ཕྱི་ཟླ་ ༩ ཚེས་ ༡༩ ཉིན་བོད་སོག་ལས་ཁུངས་སྒོ་བརྒྱབ་རྒྱུ་རེད་ཟེར།

ད་ལྟ་བར་དུ་ཐའེ་ཝན་གྱི་རྩ་ཁྲིམས་ནང་སྐྱབས་བཅོལ་གྱི་སྒྲིག་ཁྲིམས་ཤིག་མེད་ཀྱང་ཐའེ་ཝན་གྲོས་ཚོགས་ནས་བོད་མི་མང་པོ་ཞིག་ལ་དམིགས་བསལ་གྱིས་ཁྲིམས་མཐུན་ཤོག་བུ་སྤྲད་འདུག

ཁ་སང་ཕྱི་དྲོའི་ཆུ་ཚོད་ ༤།༤༥ ཙམ་ལ་གངས་སྐྱིད་གཉའ་ཁྲི་ཚོགས་ཁང་དུ། བོད་ཀྱི་སྲིད་ཇུས་ཉམས་ཞིབ་ཁང་གི་གོ་སྒྲིག་འོག ཐའེ་ཝན་ནས་ཆེད་ཕེབས་བོད་དོན་རྒྱབ་སྐྱོར་ཚོགས་པའི་སྐུ་ཚབ་བཀྲ་ཤིས་ཚེ་རིང་ལགས། ཝུ་ཅཱ་ཀྲིན། ལོའུ་ཡེན་ཁྲིན། དེ་བཞིན་ལིན་ (lin hsinyi)བཅས་འཐུས་མི་བཞི་ཡིས། ཐའེ་ཝན་ནང་གི་སྤྱི་ཚོགས་ལས་འགུལ་དང་དམངས་གཙོའི་འཕེལ་རིམ་ཞེས་པའི་བརྗོད་བྱའི་ཐོག་གཏམ་བཤད་གནང་སོང་། སྐབས་དེར་བོད་མིའི་སྒྲིག་འཛུགས་ཀྱི་བཀའ་དྲུང་སྟོབས་རྒྱལ་ཚེ་རིང་ལགས་དང་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་རྣམ་གཉིས་ཀྱི་གཙོས། བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་མཛད་གཙོ་རྣམ་པ་ཁག་ཅིག་དང་སྲི་ཞུ་ལས་བྱེད་མི་ཉུང་བ་ཞིག་ཕེབས་འདུག

བཀྲ་ཤིས་ཚེ་རིང་ལགས་ནི་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་ཡིན་པ་དང་། ཁོང་གིས་བོད་དང་ཐའེ་ཝན་འགྲོ་བ་མིའི་ཐོབ་ཐང་ཚོགས་པའི་བྱུང་རིམ་སྐོར་ལ་བརྗོད་དོན། ཐོག་མར་ངས་ཞུ་འདོད་པ་ནི། སྤྱིར་ཐའེ་ཝན་གྱི་རྩ་ཁྲིམས་ནང་བོད་དེ་ད་དུང་ཡང་ཐའེ་ཝན་གྱི་མངའ་ཁོངས་ཡིན་པ་འཁོད་པ་ཡོད་ཀྱང་། ང་ཚོས་ལོ་ངོ་ ༢༠ སྔོན་དུ་རྣ་བར་ཐོས་པའི་ཐའེ་ཝན་དང་ད་ལྟའི་ཐའེ་ཝན་གཉིས་ཀྱི་བར་རྩ་བ་ཉིད་ནས་འདྲ་བོ་མེད། ཐའེ་ཝན་གྱི་མི་ཚོས་དམངས་གཙོ་དང་རང་དབང་། དེ་བཞིན་འགྲོ་བ་མིའི་ཐོབ་ཐང་གི་ཆེད་དུ་སྐུ་ལུས་མཆོད་མེར་ཕུལ་བ་སོགས་སྐུ་ལས་ཧ་ཅང་ཆེན་པོ་བསྐྱོན་ཡོད་པ་རེད། དཔེར་ན། ཕྱི་ལོ་ ༡༩༤༧ ཟླ་ ༢ ཚེས་ ༢༨ ལ་གོ་མན་ཏང་གིས་དམངས་གཙོ་དང་རང་དབང་ཆེད་ཕྱག་ལས་གནང་མཁན་མང་པོ་བསད་པའི་ལོ་རྒྱུས་དེ་ལྟར་ཡོད། ང་ཚོ་བོད་པ་ཚོ་ཡིན་ཡང་ཕྱི་ལོ་ ༡༩༩༨ ལོར་རང་ལུས་མེར་མཆོད་གནང་བའི་དཔའ་བོ་ཐུབ་བསྟན་དངོས་གྲུབ་ལགས་ཀྱི་རྗེས་ནས་མགོ་བཙུགས་ཏེ། རང་དབང་གི་ཆེད་བོད་ཕྱི་ནང་གཉིས་སུ་སྐུ་ལུས་མེར་མཆོད་འབུལ་མཁན་མུ་མཐུད་དེ་བྱུང་དང་འབྱུང་བཞིན་ཡོད་པ་རེད། ལས་འགུལ་གང་སྤེལ་ཡང་དམིགས་ཡུལ་ཞིག་འཛིན་པའི་ཐོག་ནས་ལས་འགུལ་སྤེལ་ན་ལས་འགུལ་སྤེལ་ཕྱོགས་ལ་ཁེ་ཕན་འདུག ངས་ཟུར་དུ་བོད་དོན་ཆེད་ཚོགས་པ་ཞིག་གསར་འཛུགས་བྱས་ན། ང་སྒེར་གྱི་དཔལ་འབྱོར་ཁོ་ནས་འདང་ཐབས་མེད་སྟབས། ངས་གནས་སྟངས་མང་པོ་ཞིག་ལ་བལྟས་ནས་ཐའེ་ཝན་འགྲོ་བ་མིའི་ཐོབ་ཐང་འོག་ལ་བོད་དང་ཐའེ་ཝན་འགྲོ་བ་མིའི་ཐོབ་ཐང་ཞེས་པའི་ཚོགས་པ་ཞིག་བཙུགས་པ་རེད། ཅེས་བརྗོད་སོང་།

ཡང་ཁོང་གིས། ངས་གོང་དུ་བརྗོད་པ་ལྟར། ལོ་ངོ་ ༢༠ སྔོན་ལ་ཐའེ་ཝན་གྱི་མི་ཙམ་མ་ཡིན་པར་བོད་མི་ཐའེ་ཝན་དུ་སྡོད་མཁན་ཡིན་ཡང་། ཐའེ་ཝན་ནས་ཡིན་ལབ་པར་རང་བཞིན་གྱིས་ཏོག་ཙམ་ངོ་ཚ་དང་འཚེར་སྣང་ཡོད་པ་དེ་འདྲ་ཆགས་པ་རེད། འོན་ཀྱང་། དེང་སང་གནས་སྟངས་དེ་འགྱུར་ནས་ཐའེ་ཝན་ནང་བོད་པའི་ལས་འགུལ་ཡུལ་གཞན་ལས་ལྷག་པ་ཞིག་སྤེལ་མ་ཐུབ་ཀྱང་འདྲ་འདྲ་སྤེལ་ཐུབ་ཀྱི་ཡོད། དེ་སྔོན་བོད་པ་ཉུང་ཤས་ཡིན་པ་དང་བོད་སོག་ལས་ཁུངས་ཤུགས་ཆེན་པོ་རེད། ང་ཚོའི་ལས་ཁུངས་ཀྱི་མདུན་རང་ལ་བོད་སོག་ལས་ཁུངས་ཡོད་པ་རེད། བོད་སོག་ལས་ཁུངས་ཀྱིས་ང་ཚོའི་ལས་ཁུངས་ལའང་གནོད་པ་བྱས་ཡོད། འོན་ཀྱང་། དེང་སང་ཐའེ་ཝན་གྱི་གཞུང་དམངས་གཉིས་ཀ་ནས་བོད་སོག་ལས་ཁུངས་དེ་དགོས་ངེས་ཤིག་མིན་པ་མ་ཟད། སྤྱི་ཚོགས་ལ་ཕན་པ་ལས་གནོད་འཚེ་ཆེ་བ་ཡོད་པ་ཤེས་རྟོགས་བྱུང་ཡོད་པ་རེད། ཅེས་བརྗོད་སོང་།

ཡང་བསྐྱར་ཁོང་གིས། སྤྱིར་ཐའེ་ཝན་གྱི་རྩ་ཁྲིམས་བཟོ་མཁན་གོ་མན་ཏང་ཡིན་པ་དང་། ཁོང་ཚོ་ནི་བོད་ལ་མ་དགའ་མཁན་ཞིག་ཏུ་བརྩི་སྲོལ་ཡོད་ཀྱང་། ཕྱི་ལོ་ ༢༠༠༨ ལོར་ཐའེ་ཝན་སྲིད་འཛིན་གྱི་འོས་བསྡུའི་ལས་འགུལ་དང་བོད་ནང་གནས་སྟངས་ཛ་དྲག་བྱུང་སྐབས། ང་ཚོས་བོད་དོན་ཆེད་ལས་འགུལ་སྤེལ་དུས་གོ་མན་ཏང་གིས་ཁོང་ཚོའི་རྒྱལ་དར་བཟུང་སྟེ་ཐའེ་ཝན་གྱི་སྲིད་འཛིན་འོས་བསྡུའི་ལས་འགུལ་སྤེལ་བ་དང་བསྟུན། བོད་ཀྱི་གནད་དོན་ཐད་བོད་ལ་རྒྱབ་སྐྱོར་ཡོད་ཅེས་བརྗོད་པ་ཙམ་མིན་པར་བོད་དོན་ལས་འགུལ་ནང་མཉམ་ཞུགས་བྱེད་མཁན་ཡང་ཧ་ཅང་མང་པོ་བྱུང་སོང་། ད་ལྟ་བཤད་སྟངས་བྱས་ན། བོད་སོག་ལས་ཁུངས་དེ་སྤྱི་ཟླ་ ༩ ཚེས་ ༡༩ ཉིན་ཐའེ་ཝན་གཞུང་གིས་གསལ་བསྒྲགས་བྱས་ཏེ་སྒོ་བརྒྱབ་རྒྱུ་རེད་འདུག ཅེས་བརྗོད་སོང་།

དེའི་རྗེས་ཐའེ་ཝན་གྱི་འགྲོ་བ་མིའི་ཐོབ་ཐང་ཚོགས་པའི་ཚོགས་གཞོན་ཝུ་ཅཱ་ཀྲིན་(Wu Jiazhen)ལགས་ཀྱིས། ཐའེ་ཝན་གྱི་འགྲོ་བའི་ཐོབ་ཐང་ཚོགས་པ་བཙུགས་པའི་སྐོར་དང་ཐའེ་ཝན་གྱི་ལོ་རྒྱུས། དེ་བཞིན་དྲག་པོའི་སྲིད་གཞུང་ལས་རང་དབང་དང་དམངས་གཙོ་ཐོབ་ཆེད་ཐའེ་ཝན་མི་མང་དང་ལྷག་པར་དུ་གཞོན་སྐྱེས་ཚོས་ཇི་ལྟར་ལས་འགུལ་སྤེལ་ཏེ་སྐུ་ལས་བསྐྱོན་པའི་སྐོར་གཏམ་བཤད་གནང་སོང་བ་དང་། ཁྲིམས་བཟོའི་ལས་རོགས་ལོའུ་ཡེན་ཁྲིན་(liu ying chun)ལགས་ཀྱིས་སྔར་ཐའེ་ཝན་ལ་ཕོ་མོ་འདྲ་མཉམ་དང་ཐོབ་ཐང་འདྲ་མཉམ་གྱི་གནས་སྟངས་སྐྱོ་བོ་ཡོད་ཀྱང་། རིམ་གྱིས་འཐབ་རྩོད་དང་ལས་འགུལ་སྣ་ཚོགས་ལ་བརྟེན་ནས་ཐོབ་ཐང་འདྲ་མཉམ་ཙམ་མིན་པར། ད་ལྟ་མཚན་མཐུན་ལའང་ལྟ་སྟངས་འགྱུར་བ་ཕྱིན་ཡོད་པ་མ་ཟད། མཚན་མཐུན་གཉེན་སྒྲིག་གི་ཆེད་དུ་འཐབ་རྩོད་བྱས་དང་བྱེད་བཞིན་ཡོད་པའི་སྐོར་བརྗོད་སོང་།

སྲོག་ཐོག་གི་ཉེས་ཁྲིམས་འགོག་ཐབས་ཚོགས་པའི་ཚོགས་གཙོ་ལིན་(lin hsinyi)ལགས་ཀྱིས་ཐའེ་ཝན་བོད་དོན་རྒྱབ་སྐྱོར་ཚོགས་པའི་ངོས་ནས་ཐའེ་ཝན་ནང་བོད་དོན་ཆེད། ད་ལྟའི་བར་དུ་ལས་འགུལ་གང་དག་སྤེལ་བ་དག་གི་པར་རིས་བཏོན་བཞིན། ལས་འགུལ་དེ་དག་སྤེལ་ཡུལ་གྱི་ས་ཆའི་སྐོར་དང་དེ་བཞིན་ལས་འགུལ་ཇི་ལྟར་སྤེལ་ཡོད་མེད་སྐོར་ལ་འགྲེལ་བརྗོད་གནང་བ་མ་ཟད། ཐའེ་ཝན་ནང་བོད་དོན་རྒྱབ་སྐྱོར་ཚོགས་པས་ལས་འགུལ་ཇི་ལྟར་སྤེལ་གྱི་ཡོད་མེད་སྐོར་ལའང་འགྲེལ་བརྗོད་ཟབ་རྒྱས་གནང་སོང་།

མཇུག་ཏུ་བཀྲ་ཤིས་ཚེ་རིང་ལགས་ཀྱིས་བརྗོད་དོན། ཐའེ་ཝན་གྱི་རྩ་ཁྲིམས་ནང་སྐྱབས་བཅོལ་གྱི་སྒྲིག་ཁྲིམས་ཤིག་ད་ལྟ་མེད། འོན་ཀྱང་། ཐའེ་ཝན་ནང་བོད་པ་མང་པོ་ཞིག་ཡོད་སྟབས། ཐའེ་ཝན་གྱི་གྲོས་ཚོགས་ནས་དམིགས་བསལ་བྱས་ཏེ་དེ་སྔོན་ཐོག་མར་བོད་མི་ ༡༢༥ ལྷག་ལ་ཤོག་བུ་ཞིག་སྤྲད་ཡོད་པ་དང་། དེའི་རྗེས་ནས་བོད་མི་ ༩༠ ཙམ་ལ་ཤོག་བུ་སྤྲད་ཡོད་པ་མ་ཟད། གྲོས་ཚོགས་ནང་ནས་སྐུ་ཚབ་ཁ་ཤས་ཀྱིས་བོད་དོན་བདེན་མཐའ་མ་གསལ་བར་དུ་བོད་ལ་རོགས་པ་བྱེད་དགོས་ཞེས་རེ་འདུན་བཏོན་པ་ལྟར། ཡང་བསྐྱར་བོད་མི་ ༡༩ ལ་ཤོག་བུ་དེ་སྤྲད་ནས་ཧ་ལས་པའི་རྒྱབ་སྐྱོར་གནང་གི་ཡོད་པ་རེད། ཅེས་བརྗོད་སོང་།

གསར་འགོད་པ། ཉི་མ་ཚེ་རིང་།

བསྐྱར་བཅོས།: ༢༠༡༧/༠༩/༠༨

Leave a Reply

5 thoughts on “ཕྱི་ཟླ་ ༩ ཚེས་ ༡༩ ཉིན་བོད་སོག་ལས་ཁུངས་སྒོ་བརྒྱབ་རྒྱུ་རེད་ཟེར།

  1. ༄༅། འགྲིག་འདུག་་་་་ཐེ་ཝན་བོད་ལས་ཁུངས་ཟེར་བ་དེ་བོད་མི་ནང་ཁུལ་མཐུན་སྒྲིལ་གཏོར་བཤིགས་གཏོང་
    མཁན་དེ་རེད། བོད་པའི་སྤྱི་ཚོགས་ནང་གཏམ་ངན་གྱི་ཞབས་བྲོ་མང་པོ་འཁྲབ་ཡོད།
    དཀྲུགས་དང་མ་དཀྲུགས་དཀྲུགས་སོང།
    བོད་སོག་ལས་ནས་དཀྲུགས་སོང།
    བྱས་དང་མ་བྱས་བྱས་སོང། རྒྱ་མིའི་ཕོག་དངུལ་ཟས་སོང།
    གཉེན་མི་དགྲ་ལ་ཞུགས་སོང། དགྲ་ནས་དངུལ་སྒོར་སྤྲད་དེ།
    ཞབས་འདྲེན་མང་དག་བཟོས་སོང།གསང་དང་མ་གསང་མི་འདུག་
    གསང་བ་ཁྲོམས་ལ་འགྱར་ཡོད། དཔེར་ན་ཀུན་བཟང་བླ་མ་དང།
    བཅོ་ལྔ་ཚེ་རིང་ཟེར་ལྟར་རེད། འགྲོ་ས་དམྱལ་བའི་ཁང་རེད།