ཧོང་ཀོང་ནང་བྷི་བྷི་སི་རླུང་འཕྲིན་བཀག་འགོག

ཕྱི་ལོ་ ༡༩༧༨ ལོ་ནས་ཧོང་ཀོང་ནང་རྒྱ་ཁྱབ་ཏུ་ཕྱིན་པའི་བྷི་བྷི་སི་རླུང་འཕྲིན་ལ་བཀག་འགོག་བྱེད་ཀྱི་ཡོད་འདུག

བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་༤ ཉིན་ཧོང་ཀོང་སྲིད་གཞུང་གིས་འདས་པའི་ལོ་ངོ་  ༣༩ རིང་ཧོང་ཀོང་མི་མང་གིས་ཆུ་ཚོད་ ༢༤ རིང་ཉན་འཇོག་བྱེད་སའི་བྷི་བྷི་སིའི་འཛམ་གླིང་རླུང་འཕྲིན་ཚན་པའི་གསར་འགྱུར་བཀག་སྡོམ་བྱས་ཏེ། དེའི་ཚབ་དུ་རྒྱ་ནག་གི་རླུང་འཕྲིན་གསར་འགྱུར་ཚན་པ་ཞིག་བཅུག་ཡོད་འདུག

ཧོང་ཀོང་མི་མང་གི་གསར་འགོད་རང་དབང་ལ་བློ་ཚབས་ཆེ་བའི་མི་ཁག་ཅིག་གིས།  ཧོང་ཀོང་ནང་བྷི་བྷི་སིའི་གསར་འགྱུར་བཀག་སྡོམ་བྱས་པ་དེས། རྒྱ་ནག་དམར་ཤོག་ཚོགས་པས་ཧོང་ཀོང་གི་གསར་འགྱུར་རང་དབང་བཀག་སྡོམ་བྱས་ཏེ།  དམར་ཤོག་ཚོགས་པ་རང་གི་གསར་འགྱུར་བརྒྱུད་ལམ་ཁག་ཧོང་ཀོང་ནང་ཧམ་འཛུལ་བྱེད་ཀྱི་ཡོད་སྐོར་བརྗོད་པ་མ་ཟད། ཧོང་ཀོང་ནང་རྒྱ་ནག་གི་སྟངས་འཛིན་སྔར་ལས་ཤུགས་ཆེ་རུ་འགྲོ་བཞིན་ཡོད་ལུགས་བརྗོད་ཀྱི་འདུག

དྲ་ཐོག་ནས་མཚན་རྟགས་ ༡༠༥༦ ཙམ་བསྡུ་རུབ་བྱས་པའི་ལས་འགུལ་བ་ཁག་ཅིག་གིས།  ང་ཚོར་བྷི་བྷི་སིའི་འཛམ་གླིང་རླུང་འཕྲིན་གསར་འགྱུར་བསྐྱར་དུ་དགོས། ཅེས་ཧོང་ཀོང་སྲིད་གཞུང་ལ་ཞུ་གཏུག་བྱེད་བཞིན་ཡོད་ཀྱང་།  ཧོང་ཀོང་སྤྱི་དམངས་བརྙན་འཕྲིན་ཁང་གི་མགྲིན་ཚབ་པས།  ཧོང་ཀོང་ནང་རྒྱ་ནག་གི་རླུང་འཕྲིན་གསར་འགྱུར་གཏོང་རྒྱུའི་དམིགས་ཡུལ་ནི། རྒྱ་ནག་དང་ཧོང་ཀོང་བར་ཕན་ཚུན་གྱི་རིག་གཞུང་རྒྱུས་ལོན་བྱེད་ཐབས་ཤིག་ཡིན་པ་ལས་ཆབ་སྲིད་ཀྱི་རྒྱབ་ལྗོངས་མེད་པ་མ་ཟད།  ཧོང་ཀོང་ནང་མུ་མཐུད་མཚན་མོའི་ཆུ་ཚོད་ ༨ ཀྱི་རིང་དང་།  གཟའ་མཇུག་སོགས་ལ་བྷི་བྷི་སིའི་རླུང་འཕྲིན་གསར་འགྱུར་ཐད་གཏོང་བྱེད་ཀྱི་ཡིན།  ཞེས་བརྗོད་ཡོད་འདུག

བྷི་བྷི་སི་གསར་ཁང་གིས།  ང་ཚོའི་གསར་འགྱུར་ལེན་ཚན་ལ་འགྱུར་བ་ཐེབས་ཐེངས་རེར། གསར་འགྱུར་ཉན་མཁན་ཚོར་བློ་ཕམ་བྱུང་གི་ཡོད།  འོན་ཀྱང་། ང་ཚོས་ཐབས་ཤེས་ཡོད་རྒུ་བཏོན་ཏེ་གསར་འགྱུར་ཉན་མཁན་ཚོར་མུ་མཐུད་གསར་འགྱུར་ཉན་ཐུབ་ཐབས་བྱེད་ཀྱི་ཡིན་ལ།  ད་ལྟ་ཧོང་ཀོང་ནང་མཚན་དཀྱིལ་དུ་བྷི་བྷི་སིའི་རླུང་འཕྲིན་གསར་འགྱུར་ཉན་ཐུབ་པ་བཟོས་ཡོད་པ་མ་ཟད། མུ་མཐུད་ཆུ་ཚོད་ ༢༤ རིང་ངམ་ཡང་ན་དྲ་ལམ་དང་།  འཕྲུལ་སྐར་(Telstar 18 DTH)བརྒྱུད་དེ་ཧོང་ཀོང་མི་མང་གིས་ཉན་ཐུབ་ཀྱི་ཡོད། ཅེས་བརྗོད་འདུག

ཡང་བྷི་བྷི་སི་གསར་ཁང་གིས།  ཧོང་ཀོང་སྤྱི་དམངས་བརྙན་འཕྲིན་ཁང་གིས་ཁོ་ཚོའི་ཉིན་མོའི་གསར་འགྱུར་ལས་རིམ་ཁག་ཏུ་བྷི་བྷི་སིའི་དབྱིན་ཇིའི་གསར་འགྱུར་ཁག་ཅིག་ཐད་གཏོང་བྱ་རྒྱུའི་ཁས་ལེན་བྱས་ཡོད།  ཅེས་བརྗོད་འདུག

གསར་འགོད་པ།  སྐལ་བཟང་སྤྱིན་པ། 

བསྐྱར་བཅོས།: ༢༠༡༧/༠༩/༠༦

Leave a Reply

2 thoughts on “ཧོང་ཀོང་ནང་བྷི་བྷི་སི་རླུང་འཕྲིན་བཀག་འགོག

  1. ཆོས་རྒྱལ་ཚེ་རིང།

    bbc དང CNN ལྟ་བུ་གསར་ཁང་དག་འཛམ་གླིང་གི་གསར་ཁང་སྐད་གྲགས་ཅན་རེད། དམིགས་བསལ་རང་སྲིད་རང་སྐྱོང་གི་སྲིད་གཞུང་ཧོང་ཀོང་ནང་རྒྱལ་སྤྱིའི་གསར་འགྱུར་བཀག་སྡོམ་བྱེད་པ་ནི་གསར་འགོད་རང་དབང་བཀག་སྡོམ་བྱེད་པ་རེད། བོད་མིར་ཆ་བཞག་ན་མ་འོངས་པར་རང་སྲིད་རང་སྐྱོང་ཐོབ་པ་ཡིན་ན། ཧོང་ཀོང་ལ་མིག་དཔེ་ལྟ་དགོས་པ་ཞིག་ཆགས་ཡོད།

  2. གཞུང་པ་ཚེ་དབང་བསོད་ནམས་ཡ

    མི་གི་སྤྱི་ཚོགས་ཀྱི་བདེ་འཇགས་ལ་འགན་འཁུར་ནས་གནས་ཚུལ་བརྒྱུད་སྤེལ་བྱ་རྒྱུ་དེ་གསར་འགོད་པས་ལས་བའགན་དང་རང་དབང་ཡིན་པ་དང་སྤྱི་ཚོགས་ཀྱི་བདེ་འཇགས་ལ་འགན་འཁུར་མེད་པར་སྤྱི་ཚོགས་ནང་བྱུང་བའི་གནས་ཚུལ་ཡོངས་རྫོགས་བརྒྱུད་་ལམ་དུ་སྤེལ་རྒྱུའི་འགན་འཁུར་བླངས་ཚེ་སྤྱི་ཚོགས་ཀྱི་བདེ་འཇགས་ལ་ཕན་ལས་གནོད་ཆེ་བས་སྦི་སྦི་སི་ཙམ་མ་ཡིན་པ་གསར་འགྱུར་སྡེ་ཚན་དང་གསར་འགོད་སྡེ་ཚན་ཚོའི་ཐུགས་གནང་ཟབ་ནན་དགོས་པ་མཐོང་།