སྲིད། མདོར་ན། མེ་འདིས་ང་ཚོ་གདོང་དམར་བོད་པ་ཚང་མ་བསྲེག་སྲིད་པས། ང་ཚོ་ཚང་མ་མེ་མེད་པའི་མུན་ནག་གི་འཇིག་རྟེན་ཞིག་ལ་ཆས་རན། ང་ཚོ་ཚང་མ་ཉེན་ཁ་མེད་པའི་བདེ་འཇགས་ཀྱི་ཞིང་ཁམས་ཤིག་ལ་བསྐྱོད་རན།
