༧སྐུའི་གཅེན་པོ་དམ་པ་རྒྱལ་ལོ་དོན་འགྲུབ་མཆོག་དང་བཀའ་ཟུར་རྗེ་བཙུན་པདྨ་མཆོག་ལ་གཟེངས་རྟགས་ཕུལ།

༸སྐུའི་གཅེན་པོ་ཞིང་གཤེགས་དམ་པ་རྒྱལ་ལོ་དོན་འགྲུབ་མཆོག་དང་༸སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་རྣམ་གཉིས་ལ་བཀའ་དྲིན་རྗེས་དྲན་གྱི་གཟེངས་རྟགས་རེ་ཕུལ་སོང་།

༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་དང་བསྟུན་ནས། ཁ་སང་བཞུགས་སྒར་ཀིརྟི་བྱེས་པ་གྲྭ་ཚང་དུ་སིམ་ལའི་བོད་མི་ཡོངས་ཀྱིས་༸སྐུའི་གཅེན་པོ་ཞིང་གཤེགས་དམ་པ་རྒྱལ་ལོ་དོན་འགྲུབ་མཆོག་དང་༸སྐུའི་གཅུང་མོ་ཨ་མ་རྗེ་བཙུན་པདྨ་མཆོག་རྣམ་གཉིས་ལ་བཀའ་དྲིན་རྗེས་དྲན་གྱི་གཟེངས་རྟགས་རེ་ཕུལ་སོང་། འདི་གའི་གསར་འགོད་པས་སིམ་ལ་སྤྱི་ཁྱབ་ལྷག་པ་ཚེ་རིང་ལགས་སུ་ཐེངས་འདིའི་གཟེངས་རྟགས་སྐོར་དྲིས་པར་ཁོང་གིས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་གོ་སྟོན་དང་སྟབས་བསྟུན་ནས། མདོ་སྨད་ཆོལ་ཁས་གོ་སྟོན་སྲུང་གཙི་བྱེད་བཞིན་པའི་ཉིན་གསུམ་པར་གཟེངས་རྟགས་ཕུལ་བའི་གོ་སྐབས་གནང་བ་རེད། དེ་ནི་སྐལ་བ་བཟང་བོ་དང་བཀའ་དྲིན་ཆེན་པོ་རེད། ང་ཚོ་སིམ་ལ་བོད་མི་རྣམས་ཀྱིས་མ་སྐུལ་དང་བླངས་ཐོག་བཀའ་དྲིན་རྗེས་དྲན་གཟེངས་རྟགས་ཚོགས་ཆུང་གིས་ཕྱི་ལོ་ ༢༠༠༤ ལོར་གོ་བསྡུར་བྱས་ཏེ་ཐག་གཅོད་བྱུང་བ་ལྟར། ༧སྐུའི་གཅེན་པོ་ཞིང་གཤེགས་དམ་པ་རྒྱལ་ལོ་དོན་འགྲུབ་མཆོག་དང་༸སྐུའི་གཅུང་མོ་ཨ་མ་རྗེ་བཙུན་པདྨ་མཆོག་རྣམ་གཉིས་ལ་བཀའ་དྲིན་རྗེས་དྲན་གྱི་སླད། ༧རྒྱལ་བ་ཚེ་དཔག་མེད་ཀྱི་སྐུ་དང་། རྗེ་བཙུན་སྒྲོལ་མའི་སྐུ་ཡིད་བཞིན་སྒྲོལ་མའི་མཆོད་སྐོང་རེ་བཅས་ཕུལ་ཡོད། ཅེས་འགྲེལ་བརྗོད་གནང་བྱུང་།

ཐེངས་འདིའི་གཟེངས་རྟགས་ཕུལ་དགོས་དོན་སྐོར་ལ་ཁོང་གིས། སྐུ་ངོ་གསང་བ་ཆེན་མོ་རྒྱལ་ལོ་དོན་འགྲུབ་མཆོག་ནི་བོད་ནང་བཞུགས་སྐབས་ནས་བཟུང་རྒྱ་ནག་དང་། རྒྱ་གར། ཕྱིའི་རྒྱལ་ཁབ་ཁག་ཏུ་འབྲེལ་ལམ་བཙུགས་ཏེ་༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་གཡས་པ་བཞིན་སྐུ་ཚེ་གང་བོར་ཞབས་འདེགས་བསྒྲུབ་ཡོད། ཐ་ན་ཉེ་ལམ་ཀ་ལུམ་པོང་དུ་སྐུ་གཤེགས་པར་ང་ཚོའི་རྒྱལ་ཁབ་ཆེད་དུ་༧གོང་ས་མཆོག་གི་བཀའ་བཞིན་ཕྱག་ལས་བསྒྲུབ་ཡོད་པ་དང་། བཙན་བྱོལ་བོད་གཞུང་གི་བཀའ་བློན་ཁྲི་བ་སོགས་ཕྱག་ལས་མང་པོ་གནང་བར་སིམ་ལ་མི་མང་ཡོངས་ཀྱིས་མ་སྐུལ་སེམས་པ་གཅིག་སྒྲིལ་གྱི་ཐོག་ནས་གཟེངས་རྟགས་འབུལ་གཏན་ཁེལ་བ་ཞིག་རེད། དེ་བཞིན་༧སྐུའི་གཅུང་མོ་ཨ་མ་རྗེ་བཙུན་པདྨ་མཆོག་གིས་ཀྱང་བཙན་བྱོལ་བོད་མིའི་ཤེས་རིག་ཐོག་སྔོན་འགྲོ་ནས་མཐོ་རིམ་སློབ་གྲྭ་བར་བོད་པའི་སྐད་ཡིག་ཐོག་སློབ་སྦྱོང་བྱ་རྒྱུ་ཡོད་པའི་མཛད་པ་རླབས་ཆེན་བསྒྲུབ་ཡོད། དམིགས་བསལ་བོད་ནས་ཡོད་བའི་ཕྲུ་གུ་རྣམས་དང་རྒྱ་གར་ནང་གི་དཔལ་འབྱོར་ཐོག་དཀའ་ངལ་ཕྲུ་གུ་རྣམས་གསོ་སྐྱོང་བྱས་ཡོད། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་བཞིན་ད་ལྟ་བར་བཀའ་བློན་དང་བོད་ཕྲུག་ཁྱིམ་སྡེ་སོགས་ཐོག་ལས་འགན་བསྒྲུབ་ཡོད་པས། ང་ཚོ་སིམ་ལ་མི་མང་གིས་སེམས་པ་གཅིག་སྒྲིལ་གྱི་ཐོག་ནས་དེ་རིང་འབུལ་གཏན་ཁེལ་བ་རེད། སྤྱིར་ང་ཚོ་གཟེངས་རྟགས་འདི་ཕྱི་ལོ་ ༢༠༢༤ ནས་བཟུང་གྲ་སྒྲིག་བྱས་ཡོད་ཀྱང་། སྟབས་མ་ལེགས་པ་ཞིག་ལ་རྒྱལ་ལོ་དོན་འགྲུབ་མཆོག་སྐུ་ཚེ་འཕན་པ་རྫོགས་པ་དང་། ཨ་མ་རྗེ་བཙུན་པདྨ་མཆོག་ལ་དུས་ཚོད་ཀྱི་ཁོམ་པ་མ་བྱུང་པས་ལྷག་པ་རེད། ང་ཚོས་ཡིག་ངག་གཉིས་ཐོག་འབྲེལ་བ་ཞུས་ཏེ། མདོ་སྨད་ཀྱི་གོ་སྟོན་སྐབས་སུ་ཕུལ་ཐུབ་པར་ཐུགས་རྗེ་ཆེ་ཞུ་རྒྱུ་ཡིན། ཞེས་འགྲེལ་བརྗོད་གནང་བྱུང་།

དེ་བཞིན་ཨ་མ་རྗེ་བཙུན་པདྨ་མཆོག་གིས་གསར་འགོད་པར། ལོ་གཉིས་ཀྱི་སྔོན་དུ་སིམ་ལ་མི་མང་ཡོངས་ཀྱིས་ཞིང་གཤེགས་དམ་པ་རྒྱལ་ལོ་དོན་འགྲུབ་མཆོག་དང་ངེད་གཉིས་ལ་གཟེངས་རྟགས་ཤིག་དབུལ་རྒྱུ་ཡིན་པའི་ཐག་གཅོད་བྱུང་འདུག ང་རང་ད་ལྟ་ལོ་ཆེན་པོ་ཆགས་ཡོད་པས་སིམ་ལ་འགྲོ་བསམ་ཡང་འགྲོ་ཐུབ་ཡོད་མ་རེད། དེ་རིང་གོ་སྐབས་འདི་བརྒྱུད་ནས་སྤྲད་པ་རེད། གཟེངས་རྟགས་སྤྲད་དོན་གཙོ་བོ་བོད་ཕྲུག་ཁྱིམ་སྡེའི་ལས་ཀའི་ཐོག་རེད། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེའི་བཀའ་དྲིན་དང་བཀའ་དགོངས་བཞིན་ངས་བོད་ཕྲུག་ཁྱིམ་སྡེའི་ལས་འགན་འཁུར་བ་རེད། ཡིན་ནའང་ལས་བྱེད་མང་པོ་ཞིག་གིས་ད་ལྟ་བར་དུ་དཀའ་ངལ་བརྒྱབ་སྟེ་ཕྲུ་གུ་གྲངས་ ༥༤༠༠༠ ལྷག་ལ་སློབ་སྦྱོང་སྤྲད་ཐུབ་ཡོད་པ་དེར། མི་མང་གིས་དེའི་ཐོག་དཀའ་ལས་བརྒྱབ་པའི་ངོས་འཛིན་གྱི་ཐོག་ད་ལན་གཟེངས་རྟགས་སྤྲད་པ་ཞིག་རེད། ཅེས་གསུངས་སོང་།