ཐའེ་ཝན་འོས་བསྡུ་ཆེན་མོའི་ཚ་རླབས།

ཟླ་འདིའི་ཕྱི་ཚེས་ ༡༦ ཉིན་ཐའེ་ཝན་གྱི་སྲིད་འཛིན་དང་གྲོས་ཚོགས་འཐུས་མི་འོས་བསྡུ་གནང་རྒྱུ་ཡིན་པས་ཆབ་སྲིད་ཚོགས་པ་ཁག་གིས་མཐའ་མཇུག་གི་ཉི་མ་ལྔ་དེ་དམ་འཛིན་གྱིས་འགྲན་རྩོད་ཤུགས་ཆེན་བྱེད་བཞིན་འདུག

 

ཟླ་འདིའི་ཕྱི་ཚེས་ ༡༦ ཉིན་ཐའེ་ཝན་གྱི་སྲིད་འཛིན་དང་གྲོས་ཚོགས་འཐུས་མི་འོས་བསྡུ་གནང་རྒྱུ་ཡིན་སྟབས། ཆབ་སྲིད་ཚོགས་པ་ཁག་གི་བར་འོས་བསྡུའི་འགྲན་རྩོད་རྣོ་ངར་ཆེ་བའི་སྐབས་དང་བསྟུན་ཏེ། ཁ་སང་ཕྱི་ཚེས་ ༡༠ སྟེ་འོས་བསྡུའི་གཟའ་ཉི་མ་མཐའ་མ་དེར། ཐའེ་ཝན་དམངས་གཙོ་ཡར་ཐོན་ཚོགས་པའི་འོས་མི་ལྕམ་ཚེ་ཡེན་ཝིན་དང་། གོ་མིན་ཏང་ཚོགས་པའི་འོས་མི་ཀྲུའུ་ལི་ལུན། མི་མང་ཚོགས་པ་དང་པོའི་(People First Party)འོས་མི་སུང་ཁྲོས་ཡས་བཅས་སྲིད་འཛིན་འོས་མི་གསུམ་གྱིས། ཐའེ་ཝན་ལྷོ་ནུབ་ཁུལ་དུ་ཡོད་པའི་གྲོང་ཁྱེར་རྙིང་ཤོས་ཐའེ་ནན་དུ་ཕྱོགས་སོ་སོ་ནས་མི་མང་ནང་གཏམ་བཤད་སྤེལ་ཏེ། ཆེས་མཐའ་མཇུག་གི་གོ་སྐབས་དམ་འཛིན་བྱས་ཡོད་པ་དང་། དེ་བཞིན། ཐའེ་ཝན་གྲོས་ཚོགས་ཀྱི་འཐུས་མིའི་འགྲན་རྩོད་ནང་ཞུགས་པའི་ཆབ་སྲིད་ཚོགས་པ་ཁག་ ༡༨ ཀྱི་འོས་མི་ཚོས་ཀྱང་གཏམ་བཤད་ལས་འགུལ་སྤེལ་ཡོད་འདུག

 

ཁ་སང་དགོང་མོར་ཐའེ་ཝན་ཅཱ་ཡས་རྫོང་དུ་ཐའེ་ཝན་དམངས་གཙོ་ཡར་ཐོན་ཚོགས་པའི་འོས་མི་ཚེ་ཡེན་ཝིན་གྱི་རྒྱབ་སྐྱོར་བ་ཚོས་འོས་བསྡུའི་གཏམ་བཤད་དགོང་ཚོགས་ཤིག་བསྡུས་ཡོད་པ་དང་། སྐབས་དེར་ཐའེ་ཝན་ཁྲིམས་འཛིན་ལས་ཁུངས་ཀྱི་མགོ་ཁྲིད་ཟུར་པ་ཞི་ཀྲང་ཐིན་ (Xiè zhǎng tíng) དང་ཐའེ་ནན་གྲོང་ཁྱེར་སྤྱི་ཁྱབ་ལེ་ཆིན་དི་(Lài qīng dé)། ཅཱ་ཡས་རྫོང་གི་རྫོང་དཔོན་ཀྲང་ཧྭ་ཀན་སོགས་ཀྱིས་ཚེ་ཡེན་ཝིན་ལ་རྒྱབ་སྐྱོར་གྱི་གཏམ་བཤད་སྤེལ་ཡོད་འདུག

 

1601101206112378དགོང་ཚོགས་ཐོག་ཚེ་ཡེན་ཝིན་གྱིས། ཉིན་ ༦ གི་རྗེས་སུ་ཐའེ་ཝན་ལ་ཕྱིར་རྒྱལ་ཁ་འཐོབ་ངེས་ཡིན་པའི་ཡིད་ཆེས་ཡོད་ལ། དམངས་གཙོ་ཡར་ཐོན་ཚོགས་པས་བསྐྱར་དུ་ཐའེ་ཝན་གྱི་སྲིད་དབང་བཟུང་སྟེ་ཐའེ་ཝན་ལ་ལེགས་བཅོས་གཏོང་རྒྱུ་ཡིན། འདས་པའི་ལོ་ ༨ རིང་གོ་མིན་ཏང་ཚོགས་པས་ཡག་པོ་བསྒྲུབས་མ་ཐུབ་པ་རྣམས་དམངས་གཙོ་ཡར་ཐོན་ཚོགས་པས་སྔར་ལས་ཡག་པོ་བསྒྲུབ་སྟེ། ཐའེ་ཝན་མི་མང་ལ་འཚོ་བ་ཡག་པོ་ཞིག་རོལ་དུ་འཇུག་ངེས་ཡིན། ཞེས་དང་། མོ་རང་ལ་འོས་བསྡུའི་སྔོན་དུ་ཆེས་སེམས་ཁྲལ་ཆེ་ཤོས་གསུམ་ཡོད་པ་ལས་དང་པོ་གོ་མིན་ཏང་ཚོགས་པ་ནི་འཛམ་བུ་གླིང་གི་སྒོར་མོ་མང་ཤོས་ཀྱི་ཆབ་སྲིད་ཚོགས་པ་ཞིག་ཡིན་པས་ལྐོག་རྔན་སྤྲད་དེ་འོས་ཤོག་ཉོས་བ་དང་། གཉིས་པ་མི་མང་གིས་ཡིད་ཆེས་བྱས་པ་མང་དྲགས་ཏེ་ཧལ་ལེ་ཧོལ་ལེ་འོས་བླུགས་པ། གསུམ་པ་འོས་ཁ་འཐོར་དུ་འགྲོ་ཉེན་བཅས་ཡོད་སྟབས། དྲང་བདེན་ལ་ཁ་ཕྱོགས་ཏེ་ལྐོག་རྔན་མི་ལེན་པ་དང་། ཕྱི་ཕྱོགས་སུ་སློབ་སྦྱོང་བྱེད་བཞིན་ཡོད་མཁན་ཚོ་ཕྱིར་རྒྱལ་ནང་དུ་ལོག་ནས་འོས་བླུགས་ཏེ། རང་ཉིད་ཀྱིས་རང་ཉིད་སྐྱོབ་དགོས་པ་དང་སོ་སོའི་རྒྱལ་ཁབ་སོ་སོས་སྐྱོབ་དགོས་ལ། འོས་ཤོག་གཅིག་བསྡུས་ཀྱིས་དམངས་གཙོ་ཡར་ཐོན་ཚོགས་པར་གྲོས་ཚོགས་ནང་རྒྱལ་ཁ་འཐོབ་ཏུ་འཇུག་དགོས་པའི་འབོད་སྐུལ་བྱས་ཡོད་འདུག

 

དེ་བཞིན། ཁ་སང་དགོང་མོར་གོ་མིན་ཏང་ཚོགས་པའི་འོས་མི་ཀྲུའུ་ལི་ལུན་(Zhū lì lún)གྱི་རྒྱབ་སྐྱོར་བ་ཚོས་སྔོན་ཆད་ཁོ་རང་གིས་རྫོང་དཔོན་བྱས་མྱོང་སའི་ཐའོ་ཡན་རྫོང་དུ་དགོང་ཚོགས་ཤིག་བསྡུས་ཡོད་པ་དང་། སྐབས་དེར་གོ་མིན་ཏང་ཚོགས་པས་མིང་འདོན་བྱས་པའི་གྲོས་ཚོགས་ཀྱི་འོས་མི་དང་། ཐའོ་ཡན་རྫོང་གི་རྫོང་དཔོན་ཟུར་པ་གཉིས། ཐའོ་ཡན་གྲོང་ཁྱེར་གྱི་འཐུས་མིའི་ཚོགས་གཙོ་ཆུའུ་ཡས་ཧྲིན་(Qiū yì shèng)། ཁྲིམས་བཟོ་ལྷན་ཁང་གི་ཁྲིམས་དཔོན་གཞོན་པ་ཧོང་ཞུའུ་ཀྲུ་(Hóng xiù zhù)སོགས་ཀྱིས་གཏམ་བཤད་སྤེལ་ཏེ་ཀྲུའུ་ལི་ལུན་ལ་རྒྱབ་སྐྱོར་བྱས་ཡོད་འདུག

 

1601101204582378དགོང་ཚོགས་ཐོག་ཀྲུའུ་ལི་ལུན་གྱིས། ཐེངས་འདིའི་འོས་བསྡུ་ལ་དྲང་ཕྱོགས་ཀྱི་ནུས་སྟོབས་གོང་འཕེལ་དུ་ཕྱིན་པའི་རྣམ་པ་མངོན་གསལ་གྱིས་རྒྱ་ཆེའི་མི་མང་གིས་མཐུན་ལམ་ཆིག་སྒྲིལ་བྱས་ཏེ། ཆེས་མཐའ་མཇུག་གི་ཉིན་གྲངས་ལྔ་དེར་ཐའོ་ཡན་གྱི་ཡུལ་མི་སྤུན་ཟླ་ཚོས་མཐུན་སྒྲིལ་གྱི་སྟོབས་ཤུགས་དང་ལྟེ་བར་ཕྱོགས་པའི་ནུས་ཤུགས་གཅིག་ཏུ་སྒྲིལ་སྟེ། ཐའེ་ཝན་མི་མང་ཡོངས་ལ་ང་ཚོ་ཐའོ་ཡན་གྱི་མཐུན་སྒྲིལ་སྟོབས་ཤུགས་མཐོང་དུ་འཇུག་དགོས། ཞེས་བརྗོད་ཡོད་པ་མ་ཟད། ཁོ་རང་སྲིད་འཛིན་དུ་བདམས་ཐོན་བྱུང་རྗེས་ཐའེ་ཝན་ལ་བསྐྱར་དུ་དཀའ་སྡུག་མི་འབྱུང་བར་བདེ་སྐྱིད་ཀྱི་ཉི་འོད་དང་རེ་བ་མཐོང་རྒྱུ་ཡིན་སྐོར་བརྗོད་འདུག

 

ཁ་སང་ཕྱི་དྲོར་མི་མང་ཚོགས་པ་དང་པོའི་ཚོགས་གཞོན་འོས་མི་སུང་ཁྲོས་ཡས་ཀྱི་རྒྱབ་སྐྱོར་བ་ཚོས་ཀྱང་ཀོ་ཞོང་གྲོང་ཁྱེར་དུ་འོས་མིའི་གཏམ་བཤད་ཚོགས་འདུ་ཞིག་བསྡུས་ཡོད་པ་དང་། སྐབས་དེར་ཀོ་ཞོང་རྫོང་གི་རྫོང་དཔོན་ཟུར་པ་ལིན་ཡན་ཡན་(Lín yuān yuán)དང་ནང་སྲིད་བློན་ཆེན་ཟུར་པ་ལི་ཧོང་ཡན(Lǐ hóng yuán)། དེ་བཞིན་སུང་ཁྲོས་ཡས་ཀྱི་ཕ་རྒན་སོགས་ཀྱིས་རྒྱབ་སྐྱོར་གྱི་གཏམ་བཤད་སྤེལ་ཡོད་པ་དང་། གཏམ་བཤད་ཐོག་རྒྱབ་སྐྱོར་བ་ཁྲི་ལྷག་མཉམ་ཞུགས་བྱས་ཡོད་སྐོར་རྗོད་ཀྱི་འདུག

 

1601101209132378གཏམ་བཤད་སྐབས་སུང་ཁྲོས་ཡས་ཀྱིས། ཕྱི་ཚེས་ ༡༦ ཉིན་ཐའེ་ཝན་མི་མང་གིས་སེམས་ལྷོད་ལ་བབས་ནས་འོས་ཤོག་བླུགས་རྒྱུ་ཡིན་པ་དང་། མི་མང་གི་ཤེས་རབ་དང་མིག་རྒྱང་གིས་འཛམ་གླིང་ཡོངས་ཀྱིས་རེ་ལྟོས་བྱེད་སའི་སྲིད་གཞུང་ཞིག་འདེམས་ཐུབ་པར་ཡིད་ཆེས་ཡོད་ལ། ཐའེ་ཝན་མི་མང་གིས་འོས་ཤོག་བརྒྱུད་ཐའེ་ཝན་གྱི་རིན་ཐང་ཕྱིར་ལེན་ཐུབ་པའི་ཡིད་ཆེས་ཡོད་སྐོར་བརྗོད་འདུག་ལ། གསར་འགོད་པས་ཁོ་ལ་བཅར་འདྲི་བྱེད་སྐབས་ཐའེ་ཝན་དང་རྒྱ་ནག་བར་གྱི་ཆེས་ཆེ་བའི་ཧེ་བག་ནི་བདག་དབང་གི་གནད་དོན་མིན་པར་མི་མང་དོན་དངོས་ཀྱི་བདག་པོ་ཡིན་པར་ཡིད་ཆེས་ཡོད་མེད་ཀྱི་གནད་དོན་ཡིན་སྟབས། ཐའེ་ཝན་མི་མང་ལ་མུ་མཐུད་ཁྱིམ་གཞིས་བདག་སྐྱོང་གི་ལམ་ལུགས་རྒྱུན་སྐྱོང་བྱེད་དུ་འཇུག་དགོས་སྐོར་བརྗོད་འདུག

 

ཐའེ་ཝན་གྱི་སྲིད་འཛིན་ལས་ཐོག་མཱ་ཡེན་ཅིག་དང་ཁོའི་བཟའ་ཟླ་གཉིས་ཕྱི་ཚེས་ ༩ ཉིན་ཐའེ་པེ་རུ་སྤེལ་བའི་གོ་མིན་ཏང་ཚོགས་པའི་འོས་མི་ཀྲུའུ་ལི་ལུན་གྱི་འོས་བསྡུའི་ཁྲོམ་སྐོར་ལས་འགུལ་ནང་མཉམ་ཞུགས་བྱས་ཡོད་པ་མ་ཟད། ལས་འགུལ་ནང་མི་མང་ཁྲི་སྟོང་མང་པོ་མཉམ་ཞུགས་བྱས་ཏེ་གོ་མིན་ཏང་ཚོགས་པའི་བཟོ་ལྟ་གཞི་ནས་མངོན་གྱི་ཡོད་སྐོར་དང་། རྒྱ་ནག་དང་ཐའེ་ཝན་བར་བཞག་པའི་ ༩༢ ལོའི་གྲོས་ཆོད་དེ་སྐམ་ས་ཆེན་མོས་ཐའེ་ཝན་ལ་དང་ལེན་བྱེད་དུ་བཅུག་པ་མ་ཡིན་པར་ཐའེ་ཝན་ཕྱོགས་ནས་ཕར་བཏོན་པ་ཞིག་ཡིན་ལ། ལོ་ངོ་ ༨ རིང་གོ་མིན་ཏང་ཚོགས་པས་འབད་བརྩོན་བྱས་པ་བརྒྱུད་ད་ལྟའི་གནས་སྟངས་བྱུང་བ་ཡིན་ལ། གྲོས་ཆོད་དེ་དང་ལེན་མི་བྱེད་མཁན་ཚོས་རྒྱུན་སྐྱོང་ཐུབ་པ་ཞིག་མིན་སྟབས། གལ་སྲིད་གོ་མིན་ཏང་ཚོགས་པས་མུ་མཐུད་སྲིད་དབང་འཛིན་མ་ཐུབ་པ་ཡིན་ན། ཐའེ་ཝན་གྱི་བརྟན་ལྷིང་ལ་གནད་དོན་འབྱུང་རྒྱུ་ཡིན་སྐོར་བརྗོད་འདུག

 

ཆབ་སྲིད་དཔྱད་ཞིབ་པ་ཚོས་ཧོང་ཀོང་ནང་གི་དཀའ་རྙོག་སོགས་ཀྱིས་ཐའེ་ཝན་གྱི་འདི་ལོའི་འོས་བསྡུའི་ཁྲོད་དམངས་གཙོ་ཡར་ཐོན་ཚོགས་པར་རྒྱལ་ཁ་འཐོབ་ཐུབ་པའི་རེ་བ་ཆེན་པོ་བྱེད་ཀྱིན་ཡོད་ཀྱང་། རྒྱ་གཞུང་གི་ཆབ་སྲིད་གནོན་ཤུགས་དང་དཔལ་འབྱོར་ཀྱི་ཤུགས་རྐྱེན་ཁྲོད་མི་མང་གིས་སོ་སོའི་རང་དབང་གི་མངོན་འདོད་འཁུར་ནས་འོས་བླུགས་ཐུབ་མིན་ལ་ཐེ་ཚོམ་བྱེད་ཀྱི་ཡོད་འདུག

གསར་འགོད་པ། པདྨ་མཚོ།

བསྐྱར་བཅོས།: ༢༠༡༧/༠༢/༡༦

Leave a Reply