དེ་རིང་ཉིན་རྒྱབ་ཆུ་ཚོད་ ༣ པའི་སྟེང་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག རྒྱ་ནག་གིས་དྲག་གནོན་བྱེད་སྟངས་དང་། དེའི་རིགས་ལ་སྒྱུ་རྩལ་དང་གསར་འགོད་ལས་རིགས་བརྒྱུད་གདོང་ལེན་ཇི་འདྲ་བྱེད་ཀྱི་ཡོད་པའི་སྐོར་ལ་མཁས་པའི་གཏམ་བཤད་ལས་རིམ་འཚོགས་སོང་།
དེ་རིང་འདི་གའི་གསར་འགོད་པས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་སུ་ལས་རིམ་འདི་གོ་སྒྲིག་གནང་བའི་གནད་འགག་ག་རེ་ཡིན་སྐོར་དྲིས་པར་ཁོང་གིས། ཨོ་གླིང་ནས་ཡིན་པའི་རྒྱ་རིགས་གསར་འགོད་པ་དང་སྒྱུ་རྩལ་པ་སྐད་གྲགས་ཆེན་པོ་གཉིས་དྷ་སར་འབྱོར་ཡོད་པ་དང་བསྟུན། ཁོང་གཉིས་ནི་རྒྱ་ནག་གི་ཆབ་སྲིད་ཀྱི་འགྲོ་སྟངས་ལ་རྒྱུས་མངའ་ཆེན་པོ་ཡོད་པ་དང་རྒྱ་ནག་ལ་ཁ་གཏད་གཅོག་མྱོང་བར་བརྟེན། རྒྱ་ནག་གི་དབང་སྒྱུར་འོག་དྲག་གནོན་བྱེད་སྟངས་དང་། དྲག་གནོན་དེའི་རིགས་ལ་སྒྱུ་རྩལ་དང་གསར་འགོད་ལས་རིགས་ཀྱི་ཐོག་ནས་གདོང་ལེན་ཇི་འདྲ་བྱེད་ཀྱི་ཡོད་པའི་སྐོར་ལ་གླེང་སློང་བྱེད་ཀྱི་ཡོད་པ་རེད། ལས་རིམ་འདིའི་བརྒྱུད་རྒྱ་ནག་གཞུང་སྟོབས་ཆེན་པོ་ཡིན་ཡང་། ང་ཚོ་ཉམ་ཆུང་བྱས་ནས་སྡོད་མཁན་ཞིག་མ་རེད། བདེན་པ་དང་དྲང་བདེན་ལ་རྒྱལ་ཁ་འཐོབ་རྒྱུ་ཡོད་པ་རེད། དེ་བཞིན་བོད་པའི་གནད་དོན་དེ་བདེན་པ་དང་རང་དབང་གི་ཐོག་ནས་དུས་ནམ་ཞིག་ལ་རྒྱལ་ཁ་ཐོབ་ཀྱི་རེད་ལ། ང་ཚོ་མི་མང་པོ་ཞིག་བསམ་བློ་འདྲ་བའི་ཆ་མང་པོ་ཞིག་འདུག ཚང་མས་མཉམ་རུབ་ཀྱི་ལས་ཀ་བྱེད་ཆོག་པ་དང་། མཉམ་རུབ་ཀྱིས་ལས་ཀ་བྱེད་ཚེ་རྒྱལ་ཁ་ཐོབ་ཀྱི་རེད། ཅེས་འགྲེལ་བརྗོད་གནང་བྱུང་།
ཨོ་གླིང་དུ་ཡོད་པའི་རྒྱ་རིགས་གསར་འགོད་པ་གྲགས་ཅན་ཁྲན་ལི་ (Cheng Lei) ཡིས། རྒྱ་ནག་གི་དྲག་གནོན་གྱི་ལམ་ལུགས་དང། གསར་འགོད་ལས་རིགས་ཀྱི་ཐོག་ནས་གདོང་ལེན་གང་འདྲ་བྱེད་ཀྱི་ཡོད་པའི་སྐོར་ལ་གཏམ་བཤད་གནང་ཡོད་ཅིང་། ང་རང་རྒྱ་ནག་གི་གསར་ཁང་ (CCTV 9) ནང་གསར་འགོད་ལས་རིགས་ཀྱི་ལས་དོན་གཉེར་མྱོང་བ་དང་། རྒྱ་ནག་གིས་གནས་ཚུལ་གལ་ཆེན་ཁག་ཅིག་ཁྱབ་སྤེལ་བྱས་བཅུག་མ་སོང་། (CNBC) གསར་ཁང་དུ་ལས་དོན་གཉེར་བཞིན་པའི་སྐབས། སངས་རྒྱས་བཅོམ་ལྡན་འདས་ཀྱི་འཁྲུངས་སྐར་ཉིན་ལྷོ་ཀོ་རི་ཡའི་ནང་གི་ཁྲོམ་ས་རྣམས་སྒོ་བརྒྱབ་ཡོད་པའི་གནས་ཚུལ་ལེན་པ་ཡིན། སྐབས་དེར་རྒྱ་ནག་གཞུང་གིས་གཉེར་བའི་གསར་ཁང་གིས་ཆོས་ལུགས་དང་འབྲེལ་བའི་གནས་ཚུལ་ཕྱིར་བསྒྲགས་བྱེད་མི་དགོས་པའི་བརྡ་ལན་བཏང་འདུག ཕྱི་ལོ་ ༢༠༠༨ ལོའི་ཨོ་ལིམ་པིག་ (Olympic) འཚོག་བཞིན་པའི་སྐབས། རྒྱ་ནག་གིས་གསར་འགྱུར་བརྒྱུད་ལམ་ཁག་ལ་དམ་དྲག་དང་ཞིབ་བཤེར་ཤུགས་ཆེན་བྱས་ཡོད་ལ། གསར་འགོད་པ་རྣམས་ཀྱིས་གནས་ཚུལ་ག་རེ་བཀོད་དགོས་པ་དང་། བཀོད་མི་དགོས་པ། གནས་ཚུལ་གང་འདྲ་བཀོད་དགོས་པའི་ཡིག་ཆ་འགྲེམས་སྤེལ་བྱེད་བཞིན་འདུག ཕྱི་ལོ་ ༢༠༠༨ ལོའི་ཨོ་ལིམ་པིག་སྐབས་གནས་ཚུལ་ལེན་བཞིན་པའི་སྐབས་ང་ལ་བརྙས་བཅོས་དང་སུན་གཙེར་བྱས་སོང་། ཞེས་བརྗོད་སོང་།
ཡང་ཁོང་མོས། ཕྱིའི་རྒྱལ་ཁབ་ཁག་གི་གསར་འགོད་པ་དེ་དག་རྒྱ་ནག་ནང་གནས་ཚུལ་མཁོ་སྒྲུབ་བྱེད་པར་འགྲོ་སྐབས། ཁོང་ཚོའི་བདེ་འཇགས་དང་འབྲེལ་ནས་དངངས་སྐྲག་དང་ཞེད་སྣང་སྐྱེས་ཀྱི་ཡོད་ལ། རྒྱ་ནག་གཞུང་གིས་གསར་འགོད་པ་དེ་དག་ལའང་དྲག་གནོན་དང་། ལྟ་ཞིབ་ནན་པོ་བྱེད་ཀྱི་ཡོད་པ་རེད། ད་ལྟའི་ཆར་རྒྱ་ནག་གི་མགོ་ཁྲིད་ཞི་ཅིན་ཕིང་གི་དུས་སྐབས་སུ། གསར་འགོད་པ་རྣམས་ལ་སྔར་ལྷག་དམ་དྲག་ཤུགས་ཆེན་བྱེད་བཞིན་ཡོད་པ་དང་། རྒྱ་ནག་ལ་གནོད་པའི་གནས་ཚུལ་ཁག་ཅིག་ཁྱབ་སྤེལ་བྱེད་བཅུག་གི་མེད་པ་རེད། རྒྱ་ནག་ནང་ཞིབ་འཇུག་བྱེད་མཁན་གྱི་གསར་འགོད་པ་རྣམས་མེད་པར་གྱུར་གྱི་ཡོད་པ་རེད། རྒྱ་ནག་གིས་གསར་འགོད་པ་རྣམས་ལ་དམ་དྲག་དང་གཉའ་གནོན་ཤུགས་ཆེན་གྱི་ཡོད་ཀྱང་། གསར་འགོད་པས་སེམས་ཤུགས་མ་ཆག་པར་ཨུ་ཚུགས་ཀྱིས་གཉའ་གནོན་དེ་དག་ལ་གདོང་ལེན་བྱས་ཏེ་དྲང་བདེན་གྱི་གནས་ཚུལ་ཁྱབ་སྤེལ་བྱེད་དགོས་ཀྱི་ཡོད་པ་རེད། རྒྱ་ནག་གི་གསར་ཁང་ནང་ལས་དོན་གཉེར་བཞིན་པའི་སྐབས། ཚོར་བ་སྐྱེན་པའི་གནད་དོན་རིགས་ལ་ལག་པ་འཆང་མི་བཅུག་པ་དང་། རྒྱ་ནག་གི་དཔོན་རིགས་སོགས་ལ་བཅར་འདྲི་བྱ་རྒྱུའི་གོ་སྐབས་ཡོད་ཀྱང་། རྒྱ་ནག་གི་མགོ་ཁྲིད་ཞི་ཅིན་ཕིང་གི་སྐབས་སུ། རྒྱ་ནག་གི་དཔོན་རིགས་སོགས་ལ་བཅར་འདྲི་བྱེད་མི་ཐུབ་པའི་དཀའ་ངལ་འཕྲད་པ་དང་། གསར་འགོད་རང་དབང་གི་གནས་སྟངས་ཇེ་སྡུག་ཏུ་ཕྱིན་སོང་། འོན་ཀྱང་། ཨོ་གླིང་དུ་ཡོད་པའི་གསར་ཁང་དུ་གསར་འགོད་ལས་དོན་གཉེར་བའི་སྐབས། གསར་འགོད་རང་དབང་ཤུགས་ཆེན་ཡོད་པ་དང་། ཆབ་སྲིད་པ་སོགས་ལ་སོ་སོས་བསམ་པ་བཞིན་དྲི་བ་དྲིས་ཐུབ་པའི་ནུས་པ་དང་རང་དབང་འདུག ཅེས་སོགས་བརྗོད་སོང་།
ཨོ་གླིང་དུ་ཡོད་པའི་རྒྱ་རིགས་སྒྱུ་རྩལ་པ་གྲགས་ཅན་པ་ཌིའུ་ཚའོ་ (Badiu Cao) ཡིས། རྒྱ་ནག་གི་དྲག་གནོན་གྱི་ལམ་ལུགས་དང་། སྒྱུ་རྩལ་གྱི་ཐོག་ནས་གདོང་ལེན་གང་འདྲ་བྱེད་དགོས་པའི་སྐོར་ལ་གཏམ་བཤད་གནང་ཡོད་ཅིང་། རྒྱ་ནག་གཞུང་གིས་བོད་དང་། ཤར་ཊུར་ཀི་སི་ཐན། ཐའེ་ཝན་སོགས་ལ་དྲག་གནོན་ཤུགས་ཆེན་བྱས་དང་བྱེད་མུས་ཡིན་པ་དེ་དག་གླེང་སློང་བྱེད་དགོས་གལ་ཆེན་པོ་ཡིན་པ་མ་ཟད། ཕྱིའི་རྒྱལ་ཁབ་ཁག་གི་མི་མང་དང་རྒྱ་ནག་གི་མི་མང་རྣམས་ལ་གནད་དོན་དེ་དག་གླེང་སློང་བྱེད་དགོས་གལ་ཆེན་པོ་ཆགས་ཀྱི་ཡོད། ང་རང་གི་ངོས་ནས་བོད་མི་དང་བོད་པའི་སྤྱི་ཚོགས་ཀྱི་བདེ་དོན་དང་རང་དབང་ལ་རྒྱབ་སྐྱོར་གྱི་ཆེད་དུ་ལས་དོན་བྱས་དང་བྱེད་མུས་ཡིན། སྒྱུ་རྩལ་གྱི་ལམ་ནས་རྒྱ་ནག་གི་ལྟ་ཕྱོགས་དང་། འགྲོ་བ་མིའི་ཐོབ་ཐང་གི་གནས་སྟངས་སོགས་རི་མོའི་ལམ་ནས་གསལ་སྟོན་བྱེད་ཀྱི་ཡོད། ངས་ཐོག་མར་རྒྱ་ནག་གི་ཆབ་སྲིད་ཀྱི་གནས་སྟངས་སོགས་རི་མོའི་ལམ་ནས་གསལ་སྟོན་བྱེད་སྐབས། དྲང་བདེན་གྱི་གནས་ཚུལ་དེ་དག་ཁྱབ་སྤེལ་ཡོང་སླད། ལོ་ངོ་བདུན་གྱི་རིང་ངོ་མི་ཤེས་པའི་ཆེད་དུ་ཁ་རས་གྱོན་ཏེ་སོ་སོའི་ངོ་གདོང་བཀག་མྱོང་ཡོད། ཅེས་དང་། ལོ་ངོ་བདུན་གྱི་རྗེས་སུ་ཕྱི་ལོ་ ༢༠༡༨ རྒྱ་ནག་གཞུང་གིས་ང་སུ་ཡིན་མིན་ངོ་ཤེས་ཏེ། ངའི་ནང་མི་རྣམས་ལ་འཇིགས་སྐུལ་བྱས་པ་དང་། ཧྲང་ཧའེ་ཉེན་རྟོག་ཁང་དུ་འཁྲིད་དེ་འདྲི་རྩད་སོགས་བྱས་ཡོད་སྐོར་སོགས་འགྲེལ་བརྗོད་གནང་སོང་།
ཡང་ཁོང་གིས། རྒྱ་ནག་གིས་སྒྱུ་རྩལ་པ་རྣམས་ལ་དྲག་གནོན་ཞིབ་བཤེར་བྱས་དང་བྱེད་མུས་ཡིན་པ་དང་། དྲ་ཐོག་ནས་ཞིབ་བཤེར་དང་། སོ་ལྟ་སོགས་བྱེད་ཀྱི་ཡོད་པ་རེད། རྒྱ་ནག་གཞུང་གིས་དྲ་ཐོག་ནས་ང་དང་འབྲེལ་བའི་གནས་ཚུལ་རྣམས་ཤེས་རྟོགས་བྱུང་སྟེ། ངའི་མིང་ཐོག་ནས་དྲ་ཐོག་གི་ཁ་བྱང་རྫུན་པ་བཟོས་མགོ་བཙུགས་པ་དང་། ད་ལྟའི་ཆར་ངའི་མིང་ལ་དྲ་ཐོག་གི་ཁ་བྱང་སྟོང་ཕྲག་མང་པོ་བཟོས་པ་མ་ཟད། ངའི་སྐོར་གནས་ཚུལ་རྫུན་བཟོ་བྱས་པ་དང་། ནག་ཉེས་ཅན་ཞིག་ཡིན་སྐོར་བརྗོད་དེ་རྒྱ་ནག་ནས་ཨོ་གླིང་དུ་བྲོས་ཡིན་སྐོར་སོགས་གནས་ཚུལ་རྫུན་མ་ཁྱབ་སྤེལ་བྱེད་བཞིན་འདུག ངོ་ཤེས་ཡོད་པའི་གྲགས་ཅན་གྱི་གསར་འགོད་པ་ཞིག་ལ་འབྲེལ་བ་བྱས་པ་སོགས་རྫུན་བཟོའི་གནས་ཚུལ་ཁྱབ་སྤེལ་བྱེད་བཞིན་ཡོད་པ་དང་། དྲ་ཐོག་ནས་འཇིགས་སྐུལ་སོགས་བྱས་སོང་། དེ་བཞིན་རྒྱ་ནག་ཏུ་ཡོད་པའི་ངའི་ནང་མི་རྣམས་ལ་སུན་གཙེར་དང་། དམ་དྲག་ཤུགས་ཆེན་བྱས་པ་དང་། ང་ལ་ལྟ་ཞིབ་ནན་པོ་བྱས་པ་དང་རྗེས་འདེད་བཏང་བ་སོགས་འཇིགས་སྐུལ་བྱས་པ་མ་ཟད། རི་མོའི་སྒྱུ་རྩལ་གྱི་འགྲེམས་སྟོན་བྱས་མི་བཅུག་པའི་ཆེད་དུ་ཐབས་ལམ་འདྲ་མིན་བེད་སྤྱོད་བྱས་ཏེ། རི་མོའི་སྒྱུ་རྩལ་གྱི་འགྲེམས་སྟོན་འཚོགས་པར་དམ་དྲག་ཡང་ཡང་བྱས་སོང་། རྒྱ་ནག་གིས་ང་ལ་དམ་དྲག་མུ་མཐུད་བྱེད་བཞིན་ཡོད་པར་བརྟེན། རྒྱ་ནག་ཏུ་ཡོད་པའི་ནང་མི་རྣམས་ལ་འབྲེལ་བ་རྦད་དེ་བཅད་དགོས་པ་དེ་ཐབས་ལམ་ཡག་ཤོས་ཤིག་མཐོང་སོང་། ཞེས་སོགས་བརྗོད་སོང་།
གསར་འགོད་པ། བསྟན་འཛིན་ཕུར་བུ།
