ཚེ་དབང་དབྱངས་མཚོ་ལགས་དང་བསྟན་འཛིན་སྲི་སྒྲུབ་ལགས་གཉིས་སུ་ཕྱི་ལོ་ ༢༠༢༤ ལོའི་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཀྱི་གཟེངས་རྟགས་དབུལ་གཏན་ཁེལ་འདུག
ལོ་ལྟར་དབུས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་རྣམས་ལ་གཟེངས་རྟགས་འབུལ་སྲོལ་ཡོད་པ་ལྟར། ཕྱི་ལོ་ ༢༠༢༤ ལོའི་སྲི་ཞུ་ལས་བྱེད་ཀྱི་གཟེངས་རྟགས་དེ་ད་ལྟ་མན་སྤར་ཕན་བདེ་གླིང་དུ་ས་གནས་མགོ་འཛིན་གྱི་ལས་དོན་གཉེར་མུས་ཡིན་པའི་ཚེ་དབང་དབྱངས་མཚོ་ལགས་དང་། དབུས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གསར་འགྱུར་སྙན་སྒྲོན་པ་བསྟན་འཛིན་སྲི་སྒྲུབ་ལགས་གཉིས་སུ་དབུལ་རྒྱུ་ཡིན་འདུག
དེའི་ཐད་མན་སྤར་ཕན་བདེ་གླིང་དུ་ས་གནས་མགོ་འཛིན་གྱི་ལས་དོན་གཉེར་མུས་ཡིན་པའི་ཚེ་དབང་དབྱངས་འཛོམས་ལགས་ཀྱིས་འདི་གའི་གསར་འགོད་པར། ཕྱི་ལོ་ ༢༠༢༤ ལོའི་ལས་བྱེད་ལས་དོན་གཟེངས་རྟགས་ནང་འདེམས་ཐོན་བྱུང་བ་ལ་ཐོས་མ་ཐག་སེམས་ནང་དགའ་ཚོར་ཆེན་པོ་བྱུང་ཡོད་ནའང་། མ་འོངས་པ་ལས་དོན་གང་ཅིའི་ཐད་མིག་དཔེ་བཟང་པོ་དང་ཁྱད་དུ་འཕགས་པ་ཞིག་བསྒྲུབ་དགོས་གལ་ཡིན་པར་སོང་། འགན་འཁྲི་ཡང་ཆེན་པོ་ཞིག་ཡོད་པའི་ཚོར་སྣང་ཆེན་པོ་བྱུང་། དེ་རིང་ང་ལྟ་བུའི་ལས་མྱོང་ཞན་པོ་དང་དམིགས་བསལ་འཇོན་ཐང་མེད་པའི་ལས་བྱེད་དཀྱུས་མ་ཞིག་ལ་གཟེངས་རྟགས་དེ་ཐོབ་ཡོད། དེ་ཡང་སྒྲིག་འཛུགས་ནས་གཙོ་བོ་མ་འོངས་པའི་བོད་པའི་གཞོན་སྐྱེས་ནང་སྤྱི་ཚོགས་ཁྲོད་ཤེས་བྱ་ཡོན་ཏན་དང་ཉམས་མྱོང་གི་གནས་ཚད་གང་འདྲ་ཞིག་ཡོད་རུང་སོ་སོའི་མི་རིགས་དང་འཐབ་རྩོད་ཆེད་དུ་ནུས་པ་གང་ཡོད་སྤུངས་དགོས་རྒྱུའི་འགན་འཁྲི་བཞེས་དགོས་པའི་མིག་སྟོན་དང་གཞོན་སྐྱེས་ཚོར་སེམས་ཤུགས་སྤར་རྒྱུ་ཆེད་ཡིན་པའི་ངོས་འཛིན་ཞུ་ཡི་ཡོད། ངས་ད་ལན་གྱི་གཟེངས་རྟགས་དེ་ལམ་སྟོན་གྱི་སྒྲོན་མེ་དང་དམིགས་འདུན་སྩལ་མཁན་གྱི་༧གོང་ས་རྒྱལ་བ་རིན་པོ་ཆེ་མཆོག་དང་། ང་ལ་གཡོ་མེད་ཀྱི་རྒྱབ་སྐྱོར་དང་ཡིད་ཆེས་གནང་མཁན་གྱི་ཕ་མ་གཉིས་ལ་ཕུལ་བ་ཡིན། ཞེས་བརྗོད་བྱུང་།
དེ་བཞིན་བསྟན་འཛིན་སྲི་སྒྲུབ་ལགས་ཀྱིས་འདི་གའི་གསར་འགོད་པར། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་སྤྱི་ལྟར་གུས་རང་ནས་སྲི་ཞུ་བསྒྲུབ་བཞིན་པའི་ཁྲོད་ད་ལན་གཟེངས་རྟགས་འདི་ཉིད་ཐོབ་པར་དགའ་ཚོར་བྱུང་ལ། གུས་རང་ནས་ཀྱང་ལས་དོན་མུ་མཐུད་ཧུར་སྐྱེད་ཞུ་རྒྱུའི་ཆོད་སེམས་བརྟན་པོ་ཡོད། གོ་སྐབས་འདིའི་བརྒྱུད་བདག་ལ་དྲིན་ཆེ་བའི་ཕ་མ་དང་དགེ་བའི་བཤེས་གཉེན་རྣམ་པ། ལམ་སྟོན་གནང་མཁན་དང་ལས་རོགས་ཡོངས་ལ་བཀའ་དྲིན་ཆེ་ཞུ་རྒྱུ་ཡིན། ཞེས་བརྗོད་བྱུང་།
དབུས་བོད་མིའི་སྒྲིག་འཛུགས་ཀྱི་དྲ་རྒྱར་གཞིགས་ན། ཚེ་དབང་དབྱངས་མཚོ་ལགས་ནི་ཕྱི་ལོ་ ༢༠༡༥ ཟླ་ ༡༠ ཚེས་ ༥ ནས་ཚོད་ལྟའི་ལས་དྲུང་ཐོག་འཕྲོད་བསྟེན་ལས་ཁུངས་སུ་ལས་འགན་བཀོད་སྒྲིག་གནང་། ཕྱི་ལོ་ ༢༠༡༦ ཟླ་བ་ ༥ ཚེས་ ༡༦ ཉིན་ལས་ངོར་བསྐོ་གཞག་གནང་། ཕྱི་ལོ་ ༢༠༢༠ ཟླ་བ་ ༥ ཚེས་ ༢༠ ནས་འཕྲོད་བསྟེན་ལས་ཁུངས་སུ་དྲུང་ལས་ས་མིག་ཐོག་ལས་འགན་གོ་སྒྲིག་གནང་། ཕྱི་ལོ་ ༢༠༢༢ ཟླ་ ༠༤ ཚེས་ ༡ ནས་ལོ་གཅིག་རིང་གཞུང་མིན་སློབ་སྦྱོང་གུང་གསེང་། ཕྱི་ལོ་ ༢༠༢༣ ཟླ་བ་ ༤ ཚེས་ ༡ ནས་མན་སྤར་ཕན་བདེ་གླིང་ས་གནས་མགོ་འཛིན་གྱི་ལས་འགན་གོ་སྒྲིག་གནང་། དེ་བཞིན་ཁོང་མོས་མན་སྤར་ཕན་བདེ་གླིང་དུ་ས་གནས་མགོ་འཛིན་གྱི་ལས་དོན་གཉེར་སྐབས། རྒྱ་གར་ཡུལ་མི་དང་བོད་མི་བར་གྱི་རྩོད་རྙོག་དང་། ས་གནས་ཀྱི་ས་ཆའི་གནད་དོན་སོགས་ས་གནས་ཉེན་རྟོག་ལས་ཁུངས་དང་འབྲེལ་འདྲིས་ཟབ་མོ་གནང་ནས་དཀའ་ངལ་ལས་གྲོལ་བར་བྱས་འདུག
བསྟན་འཛིན་སྲི་སྒྲུབ་ལགས་ཀྱི་ཕྱི་ལོ་ ༢༠༢༠ ཟླ་ ༡ ཚེས་ ༡༤ ནས་ཚོད་ལྟའི་རྒན་དྲུང་གནས་རིམ་ཐོག་ཕྱི་དྲིལ་ལས་ཁུངས་ཀྱི་བོད་ཀྱི་བརྙན་འཕྲིན་ཚན་པར་བསྐོ་གཞག་གནང་། ཕྱི་ལོ་ ༢༠༢༠ ཟླ་བ་ ༨ ཚེས་ ༢༠ ནས་ལས་བྱེད་ངོ་མར་བསྐོ་གཞག་གནང་། ཕྱི་ལོ་ ༢༠༢༢ ཟླ་བ་ ༡༡ ཚེས་ ༧ ནས་ལས་དྲུང་གནས་རིམ་དུ་གནས་སྤར་གྱིས་ཕྱི་དྲིལ་ལས་ཁུངས་སུ་མུ་མཐུད་ལས་འཁུར་ཞུ་མུས། དེ་བཞིན་བོད་ཀྱི་བརྙན་འཕྲིན་གྱི་གསར་འགྱུར་ཆེད་གནས་ཚུལ་མཁོ་སྒྲུབ་དང་། རྩོམ་སྒྲིག སྙན་སྒྲོན། གསར་འགྱུར་ཕྱོགས་སྒྲིག་གྲུབ་མཚམས་གཞུང་འབྲེལ་དྲ་རྒྱའི་སྟེང་འཇོག་རྒྱུ། བརྙན་འཕྲིན་ཕྱོགས་སྒྲིག་པར་རམ་འདེགས་དང་། ལས་བགོས་ཁོ་ན་མ་ཡིན་པར་བརྙན་འཕྲིན་པར་ལེན་དང་། སྒྲིག་སྦྱོར། ཐད་ཀར་རྒྱང་སྲིང་སོགས་ཀྱི་ལས་དོན་གཉེར་མུས་ཡིན་འདུག
གསར་འགོད་པ། དཔལ་ལྡན།
