འགྲོ་བ་མིའི་ཐོབ་ཐང་ཚན་པས་རྒྱ་ནག་ལ་ཉེན་བརྡ་བཏང་།

མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་རྒྱ་གཞུང་གིས་ཉེས་མེད་བཙོན་འཇུག་བྱས་པའི་རང་དབང་ཁྲིམས་རྩོད་པ་གསུམ་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་བྱས་འདུག

ཁ་སང་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ཚན་པས་ཆེད་འཛུགས་བྱས་པའི་འགྲོ་བ་མིའི་ཐོབ་ཐང་དོན་གཉེར་ཚོགས་ཆུང་གིས་གསར་འགོད་གསལ་བསྒྲགས་ཤིག་སྤེལ་ཏེ། ཕྱི་ལོ་ ༢༠༡༦ ལོར་རྒྱ་ནག་གཞུང་གིས་བཙོན་འཇུག་བྱས་པའི་རྒྱའི་ཁྲིམས་རྩོད་པ་ཧོ་སྲི་གོན་(Hu Shigen)དང་། ཞེའུ་ཡཱང་(Xie Yang)། ཙོ་ཤི་ཧྥིན(Zhou Shifeng)གསུམ་མྱུར་ཏུ་ཀློད་གྲོལ་གཏོང་དགོས་པའི་འབོད་སྐུལ་དང་སྦྲགས། རྒྱ་ནག་གཞུང་གིས་མུ་མཐུད་གནད་དོན་དེར་སྣང་མེད་བཏང་ན་གནོན་ཤུགས་ཆེ་རུ་གཏོང་རྒྱུ་ཡིན་པའི་ཉེན་བརྡ་བཏང་འདུག

དེ་ཡང་འགྲོ་བ་མིའི་ཐོབ་ཐང་ཚན་པའི་གསལ་བསྒྲགས་ནང་། རྒྱ་ནག་གིས་ཉེས་མེད་ཀྱི་ཁྲིམས་རྩོད་པ་གསུམ་བཙོན་བཅུག་བྱས་པ་དེ་ནི་རྒྱལ་སྤྱིའི་འགྲོ་བ་མིའི་ཡོངས་ཁྱབ་གསལ་བསྒྲགས་དང་འགལ་ཡོད་པ་དང་། འདས་པའི་ལོ་འགའི་རིང་ནས་རྒྱ་ནག་གཞུང་ནས་བཙན་དབང་གིས་རང་ཉིད་ཀྱི་མི་སེར་མང་པོ་ཞིག་ཉེས་མེད་བཙོན་འཇུག་བྱས་ཡོད་ལ། དེ་ནི་ཁྲིམས་ལུགས་དང་མཐུན་པའི་བྱེད་སྟངས་ཤིག་མིན་སྟབས། རྒྱ་ནག་གཞུང་ལ་ཁོ་ཚོ་ཀློད་གྲོལ་དགོས་པའི་འབོད་སྐུལ་ཡང་ནས་བསྐྱར་དུ་བྱས་ཡོད་ཀྱང་། སྣང་མེད་གཏོང་གི་ཡོད་པས་རྒྱལ་སྤྱིའི་སྒང་ནས་རྒྱ་ནག་ལ་གནོན་ཤུགས་སྤྲོད་རྒྱུ་ཇེ་ཆེར་གཏོང་སྲིད་སྐོར་བརྗོད་འདུག

ཧོང་ཀོང་རང་དབང་གསར་ཁང་གིས་ཞི་ཅིན་ཕིན་གྱི་གཏམ་བཤད་ལ་དཔྱད་བརྗོད་སྤེལ་བའི་ནང་། དམར་ཤོག་ཚོགས་པའི་ཚོགས་ཆེན་མགོ་འཛུགས་ཀྱི་མཛད་སྒོའི་ཐོག་ཞི་ཅིན་ཕིན་གྱིས་ཆུ་ཚོད་ ༣།༣༥ རིང་གཏམ་བཤད་རིང་པོ་བྱས་ཡོད་ཀྱང་།  གཏམ་བཤད་ནང་དུ་འགྲོ་བ་མིའི་ཐོབ་ཐང་སྐོར་དང་རྒྱ་ནག་ནང་གི་ཉེས་མེད་མི་སེར་སྟོང་ཕྲག་མང་པོ་བཙོན་འཇུག་སྐོར་ལ་ཡག་སྡུག་གི་སྐད་ཆ་ཚིག་གཅིག་ཀྱང་བཤད་མེད་སྐོར་བརྗོད་འདུག

ཁྲིམས་ལུགས་རང་དབང་ལས་འགུལ་བ་ཧོ་སྲི་གོན་གྱིས་རྒྱལ་ཁབ་མགོ་གཏིང་སློག་རྩིས་བྱས་པའི་ཉེས་མིང་འོག་ལོ་བདུན་དང་ལོ་ཕྱེད་ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། དེ་བཞིན། འགྲོ་བ་མིའི་ཐོབ་ཐང་ཁྲིམས་རྩོད་པ་ཞེའུ་ཡཱང་ལ་སྤྱི་ཚོགས་དྲ་རྒྱ་བརྒྱུད་སྤྱི་དམངས་བདེ་འཇགས་ལ་གཏོར་བཤིག་བཏང་བའི་ཉེས་མིང་འོག  ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་པ་དང་། ཁོང་གི་ནང་མི་ཚོས་རྒྱ་གཞུང་གིས་ཞེའུ་ལ་གཅར་རྡུང་དང་མནར་གཅོད་བཏང་ཡོད་སྐོར་བརྗོད་ཡོད་པ་རེད།

རྒྱ་ནག་ཁྲིམས་ལུགས་ཚན་པའི་འགན་འཛིན་ཙོ་ཤི་ཧྥིན་ནི། རྒྱ་ནག་ནང་དུ་འགྲོ་བ་མིའི་ཐོབ་ཐང་འཐབ་རྩོད་མཁན་གྲགས་ཆེན་ཞིག་ཡིན་པ་དང་། ཁོང་ལའང་སྤྱི་ཚོགས་དཀྲོག་གཏམ་སྤེལ་ནས་སྤྱི་དམངས་བདེ་འཇགས་ལ་གཏོར་བཤིག་བཏང་ཡོད་པའི་ཉེས་མིང་འོག་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༧/༡༠/༢༡

Leave a Reply

One thought on “འགྲོ་བ་མིའི་ཐོབ་ཐང་ཚན་པས་རྒྱ་ནག་ལ་ཉེན་བརྡ་བཏང་།