དྲག་རླུང་གི་གནོད་སྐྱོན།

ཐའེ་ཝན་དང་རྒྱ་ནག་ནང་ཁུལ་གྱི་གྲོང་ཁྱེར་ནང་དྲག་རླུང་གི་གནོད་འཚེ་བྱུང་སྟེ། མི་མང་པོ་རྐྱེན་ལམ་དུ་ཕྱིན་ཡོད་པ་རེད།

ཕྱི་ཚེས་ ༩ ཉིན་ཐའེ་ཝན་གྱི་ལྷོ་ཕྱོགས་སུ་མི་ལོ་ལྔ་བཅུའི་རིང་བྱུང་མ་མྱོང་བའི་དྲག་རླུང་ཆེན་པོ་ཞིག་བྱུང་སྟེ། ལྷོ་རྒྱུད་ཀྱི་ཅ་ཡུས་རྫོང་དང་ཕེན་ཏོན་རྫོང། ཤར་ཕྱོགས་ཀྱི་ཐའེ་ཏོན་རྫོང་སོགས་ཀྱིས་ཡུལ་མི་ ༡༢ གནོད་འཚེ་ཁྲོད་འཆི་སྐྱོན་དང་མི་ ༥༢ གར་སོང་ཆ་མེད།  མི་ ༣༢ གཉིས་ལྷག་ལ་རྨས་སྐྱོོན་སྐྱོན་ལྗིད་མོ་ཕོག་ཡོད་པ་རེད། དྲག་རླུང་གི་གནོད་འཚེ་ཆེ་བའི་དུས་རིམ་དེ་ཡལ་ཡོད་ནའང་། ཉིན་འདི་འགར་བསྟུད་མར་ཆར་བ་རྒྱུན་ཆད་མེད་པར་གཏོང་གི་ཡོད་འདུག་ལ།  མྱུར་སྐྱོབ་དམག་མི་སོགས་ཀྱིས་ད་ལྟའང་མུ་མཐུད་མྱུར་སྐྱོབ་ཀྱི་ལས་ལ་འབད་བཞིན་ཡོད་པ་རེད།  ཐེངས་འདིའི་དྲག་རླུང་གི་གནོད་འཚེ་འདིས་ཐའེ་ཝན་གྱི་བརྡ་འཕྲིན་འབྲེལ་ལམ་དང་གཞུང་ལམ་མཐའ་དག་བསྣུབས་ཡོད་པ་མ་ཟད། ཀོ་ཞོན་རྫོང་སོགས་ཀྱི་ནང་གནོད་སྐྱོན་ཚབས་ཆེན་བྱུང་སྟེ་གྲོང་སྡེ་ཡོངས་ཆུས་འཁུར་ཡོད་པ་རེད། ཐའེ་ཝན་རྒྱལ་སའི་ནང་ལོ་རེར་རང་བྱུང་གནོད་འཚེ་འབྱུང་གིན་ཡོད་ཀྱང་། ཐེངས་འདི་ནི་མི་ལོ་ ༥༠ རིང་གི་གནོོད་འཚེ་ཆེ་ཤོས་ཏེ་ཆགས་ཡོད་པ་རེད།
 
དེ་བཞིན། དྲག་རླུང་དེ་རིམ་བཞིན་རྒྱ་ནག་གི་མཚོ་ཁུལ་གྱི་ཧྤུ་ཅན་དང་ཀྲེ་ཅིང་ཞིང་ཆེན། ཅང་སུའུ་ཞིང་ཆེན། ཀོང་ཏུང། ཧོང་ཀོང་སོགས་སུ་ཐོན་སྟེ་མཚོ་བརྒྱུད་ཀྱི་མི་ ༤  རྐྱེན་འདས་དང་མི་ ༧ གར་སོང་ཆ་མེད་དུ་གྱུར་ཡོད་པ་དང་།  མི་ ༢༦ ལྷག་སྲོག་ཉེན་ལས་ཐར་ཡོད་ནའང་། ས་གནས་དེ་དག་གི་ཁང་བརྩེགས་དང་འགྲིམ་འགྲུལ་སོགས་ལ་གཏོར་སྐྱོན་ཚབས་ཆེན་བྱུང་སྟེ་ས་གནས་མི་མང་ཁྲི་ ༤༠༠ ལྷག་ལ་གནོད་འཚེ་བྱུང་ཡོད་པ་མ་ཟད། ཞིང་ཆེན་དེ་དག་གི་ཡུལ་མི་ཁྲི་ ༡༡༠ ལྷག་ཡུལ་གཞན་དུ་གནས་སྤོར་བྱ་དགོས་བྱུང་ཡོད་པ་དང་། རྒྱ་ནག་མཚོ་བརྒྱུད་ཀྱི་མུ་ཏིག་གཙང་བོའི་འགག་གི་ས་ཁུལ་དང་ཀོང་ཏུང་མཚོ་བརྒྱུད་ཀྱི་ས་ཁུལ་ནང་ཆར་བ་མུ་མཐུད་དུ་འབབ་ཀྱིན་ཡོད་པ་རེད།

 ཐའེ་ཝན་གནམ་གཤིས་བརྟག་དཔྱད་ཚན་པས་བརྗོད་དོན་ལྟར་ན། སྤྱིར་ཚད་རིམ་ ༧ ཅན་གྱི་དྲག་རླུང་དེ་ཆུ་ཚོད་གཅིག་ནང་ཁྱབ་ཚད་སྤྱི་ལེ་ ༢༥༠ རུ་ཁྱབ་ཐུབ་པ་དང་། ཚད་རིམ་ ༡༠ ཅན་གྱི་དྲག་རླུང་དེ་ཆུ་ཚོད་གཅིག་ནང་ཁྱབ་ཚད་སྤྱི་ལེ་ ༩༠ རུ་ཁྱབ་ཐུབ་ཀྱིན་ཡོད་པ་རེད། ཡིན་ནའང་། ཐེངས་འདི་ནི་ཤུགས་ཆེན་གྱི་དྲག་རླུང་ཞིག་མིན་ལ། ཆུ་ཚོད་གཅིག་གི་ནང་སྤྱི་ལེ་ ༡༡ ལས་ཁྱབ་ཐུབ་མེད་པའི་སྐོར་བརྗོད་ཡོད་པ་རེད།

བསྐྱར་བཅོས།: ༢༠༡༤/༠༣/༢༦

Leave a Reply

3 thoughts on “དྲག་རླུང་གི་གནོད་སྐྱོན།

  1. གངས་ཅན་པའི་ལས་དབང་།

    དྲག་རླུང་གི་གནོད་སྐྱོན་ནི་འབྱུང་བཞི་ཆ་མ་མཉམ་པར་འཕེལ་ཟད་འཁྲུགས་པའི་གནས་སུ་འགྱུར་གྱི་ཡོད། སྤྱི་བཏང་གོ་ལའི་འདི་སྒང་ནས་རྫས་ཆས་བཟོ་བསྐྲུན་མང་བའི་དབང་གིས་འབྱུང་བཞི་ཆ་མ་མཉམ་པར་བྱེད་རྒྱུ་ཡོད།

  2. བོད། ཤ་ཁྲག་རུས་གསུམ།

    ཁོར་ཡུག་ལ་གཏོར་བཤིག་གཏོང་མཁན་དེ་དག་གིས་འདི་དག་ངོས་ཟིན་ཐོབ་དགོས་ཀྱི་ཡོད་པ་རེད། དམིགས་བསལ་གྱིས་རྒྱ་ནག་གི་སྲིད་གཞུང་གིས་འདི་དག་དངོས་ནས་ཤེས་ན་ཡག་པོ་རེད། དེ་མིན་ནམ་ཞིག་བོད་ཀྱི་རང་བྱུང་ཁོར་ཡུག་ལ་ཉམས་ཆག་བྱིན་ནས་ཆུ་རླུང་གི་འཇིགས་པ་ལས་བརྒལ་ནས་རང་བྱུང་གི་ཐན་པ་དང་གནོད་འཚེ་མི་མྱོང་བ་ཞིག་ཡོང་རྒྱུ་ཡིན་པ་གདོན་མི་ཟ་བ་ཡིན། དེ་འདྲ་ཞིག་མ་རེད་དམ། སྤུན་ཟླ་ཚོ།

  3. འདི་ལྟ་བུའི་རང་བྱུང་གི་གནོད་པ་མང་པོ་ཞིག་གོ་ལའི་ཚ་དྲོད་ལ་འབྲེལ་བ་ཡོད་པར་བཤད་ཀྱིན་ཡོད་ལ། དེའི་སྟེང་དུ་མཁས་པའི་ཚོགས་འདུ་དང་ཚན་རིག་པའི་དཔྱད་བརྗོད་མང་དག་ཅིག་ཉིན་རེ་བཞིན་མཐོང་རྒྱུ་ཡོད་པས། ང་ཚོས་ཀྱང་ཤེས་དགོས་པར་འདུག དེ་ཤེས་ན་ཁོར་ཡུག་ལ་གཅེས་སྤྲས་བྱེད་དགོས་པའི་འདུ་ཤེས་བསླེབ་ཐུབ།