མི་མང་ལ་གཅར་རྡུང་བྱས་ཏེ་མི་བཅུ་ཙམ་རྨས།

ཟླ་འདིའི་ཕྱི་ཚེས་ཉེར་བཞི་ཉིན་དཀར་མཛེས་རྫོང་གི་ཉེན་རྟོག་པས་མི་མང་ལ་གང་བྱུང་གཅར་རྡུང་བཏང་སྟེ་མི་བཅུ་ཙམ་ལ་རྨས་སྐྱོན་ཆེན་པོ་བཟོས་ཡོད་འདུག

འདི་གར་བྱང་ཆུབ་སེམས་དཔའ་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ཉེར་བཞི་ཉིན་གྱི་སྔ་དྲོར་དཀར་མཛེས་ཁུལ་བྲག་མགོ་རྫོང་མཚོ་འགོ་གྲོང་ཚོ་སྒང་རོང་སྡེ་བའི་སྡེ་མི་རྣམས་རི་མགོར་བསང་མཆོད་དུ་ཕྱིན་ཏེ། བསང་མཆོད་ཚར་རྗེས་སྡེ་མི་རྣམས་ཀྱིས་སྤྲོ་སྐྱིད་བཏང་ནས་སྡོད་སྐབས། གློ་བུར་དུ་དཀར་མཛེས་རྫོང་གི་ཉེན་རྟོག་པ ༣༠ ལྷག་བསླེབས་ནས་སྡེ་མི་རྣམས་བསྐོར་ཏེ། སྡེ་མི་རྣམས་པང་བསྒྲིགས་དུ་བཅུག་སྟེ་མི་རེ་རེ་བཞིན་གྱི་ཐོབ་ཐང་དཔང་ཡིག་ལ་ཞིབ་བཤེར་བྱེད་དགོས་ཞེས་བཀའ་བཏང་། དེ་དུས་སྡེ་མི་རྣམས་ཀྱིས་རྒྱུ་མཚན་གང་ཡིན་མ་ཤེས་པར་སྡེ་དཔོན་གྱིས་བྲག་མགོ་རྫོང་མཚོ་འགོ་གྲོང་ཚོ་སྲིད་གཞུང་ལ་ཁ་པར་བཏང་སྟེ་གནས་ཚུལ་ཞུ་རྩིས་བྱེད་སྐབས། དེ་མ་ཐག་ཉེན་རྟོག་པ་གཉིས་ཀྱིས་སྡེ་དཔོན་ལ་གཅར་རྡུང་བཏང་བ་མ་ཟད། དཀར་མཛེས་རྫོང་གི་དཔོན་གཞོན་པ་ཡན་ཝིན་བོ་ཟེེེེར་བ་དེེེས་ཉེན་རྟོག་པ་ཚོས་སྣེ་འཁྲིད་དེ་མི་མང་ལ་གཅར་རྡུང་དང་འཇུ་བཟུང་བྱོོས་ཞེས་བཀའ་ཕབ་ཡོོད་འདུག

སྡེ་མི་རྣམས་ཀྱིས་ང་ཚོ་མ་རྡུང་རོགས་ཞེས་ཞུ་བ་བརྒྱབ་ཀྱང་མ་ཉན་པར་སྡེ་མི་རྣམས་ལ་གང་བྱུང་གཅར་རྡུང་དྲག་པོ་བྱས་ཏེ། སྡེ་མི་ ༡༠ ཙམ་ལ་རྨས་སྐྱོན་ཚབས་ཆེན་ཕོགས་ཡོད་པ་དང་། དེའི་ནང་ནས་རྒད་པོ་ལོ་ ༧༠ ཅན་ཞིག་གི་མགོ་ལ་རྨས་སྐྱོན་ཕོགས་ནས་ཁྲེན་ཏུའུ་རུ་སྨན་བཅོས་བྱེད་པར་སོང་ཡོད་པ་དང་།  ཡང་མི་གཅིག་གི་རྩིབས་མ་བཅགས་ཏེ་ཐེན་ཆིན་སྨན་ཁང་དུ་བསྐྱལ་དགོས་བྱུང་། གཅར་རྡུང་ཕོག་པའི་སྡེ་མི་གཞན་རྣམས་བྲག་མགོ་རྫོང་སྨན་ཁང་ནང་དུ་ཡོད་འདུག

སྡེ་མི་ཚོས་རྒྱ་ནག་དབུས་གཞུང་དང་སི་ཁྲོན་ཞིང་ཆེན། དཀར་མཛེས་ཁུལ་སོགས་ཀྱི་འབྲེལ་ཡོད་ལས་ཁུངས་དང་དཔོན་རིགས་རྣམས་ལ་རེ་སྐུལ་ཞུ་ཡིག་ཅིག་བྲིས་ཡོད་པ་དེའིི་ནང་དུ། ང་ཚོས་ད་ལྟའི་བར་དུ་དཀར་མཛེས་རྫོང་ཉེན་རྟོག་པས་སྡེ་མི་རྣམས་ལ་གཅར་རྡུང་བྱས་པའི་རྒྱུ་མཚན་ཅི་ཡིན་གསལ་བོ་ཤེས་མེད། དེ་མ་ཟད་ངེད་སྡེ་མི་ཚོས་དཔྱད་ན་ཡང་ང་ཚོའི་རྒྱལ་ཁབ་ནི་ཁྲིམ་མཐུན་གྱི་རྒྱལ་ཁབ་ཅིག་ཡིན་པས་ཉེན་རྟོག་པ་ཚོས་ངེས་པར་དུ་ཁྲིམས་མཐུན་གྱི་ལམ་ནས་ས་གནས་ཀྱི་དོན་དག་ཐག་གཅོད་དགོས་པ་ལས་དོན་དག་ཅི་ཡིན་གསལ་བོ་མ་བཤད་པར་སྡེ་མི་རྣམས་ལ་ཐད་ཀརགཅར་རྡུང་བྱེད་པ་ནི་ཁྲིམས་མཐུན་མིན་པར་སྙམ། ང་ཚོ་སྡེ་མི་དག་ནི་ཉམ་ཆུང་ཡིན་པས་ད་ལྟ་འཇིགས་སྐྲག་ངང་གནས་ཡོད་པར་བརྟེན། ང་ཚོ་སྡེ་མི་ཡོངས་ཀྱིས་བྲག་མགོ་རྫོང་དང་དེ་མིན་གྱི་འབྲེལ་ཡོད་སྲིད་གཞུང་སྡེ་ཁག་རྣམས་ལ། ང་ཚོར་ཐུགས་ཁུར་གནང་ཞིང་སྡེ་མི་རྣམས་དོན་མེད་གཅར་རྡུང་བྱས་པར་ཁྲིམས་མཐུན་གྱི་བཤད་ཚུལ་ཞིག་བྱིན་པར་ཞུ་ཞེས་བརྗོད་འདུག

གསར་འགོད་པ། པདྨ་མཚོ།

བསྐྱར་བཅོས།: ༢༠༡༧/༠༨/༢༦

Leave a Reply

2 thoughts on “མི་མང་ལ་གཅར་རྡུང་བྱས་ཏེ་མི་བཅུ་ཙམ་རྨས།

  1. གཞུང་པ་ཚེ་དབང་བསོད་ནམས་

    གསར་ཤོག་དང་བརྒྱུད་ལམ་ཁག་ནས་གནས་ཚུལ་ངོ་སྤྲོད་གནང་བ་དེ་དག་ལ་སྒྲིག་འཛུགས་དང་མི་མང་གི་ངོས་ནས་བཟང་ངན་གྱི་བརྡ་ལན་དང་འགུལ་སྐྱོགས་དུས་ཐོག་ལ་གནང་མ་ཐུབ་ཚེ་རང་དབང་ཅན་གྱི་གསར་ཤོག་དང་བརྒྱུད་ལམ་ཁག་ནུས་དུ་འགྲོ་སྲིད་པ་མ་རེད་དམ་?

  2. གཞུང་པ་ཚེ་དབང་བསོད་ནམས་

    རང་ཡུལ་རང་བདག་མེད་ན་འདི་འདྲ་རེད་།
    རང་བཙན་མེད་ན་རང་དབང་གང་ན་ཡོད་།
    རང་བཙན་རང་དབང་མི་གི་ཐོབ་ཐང་ལ་།
    རང་ལ་གང་དགོས་གཞན་ལའང་དགོས་གལ་ཆེ་།