བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༨༡ སྟེང་གི་རྩོམ་སྒྲིག་པའི་གཏམ།

བཀའ་ཤག་སྐབས་བཅོ་ལྔ་པའི་སྲིད་སྐྱོང་དང་བོད་མི་མང་སྤྱི་འཐུས་སྐབས་བཅུ་དྲུག་པའི་འོས་བསྡུ་ཆེན་མོར་གླེང་སློང་ཉིན་རེ་བཞིན་ཇེ་ཆེར་འགྲོ་བཞིན་འདུག ནུབ་ཡུ་རོབ་དང་བྱང་ཨ་རི་སོགས་ནས་དྲི་བ་དང་དོགས་པ། གླེང་ཕྱོགས་མང་པོ་རླུང་ཚུབ་བཞིན་ལྡང་ཡོང་གི་འདུག བོད་དོན་ལ་ཐུགས་འཁུར་དང་བོད་མིའི་སྒྲིག་འཛུགས་ཀྱི་ལས་དོན་ལ་ཆ་ཤས་ལེན་མཁན་གྱི་མི་གསར་པ་གསར་རྐྱང་མང་པོ་ཞིག་འཛམ་གླིང་ཤར་ནུབ་གང་ས་ནས་ཡོང་གི་འདུག རིམ་གྱིས་བོད་ནང་དང་རྒྱ་ནག་པེ་ཅིན་སོགས་ནས་ཀྱང་གངས་སྐྱིད་ལ་ཐུགས་འཁུར་དང་། བཙན་བྱོལ་བོད་མིའི་དམངས་གཙོའི་ནང་ཆ་ཤས་ལེན་མཁན་འཁྲིད་ཡོང་རྒྱུར་སྟ་གོན་ཡོད་ཚོད་འདུག

མ་གཞི་ཡག་པོ་རེད། སྤྱི་ཚོགས་ནང་དམངས་གཙོའི་སྒྲིག་སྲོལ་ཡོད་པ་ཙམ་དང་། མི་མང་ལ་འོས་ཤོག་ལྡུག་རྒྱུའི་ཐོབ་ཐང་ཡོད་པ་ཙམ་གྱིས་སྤྱི་ཚོགས་དེར་དམངས་གཙོ་ཡོད་པ་དང་། མི་མང་གིས་དམངས་གཙོ་ཚད་ལྡན་ལོངས་སུ་སྤྱོད་ཀྱིན་ཡོད་པ་མཚོན་མི་ཐུབ། དེར་བརྟེན། དམངས་གཙོའི་སྒྲིག་སྲོལ་དེ་གཞུང་དམངས་བར་དུ་རྩུབ་བརྡར་བྱས་ཏེ་དག་ཐེར་དང་སུན་འབྱིན་བྱེད་དགོས་ལ། མི་རེ་རེའི་འདུ་ཤེས་ངོས་སུ་དམངས་གཙོའི་རི་མོ་བརྐོས་ཏེ་སྤྱི་ཚོགས་ཁྱོན་ཡོངས་ལ་དམངས་གཙོའི་གཤིས་ཀ་བསྐྲུན་དགོས།

འོས་བསྡུ་ལྷན་ཁང་ལ་སྐྱོན་ཆ་ཡོད་ན་ཐེར་འདོན་བྱེད་ཆོག་ལ། གངས་ཅན་སྐྱིད་ཤོང་གི་ལས་དོན་ཐོག་ནོར་འཁྲུལ་ཡོད་ནའང་བཤད་ཆོག་གི་རེད། འོན་ཀྱང་། ནམ་རྒྱུན་གངས་ཅན་སྐྱིད་ཤོང་གི་ལས་དོན་ལ་དོ་སྣང་ཕར་ཞོག བོད་མིའི་དང་བླང་དཔྱ་དངུལ་ཙམ་ཡང་སྤྲོད་ཀྱི་མེད་མཁན་དང་། དུས་དང་རྣམ་པ་ཀུན་ཏུ་བོད་མིའི་སྒྲིག་འཛུགས་ཀྱི་སྐྱོན་གནས་ཁབ་རྩེ་ཡིས་འཚོལ་མཁན་མང་པོ་ཞིག་ཐེངས་འདིར་གང་ས་ནས་རོ་ལངས་བརྒྱབ་ཡོང་གི་ཡོད་པ་དེ་དམངས་གཙོ་གཤིས་ཀ་འཇགས་པའི་བཟང་ལྟས་མ་རེད། སྒེར་གཙོ་སྐྱག་ལང་ཤོར་བའི་ངན་ལྟས་རེད། འདིར་འུ་བུ་གིས་བསམ་གཞིག་གཏོང་དགོས་པའི་གནད་དང་པོ་དེ་རེད།

ལྐོག་ཏུ་ཡིབ་པའི་མི་རེ་གཉིས་ཀྱིས་བོད་མིའི་སྒྲིག་འཛུགས་ལ་དག་ཐེར་དང་བཙན་བྱོལ་བོད་མིའི་དམངས་གཙོར་སེམས་འཁུར་གྱི་གདོང་འབག་གྱོན་ཏེ། གོ་སྐབས་འཇུས་ཏེ་སྤྱི་ཚོགས་ནང་གླེང་ཕྱོགས་སྣ་ཚོགས་བཟོས་ཤིང་། ཤར་ལྷོ་ནུབ་བྱང་ནས་མཚན་རྟགས་བསྡུ་སློང་གིས་ཡུན་རིང་སྙིང་དུ་བརྣག་པའི་ཞེ་འཁོན་རྩོད་པ་དང་། སྒེར་གྱི་དམིགས་འབེན་མངོན་འགྱུར་བྱེད་ཐུབ་ལ་ཤ་ཐང་གིས་བརྩོན་པ་འདི་སྤྱི་སེམས་རེད་དམ། དུས་རྒྱུན་ཝ་མོ་བཞིན་ལྐོག་ཏུ་ཡིབ་ནས་སྤྱི་སྒེར་གྱི་བྱ་བ་སྣ་ཚོགས་ནང་ཁ་ལག་གཉིས་ཀྱིས་འཇབ་རྒྱུག་བྱེད་པ་དང་། གྲང་པའི་བཀབ་པའི་གཉན་ཚད་ནད་པ་ལྟར་གོ་སྐབས་ཤར་ན་སྟག་ལྟར་མཆོང་ནས་རང་གི་སྤྱི་ཚོགས་ནང་ལ་དྲག་འཐབ་བྱེད་མགོ་རྩོམ་སྟངས་འདི་བོད་སྤྱི་དོན་ལ་ཤ་ཚ་སྟངས་རེད་དམ།

དབུས་འོས་བསྡུ་ལྷན་ཁང་གི་ལས་དོན་ལ་ནོར་འཁྲུལ་ཡོད་ན་ཐེར་འདོན་བྱེད་ཆོག་ལ། བོད་མིའི་སྒྲིག་འཛུགས་ཀྱིས་དྲང་བདེན་བྱས་མེད་ན་ངོ་རྒོལ་ཡང་བྱེད་ཆོག་མོད། དམངས་གཙོའི་དག་སྣང་དང་སྒེར་གཙོའི་ངན་རེངས་ཀྱི་འོག་ནས་མངོན་ལྐོག་ཅི་རིགས་ནས་ལས་དོན་འདིར་སྣེ་ཁྲིད་དེ་རྩ་འཛུགས་བྱེད་མཁན་ཚོའི་སེམས་ན་བོད་པའི་སྤྱི་དོན་ཕར་ཞོག མི་དང་མིའི་མཛའ་འབྲེལ་གྱི་དྲི་ཙམ་ཡང་མི་བྲོ་བས་གོང་གི་ཡིག་ཆར་མཚན་རྟགས་འགོད་མཁན་ཚོས་རིག་པ་དྭངས་གསལ་བྱོས་ཨཱ།