ཨ་རིའི་སྲིད་འཛིན་ཊོ་རུམ་ཕིའི་བཟའ་ཟླ་དང་པོ་ཨ་ཝིན་ན་ཊི་རུམ་ཕི་དང་མེ་ལཱ་ནེ་ཡཱ་ཊི་རུམ་ཕི་བར་ཨ་རིའི་སྐུ་ལྕམ་དང་པོ་སུ་ཡིན་གྱི་འཐབ་རྩོད་ཡོང་བཞིན་ཡོད་འདུག

ཁ་སང་ཕྱི་ཚེས་༩ ཉིན་ཨ་རི་ཞོགས་པ་བདེ་ལེགས་ཞེས་པའི་གསར་ཁང་གིས། ཨ་རིའི་སྲིད་འཛིན་ཊི་རུམ་ཕི་ཡི་བཟའ་ཟླ་དང་པོ་ཨ་ཝེན་ནཱ་ཊི་རུམ་ཕི་(Ivana Trump) ཞེས་པར་བཅར་འདྲི་བྱེད་སྐབས། མོས་མོ་རང་ཨ་རིའི་སྐུ་ལྕམ་དང་པོ་དེ་ཡིན་ཞེས་བརྗོད་ཡོད་པ་དང་། ཡང་མོས་ཊི་རུམ་ཕི་དང་མོ་གཉིས་ལ་ད་ལྟ་ད་དུང་འབྲེལ་བ་ཡོད་པ་མ་ཟད། མོ་ལ་ཕོ་བྲང་དཀར་པོའི་ནང་དུ་ཐད་ཀར་ཁ་པར་གཏོང་ཆོག་པའི་ཨང་གྲངས་ཡོད་སྟབས། ཁོ་གཉིས་ཀྱིས་རྒྱུན་དུ་བདུན་ཕྲག་གཉིས་རེའི་མཚམས་སུ་སྐད་ཆ་བཤད་ཀྱི་ཡོད་སྐོར་བརྗོད་ཡོད་པ་རེད།

ཡང་བཅར་འདྲི་དེའི་སྐབས་སུ་མོས་ངས་ཁོ་ལ་ཁ་པར་མང་པོ་གཏོང་འདོད་ཀྱི་མི་འདུག མཱེ་ལཱ་ནེ་ཡཱ་དེར་ཡོད་པས་ངས་མོ་ལ་ཕྲག་དོག་རིགས་གང་ཡང་བྱེད་འདོད་མི་འདུག་ལ། རྒྱུ་མཚན་ང་ཊི་རུམ་ཕི་ཡི་བཟའ་ཟླ་དང་པོ་དེ་ཡིན་པས། རང་བཞིན་གྱིས་ང་ཨ་རིའི་སྐུ་ལྕམ་དང་པོར་ཆགས་ཡོད་པ་རེད།ཅེས་བརྗོད་ཡོད་སྟབས། དེ་ནི་མོས་སྲིད་འཛིན་ཊི་རིམ་ཕིའི་ད་ལྟའི་སྐུ་ལྕམ་མེ་ལཱ་ནེ་ཡཱ་ལ་མི་མང་ཁྲོད་མཐོང་སྣང་ཆག་བཅུག་པ་དང་ངོ་ཚར་གཏོད་འདོད་པ་རེད་ཅེས་བརྗོད་ཀྱི་འདུག

དེ་རིང་ཨ་རིའི་སྲིད་འཛིན་གྱི་སྐུ་ལྕམ་དང་པོའི་འབྲེལ་མཐུད་འགན་འཛིན་ལགས་ཀྱིས། སྐུ་ལྕམ་མཱེ་ལཱ་ནེ་ཡཱ་ཡིས་ཕོ་བྲང་དཀར་པོ་རང་གི་ནང་བྱས་ཏེ་སྲིད་འཛིན་མཉམ་དུ་བསྡད་ཡོད་པ་དང་། མོ་ཝ་ཤིན་ཊོན་ནས་འདུག་རྒྱུར་དགའ་བོ་ཡོད་པ་མ་ཟད། མོས་ཨ་རིའི་སྲིད་འཛིན་གྱི་སྐུ་ལྕམ་དང་པོའི་འགན་ཡོངས་རྫོགས་འཁུར་གྱི་ཡོད་པ་རེད། སྐུ་ལྕམ་གྱིས་རང་གི་མཚན་གནས་འོག་བྱིས་པ་ཚོར་རོགས་སྐྱོར་བྱེད་པའི་འཆར་གཞི་ཡོད་པ་ལས་དེབ་བཙོང་ནས་བསྡད་མེད་པ་རེད་ཅེས་ཨ་ཝེན་ན་ཊི་རུམ་ཕིས་དེབ་བཙོང་གི་ཡོད་པ་དེར་ཟུར་ཟ་བྱས་ཡོད་པ་དང་། ཡང་ཁོང་གིས། ཨ་ཝིན་ན་ཡི་སྐད་ཆ་དེ་དག་ནི་འབྲེལ་མེད་ཅིག་ཡིན་པ་གསལ་བོ་རེད་ལ། སྐད་ཆ་དེ་དག་ནི་རང་ཉིད་ཀྱི་མཐོང་སྣང་ཆེད་ཁོ་ན་ཞིག་རེད། ཅེས་བརྗོད་ཡོད་འདུག

ཊི་རུམ་ཕིར་ད་ལྟའི་ཆར་ཨ་རིའི་མི་མང་ཁྲོད་མཐོང་སྣང་མི་ལེགས་པ་ཤུགས་ཆེན་བྱུང་གི་ཡོད་པ་མ་ཟད། ཨ་རིའི་མཐོ་རིམ་དཔོན་རིགས་མང་པོ་ཞིག་གིས་ཁོང་གི་ཀུན་སྤྱོད་དང་བྱེད་སྟངས་མང་པོ་སྲིད་འཛིན་ཞིག་གི་ལས་སྟངས་མིན་པ་དང་། ཁོས་རང་ཉིད་ཀྱི་འདོད་པ་ཁོ་ན་སྒེར་གཅོད་བྱས་ཏེ་གཞུང་གི་ལས་མི་མང་པོ་གནས་དབྱུང་བཏང་བ་དང་། རང་ཉིད་མི་སྒེར་གྱི་རྩོད་རྙོག་མང་པོ་ཞིག་གཞུང་གི་ལས་གའི་ནང་དུ་འཁུར་ཡོང་གི་ཡོད་པའི་བསམ་ཚུལ་བྱུང་གི་ཡོད་པ་རེད།

ཡང་ཊི་རུམ་ཕིའི་བྱ་སྤྱོད་སྐོར་ལ་ཨ་ཝིན་ན་ཡིས། ཊི་རུམ་ཕི་ནི་མི་གུས་ཞབས་མེད་པ་ཞིག་དང་། མཚམས་རེར་ཁོས་བཤད་པའི་སྐད་ཆ་ནི་ཆོ་མེད་པ་རྐྱང་ཡིན་པ་རེད། ཁོས་རང་གི་ཁ་གཏད་ཀྱི་མི་ལ་གང་བྱུང་བཤད་ངེས་རེད། ཉེ་སྔོན་ཁོས་སྤྱི་ཚོགས་དྲ་ལམ་དུ་བྱང་ཀོ་རི་ཡའི་མགོ་འཁྲིད་ཀེམ་ཇོང་ཨན་ལ་འཕུར་མདེལ་མི་ཆུང་ཞེས་བཤད་ཡོད་པ་རེད། གལ་ཏེ་ཁོས་འཕྲུལ་སྒྲའི་(Twitter)ངོས་སུ་སྐད་ཆ་བཤད་ན། འཛམ་གླིང་ཡོངས་ཀྱིས་ཁོའི་སེམས་ནང་དུ་ག་རེ་ཡོད་པ་ཧ་གོ་འགྲོ་བ་ཞིག་ཡོད་པ་རེད། ཅེས་བརྗོད་ཡོད་འདུག དེ་སྔོན་ཊི་རུམ་ཕིས་མོ་རང་ཅེག་སྤྱི་མཐུན་རྒྱལ་ཁབ་(Czech)གྱི་ཨ་རིའི་གཞུང་ཚབ་ཏུ་བསྐོ་བཞག་བྱས་ཡོད་ཀྱང་མོས་དང་ལེན་བྱས་མེད་པ་རེད།

ཨ་ཝེན་ནཱ་ནི་ད་ལྟ་ལོ་ན་ ༦༨ ཡིན་པ་དང་། ཕྱི་ལོ་ ༡༩༧༧ལོར་ཊི་རུམ་ཕི་དང་གཉེན་སྒྲིག་བྱས་ཏེ། ཕྱི་ལོ་ ༡༩༩༢ ལོར་བཟའ་འཐོར་བྱུང་ཡོད་འདུག ད་ལྟ་ཁོང་གཉིས་ལ་བྱིས་པ་གསུམ་སྟེ། ད་ལྟའི་ཊི་རུམ་ཕི་ཡི་སློབ་སྟོན་པ་བུ་མོ་ཨ་ཝིན་ན་མཱ་རི་ཊི་རུམ་ཕི་(Ivanka Marie Trump)། ཊི་རུམ་ཕི་འཛིན་སྐྱོང་ལྷན་ཁང་གི་འགན་འཛིན་བུ་ཇོན་ཊི་རུམ་ཕི་ཇིར་(Donald John Trump Jr)དང་(Eric Frederick Trump)ཨེ་རིག་ཧྥི་ཊི་རིག་ཊི་རུམ་ཕི་བཅས་ཡིན་འདུག

གསར་འགོད་པ། སངས་རྒྱས་དཀོན་མཆོག