རྒྱལ་བ་རིན་པོ་ཆེའི་ཐུགས་གི་བོད་པ་དང་རྒྱ་མི།

རྒྱ་ནག་རང་ལ་མཚོན་ན་གནའ་སྔ་མོའི་རིག་གནས་རྩ་ཆེན་མང་པོ་ཡོད་པ་དག རིག་གནས་གསར་བརྗེའི་སྐབས་རྩ་རླག་ཏུ་བཏང་ཡོད། དེ་དང་མཉམ་དུ་མར་ཁུ་སིའི་ལྟ་བ་དེ་ཡང་མེད་པ་ཆགས་ཡོད་སྟབས། དེང་སང་དཔལ་འབྱོར་ཡར་རྒྱས་འགྲོ་བཞིན་པའི་སྐབས་འདིར། རྒྱ་ནག་གི་གཞོན་སྐྱེས་མང་པོས་དཔལ་འབྱོར་དང་དངུལ་སོགས་ལས་དྲན་རྒྱུ་གང་ཡང་མེད་པ་ཞིག་ཏུ་གྱུར་ཡོད།

སྤྱི་ནོར་ྋགོང་ས་མཆོག་ཐེངས་འདིར་ཧྤ་རན་སིའི་ལྷོ་ཕྱོགས་གྲོང་སྡེ་རོ་ཁུ་རི་ཌོན་ཌིར་རྟེན་གཞི་བྱས་པའི་སྤྲུལ་སྐུ་བསོད་རྒྱལ་རིན་པོ་ཆེའི་ཆོས་ཚོགས་ཀྱི། རིག་པ་ལས་རབ་གླིང་པའི་གཙུག་ལག་ཁང་ལེགས་གྲུབ་ཟིན་པའི་དབུ་འབྱེད་མཛད་སྒོར་ཕེབས་ཡོད་པ་དང༌། མཛད་སྒོ་དེའི་སྟེང་ཧྤ་རན་སིའི་སྲིད་འཛིན་གྱི་སྐུ་ཟླ་དང༌། ཧྤ་རན་སི་ཕྱི་སྲིད་བློན་ཆེན། ཧྤ་རན་སིའི་འགྲོ་བ་མིའི་ཐོབ་ཐང་གི་བློན་ཆེན་བཅས་ཀྱང་ཕེབས་ཡོད་འདུག སྐབས་དེར་༧གོང་ས་མཆོག་གིས་བཀའ་སློབ་གནང་དོན། བདེན་པ་དང་འཚེ་བ་མེད་པ། རང་དབང་ཟེར་བ་དེ་མི་ཚང་མར་དགོས་པ་ཞིག་རེད་ལ། མི་ཚང་མས་དགའ་ཞེན་བྱེད་ས་ཞིག་རེད། ལུང་པ་བྱེ་བྲག་པ་འགའ་རེའི་ནང༌། མི་འདྲ་བ་རེ་བྱེད་ཀྱིན་པ་དེ། དོན་ངོ་མའི་སྟེང་ནས་རྒྱུ་མཚན་མེད་པ་ཞིག་རེད། རྒྱ་ནག་གཞུང་གིས་བོད་ཀྱི་དཀའ་རྙོག་ཟེར་བ་ཞིག་ཡོད་པ་མ་རེད། བོད་དེ་རྒྱ་ཁོངས་རེད། བོད་ཀྱི་གནད་དོན་དེ་དམིགས་བསལ་གང་ཡང་མ་རེད། རྒྱ་ནག་ནང་ཁུལ་གྱི་དོན་དག་ཅིག་རེད་ཟེར་གྱིན་ཡོད་ལ། ཕྱི་ལྟར་དུ་རྒྱ་ནག་གཞུང་གིས་དྲིལ་བསྒྲགས་གང་འདྲ་ཞིག་བྱས་ཀྱང་རུང༌། རྒྱལ་སྤྱིའི་ནང་དུ་བོད་དོན་དཀའ་རྙོག་ཟེར་བ་ཞིག་ལྷག་ཡོད་པ་གསལ་བོ་ཞེ་དྲག་རེད། དེ་བཞིན་རྒྱ་ནག་རང་ལ་མཚོན་ན་གནའ་སྔ་མོའི་རིག་གནས་རྩ་ཆེན་མང་པོ་ཡོད་པ་དག རིག་གནས་གསར་བརྗེའི་སྐབས་རྩ་རླག་ཏུ་བཏང་ཡོད། དེ་དང་མཉམ་དུ་མར་ཁུ་སིའི་ལྟ་བ་དེ་ཡང་མེད་པ་ཆགས་ཡོད་སྟབས། དེང་སང་དཔལ་འབྱོར་ཡར་རྒྱས་འགྲོ་བཞིན་པའི་སྐབས་འདིར། རྒྱ་ནག་གི་གཞོན་སྐྱེས་མང་པོས་དཔལ་འབྱོར་དང་དངུལ་སོགས་ལས་དྲན་རྒྱུ་གང་ཡང་མེད་པ་ཞིག་ཏུ་གྱུར་ཡོད། གནས་སྐབས་འདི་འདྲ་ཞིག་ལ་བོད་ཀྱི་ཆོས་དང་རིག་གཞུང༌། བྱམས་སྙིང་རྗེ་སོགས་ནང་ཆོས་ཀྱི་ལྟ་གྲུབ་དེ་དག་གིས་ཕན་ཐོགས་ཆེན་པོ་ཡོད་ཅེས་གསུང་ཡོད་ལ། དེ་བཞིན་བོད་ཀྱི་ཁོར་ཡུག་སྲུང་སྐྱོབ་དེ་ཧ་ཅང་གལ་ཆེན་པོ་རེད། གང་ཡིན་ཟེར་ན། ཨེ་ཤ་ཡའི་རྒྱལ་ཁབ་ཁག་ཏུ་བཞུར་བཞིན་པའི་རྒྱུགས་ཆུ་མང་པོ་ཞིག་གི་འབྱུང་ཁུང་བོད་རེད། རྒྱ་ནག་གཞུང་གིས་ལོ་འདི་འགར་གང་འཚམ་གྱི་བདག་ཉར་བྱེད་གི་ཡོད་ནའང༌། སྔོན་མ་ལོ་མང་རིང་བོད་ཀྱི་རང་བྱུང་ཁོར་ཡུག་ལ་གཏོར་བཤིག་བཏང་བའི་རྐྱེན་གྱིས། ད་དུང་ཡང་ཉམ་གསོ་ཚད་ལྡན་ཞིག་བྱུང་ཐུབ་མེད་ཅེས་གསུངས་ཡོད།

མཛད་རིམ་གྲུབ་རྗེས་དབུ་ཁྲིད་དེ་དག་གིས་ྋགོང་ས་མཆོག་ལ་ཟུར་དུ་མཇལ་འཕྲད་ཞུས་ཡོད། སྐབས་དེར་༧གོང་ས་མཆོག་གི་གསུང་སྒྱུར་མཁན་གྱིས་གསར་འགོད་པ་ཚོར། ཐེངས་འདིར་༧ཏཱ་ལའི་བླ་མ་མཆོག་དང་ཧྥ་རན་སིའི་སྲིད་འཛིན་གྱི་སྐུ་ཟླ། ཧྤ་རན་སིའི་ཕྱི་སྲིད་བློན་ཆེན། འགྲོ་བ་མིའི་ཐོབ་ཐང་གི་བློན་ཆེན་བཅས་ཀྱིས་བོད་ཀྱི་གནད་དོན་སྐོར་ལ་བཀའ་སྡུར་གནང་ཡོད། ཏཱ་ལའི་བླ་མས་བོད་ནང་གི་ད་ལྟའི་གནས་སྟངས་ལ་ཐུགས་འཚབ་ཆེན་པོ་གནང་གི་ཡོད་སྐོར་དང་། ཨོ་ལིམ་པིག་རྩེད་འགྲན་གྱི་སྐབས་འདིར་བོད་ནང་རྒྱ་གཞུང་གིས་གདུག་རྩུབ་ཆེན་པོས་དྲག་གནོན་བྱེད་བཞིན་ཡོད་པ་དང༌། ཕྱི་ཟླ་ ༩ ནང་བོད་མི་མང་སྤྱི་འཐུས་གྲོས་ཚོགས་འཚོགས་རྒྱུ་དང་ཕྱི་ཟླ་ ༡༠ ནང་ཁོང་གི་སྐུ་ཚབ་དང་རྒྱ་ནག་གི་སྐུ་ཚབ་བར་སླར་ཡང་འབྲེལ་མོལ་ལྷན་འཛོམས་གནང་རྒྱུར་ཐུགས་རེ་གནང་གི་ཡོད་ཚུལ་སོགས་གསུངས་ཡོད། དེ་བཞིན་ཧྥ་རན་སིའི་སྐུ་ཚབ་དོན་གཅོད་འཇམ་དཔལ་ཆོས་བཟང་ལགས་ཀྱིས་གསར་འགོད་པ་ཚོར། ཧྥ་རན་སིའི་སྲིད་འཛིན་གྱིས་ཐེངས་འདིར་ཁོང་གི་སྐུ་ཟླ་བརྒྱུད་ནས་༧གོང་ས་མཆོག་ལ་འཚམས་འདྲི་ཞུས་ཡོད་པ་དང༌། ཧྥ་རན་སིའི་ཕྱི་སྲིད་བློན་ཆེན་ནི་ལོ་ ༢༠ གོང་ནས་༧གོང་ས་མཆོག་དང་མཇལ་འཕྲད་ཞུ་མྱོང་མཁན་ཞིག་ཡིན་ལ། ༧གོང་ས་མཆོག་ཧྥ་རན་སིར་ཆིབས་སྒྱུར་ཐད་དུས་རྟག་ཏུ་དགའ་བསུ་ཞུ་གིན་ཡོད་ཅེས་གསུངས་ཡོད།

བསྐྱར་བཅོས།: ༢༠༡༧/༠༥/༠༢

Leave a Reply

2 thoughts on “རྒྱལ་བ་རིན་པོ་ཆེའི་ཐུགས་གི་བོད་པ་དང་རྒྱ་མི།

  1. དོན་འགྲུབ་བཀྲ་ཤིས།

    སྐུ་ཞབས་དོ་ཁོ་ལགས། ཐེངས་འདིར་ཧྥ་རིན་སིའི་སྲིད་འཛིན་གྱིས་༧གོང་ས་མཆོག་ལ། བོད་ནང་གི་བོད་མའི་དཀའ་སྡུག་ལ་སེམས་འཚབ་ཡོད། ཡིན་ནའང་ང་ཚོས་རོགས་གེ་བྱ་ཐུབ་གི་མ་རེད། ཁྱེད་ཚོས་ང་ཚོ་ལ་རེ་བ་ཆེན་པོ་བྱེད་ཀྱིན་ཡོད་ན་ནོར་བ་རེད། ཅེས་ལན་བསྐུར་ཡོད་པ་དེ་འདྲ་མ་གོ་ལགས། དེ་ནི་གནས་ཚུལ་གསར་བ་དང་། གནད་དོན་ཆུང་ཆུང་རེད།
    རྒྱ་ནག་གི་གནོན་ཤུགས་འོག་ཐེངས་འདིར་སྲིད་འཛིན་གྱིས་༧གོང་ས་མཆོག་ལ་ཐུག་འཕྲད་གནང་མེད། དེ་ནི་༧གོང་ས་མཆོག་གིས་རྒྱ་ནག་ཁོང་ཁྲོ་མི་སློང་ཆེད་ཁོང་གི་ཐུགས་རེ་ལྟར་ཕྱིར་འཐེན་གནང་ཚུལ་འདུག་ལ། ༧གོང་ས་མཆོག་གིས་རྒྱལ་ཁབ་གང་ཞིག་གི་དབུ་ཁྲིད་ཡིན་ནའང་ཁོང་དང་མཉམ་དུ་མཇལ་འཕྲད་གནང་བར་བརྟེན། རྒྱལ་ཁབ་གཉིས་ཀྱི་འབྲེལ་བར་དོ་ཕོག་འགྲོ་གི་ཡོད་ཚེ་ཁོང་ནས་མཇལ་འཕྲད་ཕྱིར་འཐེན་གནང་རྒྱུའི་དགོངས་བཞེས་ཤུགས་ཆེན་གནང་ཡོད་པ་རེད།
    སྔར་ལོ་ཧྤ་རིན་སིའི་སྲིད་འཛིན་ནེ་ཁོལ་༧གོང་ས་མཆོག་ལ་ཐུག་འཕྲད་བྱས་རྗེས། རྒྱ་ནག་གིས་ཚོང་འབྲེལ་ཁག་ཅིག་ཕྱིར་འཐེན་བྱས་ཡོད ། དྲང་བདེན་གྱི་རྒྱབ་དཔུང་། དཔལ་འབྱོར་འགྲན་རྩོད་ཀྱི་གོང་དུ་འཇོག་མི་ཐུབ་མཁན་ཧྤ་རིན་སིའི་སྲིད་འཛིན་ནེ་ཁོལ་གཅུག་པུ་ག་ལ་ཡིན།

  2. ཧྥ་རིན་སིའི་སྲིད་འཛིན་གྱིས་༧གོང་ས་མཆོག་ལ་བོད་ནང་གི་བོད་མའི་དཀའ་སྡུག་ལ་སེམས་འཚབ་ཡོད། ཡིན་ནའང་ང་ཚོས་རོགས་གེ་བྱས་ཐུབ་གི་མ་རེད། ཁྱེད་ཚོས་ང་ཚོ་ལ་རེ་བ་ཆེན་པོ་བྱེད་ཀྱི་ཡོད་ན་ནོར་བ་རེད་ཅེས་ལན་བསྐུར་ཡོད་ཚུལ་འདུག་པ་བདེན་པ་རེད་དམ།