ཨ་རིའི་སྲིད་འཛིན་བྷུ་ཤུ་མཆོག་ཨེ་ཤ་ཡའི་རྒྱལ་ཁབ་ཁ་ཤས་སུ་མཐའ་མའི་གཟིགས་སྐོར་ལ་ཕེབས་ཡོད་ལ། ཚེས་ ༡༤ ཉིན་གྱི་དགོང་དྲོ་ཨེ་རཱག་གི་རྒྱལ་ས་བྷང་གཱ་ཌེ་ཐི་རུ་གསར་འགོད་ལྷན་ཚོགས་ཤིག་གི་ཐོག  བྷུ་ཤུ་དང་ཨེ་རཱག་སྲིད་བློན་གཉིས་ཀྱིས་མཛའ་འབྲེལ་གྱི་གཏམ་བཤད་གནང་མགོ་བརྩམས་མ་ཐག དབྱིན་ཡུལ་ནང་བརྟན་གཞི་བྱས་ཡོད་པའི་ཨེ་རག་གི་བརྙན་འཕྲིན་གསར་འགོད་པ་ཨལ་ཛེ་ཏི་ཟེར་བ་ཞིག་གིས་བྷུ་ཤུ་ལ་ཨེ་རག་གི་སྐད་ནང༌། ཁྱི་ཁྱོད་ཀྱིས་ཨེ་རག་གི་མི་མང་པོ་བསད་སོང༌། ཞེས་སྡིགས་དམོད་བྱེད་བཞིན་རྐང་མགོའི་ལྷམ་གཉིས་བླངས་ཏེ་བསྟུད་མར་གཞུས་ཡོད་འདུག བྷུ་ཤུ་མཆོག་དེ་ལས་གཡོལ་ཏེ་ཁོང་ལ་ཁེལ་བར་རྒྱབ་ཕྱོགས་སུ་བསྒྲེངས་འཛུགས་བྱས་ཡོད་པའི་ཨ་རིའི་རྒྱལ་དར་ངོས་སུ་ཁེལ་ཡོད་འདུག གསར་འགོད་པས་ལྷམ་གཉིས་སྔ་རྗེས་སུ་འཕངས་རྗེས་གཞི་ནས་སྐོར་སྲུང་བ་སླེབས་ཡོད། ཉིན་དེ་ནས་གསར་འགོད་པ་ཁོང་བཀག་ཉར་བྱས་ཡོད་འདུག  ཨེ་རག་མི་མང་གི་ཁྲོད་དུ་གསར་འགོད་པ་ཁོང་མགྱོགས་པོར་གློད་གྲོལ་ཡོང་བའི་འབོད་སྐུལ་ཞུ་བཞིན་ཡོད་པ་དང༌། གསར་འགོད་པ་ཨལ་ཛེ་ཏི་ཡིས་ཀྱང༌། བཀག་གཉར་ཁང་ནས་ཁོང་གིས་མིག་ལ་མཛེས་པོ་མེད་པའི་བྱ་སྤྱོད་སྤེལ་བར་དགོངས་སེལ་ཞུས་ཡོད། དོན་རྐྱེན་འདི་བྱུང་རྗེས་བྷུ་ཤུ་མཆོག་ནས་ཆབ་སྲིད་གུ་ཡངས་དང་རང་དབང་ལ་བརྩོན་པའི་སྤྱི་ཚོགས་ནང་འདི་ལྟ་བུ་བྱུང་སྲིད་པ་ཞིག་རེད། འོན་ཀྱང༌། ང་ལ་གཞུས་པའི་ལྷམ་དེ་གཉིས་ཨང་གྲངས་བཅུ་ཅན་ཞིག་རེད། ཅེས་དང༌། གསར་འགོད་པ་ཁོང་གིས་ཨེ་རཱག་མི་དམངས་ཡོངས་ཀྱི་ཚབ་བྱཻད་ཐུབ་གི་མ་རེད་ཅེས་གསུངས་ཡོད།