མུ་དྷེའི་གཞུང་གིས་རྒྱ་གར་རྒྱལ་ཡོངས་ཀྱི་བློན་ཆེན་ ༣༢ ཀྱི་གོ་གནས་བསྐྱར་སྒྲིག་བྱས་ཏེ་བུད་མེད་བློན་ཆེན་དྲུག་བསྐོ་བཞག་བྱས་ཡོད་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་སྔོན་མུ་དྷེ་གཞུང་གིས་རྒྱ་གར་རྒྱལ་ཡོངས་ཀྱི་བློན་ཆེན་བསྐྱར་སྒྲིག་ཤུགས་ཆེན་པོ་ཞིག་གནང་སྟེ། ཁ་སང་ཕྱི་ཚེས་ ༣ ཉིན་བསྐྱར་སྒྲིག་བསྐོ་བཞག་བྱས་པའི་བློན་ཆེན་ ༣༢ ཀྱིས་ལས་འཁུར་དམ་བཅའ་བཞག་ཡོད་པ་དང་། དེའི་ཁྲོད་བྷི་ཇི་པི་ཚོགས་པའི་མགྲིན་ཚབ་མ་ལྕམ་ནེར་མཱ་ལཱ་སི་ཐཱ་རཱ་མན་(Nirmala Sitharaman)ལགས་བདེ་སྲུང་བཀའ་བློན་དུ་བསྐོ་བཞག་བྱས་ཡོད་པ་དང་།   མོ་ནི་རྒྱ་གར་གྱི་ལོ་རྒྱུས་ནང་ཆེད་བསྐོས་བདེ་སྲུང་བློན་ཆེན་ཐོག་མ་དེ་ཆགས་ཡོད་འདུག

ལྕམ་ནེར་སི་ཐཱ་རཱ་མན་ལགས་ཀྱིས།  ང་རང་བདེ་སྲུང་བཀའ་བློན་དུ་བསྐོ་བཞག་བྱས་པ་དེས་རྒྱ་གར་སྤྱི་ཚོགས་ནང་བུད་མེད་ཀྱི་གནས་བབ་མཐོ་རུ་འགྲོ་ཡི་ཡོད་པ་བསྟན་ཡོད་པ་མ་ཟད།  མུ་དྷེ་གཞུང་ནི་བུད་མེད་ལ་རྒྱབ་སྐྱོར་བྱེད་པའི་གཞུང་ཤུགས་ཆེ་ཤོས་དེ་ཆགས་ཡོད་པ་དང་།  ངས་བུད་མེད་འཐབ་འཁྲུག་ནང་ཞུགས་རྒྱུར་རྒྱབ་སྐྱོར་བྱེད་ཀྱི་ཡིན།  ཞེས་བརྗོད་ཡོད་པ་དང་།  རྒྱ་གར་གྱི་དམག་སྤྱི་ཆེན་མོ་བྷི་ཕི་རཱ་ཝ་ཊི་(Bipin Rawat)ལགས་ཀྱིས།  འཛམ་གླིང་ནང་བུད་མེད་གཡུལ་སར་ཞུགས་བཞིན་པའི་རྒྱལ་ཁབ་ཉུང་ཤས་ཤིག་མ་གཏོགས་མེད་པ་དེས་ཕོ་མོའི་བར་གྱི་འདྲ་མཉམ་མིན་པའི་སྟོང་ཆ་དེ་སྟོན་གྱི་ཡོད།  ཅེས་བརྗོད་ཡོད་པ་དང་།  ད་བར་འཛམ་གླིང་ནང་བུད་མེད་དམག་འཁྲུག་ལ་ཞུགས་ཆོག་པའི་རྒྱལ་ཁབ་ཨ་རི་དང་།  ཨི་ཛི་རལ།  དབྱིན་ཇི།  ཧྥི་ལན་ཌི།  ཨོ་སི་ཊོ་ལེ་ཡ། ཁེ་ན་ཌ། ཧྥ་རན་སི། དེ་བཞིན་ནོར་ཝེ་དང་སི་ཝི་ཌན་བཅས་ཡིན་འདུག

རྒྱ་གར་དཔལ་འབྱོར་དུས་དེབ་སྟེང་བཀོད་པའི་གནས་ཚུལ་ལྟར་ན། ལྕམ་ནེར་སི་ཐཱ་རཱ་མན་ལགས་བདེ་སྲུང་བཀའ་བློན་དུ་བསྐོ་བཞག་བྱས་པར་མི་མང་པོས་དགའ་ཚོར་ཆེན་པོ་གནང་གི་ཡོད་པ་དང་བསྟུན། རྒྱ་གར་ལ་པཱ་ཀི་སི་ཐན་ཙམ་མ་ཟད།  རྒྱ་ནག་དང་ལྷན་དུ་ས་མཚམས་ཀྱི་དཀའ་རྙོག་འབྱུང་བཞིན་པའི་སྐབས་འདིར། རྒྱ་གར་ནང་མི་མང་གིས་ངོས་ལེན་ཡོད་པ་དང་། མངའ་ཁོངས་དབང་སྒྱུར་གྱི་སྲིད་ཇུས་ལྡན་པའི་བདེ་སྲུང་བློན་ཆེན་ཞིག་བསྐོ་བཞག་བྱས་པ་ནི་དོན་སྙིང་ལྡན་པ་ཞིག་ཆགས་ཡོད།  ཅེས་བཀོད་ཡོད་པ་དང་།  ཡང་མི་ཁག་ཅིག་གིས་ལྕམ་ནེར་སི་ཐཱ་རཱམ་ལགས་བདེ་སྲུང་བཀའ་བློན་དུ་བསྐོ་བཞག་བྱས་བར་ཧང་སངས་ཡོད་པའི་འགྲེལ་བརྗོད་བྱས་ཡོད་པ་རེད།

ཡང་མོ་ལ་སྐྱོན་བརྗོད་བྱེད་མཁན་ཚོས་ལྕམ་ནེར་སི་ཏཱ་རཱ་མན་ལགས་ལ་དམག་ཤུགས་རྒྱ་སྐྱེད་ཀྱི་ནུས་པ་མེད་སྐོར་སོགས་ཀྱི་སྐྱོན་བརྗོད་བྱེད་ཀྱི་ཡོད་པ་དང་འབྲེལ། གང་ལྟར་མོས་རྒྱ་གར་གྱི་དམག་སྡེ་དེང་ཪབས་ཅན་དུ་བསྒྱུར་ཏེ་སྦྱོང་བརྡར་སྔར་ལྷག་སྤྲད་དེ་རྒྱལ་ཁབ་སྲུང་སྐྱོབ་ཀྱི་འོས་འགན་ལ་ནམ་ཡང་གཡོལ་ཐབས་མེད་སྐོར་བརྗོད་ཀྱི་འདུག

ཐེངས་འདིའི་བཀའ་བློན་བསྐྱར་སྒྲིག་སྐབས་བློན་ཆེན་རྒན་པ་ ༢༧  ཡོད་པའི་ཁྲོད་བུད་མེད་བློན་ཆེན་ ༦ བྱུང་ཡོད་པ་དང་།  དེ་ནི་འདས་པའི་ལོ ༡༠ ལྷག་རིང་བུད་མེད་བཀའ་བློན་མང་ཤོས་ཀྱི་འཛིན་སྐྱོང་ཞིག་ཆགས་ཡོད་པ་དང་།  དམིགས་བསལ་འགྲིམ་འགྲུལ་བློན་ཆེན་སཱོ་རེ་ཤི་(Suresh Prabhu)ལགས་ལ་ཉེ་ཆར་ནད་མནར་གྱིས་རྩ་དགོངས་སྙན་ཞུ་ཕུལ་ཡོད་པ་ལྟར། ཐེངས་འདིའི་བློན་ཆེན་བསྐྱར་སྒྲིག་སྐབས་ཁོང་ལ་དགོངས་པ་གནང་ཡོད་འདུག

ལྕམ་ནེར་སི་ཐཱ་རཱ་མན་ནི་རྒྱ་གར་མངའ་སྡེ་ཏཱ་མིལ་ནཱ་རྡོའི་གྲོང་ཁྱེར་མཱ་ཌོ་རཱེས་(Madurai)ཞེས་བར་ཕ་ཤཱི་རེ་ནཱ་ར་ཡ་ན་(Shri Narayanan Sitaraman)དང་། མ་སཱ་བི་ཊི་རེ་(Savitri)གཉིས་ཀྱི་བུ་མོར་སྐྱེས་ཤིང་། ཏཱ་མིལ་ནཱ་རྡོའི་གྲོང་ཁྱེར་ཊི་ཆི་རཱ་པཱ་ལིའི་(Tiruchirappalli)མཐོ་སློབ་ནས་དངོས་གཞིའི་སྒྱུ་རྩལ་རིག་པ་མཐར་ཕྱིན་དང་།  དེའི་རྗེས་རྒྱལ་ས་ལྡི་ལིར་ནེ་རུ་(Jawaharlal Nehru)གཙུག་ལག་སློབ་གཉེར་ཁང་དུ་དཔལ་འབྱོར་རིག་པའི་འབུམ་རམས་པ་ཐོན་ཡོད་འདུག  དེ་ནས་རིམ་བཞིན་སྤྱི་ཚོགས་ཞབས་ཞུ་དང་།  ཆབ་སྲིད་ཀྱི་ཕྱག་ལས་གནང་སྟེ་རྒྱལ་སྤྱིའི་གསར་ཁང་བྷི་བྷི་སིའི་ས་གནས་གསར་འགོད་པ་དང་།  དབྱིན་ཇིའི་རྒྱལ་ས་ལོན་ཌོན་དུ་རྟེན་གཞི་བྱས་པའི་རྒྱལ་སྤྱིའི་ཁེ་ལས་ཁང་(Pricewaterhouse Copper)ཞེས་པའི་འགན་འཛིན་རྒན་པ། མངའ་སྡེ་རིམ་པའི་ཚོང་དང་བཟོ་གྲྭའི་བློན་ཆེན་ཡིན་པ་མ་ཟད།  དེའི་རྗེས་བྷི་ཇི་པི་ཚོགས་པའི་མགྲིན་ཚབ་མ་ཡང་གནང་ཡོད་འདུག

དེ་སྔོན་ཨིན་དྷ་ར་གྷན་དྷི་(Indira Gandhi)མཆོག་ནས་བདེ་སྲུང་བློན་ཆེན་གྱི་ཕྱག་ལས་གནང་མྱོང་ཡོད་ཀྱང་།  སྐབས་དེར་མོ་སྲིད་བློན་ཡིན་པས་བདེ་སྲུང་བློན་ཆེན་གྱི་འགན་གཅིག་ལྕོགས་སུ་འཁུར་ཡོད་འདུག

གསར་འགོད་པ། སྐལ་བཟང་སྤྱིན་པ།