བོད་རིཊ་བུ་མོ་ཞིག་ལ་བཙན་གཡེམ་བྱས།

ཟླ་འདིའི་ཕྱི་ཚེས་ ༡༣ ཉིན་གྱི་དགོང་མོར་ཧྥ་རན་སིར་གནས་སྡོད་བོད་རིགས་བུ་མོ་ལོ་ན་ ༡༡ ཅན་ཞིག་སློབ་གྲྭ་ནས་རང་ཁྱིམ་དུ་ལོག་སྐབས་སྐྱེས་པ་ཞིག་གིས་བཙན་གཡེམ་བྱས་ཡོད་འདུག

ཁ་སང་ཧྥ་རན་སིའི་(Leparisien)གསར་ཁང་གིས་གནས་ཚུལ་སྤེལ་བ་ལྟར་ན།  ཟླ་འདིའི་ཚེས་ ༡༣ ཉིན་གྱི་དགོང་མོའི་ཆུ་ཚོད་ ༨ པ་ཡས་མས་སུ། ཧྥ་རན་སིའི་མངའ་སྡེ་ཡེ་ཝན་ལིའི་ས་གནས་(Trappes)ཅེས་པར་བོད་རིགས་བུ་མོ་ལོ་ན་ ༡༡ ཅན་ཞིག་སློབ་གྲྭ་ནས་ཕྱིར་རང་ཁྱིམ་དུ་ལོག་པའི་ལམ་བར་དུ། མགོ་རས་སྐྱ་བོ་དང་ལུས་སྦྱོང་གྱོན་ཆས་ནག་པོ་གྱོན་པའི་ལོ་ན་ ༤༠ ཙམ་ཡིན་པའི་སྐྱེས་པ་ཞིག་གིས། མོ་ལ་མགོ་སྐོར་བཏང་སྟེ་ཉེ་འཁྲིས་ཀྱི་ཤིང་གསེབ་ཅིག་ཏུ་འཁྲིད་སོང་ནས་བཙན་གཡེམ་བཏང་ཡོད་འདུག

ས་གནས་ཉེན་རྟོག་པས་ཉིན་གཉིས་རིང་རྩད་གཅོད་བྱས་པ་བརྒྱུད། ལོ་ན་ ༢༥ ནས་༣༥ བར་ཡིན་པའི་དོགས་ཡོད་ཉེས་ཅན་ཞིག་འཛིན་བཟུང་བྱས་ཏེ། དེ་རིང་ཁྲིམས་ར་བསྡུས་ནས་འདྲི་རྩད་བྱེད་ཀྱི་ཡོད་པ་དང་། ཉེ་སྔོན་དོགས་ཡོད་ཉེས་ཅན་དེས་རྒྱལ་ས་པེ་རེ་སུར་ཨེ་ཤ་ཡའི་བུ་མོ་ཚོའི་རྐུབ་ལ་ལག་པ་འཆང་བ་སོགས་བྱས་ཏེ་བརྙས་བཅོས་བཏང་ཡོད་པ་ཤེས་རྟོགས་བྱུང་ཡོད་འདུག

ཉེན་རྟོག་པས་བསྒྲགས་པའི་གནས་ཚུལ་ལྟར་ན། བོད་རིགས་བུ་མོ་དེ་ད་ལྟ་ཨན་ཌིར་མི་གྷོ་ཊི་(Andre-Mighot)ཞེས་པའི་སྨན་ཁང་དུ་ཡོད་པ་དང་། མོའི་སེམས་ཁམས་ལ་གནོད་སྐྱོན་ཆེན་པོ་ཐེབས་ཡོད་འདུག བུ་མོ་དེའི་ཁྱིམ་ཚང་(Formule I)ཞེས་པའི་མགྲོན་ཁང་དུ་གནས་སྡོད་བྱེད་ཀྱི་ཡོད་པ་དང་། བཙན་གཡེམ་དོན་རྐྱེན་བྱུང་རྗེས། བུ་མོའི་ཕ་མ་གཉིས་ཀྱིས་མགྲོན་ཁང་དེའི་ལས་མི་ཞིག་ལ་རེ་སྐུལ་བྱས་ཏེ་ཉེན་རྟོག་པར་གྱོད་དོན་ཞུ་གཏུགས་བྱས་ཡོད་པ་དང་། བུ་མོ་དེ་ཧྥ་རན་སིར་འབྱོར་ནས་ལོ་གཅིག་ཙམ་ལས་འགོར་མེད་ཀྱང་ཧྥ་རན་སིའི་སྐད་བྱང་ཆུབ་པ་བཤད་ཤེས་ཀྱི་ཡོད་སྐོར་བརྗོད་འདུག

གསར་འགོད་པ།  སྐལ་བཟང་སྤྱིན་པ།

བསྐྱར་བཅོས།: ༢༠༡༧/༡༠/༡༦

Leave a Reply

3 thoughts on “བོད་རིཊ་བུ་མོ་ཞིག་ལ་བཙན་གཡེམ་བྱས།

  1. ཚུལ་ཁྲིམས་བཟང་པོ།

    གནས་ཚུལ་འདི་ནི་ཧ་ཅང་སེམས་སྐྱོ་ཞིག་རེད་འདུག དེ་ཕྱིར་ཀུན་གྱིས་མ་འོངས་གནས་ཚུལ་འདི་འདྲ་མི་ཡོང་ཆེད་སྒོ་གང་ས་ནས་བརྩོན་པ་བྱེད་དགོས་པ་ཧ་ཅང་གལ་ཆེ་སྙམ། ལྷག་པར་དྲིན་ཅན་གྱི་ཕ་མ་ཚོས་རང་གི་གཅེས་ཕྲུག་ཀུན་བདག་སྐྱོང་ལེགས་པོ་དགོས་པ་ནི་སྔར་ལས་ཀྱང་གལ་ཆེ། བོད་ཀྱི་མི་རིགས་དེ་གྲངས་ཉུང་མི་རིགས་ཡིན་ལགས་ན། བོད་ཀྱི་བུ་ཕྲུག་གཅིག་ལ་སྐྱོན་ཆག་ན་ཧ་ཅང་སེམས་སྐྱོ་ཡིན་བསམ། དགེ་རྒན་ཕ་མ་གྲོགས་པོ་ཡོངས་ཀྱིས་རང་རང་གི་འཁོར་དེ་དག་ལ་སྤྱི་ཚོགས་ཀྱི་ཡ་རབས་བཟང་སྤྱོད་ཀུན་ངག་ཡིག་འདྲ་མིན་གྱིས་སྤེལ་ལ་བརྩོན་རོགས། བཟང་སྤྱོད་ཀྱི་འཛམ་གླིང་ཞིག་སྐྲུན་པར་མི་རེ་ངོ་རེ་ལ་རག་ལས་ཡོད་ན་ཀུན་གྱིས་དེ་ལ་བརྩོན་པ་མཛད་རོགས།