འདི་དྲང་བདེན་རེད་དམ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༧༤ སྟེང་གི་རྩོམ་སྒྲིག་པའི་གཏམ།

བོད་ཡུལ་ཆོས་ལྡན་གྱི་ཞིང་ཁམས་དང་བོད་པ་ལས་འབྲས་ཀྱི་བདག་པོ་ཡིན་རབས་བཤད། བོད་འབར་ཐལ། བོད་མི་ཚར་ཐལ། ང་ཚོས་འདི་ལྟར་རྒྱང་ནས་ལྟད་མོར་ལྟ་བསྡད་ན་དྲང་བདེན་མ་རེད། ལས་རྒྱུ་འབྲས་ལའང་འགྲོ་བ་མ་རེད། ཕར་ཕྱོགས་ན་ཤ་ཁྲག་གཅིག་པའི་མིང་སྲིང་ཚོས་གཟུགས་པོ་མེ་རུ་བསྒྲོན་ཏེ་འུ་ཅག་དང་འུ་ཅག་གི་མ་འོངས་པའི་ཆེད་དུ་ བོད་པའི་རང་དབང་ཞེས་འབོད་སྒྲ་སྒྲོག་བཞིན་གཅིག་འཕྲོར་གཅིག་མཐུད་དུ་འགྱེད་བཞིན་འདུག ཚུར་ཕྱོགས་ན་གཞུང་ཚོགས་སྒེར་གསུམ་གྱིས་གདུང་སེམས་མཉམ་སྐྱེད་ཡོད་ཁུལ་དང་དད་པ་དག་སྣང་ཆེ་མདོག་གིས་བླ་མ་དཀོན་མཆོགཞེས་བསྔོ་སྨོན་མཆོད་འབུལ་གྱིས་ཉི་མ་འཕུད་ཐབས་དང་མི་ཚེ་སྐྱེལ་ཐབས་བྱེད་ཀྱི་འདུག འདི་དྲང་བདེན་རེད་དམ། འདི་འདྲ་མཉམ་རེད་དམ།

        སྤྱིར་ད་ལྟ་ཐོབ་ཐང་དང་འདྲ་མཉམ་གླེང་བའི་དུས་ཚོད་ཅིག་མ་རེད་ལ། ནང་ཁུལ་གྱི་གནས་ཚུལ་ཐོག་མཛུབ་གེར་གྱིས་སྡིགས་ར་གཏོང་ཚོད་དེ་བས་ཀྱང་མིན་པ་ཤེས་ཀྱི་ཡོད། ཛ་དྲག་གཉན་འཕྲང་གི་དུས་ཚོད་ཅིག་ལ། ལས་རྒྱུ་འབྲས་དང་འདྲ་མཉམ་ལ་མངོན་གསལ་དོད་པོས་རྡོག་བརྫིས་བཏང་དང་གཏོང་བཞིན་པ་འདི། སྨྲ་ཤེས་ཤིང་དོན་གོ་མཁན་སུ་ཞིག་གི་མཐོང་ཐོས་དྲན་རེག་གི་ཡུལ་ནས་བཟོད་བསྲན་བྱེད་ཐབས་མེད་ལ། ཐ་ན་ཚེ་སྲོག་གི་རྒྱུ་བ་བོད་དོན་ལ་བཅད་ཟིན་པའི་རྒྱལ་གཅེས་དཔའ་བོ་དཔའ་མོའི་རྣམ་ཤེས་དག་ཀྱང་ཐུགས་བདེ་བར་བཞུད་ཐབས་དཀའ། ད་དུང་མུ་མཐུད་དུ་ཕར་ཕྱོགས་ལ་ལྟད་མོར་ལྟ་བསྡད་ན་འདྲ་མཉམ་དང་དྲང་བདེན། ལས་རྒྱུ་འབྲས་སོགས་གླེང་མཁན་དང་རྩོད་མཁན་བོད་ཕྱི་ནང་གཉིས་ནས་ཇེ་མང་དུ་འགྲོ་སྲིད།

        བསྔོ་སྨོན་མཆོད་འབུལ་བྱེད་པ་འདས་པོའི་ཆེད་ཡིན་དུ་ཆུག་ཀྱང་། འདས་པོ་དག་གི་རེ་བ་བསྔོ་སྨོན་མཆོད་འབུལ་ཙམ་མ་རེད། ཁ་ཞེ་གཉིས་མེད་ཀྱིས་བོད་དོན་ཐོག་ལས་ཀ་བྱས་ཏེ་བོད་ཕྱི་ནང་འཐབ་ཕྱོགས་གྱུར་གྱིས་བོད་རྒྱལ་ཁབ་དང་མི་རིགས་ཀྱི་རང་དབང་རྩོད་ལེན་བྱེད་རྒྱུ་དེ་རེད། དགོས་མཁོ་དང་ཁེ་ཕན་ལ་ཐུག་ན་བྱེས་པ་ཚོས་ནམ་རྒྱུན་ང་ཚོ་གཞིས་བཞུགས་རྒྱ་ཆེའི་མི་མང་གི་སྐུ་ཡི་སྐུ་ཚབ་དང་གསུང་གི་མགྲིན་ཚབ་ཡིན་རབས་འུད་ཀྱིས་རྗོད་ཀྱི་ཡོད། དགོས་གལ་དང་ཛ་དྲག་ལ་ཐུག་ཡོང་དུས་རྒྱབ་བཤོལ་བརྒྱབ་སྟེ་ཕན་ཚུན་ལ་འཁང་ར་དང་ནང་ཁུལ་གྱི་སྐྱོན་མཚང་འབྲུ་པ། ད་དུང་གོ་སྐབས་འཇུས་ཏེ་སྒེར་དོན་བསྒྲུབ་པ་དང་། ལོ་རབས་དང་དུས་རབས་ཀྱི་ནད་རྙིང་ལ་འཁོན་ལན་སློག་རྒྱུར་རེམ་མཁན་ཡང་མི་ཉུང་བ་ཞིག་གང་སར་བྱུང་དང་འབྱུང་བཞིན་འདུག

        གཞིས་སྲུང་སྤུན་ཟླ་ཚོས་རེ་བའི་མིག་འབུར་ཕྱི་ལ་གཏད་དེ་ཡུན་རིང་ཕྱིན་སོང། ཡིད་ཆེས་བློ་གཏད་བྱེས་ལ་བཅོལ་ཏེ་ལོ་མང་འགོར་སོང། བྱེས་གྱར་བ་ང་ཚོས་ད་དུང་ཁོང་ཅག་གི་འདོད་པ་ཁེངས་པའི་གྲུབ་འབྲས་ཤིག་ལེན་ཐུབ་མེད་ལ། ཐ་ན་སྐུ་ལུས་མཆོད་འབུལ་གནང་མཁན་དག་གི་ཞལ་ཆེམས་མཐོང་བཞིན་དུ། འབོད་ཚིག་གདངས་སུ་གྱེར་པ་ཐོས་བཞིན་དུ་ཁོང་རྣམ་པའི་མངོན་འདོད་ཐོག་རྩོད་གླེང་བྱེད་ཀྱི་ཡོད། ད་ནི་གསར་ལམ་ཁག་ལ་ཅེར་ཏེ་སྒུག་སྡོད་རྒྱུ་མིན་པར། མ་མཐར་བོད་ནང་གི་གྲོང་ཁྱེར་གྲོང་རྡལ་གྲོང་གསེབ་མེད་པར་གནས་ཚུལ་ཆེ་ཆུང་གང་ཞིག་ལྷག་ཀྱང་ཆད་ལྷག་ནོར་འཕྱུག་མེད་པར་ཕྱི་ལོགས་སུ་ལེན་ཐུབ་པ་དང་། དུས་ཐོག་ཏུ་རྒྱལ་སྤྱིའི་སྡིངས་ཆའི་སྟེང་བསྐྱལ་ཐུབ་ཐབས་ལ་འབད་དགོས། འདི་བྱེས་སྡོད་བོད་མིའི་ལས་འགན་ཡིན་ལ། ལས་འགན་འདི་བསྒྲུབ་པའི་གོ་སྐབས་དང་ཆ་རྐྱེན་ཡང་བྱེས་སྡོད་བོད་མི་ཚོར་འཛོམས་ནས་ཡོད།

བསྐྱར་བཅོས།: ༢༠༡༤/༠༣/༢༦

Leave a Reply