ཤེས་རིག་ལས་ཁུངས་ངོས་ནས་གཞི་རིམ་འོག་མའི་ཐོག་ཤུགས་བསྐྱོན་ཏེ། བྱིས་པའི་ཀློག་དེབ་སོགས་ལས་འཆར་ཆེན་པོ་བང་སྒྲིག་ཡོད་པ་དང་། ད་ལྟ་བྱིས་སྒྲུང་ ༤༠ ཙམ་འདོན་འཆར་ཡོད་པའི་པའི་ཐོག་བསྒྱུར་ཟིན་པའི་ཀློག་དེབ་ ༡༥ ཙམ་མི་འགྱང་བར་འཐོན་ལ་ཉེ་བ་དང་། དེ་འདྲའི་ཀློག་དེབ་རྩོམ་ཐུབ་པ་ཡིན་ན་ཤེས་རིག་གི་ངོས་ནས་པར་སྐྲུན་ཞུ་ཐབས་སུ་འབད་བརྩོན་བྱེད་རྒྱུ་ཡིན་ཞེས་ཤེས་རིག་བཀའ་བློན་མཆོག་གིས་གསུངས།
དེ་རིང་ཕྱི་དྲོའི་ཆུ་ཚོད་ ༣ པའི་ཐོག་དྷ་ཤོད་བོད་ཁྱིམ་སློབ་གྲྭའི་ཚོགས་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག གྲྭ་རེ་མདོ་སེང་གེ་ལགས་ཀྱིས་རྩོམ་སྒྲིག་གནང་བའི་ <<གཏམ་བརྒྱུད་ལམ་ནས་མེས་པོའི་ཞབས་རྗེས་འཚོལ་བ་>>ཅེས་པའི་དཔེ་ཚོགས་དེབ་ཕྲེང་བཅུ་དང་། བྱང་ཨ་རིའི་གཟའ་མཇུག་སློབ་གྲྭའི་སློབ་དེབ་གསུམ་བཅས་དབུ་འབྱེད་གནང་སོང་ལ། དབུ་འབྱེད་མཛད་སྒོའི་སྐུ་མགྲོན་གཙོ་བོ་ཤེས་རིག་བཀའ་བློན་དངོས་གྲུབ་ཚེ་རིང་མཆོག་དང་། ཤེས་རིག་ལས་ཁུངས་ཀྱི་ཤེས་ཡོན་ལྷན་ཚོགས་ཀྱི་རྩོམ་སྒྲིག་པ་རྣམ་པ། དེ་བཞིན། ཀིརྟི་བྱེས་པ་གྲྭ་ཚང་གི་དགེ་སློབ་དང་། དྷ་ཤོད་བོད་ཁྱིམ་གྱི་འཛིན་རིམ་དྲུག་པ་བདུན་པའི་དགེ་སློབ་རྣམས་པ་སོགས་ཕེབས་འདུག
མཛད་སྒོའི་ཐོག་རེ་མདོ་སེང་གེ་ལགས་ཀྱིས་ཀློག་དེབ་དེ་དག་རྩོམ་སྒྲིག་གི་དགོས་དམིགས་དང་དེའི་རྒྱབ་ལྗོངས་སྐོར་ལ། བཙན་བྱོལ་ནང་གི་མི་རབས་གསུམ་པ་བཞི་པ་ནས་བཟུང་གནས་སྟངས་མང་པོ་ཞིག་ལ་འགྱུར་བ་ཕྱིན་པ་དང་མཉམ་དུ་སློབ་གྲྭ་ཁག་གི་གནས་སྟངས་ལའང་འགྱུར་བ་ཕྱིན་ཡོད། འགྱུར་བ་ཆེན་པོ་གཅིག་དེ་མི་སོ་སོའི་མི་ཚེ་རིན་ཐང་གི་ལྟ་བ་ལ་འགྱུར་བ་ཕྱིན་པ་དང་། གཉིས་པ་སློབ་གཉེར་བ་ཚོའི་ཤེས་ཡོན་སློབ་སྦྱོང་གི་གོ་དོན་ངོས་འཛིན་ལ་འགྱུར་བ་ཕྱིན་ཡོད། དེ་ནིི་ཧ་ཅང་ཉེན་ཁ་ཆེ་བའི་འགྱུར་བ་ཆེན་པོ་གཉིས་རེད། མི་ཞིག་གི་མི་ཚེ་ཁ་ཕྱོགས་སམ་མི་རབས་ཤིག་གི་མ་འོངས་གནས་སྟངས་ག་འདྲ་ཆགས་མིན་དེ། མི་སྒེར་སོ་སོ་དང་མི་རིགས་ཤིག་གི་མི་རབས་དེས་མི་ཚེ་རིན་ཐང་ངོས་འཛིན་བྱེད་སྟངས་དང་འབྲེལ་བ་ཆེན་པོ་ཡོད། བཙན་བྱོལ་ནང་གི་མི་རབས་དང་པོ་དང་གཉིས་པའི་གནས་སྟངས་ལ་མཚོན་ན། མི་མང་ཆེ་བའི་བསམ་བློའི་ནང་གཙོ་བོ་རྒྱལ་བ་རིན་པོ་ཆེའི་བཀའ་གསུང་ཅི་སྒྲུབ་གནང་རྒྱུ་དང་། བོད་བསྟན་པ་ཆབ་སྲིད་ལ་ཕན་ཐོགས་པའི་བྱ་བ་ཞིག་བསྒྲུབ་ཐུབ་པ་ཡིན་ན། སོ་སོའི་མི་ཚེའི་དོན་གོ་ཆོད་ཡོད་པའི་བསམ་བློ་ཤུགས་ཆེན་པོ་རེད། དུས་སྐབས་དེའི་སློབ་གཉེར་བ་ཚོའི་དཔལ་འབྱོར་གནས་སྟངས་སོགས་གང་ཅིའི་ཐད་ཧ་ཅང་སྐྱོ་བོ་ཡིན་ནའང་བསམ་བློའི་ངར་ཤུགས་ལ་བརྟེན་ཏེ། སོ་སོའི་སྦྱོང་བྱའི་ཤེས་ཡོན་གཏིང་ཟབ་པོ་ཤེས་པ་མ་ཟད། སློབ་གྲྭ་ནས་མཐར་ཕྱིན་པ་དང་ལྟོ་གོས་རག་ཐབས་ཙམ་མ་ཡིན་པར། སོ་སོའི་ཤེས་ཡོན་དེས་བོད་བསྟན་པ་ཆབ་སྲིད་དང་། བོད་མི་རིགས་ཀྱི་ཆེད་དུ་ཡིན་པའི་ལྷག་བསམ་ཆེན་པོ་ཡོད། ཡིན་ནའང་མི་རབས་གསུམ་པ་དང་བཞི་བ་ནས་བཟུང་སྤྱི་ཚོགས་ཀྱི་གནས་སྟངས་དང་སློབ་གྲྭའི་གནས་སྟངས་སོགས་ལ་འགྱུར་བ་ཕྱིན་པ་དང་མཉམ་དུ་མི་ཚེ་རིན་ཐང་ངོས་འཛིན་བྱེད་སྟངས་དང་སློབ་སྦྱོང་གི་གོ་དོན་ངོས་འཛིན་བྱེད་སྟངས་ལའང་འགྱུར་བ་ཆེན་པོ་ཞིག་འགྲོ་བཞིན་ཡོད། ད་ལྟའི་ང་ཚོའི་མི་རབས་འདི་ཧ་ཅང་གཉེན་འཕྲེང་ཆེན་པོ་ཞིག་ལ་ཐུག་ཡོད་སྟབས། མ་འོངས་པར་ང་ཚོའི་མི་རིགས་འདི་གང་འདྲ་ཆགས་མིན་དེ་སློབ་གྲྭ་ཁག་ནང་སློབ་སྦྱོང་གང་འདྲ་གནང་མིན་དང་། སོ་སོའི་མི་ཚེ་རིན་ཐང་ག་འདྲ་ཞིག་ལ་ངོས་འཛིན་གནང་མིན། སོ་སོའི་སློབ་སྦྱོང་གི་གོ་དོན་མ་ནོར་བར་ངོས་འཛིན་བྱེད་ཐུབ་མིན་ལ་འབྲེལ་བ་ཆེན་པོ་ཡོད། ཅེས་བརྗོད་བྱུང་།
ཁོང་གི་ཀློག་དེབ་རྩོམ་སྒྲིག་གནང་བའི་སྐོར་ལ། གནའ་སྔ་མོའི་སྐྱེས་བུ་དམ་པ་དེ་ཚོས་ག་རེ་གནང་ཡོད་པ་དེ་ཟུར་འདོན་བྱས་ནས་རྣམ་པ་ཚོར་ཕུལ་བ་ཡིན་ན་དེས་ཕན་ཐོག་ཡོང་གི་རེད་བསམ་ནས། དཔེ་ཚོགས་ཀྱི་ཁ་བྱང་ལའང་<<གཏམ་བརྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་>>ཞེས་བཏགས་པ་ཡིན་ལ། དེ་སྔོན་ངས་<<བོད་ཀྱི་ཤེས་ཡོན་ལམ་ལུགས་དང་སྲིད་ཇུས་>>ཞེས་པའི་དེབ་ཅིག་བྲིས་པ་ཡིན། སྐབས་དེར་ངས་སྤྱི་ཚོགས་གནས་སྟངས་ལ་གང་ལ་འཚམས་རྒྱུས་ལོན་བྱུང་བ་བསྟུན་ཏེ། ཀློག་དེབ་རྩོམ་སྒྲིག་གི་ལས་དོན་འདི་འདྲ་ཞིག་བསྒྲུབ་པའི་འདུན་པ་བྱུང་སོང་། ཡིན་ནའང་དུས་ཚོད་ཀྱི་དབང་གིས་བར་སྐབས་སུ་ལས་དོན་དེ་བྱེད་ཐུབ་མ་སོང་། ཕྱི་ལོ་ ༢༠༡༢ ལོར་སྐབས་དེའི་ཤེས་རིག་འགན་འཛིན་བཀྲ་ཤིས་དོན་འགྲུབ་ལགས་དང་ང་ཚོའི་བར་ལ་སྐད་ཆ་བྱུང་ནས་གཏན་འཁེལ་བ་རེད། སྤྱིར་དེང་སང་གི་སྤྱི་ཚོགས་སྟེང་ལས་ཀ་འདི་འདྲར་ལག་པ་འཆང་མཁན་དཀོན་པོ་རེད་ལ། དཀོན་པོ་ཡིན་པའི་ལས་ཀ་དེར་ལག་པ་འཆང་ཐུབ་པ་ཡིན་ན། དེས་ང་ཚོའི་ཤེས་ཡོན་སློབ་གསོའི་སྟོང་ཆ་ཞིག་བསྐོང་ཐུབ་ཀྱི་ཡོད་སྟབས། ངས་དེབ་ཕྲེང་ ༡༠ དང་། དེབ་རེ་རེའི་ནང་གཏམ་བརྒྱུད་ ༡༠ རེ་བཅས་ཁྱོན་གཏམ་བརྒྱུད་ ༡༠༠ བྲིས་ཡོད། དེབ་ཕྲེང་དེ་དག་ནང་ངས་དུས་རབས་གསར་རྙིང་གི་རླབས་ཆེན་མི་སྣ་ ༣༤ ཆོས་ལུགས་ཆོལ་ཁ་རིས་མེད་ཐོག་འདེམས་སྒྲིག་བྱས་ཏེ། ཁོང་རྣམ་པའི་མི་ཚེ་ལོ་རྒྱུས་དང་མཛད་རྗེས་སྙིང་བསྡུས་སུ་བྲིས་ཡོད་ལ། རྩོམ་སྟངས་ཀྱི་ཐད་ནས་གཞི་རིམ་སློབ་མའི་ཤེས་ཚད་ལ་གཞིགས་ཏེ་བོད་རང་གི་བརྡ་སྤྲོད་དང་མཐུན་པའི་སྒོ་ནས་ཧ་ཅང་གོ་བདེ་བོར་བྲིས་ཡོད། དེང་སང་ཀློག་དེབ་གང་ལ་གང་འཚམས་ཡོད་ནའང་། ཀློག་དེབ་མང་པོ་ཞིག་བསྒྱུར་རྩོམ་དང་། བྱིས་སྒྲུང་། རྟོག་སྒྲུང་སོགས་རེད། བོད་རང་གི་དངོས་བྱུང་མི་སྣ་ཞིག་བརྗོད་བྱར་བཟུང་ནས་བྲིས་པའི་ཀློག་དེབ་དེ་འདྲ་མང་པོ་མཇལ་རྒྱུ་མ་བྱུང་། དེར་བརྟེན། དཔེ་དེབ་འདི་དག་ནང་བོད་རང་གི་དངོས་བྱུང་མི་སྣ་ཡིན་པ་དང་བོད་སྤྱི་ཚོགས་སྟེང་ཤུགས་རྐྱེན་ངེས་ཅན་ཡོད་མཁན། བོད་ཀྱི་ཆོས་དང་རིགས་གཞུང་ཐོག་མཛད་རྗེས་ཆེན་པོ་ཡོད་མཁན་ཁག་ཅིག་བརྗོད་བྱར་བཟུང་ནས་བྲིས་ཡོད། ཅེས་བརྗོད་བྱུང་།
དེའི་རྗེས་ཤེས་རིག་བཀའ་བློན་མཆོག་གིས་ཐེངས་འདིར་རེ་མདོ་སེང་གེ་ལགས་ཀྱིས་བཙན་བྱོལ་ནང་སློབ་ཕྲུག་སྟོང་ཕྲག་ཉི་ཤུ་རྩ་གྲངས་ཤིག་ཡོད་པ་ཚོའི་ཆེད་དང་། བོད་ནང་གི་སློབ་ཕྲུག་ཚོའི་ཆེད་དུ། དེ་བཞིན། བོད་པའི་སྐད་ཡིག་རིག་གཞུང་ཡར་རྒྱས་ཀྱི་ཆེད་དུ་སྐུ་ལས་བསྐྱོན་ནས་དེབ་བཅུ་བཏོན་ཡོད་པར་བོད་མི་ཚང་མས་ངེས་པར་དུ་དོ་སྣང་གནང་གལ་ཆེ་སྐོར་གསུངས་པ་དང་འབྲེལ་ཏེ། ད་སྔ་འཛམ་གླིང་སྒང་འདིར་སྐད་ཡིག་ཁྲི་གཅིག་ལྷག་ཡོད་པ་ལས་ད་ཆར་སྐད་ཡིག་ ༥༦༠༠ ཙམ་ལས་མེད་པ་དང་། དེའི་ནང་ནས་སྐད་ཡིག་བརྒྱ་དང་ཉི་ཤུ་རྩ་གྲངས་ཤིག་ལོ་ལྔ་བཅུའི་ནང་མེད་པ་ཆགས་ཡོད་པ་དང་། དེའི་རྒྱུ་མཚན་སྐད་ཡིག་དེ་ཤེས་མཁན་འཛམ་གླིང་ནང་མི་རེ་ཟུང་ལས་མེད་སྟབས། སྐད་ཡིག་དེ་མེད་པ་ཆགས་པ་དང་མི་རིགས་དེ་ཡང་མེད་པ་ཆགས་ཀྱི་ཡོད་པ་རེད། གཞན། འཛམ་གླིང་ནང་མི་འབོར་ཐེར་འབུམ་ ༧ བཤད་ཀྱི་ཡོད་པ་དང་། མི་འབོར་ཐེར་འབུམ་ ༧ དེས་སྐད་ཡིག་བརྒྱ་ཆ་ ༤ མ་གཏོགས་བེད་སྤྱོད་གཏོང་གི་མེད་སྟབས། སྐད་ཡིག་མང་པོ་ཞིག་རང་བཞིན་གྱིས་མེད་པ་ཆགས་འགྲོ་བཞིན་ཡོད་པ་དང་། མི་རིགས་ཤིག་གི་སྐད་ཡིག་གནས་དང་མ་གནས་དེ། སྐད་ཡིག་དེ་བེད་སྤྱོད་བཏང་དང་མ་བཏང་ལ་རག་ལས་ཡོད་སྟབས། བོད་སྐད་ཡིག་བེད་སྤྱོད་གཏོང་མཁན་བོད་མི་ས་ཡ་དྲུག་ཙམ་ལས་མེད་པ་དང་། བོད་སྐད་ཡིག་གི་ཉེན་ཁ་གཞན་ཞིག་དེ་རྒྱ་ནག་གཞུང་གིས་མངོན་གསལ་དོད་པོས་བོད་སྐད་ཡིག་བཀག་སྡོམ་བྱེད་བཞིན་ཡོད་སྟབས། བོད་ནང་གི་བོད་མི་ཚོས་དེ་ལ་གདོང་ལེན་ཞེ་དྲགས་གནང་གི་ཡོད་ཀྱང་། བཙན་བྱོལ་ནང་ང་ཚོ་རང་ཉིད་ཀྱིས་གཏོར་བཤིག་གཏོང་གི་ཡོད་སྟབས། ང་ཚོ་གཟབ་གཟབ་མ་བྱས་ཚེ། བོད་སྐད་ཡིག་དེ་ཡང་རིམ་གྱིས་མེད་པ་ཆགས་རྒྱུའི་ཉེན་ཁ་ཆེན་པོ་ཞིག་ཏུ་སླེབ་ཡོང་གི་ཡོད་དང་། གལ་ཏེ་བོད་སྐད་ཡིག་མེད་མ་ཆགས་ན། བོད་ཀྱི་བླ་སྲོག་མེད་པ་ཆགས་པ་རེད། ཅེས་གསུངས་སོང་།
ཁོང་གིས་མུ་མཐུད་དུ། ཤེས་རིག་ལས་ཁུངས་ངོས་ནས་གཞི་རིམ་འོག་མའི་ཐོག་ཤུགས་བསྐྱོན་ཏེ། བྱིས་པའི་ཀློག་དེབ་སོགས་ལས་འཆར་ཆེན་པོ་བང་སྒྲིག་ཡོད་པ་དང་། དེའི་ནང་ནས་གལ་ཆེ་ཤོས་དེ་ཀློག་དེབ་དང་སྒྲུང་དེབ་མང་པོ་ཞིག་པར་སྐྲུན་བྱ་དེ་ཡིན་ཞིང་། རྩོམ་པ་པོས་སློབ་ཕྲུག་གི་བསམ་བློ་དང་ཤེས་ཚད་དང་མཚམས་པ། སློབ་ཕྲུག་གི་དང་བ་འདྲེན་ཐུབ་པའི་ཀློག་དེབ་དེ་འདྲ་འབྲི་ཐུབ་དགོས་པ་དང་། དེའི་ཐད་ཤེས་རིག་ལས་ཁུངས་ནས་མཐུན་འགྱུར་ཟབ་སྦྱོང་མང་པོ་ཕུལ་ཡོད་པ་མ་ཟད། ད་ལྟ་བྱིས་སྒྲུང་ ༤༠ ཙམ་འདོན་འཆར་ཡོད་པའི་པའི་ཐོག་བསྒྱུར་ཟིན་པའི་ཀློག་དེབ་ ༡༥ ཙམ་མི་འགྱང་བར་འཐོན་ལ་ཉེ་བ་དང་། དེ་འདྲའི་ཀློག་དེབ་རྩོམ་ཐུབ་པ་ཡིན་ན། ཤེས་རིག་གི་ངོས་ནས་པར་སྐྲུན་ཞུ་ཐབས་སུ་འབད་བརྩོན་བྱེད་རྒྱུ་ཡིན། ཞེས་གསུངས་སོང་།
མཇུག་ཏུ་ཁོང་གིས་བྱང་ཨ་རིའི་གཟའ་མཇུག་སློབ་གྲྭའི་སྐོར་ལ། ལྷོ་བྱང་ཨ་རིའི་སློབ་ཕྲུག་ཚོས་བོད་སྐད་བཤད་མི་ཤེས་པར་མང་ཆེ་བས་དབྱིན་སྐད་རྒྱག་གི་ཡོད་པ་དང་། སྐབས་རེར་ཕ་མ་དང་ཕྲུག་གུའི་བར་ལ་གོ་བརྡ་འཕྲོད་ཀྱི་མེད་སྟབས། ཁོ་ཚོའི་ཆེད་དུ་ཤེས་རིག་ལས་ཁུངས་ནས་སློབ་དེབ་རྩོམ་སྒྲིག་ཞུས་པ་དང་། ཐོག་མ་ཁོ་ཚོས་བོད་སྐད་བཤད་ཐུབ་པ་ནས་བོད་ཡིག་ཀློག་ཐུབ་ཙམ་ལ་རེ་བ་རྒྱག་གི་ཡོད་པ་མ་གཏོགས། བཙན་བྱོལ་ནང་གི་སློབ་ཕྲུག་ཚོ་ལྟར་བོད་སྐད་ཡིག་ཐོག་ནས་རྩོམ་འབྲི་མཁན་དང་མཁས་པ་ཆགས་པར་ཁོ་ཚོས་ང་ཚོར་རེ་བ་རྒྱག་གི་ཡོད་པ་མ་རེད། ཅེས་གསུངས་སོང་།
<<གཏམ་བརྒྱུད་ཀྱི་ལམ་ནས་མེས་པོའི་ཞབས་རྗེས་འཚོལ་བ་>>ཞེས་པའི་ཀློག་དེབ་དེ་དག་གཞི་རིམ་འཛིན་གྲྭ་བདུན་པ་ཡན་གྱི་སློབ་མའི་ཤེས་ཚད་གཞིར་བཟུང་སྟེ་བྲིས་ཡོད་པ་དང་། བྱང་ཨ་རིའི་གཟའ་མཇུག་སློབ་གྲྭའི་འཛིན་རིམ་གསུམ་པ་ནས་ལྔ་བའི་བར་གྱི་སློབ་དེབ་གསུམ་དེ་ཤེས་རིག་ལས་ཁུངས་ནས་རྩོམ་སྒྲིག་གནང་ནས་དྲ་ཐོག་ www.bodyiglobjong.com ཏུ་བཏང་ཡོད་འདུག
གསར་འགོད་པ། པདྨ་རྒྱལ།
ཡིག་ནོར་མེད་པར་སྨོན