༢༠༡༠ ལོའི་གསར་འགོད་པའི་མིག་ཆུ།

 

རྒྱལ་མཚམས་མེད་པའི་གསར་འགོད་པའི་མཐུན་ཚོགས་ཀྱི་ཕྱི་ལོ་ ༢༠༡༠ ལོའི་རྒྱལ་སྤྱིའི་གསར་འགོད་པའི་གནས་སྟངས་ཕྱོགས་བསྡོམས་བྱས་པའི་སྙན་ཐོའི་ནང་བཀོད་པ་ལྟར་ན། ད་ལོར་རྒྱལ་ཁབ་ ༢༥ ནང་གསར་འགོད་པ་ ༥༧ ཙམ་རྐྱེན་ལམ་དུ་བཏང་ཡོད་པ་དང་།  དེ་དག་ལས་བརྒྱ་ཆ་ ༣༠ ནི་ཨ་གྷོ་ལ (Angola) ། ཁཱ་མེ་རོན (Cameroon) ། ནེ་ཇི་རི་ཡ (Nigeria) ། ཡུ་གྷན་ཌ (Uganda) ། ཀོང་གྷོ་དམངས་གཙོའི་སྤྱི་མཐུན་རྒྱལ་ཁབ (Democratic Republic of Congo) །  རུ་ཝན་ཌ (Rwanda) ། སོ་མ་ལི་ཡ (Somalia) བཅས་རྒྱལ་ཁབ་བདུན་ནང་རྐྱེན་ལམ་དུ་སོང་ཡོད་པ་རེད།

གཞན་ཡང་། ད་ལོར་གསར་འགོད་པ་ ༥༡ བཙན་འཁྲིད་དང་། གསར་འགོད་པ་ ༥༣༥ འཛིན་བཟུང་། གསར་འགོད་པ་ ༡༢༧༤  ལ་འཇིགས་སྐུལ་དང་གནོན་ཤུགས་འདྲ་མིན་འཕྲད་ཡོད་པ་དང་། དེ་མིན་གྱི་རྒྱལ་ཁབ་ ༢༥ ནང་གསར་འགོད་པ་ ༡༢༧ འཇིགས་སྐུལ་འོག་སོ་སོའི་རྒྱལ་ཁབ་ནང་བསྡོད་མ་ཚུགས་པར་ཕྱིའི་རྒྱལ་ཁབ་ཁག་ལ་ཉེན་ཡོལ་དུ་འགྲོ་དགོས་བྱུང་ཡོད་པ་དང་། དེའི་ཁྲོད་དབྱི་རག་ནི་གསར་འགོད་པ་ཉེན་ཡོལ་དུ་ཕྱིན་པའི་ཁ་གྲངས་ཆེས་མང་ཤོས་དེ་ཆགས་ཡོད། གཞན་ཡང་། ད་ལོར་གསར་ཁང་ཁག་ ༥༠༤ ཙམ་གནོན་ཤུགས་འོག་སྒོ་བརྒྱག་དགོས་བྱུང་ཡོད་པ་དང་། དེ་བཞིན་རྒྱལ་ཁབ་ ༦༢ ནང་བརྡ་འཕྲིན་དྲ་རྒྱར་བཀག་སྡོམ་གྱི་གནས་ཚུལ་བྱུང་ཡོད་པ་དང་། ཟིན་བྲིས་སྤེལ་མཁན་དང་དྲ་རྒྱ་མཛད་སྤྱོད་པ་ ༡༥༢ འཇུ་བཟུང་བྱས་ཡོད་པར་མ་ཟད། ཟིན་བྲིས་སྤེལ་མཁན་ ༥༢ ལ་འཇིགས་སྐུལ་བྱས་ཡོད་འདུག 

ད་ལོའི་འཛམ་གླིང་གི་གསར་འགོད་པའི་གནས་སྟངས་སྐོར་ལ་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་དྲུང་ཆེ་ཇོ་ལེར་ཌི་( Jean-François Julliard) ལགས་ཀྱིས་བརྗོད་དོན།  ད་ལོར་འཁྲུག་འཛིང་བྱེད་སའི་འཐབ་ས་རུ་རྐྱེན་ལམ་དུ་གྱུར་བའི་གསར་འགོད་པའི་ཁ་གྲངས་དེ་ལོ་སྔོན་མ་ལས་བརྒྱ་ཆ་ ༢༥ མར་ཆགས་ཡོད།  ཡིན་ནའང་། གསར་འགོད་པར་མ་ཉེས་ཁག་གཡོགས་ཀྱིས་ཉེས་ཁྲིམས་བཅད་པ་དང་འཇུ་བཟུང་བྱས་པ། བཙན་འཁྲིད་བྱས་པ་བཅས་ཀྱི་ཁ་གྲངས་སྔར་ལོ་ལས་ཇེ་མང་དུ་གྱུར་ཡོད་པ་དང་། ཆབ་སྲིད་ནག་ཚོགས་དང་ཉེན་རྟོག་དམག་མི་རྣམས་ནི་གསར་འགོད་པའི་ཚེ་སྲོག་ལ་འཇིགས་སྐུལ་གཏོང་མཁན་གཙོ་བོ་དེ་ཆགས་ཡོད་ལ།  ད་ལོར་གསར་འགོད་པར་གནོད་འཚེ་ཐེབས་གྲངས་ཆེས་མང་ཤོས་དེ་ཨེ་ཤ་ཡའི་རྒྱལ་ཁབ་ཁག་ཆགས་འདུག ཅེས་བརྗོད་འདུག

གསར་འགོད་པ། ཚེ་རིང་རྒྱལ།

བསྐྱར་བཅོས།: ༢༠༡༤/༠༣/༢༦

Leave a Reply

2 thoughts on “༢༠༡༠ ལོའི་གསར་འགོད་པའི་མིག་ཆུ།

  1. མིག་དམར་ཚེ་རིང་།

    གཞན་དོན་དུ་སྐུ་གཤེགས་པའི་གསར་འགོད་པ་རྣམས་ལ་མྱ་ངན་ཞུ། གསར་འགོད་པ་ནི་འཛམ་གླིང་གི་ཆེས་རླབས་ཆེ་བའི་མི་སྣ་དེ་ཡིན་ལ། གསར་འགོད་ལས་རིགས་ན་འཛམ་གླིང་གི་ཆེས་དཀའ་ཁག་དང་ཉེན་ཁ་ཆེ་བའི་ལས་ཀ་དེ་ཡིན།
    ཁྲག་ཞགས་ཆགས་པའི་གོང་གི་པར་ཆས་བདག་མེད་དེའི་གཟི་བརྗིད་མཐོང་ཡོང་སྐབས། ངང་ངམ་ཤུགས་ཀྱིས་སྨྲེང་སེམས་ཤིག་སྐྱེ་ཡོང་གི་འདུག་ལ། གསར་འགོད་པ་ཟེར་བ་དེ་ལ་སེམས་གཏིང་ནས་ཡིད་འགུལ་ཞིག་ཀྱང་ཐེབས་ཀྱི་འདུག
    བོད་པའི་གསར་འགྱུར་བརྒྱུད་ལམ་ཁག་གི་བདེ་སྡུག་དང་། སྨྲ་བརྗོད་རང་དབང་གི་གནས་བབ། སྤྱི་ཚོགས་ཀྱི་ཆེ་མཐོང་སོགས་ལ་ཡང་ལྟ་རྟོག་དང་། འགན་ལེན་ཞིབ་འཇུག་བྱེད་མཁན་ཞིག་ཡོད་ན་ཅི་མ་རུང་།

  2. ཀརྨ་རྡོ་རྗེ།

    གསར་འགོད་པ་༥༧རྐྱེན་ལམ་དུ་སོང་བ་དེ་དག་ནི། འཛམ་གླིང་ཧྲིལ་བུ་འདི་ནང་གི་མི་འབོར་དུང་ཕྱུར་༼༧ ༠༠༠ ༠༠༠ ༠༠༠༽བདུན་ལ་ཉེ་བའི་ནང་ནས་དྲང་དོན་མགྲིན་ཚབ་པའི་ཆེད་དུ་སྲོག་བློས་བཏང་གི་་གྲས་སུ་རྩིས་འོས། དལ་འགྲོར་སྐྱེ་བའི་སྨོན་འདུན་བཅས།