སྲིད་སྐྱོང་སྤེན་པ་ཚེ་རིང་མཆོག་གིས་ང་ཚོའི་རྩ་དོན་གྱི་ཆེད་དུ་འགན་འཁྱེར་ནས་བོད་དོན་རྒྱབ་སྐྱོར་གནང་མཁན་རྣམས་དང་མཉམ་དུ་འགྲོ་ཐུབ་པ་ཡིན་ན་བོད་པའི་འཐབ་རྩོད་ལ་སྟོབས་དང་ནུས་པ་མི་འདྲ་བ་ཞིག་ཡོང་གི་རེད་ཅེས་གསུངས།
དེ་རིང་དང་སང་ཉིན་ཉིན་གྲངས་གཉིས་ཀྱི་རིང་བོད་ཀྱི་ཟློས་གར་ཚོགས་ཁང་དུ། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་ཆེན་ཐེངས་བརྒྱད་པ་དབུ་འཛུགས་གནང་སོང་། སྐབས་དེར་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བདེ་སྲུང་བཀའ་བློན་རྒྱ་རི་སྒྲོལ་མ་མཆོག རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་རྒྱལ་ཡོངས་འབྲེལ་མཐུད་པ་རིན་ཆེན་མཁའ་འགྲོ་ཁེར་མེ་ལགས། ལྡི་ལིའི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས། རྒྱ་གར་བོད་དོན་རྒྱབ་སྐྱོར་ཚོགས་པའི་སྡེ་ཚན་ནང་མའི་འབྲེལ་མཐུད་པ་པང་ཀ་ཇི་གྷོ་ཡལ་ (Pankaj Goyal) ལགས། འཕགས་བོད་འབྲེལ་མཐུད་ལས་ཁང་གི་འབྲེལ་མཐུད་པ་བཀྲ་ཤིས་བདེ་སྐྱིད་ལགས། དེ་བཞིན་འཕགས་བོད་འབྲེལ་མཐུད་ལས་ཁང་གི་ལས་བྱེད་དང་། རྒྱ་གར་བོད་དོན་རྒྱབ་སྐྱོར་བ་ ༣༠༠ ཙམ་ལྷན་འཛོམས་གནང་འདུག
བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། ཁ་སང་ཕྱི་ཚེས་ ༡༡ ཉིན་རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པས་༸གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་པར་བོད་མི་ཡོངས་ཀྱི་ཚབ་ཞུས་ཏེ་ཐུགས་རྗེ་ཆེ་ཞུ་ཡི་ཡིན། དེ་རིང་རྒྱ་གར་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་ཆགས་ཀྱི་ཡོད་པ་རེད། རྒྱ་གར་གྱི་ད་ལྟ་དང་མ་འོངས་པའི་ཆབ་སྲིད་ཀྱི་གནས་སྟངས་དང་། གནས་བབ་འདི་བོད་ཀྱི་གནས་བབ་དང་ཐད་ཀར་འབྲེལ་བ་ཡོད་པ་ཞིག་རེད། འཛམ་གླིང་ནང་ཆབ་སྲིད་ཀྱི་འགྱུར་འགྲོས་གང་འདྲ་ཞིག་ཕྱིན་རུང་། རྒྱལ་ཁབ་གཞན་གྱིས་དང་པོ་བལྟ་ས་དེ་བོད་དང་འབྲེལ་བའི་ཐོག་ནས་རྒྱ་གར་ལ་ལྟ་ཡི་ཡོད་པ་རེད། དེར་བརྟེན། ང་ཚོར་རྒྱ་གར་གྱི་ལངས་ཕྱོགས་དང་རྒྱབ་སྐྱོར་དེ་དག་གལ་ཆེན་པོ་ཆགས་ཀྱི་ཡོད་པ་རེད། རྒྱ་གར་གྱི་དབུ་ཁྲིད་དམ་པ་མང་པོ་ཞིག་གིས་རྒྱ་གར་གྱི་ལངས་ཕྱོགས་དེ་གསལ་པོ་གསུངས་ཡོད་པ་དང་། དེ་བཞིན་རྒྱ་གར་གཞུང་གི་ལངས་ཕྱོགས་བརྟན་པོ་ཆགས་ཀྱི་ཡོད་ལ། ད་ལྟའི་རྒྱ་གར་གཞུང་ལ་རེ་བ་དང་ཡིད་ཆེས་ཡོད་པས། དུས་རན་པ་ཞིག་ལ་ཏན་ཏན་དགོངས་པ་བཞེས་ཀྱི་རེད་བསམ་པ་དང་། དགོངས་པ་བཞེས་དགོས་པ་ཞིག་རེད། དེ་ནི་རྒྱ་གར་མི་མང་གི་མངོན་འདོད་དང་། རྒྱ་གར་གྱི་ཁེ་ཕན། འཇིག་རྟེན་འདི་ལ་ཕན་ཐོགས་པའི་གནས་བབ་ཅིག་ཡིན་པ་ལས། བོད་ཁོ་ནའི་སྐད་ཆ་ཞིག་མ་རེད། ཅེས་གསུངས་སོང་།
ཡང་བདེ་སྲུང་བཀའ་བློན་མཆོག་གིས། རྒྱ་ནག་གིས་བོད་ལ་བཙན་འཛུལ་བྱས་ཏེ་བོད་ནང་གི་འགྲོ་བ་མིའི་ཐོང་ཐང་རྩིས་མེད་རྡོག་རོལ་བཏང་དང་གཏོང་མུས་ཡིན་པ་དང་། རྒྱ་ནག་གིས་བོད་མིའི་ངོ་བོ་དང་། རིག་གཞུང་། སྐད་ཡིག་སོགས་རྩ་མེད་གཏོང་སླད། བོད་ནང་གི་བོད་ཕྲུག་ས་ཡ་གཅིག་ཙམ་ཕ་མ་དང་ཁ་བྲལ་དུ་བཅུག་སྟེ་བཅའ་སྡོད་སློབ་གྲྭར་བཅུག་ནས་རྒྱ་སྒྱུར་སློབ་གསོ་སྤྲད་དང་སྤྲོད་མུས་ཡིན་པ་རེད། དེ་བཞིན་བོད་ནང་གི་ཛ་དྲག་གནས་སྟངས་སོགས་ཤེས་རྟོགས་ཡོད་པའི་ཐོག་ནས་རྒྱ་གར་གྱིས་དྲང་བདེན་དང་། བོད་དང་རྒྱ་གར་གྱི་དོན་དུ་ལངས་ཕྱོགས་བརྟན་པོ་འཛིན་དགོས་ཀྱི་ཡོད་པ་རེད། བོད་ཀྱི་མ་འོངས་པ་དེ་རྒྱ་གར་གྱི་བདེ་འཇགས་དང་འབྲེལ་བ་ཡོད་ལ། འཛམ་གླིང་ཁྱོན་ཡོངས་ལ་འབྲེལ་བ་ཡོད་པ་རེད། ཅེས་དང་། ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་གིས། ཧིན་བོད་མཐའ་མཚམས་དེ་རྒྱ་གར་དང་བོད་གཉིས་ས་འབྲེལ་ཡིན་པ་ལས་རྒྱ་ནག་ལ་འབྲེལ་བ་མེད། ཅེས་འགྲེལ་བརྗོད་གནང་ཡོད་པ་ལྟར། ལངས་ཕྱོགས་བརྟན་པོ་བཟུང་སྟེ་མདུན་སྐྱོད་བྱ་དགོས་སྐོར་དང་། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ཀྱིས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། རྒྱ་གར་གཞུང་མང་གཉིས་ཀྱིས་མུ་མཐུད་དུ་བོད་དོན་རྒྱབ་སྐྱོར་གནང་རྒྱུའི་འབོད་སྐུལ་ཞུས་སོང་།
སྲིད་སྐྱོང་སྤེན་པ་ཚེ་རིང་མཆོག་གིས། ང་ཚོ་རྒྱ་གར་ནང་གནས་སྡོད་བྱས་ཏེ་ལོ་ངོ་ ༦༦ ཙམ་འགྲོ་ཡི་ཡོད་པ་དང་། རྒྱ་གར་ནང་བོད་པའི་གནད་དོན་ཆ་ཚང་ཤེས་ཀྱི་ཡོད་རེད་བསམ་པའི་རེ་བ་ཞིག་ཡོད་རེད་དེ། སྐབས་རེ་ཤེས་ཡོན་པའི་ནང་ལོགས་ལ་སྐད་ཆ་བཤད་པའི་སྐབས། བོད་ཀྱི་བྱུང་རབས་སོགས་ཀྱི་སྐོར་ལ་གོ་རྟོགས་གཏིང་ཟབ་པོ་ཡོད་མཁན་ཁག་པོ་འདུག དེར་བརྟེན་བོད་དོན་རྒྱབ་སྐྱོར་བ་ཚོ་བརྒྱུད་ནས་བོད་ཀྱི་གནས་སྟངས་དང་། གནས་བབ། བྱུང་རབས་དེ་དག་ག་ཚོད་ཐུབ་ཐུབ་ཀྱིས་མི་རབས་གསར་པ་ཚོར་ངོ་སྤྲོད་བྱ་ཐུབ་པ་དང་། ཁོང་ཚོའི་ལས་རིམ་ནང་ང་ཚོས་མཉམ་ཞུགས་བྱས་ཏེ། སྲིད་སྐྱོང་ནས་འཛིན་སྐྱོང་གི་ལས་བྱེད། སྤྱི་འཐུས་རྣམ་པ་ས་གནས་སུ་ཕེབས་པའི་སྐབས་བོད་དོན་ངོ་སྤྲོད་བྱ་རྒྱུ་དང་། མོས་མཐུན་གསལ་པོ་ཞིག་བྱུང་བ་ཡིན་ན། བོད་ཀྱི་ས་ཆའི་ཆགས་བབ་དང་། དེའི་བྱུང་རབས། གནད་འགག་དེ་ཚོ་ཤེས་པ་ཡིན་ན། རྒྱ་གར་ལ་ཁེ་ཕན་ག་རེ་ཡོད་པ་རང་བཞིན་གྱིས་ཤེས་ཡོང་གི་རེད། ཆབ་སྲིད་པ་སོགས་ལ་བོད་ཀྱི་ས་ཁྱོན་གྱི་སྐོར་ལ་གོ་རྟོགས་སྤེལ་དགོས་པ་དང་། རྒྱ་ནག་གིས་བོད་ཚབ་ཏུ་ཞིས་ཙང་ (Xizang) ཟེར་བའི་ཐ་སྙད་བེད་སྤྱོད་གཏོང་མི་རུང་བ་སོགས་བོད་དོན་སྐོར་ལ་འགྲེལ་བཤད་རྒྱག་དགོས་པ་སོགས་རྨང་གཞི་ནས་ནུས་པ་སྤུངས་ཐུབ་པ་ཡིན་ན། དངོས་གནས་བོད་དོན་རྒྱབ་སྐྱོར་ཚོགས་པའི་མིང་དོན་གཉིས་ཀ་མཚུངས་པའི་ཐོག་ནས་ལས་ཀ་བྱེད་ཐུབ་པ་ཞིག་ཡོང་གི་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། ང་ཚོའི་རྩ་དོན་དེ་གཙོ་བོ་ཡིན་པར་བརྟེན། བོད་པ་ཚོས་འགན་སྔོན་ལ་འཁྱེར་ནས་འགྲོ་དགོས་ཀྱི་ཡོད་པ་རེད། ཁོང་ཚོ་རྒྱབ་སྐྱོར་བྱེད་མཁན་ཞིག་ཡིན་པ་དང་། འགན་འདི་ང་ཚོར་ཤུགས་ཆེ་བ་ཡོད་པ་རེད། བོད་པས་འགན་འཁྱེར་བ་དང་། བོད་དོན་རྒྱབ་སྐྱོར་བྱེད་མཁན་ཚང་མ་མཉམ་དུ་འགྲོ་ཐུབ་པ་ཡིན་ན་བོད་པའི་འཐབ་རྩོད་འདི་ལ་སྟོབས་དང་ནུས་པ་མི་འདྲ་བ་ཞིག་ཡོང་གི་རེད། ཅེས་དང་། རྒྱ་ནག་གིས་བོད་ཀྱི་ལོ་རྒྱུས་ལ་འཁྱོག་བཤད་བྱས་པ་དང་། བོད་ནང་བཙན་འཛུལ་བྱས་པ་དེ་རྒྱལ་སྤྱིའི་ཁྲིམས་དང་འགལ་གྱི་ཡོད་པ་དང་། རྒྱ་ནག་གི་ལོ་རྒྱུས་ཀྱི་ཐོག་ནས་ཁུངས་བསྐྱལ་རྒྱུ་མེད་པའི་གནས་སྟངས། ང་ཚོའི་རྒྱལ་ཁབ་བཟུང་བ་ཙམ་དུ་མ་ཡིན་པར་རྒྱལ་ཁབ་ཀྱི་སྣོད་དང་བཅུད། མི་རིགས་ཀྱི་ངོ་བོ་རྩ་མེད་གཏོང་ཐབས་བྱས་དང་བྱེད་མུས་ཡིན་པ་རེད། དེ་ཚོ་ངོ་ཚ་དགོས་པ་ཞིག་རེད། འཛམ་གླིང་འདིའི་ནང་དཔལ་ཡོན་ཡག་པོ་ཡོད་པ་དེ་དག་ཚང་མ་སྲུང་སྐྱོབ་བྱ་དགོས་ཀྱི་ཡོད། དེ་མིན་སྐད་ཡིག་དང་། རིག་གཞུང་། དཔལ་ཡོན་ཡག་པོ་ཡོད་པ་དེ་དག་མེད་པ་བཟོས་པ་སོགས་བྱས་ཚེ། མ་འོངས་པར་འཛམ་གླིང་གི་གནས་སྟངས་འདི་གང་འདྲ་ཆགས་ཀྱི་རེད། དེང་སང་འཛམ་གླིང་ནང་དམག་འཁྲུག་མང་པོ་བྱུང་བཞིན་པའི་སྐབས་འདིར། རྒྱ་ནག་གཞུང་གིས་འཛམ་གླིང་ནང་ཞི་བདེ་དང་། འཆམ་མཐུན་བྱ་དགོས་ཀྱི་རེད་ཟེར་ནས་ཤོད་ཀྱིན་འདུག རྒྱ་ནག་ནང་ལོགས་ལ་འཆམ་མཐུན་དང་ཞི་བདེ་ཡོང་རྒྱུའི་སྐོར་ག་རེ་བྱས་ནས་བྱེད་ཐུབ་ཀྱི་མེད་པ་རེད། གལ་སྲིད་འཛམ་གླིང་ནང་ཞི་བདེ་དགོས་ཀྱི་ཡོད་ན། རྒྱ་ནག་ནང་ལོགས་ལ་ཞི་བདེ་དགོས་ཀྱི་རེད། མི་རིགས་ཚང་མ་ལ་ལྟ་སྟངས་གཅིག་པ་བལྟ་དགོས་ཀྱི་རེད། ཅེས་གསུངས་སོང་།
གསར་འགོད་པ། བསྟན་འཛིན་ཕུར་བུ།
