རྒྱ་གར་གྱི་གྲོས་ཚོགས་འོག་མའི་འཐུས་མི་རམ་སོ་ཝ་རུབ་ཤར་མ་ལགས་ཀྱིས་རྒྱ་གར་གྱི་ཆེས་མཐོའི་གཟེངས་རྟགས་བྷ་རཱ་ཊི་རཱ་ནཱ་༧གོང་ས་མཆོག་ལ་འབུལ་ལམ་ཞུ་དགོས་པའི་རེ་འདུན་གདོན་རྒྱུ་ཡིན་སྐོར་གསུངས་འདུག

དེ་རིང་སྔ་དྲོའི་ཆུ་ཚོད་༡༠ ཐོག་བཞུགས་སྒར་དྷ་རམ་ས་ལའི་ཐེག་ཆེན་གཙུག་ལག་ཁང་དུ། ༧གོང་ས་རྒྱལ་བ་རིན་པོ་ཆེ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་དེ་ལོ་ངོ་ ༢༨ འཁོར་བའི་དུས་ཆེན་གྱི་གཞུང་འབྲེལ་མཛད་སྒོ་ཚོགས་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། མཛད་སྒོའི་སྐུ་མགྲོན་གཙོ་བོར་རྒྱ་གར་གྲོས་ཚོགས་འོག་མའི་འཐུས་མི་སྐུ་ཞབས་རམ་ས་ཝ་རུབ་ (Ram Swaroop) ལགས་དང་། བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་ཆེ་ཕྲ། དེ་བཞིན་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྡེ་ཁག་གི་སྐུ་ཚབ་རྣམ་པ། གཞན་ཡང་། བཞུགས་སྒར་ཁུལ་གྱི་དགོན་སྡེ་ཁག་གི་གྲྭ་བཙུན་དང་སློབ་གྲྭ་ཁག་གི་སློབ་ཕྲུག ཕྱི་རྒྱལ་བ། དྷ་སའི་སེར་སྐྱ་མི་མང་བཅས་འཛོམས་འདུག

མཛད་སྒོ་དང་བསྟུན་འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ནང་འཕྲོད་བསྟེན་དང་འབྲེལ་བའི་སྲི་ཞུ་གནང་མཁན་ལས་བྱེད་ལྔ་ལ་ཞབས་ཞུའི་ལོ་ ༢༥ ཧྲིལ་པོ་འཁོར་བའི་གཟེངས་བསྟོད་ལེགས་སྐྱེས་དང་། ལས་བྱེད་འདེམས་བསྐོ་ལྷན་ཁང་ནས་སྲི་ཞུ་བ་ལུགས་མཐུན་བགྲེས་ཡོལ་དང་བགྲེས་ཡོལ་སྔ་བསྣུར་ཕེབས་མཁན་གཉིས་ལ་རྗེས་དྲན་ལེགས་གསོའི་ཕྱག་འཁྱེར་དང་ཆོས་རྒྱལ་སྲོང་བཙན་སྒམ་པོའི་སྐུ་བརྙན་བྱིན་ཅན་རེ་གནང་སོང་། གཞན་ཡང་། བོད་ཀྱི་ཟློས་གར་གྱི་འདི་ལོའི་དབྱར་སྐྱིད་༼བྱམས་བརྩེའི་རིན་ཐང་།༽ཞེས་པའི་འོད་སྡེར་དབུ་འབྱེད་བཅས་གནང་སོང་།

མཛད་སྒོའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ། ༧གོང་ས་རྒྱལ་བ་རིན་པོ་ཆེ་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་ལོ་ངོ་ ༢༨ འཁོར་བར་བཀའ་དྲིན་རྗེས་དྲན་དང་བཅས་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་སྦྲགས་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོག་སྦྱངས་གནང་བའི་ནང་། ཕྱི་ལོ་ ༢༠༡༧ ཟླ་ ༡༠ པའི་ནང་རྒྱ་ནག་དམར་ཤོག་ཀྲུང་དབྱང་ཨུ་ཡོན་ལྷན་ཁང་ཟེར་བའི་སྐབས་ ༡༩ པའི་ཚང་འཛོམས་གྲོས་ཚོགས་དེས་རྒྱ་ནག་དམར་ཤོག་དབུས་ཆབ་སྲིད་ཅུས་ཟེར་བའི་ཨུ་ཡོན་དང་། དབུས་ཆབ་སྲིད་ཚན་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན། ཀྲུང་དབྱང་ཨུ་ཡོན་ལྷན་ཁང་གི་སྤྱི་ཁྱབ་དྲུང་ཆེ་བཅས་འདེམས་བསྐོ་བྱས་པ་དང་། སྲིད་འཛིན་ཞི་ཅིན་ཕིན་གྱི་མིང་དང་བསམ་ཚུལ་ཏང་གི་སྒྲིག་ཡིག་ནང་དུ་བཀོད་ཆོག་པར་བྱས་པ་ནི། འདས་པའི་ལོ་རབས་ནང་མར་ལེ་རིང་ལུགས་དང་མའོ་ཙེ་ཏུང་གི་དགོངས་པ་ཟེར་བ་ནང་བཞིན་ཚོགས་ཆེན་འདི་བརྒྱུད་དེ། སྲིད་འཛིན་ཞི་ཅིན་ཕིན་གྱི་གོ་གནས་དང་དབང་ཚད་བླ་ན་མེད་པ་ཆགས་ཡོད། སྐབས་དེར་མཐའ་འཁྱོངས་བཅུ་བཞི་དྲངས་པའི་ནང་ནས་ཕྱོགས་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་རྒྱུ་མཐའ་འཁྱོངས་ཟེར་བ་དང་། མི་དམངས་ཀྱི་རང་ཐག་རང་གཅོད་མཐའ་འཁྱོངས། ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་རྒྱུ་མཐའ་འཁྱོངས། འཕེལ་རྒྱས་ཁྲོད་དམངས་འཚོ་འགན་ལེན་དང་ལེགས་བཅོས་མཐའ་འཁྱོངས། མི་དང་རང་བྱུང་ཁམས་ཞི་མཐུན་མཉམ་གནས་མཐའ་འཁྱོངས། མིའི་རིགས་ཀྱི་ལས་དབང་གཅིག་མཐུན་འདུས་གྲུབ་བསྐྲུན་རྒྱུར་སྐུལ་འདེད་གཏོང་རྒྱུ་མཐའ་འཁྱོངས་ཟེར་བ་སོགས་ཀྱིས་བཟང་ཕྱོགས་ཀྱི་ཟུར་ཞིག་མངོན་ཡོད་པས། རྒྱ་ནག་ནང་དང་ལྷག་པར་བོད་རྒྱའི་གནད་དོན་ཐད་ལའང་དེའི་བཟང་ཕྱོགས་ཀྱི་འགྱུར་བ་ཞིག་འབྱུང་རྒྱུར་རེ་བ་རྒྱག་མི་ཆོག་པ་མིན་སྟབས། སྲིད་འཛིན་ཞི་ཅིན་ཕིན་གྱི་གུ་ཡངས་ཀྱི་སྲིད་བྱུས་བཟུང་སྟེ་རྒྱལ་སྤྱིའི་ནང་རྒྱ་ནག་ལ་ཆེ་མཐོང་འབྱུང་ཐབས་དང་། ལྷག་པར་བོད་མི་རིགས་ཀྱི་མངོན་འདོད་ལ་བདག་བཟུང་གིས་དཀའ་རྙོག་སེལ་ཐབས་གནང་དགོས་པ་གལ་ཆེ་བའི་གནད་དོན་ཆགས་ཡོད། ཅེས་འགོད་འདུག

འདི་ལོའི་ནོ་བྷེལ་ཞི་བདེའི་གཟེངས་རྟགས་(ICAN)ཐོབ་ཡོད་པ་དེའི་སྐོར་ལ། ཕྱི་ལོ་ ༢༠༡༧ ལོའི་ནོ་བྷེལ་ཞི་བདེའི་གཟེངས་རྟགས་རྒྱལ་སྤྱིའི་རྡུལ་ཕྲན་མཚོན་ཆ་ཉེན་སྲུང་ཚོགས་པ་ ICAN ཞེས་པར་ཐོབ་ཡོད་ལ་འཛམ་གླིང་ཁྱོན་དུ་རྡུལ་ཕྲན་མཚོན་ཆ་རྩ་མེད་བཟོ་ཆེད་ད་བར་མུ་མཐུད་ལས་འགུལ་ཤུགས་ཆེ་སྤེལ་ཡོད་པ་དང་། དེང་སྐབས་འཛམ་གླིང་གི་གནས་སྟངས་ཇི་འདྲ་ཞིག་ཏུ་འགྱུར་མིན་ཐད་ངེས་གཏན་གང་ཡང་མེད་པ་མ་ཟད། ས་ཕྱོགས་གང་སར་ལྷིང་འཇགས་མེད་པའི་གནས་སྟངས་འདིའི་འོག་ཁོང་རྣམ་པའི་ལས་འགན་ནི་ཛ་དྲག་གི་དགོས་མཁོ་ཆེན་པོ་ཞིག་ཏུ་ཆགས་ཡོད་ལ། དེ་བཞིན་ཆོད་སེམས་བརྟན་པོས་འབད་བརྩོན་གནང་བའི་སྙིང་སྟོབས་བཅས་ལ་ངོས་འཛིན་གསལ་པོ་གནང་སྟེ་གཟེངས་རྟགས་གནང་བ་ཞིག་ཡིན་སྟབས། ང་ཚོས་ཀྱང་ཚོགས་པ་དེའི་མཛད་བཟང་ལ་རྗེས་སུ་ཡི་རངས་ཀྱིས་བསྔགས་བརྗོད་དང་འཚམས་འདྲི་ཞུ་རྒྱུ་ཡིན། ཞེས་འགོད་འདུག

རྒྱ་ཆེའི་བོད་རིགས་རྣམས་ལ་འབོད་སྐུལ་གནང་བའི་ནང་དུ། གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་རྣམས་ཀྱི་ལྷག་བསམ་དང་། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་རྣམས་ལ་གདུང་སེམས་མཉམ་སྐྱེད་ཀྱིས་མངོན་པར་བསྟོད་རྒྱུ་དང་། བཙན་བྱོལ་བོད་མི་ཡོངས་ནས་ཀྱང་རང་མི་རིགས་ཀྱི་ཁྱད་ཆོས་སྲུང་སྐྱོབ་དང་། བོད་མིའི་འཐབ་རྩོད་ཐད་དངོས་ཤུགས་བརྒྱུད་གསུམ་ནས་འགན་ཁུར་བཞེས་དང་བཞེས་བཞིན་པར་བསྔགས་བརྗོད་དང་སྦྲགས་རང་ཅག་བོད་མི་རྣམས་ཀྱིས་བོད་དོན་བདེན་མཐའ་མྱུར་དུ་གསལ་ཐབས་དང། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་བསྐལ་བརྒྱར་བརྟན་ཅིང་ཐུགས་བཞེད་ལྷུན་གྱིས་འགྲུབ་ཐབས་སུ་རྣམ་དཀར་བསོད་ནམས་གསོག་བསྒྲུབ་དང་། བོད་མིའི་མཐུན་ལམ་དང་ཆིག་སྒྲིལ་རྒྱུན་གནས་ཡོང་ཐབས་སུ་བོད་མི་ཚང་མས་ཡིད་གཟབ་ཀྱིས་དུས་རྟག་ཏུ་འབད་བརྩོན་ལྷོད་མེད་བྱ་དགོས་རྒྱུ་ལས། དེ་མིན་སྤྱི་ཚོགས་དྲ་ལམ་ཁག་ཏུ་དགྲ་དགའ་གཉེན་སྡུག་གིས་བོད་མིའི་མཐུན་སྒྲིལ་ལ་གཏོར་སྐྱོན་འགྲོ་གཞིའི་ཐལ་སྐྱོན་རིགས་རྩ་བ་ནས་མ་ཤོར་བ་དགོས་པའི་གཞེན་སྐུལ་ནན་པོ་ཞུ་རྒྱུ་ཡིན་ལ། དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཚེ་མེད་ཞི་བའི་ལམ་སྟོན་མཛད་པ་ཁག་སྙིང་དབུས་སུ་བཅངས་ཏེ་འཛམ་གླིང་སྤྱི་དང་། བྱེ་བྲག་བོད་སྤྱིའི་འཕྲལ་ཕུགས་བདེ་དོན་ལ་སྨན་པའི་འགན་ཁུར་ཞུ་དགོས་རྣམས་རང་གཅེས་འཛིན་གྱི་བསམ་མནོ་ཁོ་ན་མིན་པར་སྤྱི་པའི་ལས་དོན་ལ་དོ་ཁུར་ཧུར་བསྐྱེད་གནང་དགོས་རྒྱུ་ནི་༸རྒྱལ་བའི་བཀའ་དྲིན་རྗེས་དྲན་དང་། དུས་དྲན་ཉིན་མོ་སྲུང་བརྩི་ཞུ་བའི་དགོས་དོན་སྙིང་པོ་དེ་ཡིན་པས། ཚང་མའི་ཐུགས་ལ་ཉར་ཏེ་ཉིན་རེའི་འཚོ་བའི་ནང་ལག་བསྟར་གནང་དགོས་པའི་བསྐུལ་མ་ནན་ཏན་ཞུ་རྒྱུ་ཡིན། ཞེས་འཁོད་འདུག

བོད་མིའི་སྒྲིག་འཛུགས་ཀྱི་སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ནས་༧གོང་ས་རྒྱལ་བ་རིན་པོ་ཆེ་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་མི་ལོ་ ༢༨ འཁོར་བར་གཞིས་བྱེས་བོད་མི་ཡོངས་ཀྱི་ཚབ་བྱས་ཏེ་འཚམས་འདྲི་ཞུས་པ་དང་སྦྲགས་བཀའ་ཤག་གི་བསྒྲགས་གཏམ་སྒྲོག་སྦྱངས་གནང་བའི་ནང་དུ། དེ་རིང་གི་ཉིན་མོ་འདི་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོར་ཡང་སྲུང་བརྩི་ཞུ་ཡི་ཡོད། འོན་ཀྱང་བོད་ཀྱིས་གཙོས་འཛམ་གླིང་ཡུལ་གྲུ་མང་པོའི་ནང་དབང་འཛིན་པ་ཚོས་འགྲོ་བ་མིའི་ཐོབ་ཐང་བརྡལ་བཤིག་ཚབས་ཆེ་གཏོང་བཞིན་ཡོད་པ་དེ་དག་ལས་སྐྱོབ་ཐབས་གནང་དགོས་པ་མཉམ་འབྲེལ་རྒྱལ་ཚོགས་དང་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཚོགས། དེ་བཞིན་རྒྱལ་སྤྱིའི་ནང་དྲང་བདེན་དང་རང་དབང་ལ་དགའ་བའི་གཞུང་མང་ཡོངས་ལ་འབོད་སྐུལ་ཞུ་རྒྱུ་ཡིན། ཞེས་དང་། སྤྱི་ནོར་༧གོང་ས་མགོན་ཆེན་པོ་མཆོག་ནས་རྡུལ་ཕྲན་མཚོན་ཆ་མེད་པའི་ཞི་བདེ་ལྡན་པའི་འཛམ་གླིང་ཞིག་བསྐྲུན་ཕྱིར་འབད་བརྩོན་དང་བཀའ་སློབ་ལམ་སྟོན་རྒྱུན་མར་གནང་དང་གནང་བཞིན་ཡོད། འདི་ལོ་རྡུལ་མཚོན་བེད་སྤྱོད་བྱས་རྐྱེན་གོ་ལའི་སྣོད་བཅུད་གཉིས་ཀར་གནོད་སྐྱོན་ཚབས་ཆེ་ཕོགས་ཡོད་པའི་དཔེ་མཚོན་དང་ལྷག་དོན་ཁྲིམས་ཐོག་ནས་མཚོན་ཆ་དེ་རིགས་བཟོ་འདོན་དང་བེད་སྤྱོད་རྩ་འགོག་ཡོང་ཆེད་ཀྱིས་འབད་བརྩོན་ལ་རྒྱལ་སྤྱིའི་ལས་འགུལ་ཁང་ (International Campaign to Abolish Nuclear Weapons – ICAN) ལ་ཞི་བདེའི་གཟེངས་རྟགས་འབུལ་ཐོབ་བྱུང་བར་གོ་སྐབས་འདི་བརྒྱུད་འཚམས་འདྲི་ཞུ་རྒྱུ་ཡིན། ཞེས་འཁོད་འདུག

ཡང་བསྒྲགས་གཏམ་ནང་རྒྱལ་སྤྱིའི་སྟེང་ནས་བོད་མིའི་བདེན་དོན་ལ་རྒྱབ་སྐྱོར་གང་ཆེ་འཐོབ་བཞིན་པའི་སྐོར་ལ། བོད་དང་བོད་མིའི་ཐོག་འབྱུང་བཞིན་པའི་གནས་ཚུལ་དེ་དག་ལ་གཞིགས་ན་ཡིད་ཞུམ་བྱེད་དགོས་པའི་གནས་སྟངས་ཤིག་ཡིན་ན་ཡང་། ཕྱོགས་གཞན་ཞིག་ནས་རྒྱལ་སྤྱི་ཁྱོན་ཡོངས་ནང་དྲང་བདེན་དང་རང་དབང་ལ་དགའ་བའི་གཞུང་དང་མི་མང་མང་པོས་བོད་དང་བོད་མིའི་བདེན་དོན་ལ་རྒྱབ་སྐྱོར་གང་ཆེ་འཐོབ་བཞིན་ཡོད། དེ་ཡང་ཉེ་ཆར་རང་ཨ་རིའི་གྲོས་ཚོགས་གོང་འོག་གི་ཆབ་སྲིད་ཚོགས་པ་ཐུན་མོང་གིས་༸གོང་ས་མཆོག་དང་བོད་དོན་རྒྱབ་སྐྱོར་གྱི་གྲོས་འཆར་བཏོན་ཡོད་པ་དང་། ཐའེ་ཝན་གྲོས་ཚོགས་ནང་ཚད་མཐོའི་མང་མོས་གྲོས་ཆོད་བཞག་སྟེ་སྔ་ཕྱིར་བོད་མིའི་སྤྱི་ཚོགས་ནང་འཁྲུག་རྐྱེན་དང་བརྒལ་ཟླ་བཟོ་མཁན་གྱི་བོད་སོག་ལས་ཁུངས་ཟེར་བ་དེ་སྒོ་བརྒྱབ་འདུག་པར་དམིགས་བསལ་དགའ་བསུ་ཞུ་རྒྱུ་ཡིན། དེ་བཞིན་ཡོ་རོབ་སྤྱི་མཐུན་ཚོགས་པ་དང་། ཁེ་ན་ཌ། ཨོ་སི་ཀྲོ་ལི་ཡ། ནོར་ཝེ། སུཝེ་ཌན། ཌན་མཀ་བཅས་ཐེ་བའི་རྒྱལ་སྤྱིའི་གྲོས་ཚོགས་འཐུས་མི་མང་པོས་ཀྱང་བོད་དོན་གླེང་སློང་དང་། བོད་དང་བོད་མིར་རྒྱབ་སྐྱོར་ཤུགས་ཆེ་ཡོད་པའི་རྣམ་པ་དངོས་ཤུགས་བརྒྱུད་གསུམ་ནས་བསྟན་ཡོད་པ་བཅས་ནི་དགའ་སྤོབས་བྱེད་འོས་པ་ཞིག་ཡིན། ཞེས་གསུངས་འདུག

རྒྱ་གཞུང་གིས་༧གོང་ས་མཆོག་གི་སྐུ་ཚབ་དང་གྲོས་མོལ་བསྐྱར་དུ་དབུ་འཛུགས་དགོས་པའི་འབོད་སྐུལ་ཞུ་དོན། རྒྱ་དམར་གཞུང་གིས་བོད་བཙན་བཟུང་བྱས་པ་ནས་ད་བར་བོད་མིའི་ཐོག་དྲག་གནོན་དང་གཡོན་ཐལ་གྱི་སྲིད་བྱུས་རིམ་པ་ལག་བསྟར་དང་། ཕྱོགས་གཞན་ནས་དཔལ་འབྱོར་ལྷུག་གཏོང་གི་སྲིད་བྱུས་ཤིག་ཀྱང་འཛིན་ཁུལ་བྱེད་ཀྱི་ཡོད་ནའང་བོད་མི་ཚོའི་བློ་སེམས་ནམ་ཡང་འགུག་ཐབས་བྲལ་བ་ཞིག་ཡིན། དེས་ན་རྒྱ་གཞུང་གིས་དབུ་མའི་ལམ་གྱི་སྲིད་བྱུས་གཞིར་བཞག་༧གོང་ས་མཆོག་གི་སྐུ་ཚབ་དང་ལྷན་དུ་གྲོས་མོལ་བསྐྱར་མཐུད་དགོས་པའི་འབོད་སྐུལ་ཞུ་རྒྱུ་དང་ཆབས་ཅིག ང་ཚོས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ལས་རང་བཙན་རྩོད་སྒྲུབ་བྱེད་ཀྱི་མེད་པ་ནན་བརྗོད་བྱེད་རྒྱུ་ཡིན། ཞེས་བསྒྲགས་གཏམ་ནང་འཁོད་འདུག

སྐུ་མགྲོན་གཙོ་བོ་རམ་ས་ཝ་རུབ་ལགས་ཀྱིས། ༧གོང་ས་མཆོག་དབུས་པའི་བོད་མི་རྣམས་ཀྱིས་སོ་སོའི་མི་རིགས་ཀྱི་རྩ་དོན་ཆེད་ལས་དོན་ཧུར་ཐག་སྒྲུབ་ཀྱི་ཡོད་སྟབས། ད་ལྟ་འཛམ་གླིང་མི་མང་གིས་བོད་དོན་ལ་དོ་སྣང་དང་རྒྱབ་སྐྱོར་བྱེད་ཀྱིན་ཡོད། དམིགས་བསལ་ང་ཚོ་རྒྱ་གར་མི་མང་གིས་བོད་མི་རྣམས་ཀྱི་མངོན་འདོད་དང་བདེན་མཐའ་མྱུར་དུ་སེལ་བའི་སྨོན་འདུན་དང་ཡིད་ཆེས་ཡོད། ཧིན་བོད་མཛའ་འབྲེལ་ཚོགས་པས་ཧི་མ་ཅལ་མངའ་སྡེའི་གྲོས་ཚོགས་དང་རྒྱ་གར་གྲོས་ཚོགས་ནང་བོད་དོན་གླེང་སློང་བྱེད་ཀྱི་ཡོད་ལ། འབྱུང་འགྱུར་ང་ཚོས་རྒྱ་གར་སྲིད་འཛིན་མཆོག་ནས་(Bharat Ratna)གཟེངས་རྟགས་དེ་༧གོང་ས་མཆོག་ལ་འབུལ་བར་འབོད་སྐུལ་ཞུ་རྒྱུ་དང་། སྲིད་བློན་མོ་ཌི་མཆོག་ནས་༧གོས་ས་མཆོག་རྒྱ་གར་གྲོས་ཚོགས་ནང་གདན་འདྲེན་ཞུ་རྒྱུར་འབོད་སྐུལ་ཞུ་རྒྱུ་བཅས་རེ་འདོད་གཉིས་ཡོད། དེ་སྔོན་༧གོང་ས་མཆོག་དྷ་རམ་ས་ལར་བཞུགས་རྒྱུར་གཏན་འཁེལ་བྱུང་བ་ནས་བཟུང་། དྷ་རམ་ས་ལའི་མིང་དེ་རྒྱལ་སྤྱིའི་སྒང་ཁྱབ་བརྡལ་དུ་ཕྱིན་ཏེ། ད་ལྟ་དྷ་རམ་ས་ལ་འཛམ་གླིང་ནང་གི་ས་ཆ་གྲགས་ཅན་ཞིག་ཆགས་ཡོད་པ་མ་ཟད། ༧གོང་ས་མཆོག་གི་བཀའ་དྲིན་བྱིན་རླབས་ཉག་གཅིག་ལ་བརྟེན་ནས་རྒྱ་གར་ཡང་འཛམ་གླིང་ས་ཕྱོགས་མང་པོའི་ཐོག་སྟོབས་ཤུགས་ཆེ་བའི་རྒྱལ་ཁབ་ཅིག་ཆགས་ཡོད། དེར་བརྟེན་ང་ཚོས་ཁོང་ལ་བཀའ་དྲིན་ཆེ་ཞུ་རྒྱུ་དང་། ༧གོང་ས་མཆོག་འདིར་བཞུགས་པ་ཙམ་གྱིས་ཧི་མ་ཅལ་མི་མང་ལ་ཁོང་གི་བྱིན་རླབས་ཐོབ་ཀྱི་ཡོད། མཐའ་དོན་དེ་རིང་མཛད་སྒོ་འདི་འདྲ་ཞིག་གི་ཐོག་ང་སྐད་བཏང་སྟེ་གཏམ་བཤད་ཀྱི་གོ་སྐབས་ཕུལ་བར་ཐུགས་རྗེ་ཆེ་ཞུ་རྒྱུ་དང་། ངའི་རེ་བར་བོད་མི་ཚོས་སོ་སོའི་སྐད་ཡིག་དང་རིག་གཞུང་སྲུང་སྐྱོབ་མུ་མཐུད་གནང་བའི་ཐོག་བོད་མིའི་བདེན་མཐའ་མགྱོགས་མྱུར་སེལ་བའི་སྨོན་འདུན་ཡོད། ཅེས་གསུངས་སོང་།

གཞན་ཡང་། དབུས་བོད་ཀྱི་གཞོན་ནུ་ལྷན་ཚོགས་ཀྱི་རྒྱ་གར་གྱི་གྲོང་ཁྱེར་༡༥༠ ནང་བོད་དོན་གསལ་བཤད་ཀྱི་ལས་འགུལ་སྤེལ་རྒྱུ་ཡིན་པ་ལྟར། དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། རྒྱ་གར་བྱང་ཕྱོགས་ཁུལ་གྱི་ལས་འགུལ་དེ་རིང་སྔ་དྲོའི་ཆུ་ཚོད་ ༩ པའི་ཐོག་བཞུགས་སྒར་དྷ་རམ་ས་ལ་ནས་མགོ་འཛུགས་གནང་ཡོད་པ་དང་། བོད་ཀྱི་བུད་མེད་ལྷན་ཚོགས་ནས་༧གོང་ས་རྒྱལ་བ་རིན་པོ་ཆེ་མཆོག་ནས་ནོར་སྦེལ་ཞི་བདེའི་གཟེངས་རྟགས་བཞེས་ནས་ལོ་ངོ་ ༢༨ འཁོར་བར་འཚམས་འདྲི་དང་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོར་བསྒྲགས་གཏམ་སྤེལ་འདུག ཡང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་བསྟུན། ཐེག་ཆེན་གཙུག་ལག་ཁང་གི་ཉེ་འཁྲིས་སུ་བོད་རང་བཙན་སློབ་ཕྲུག་ཚོགས་པས་རྒྱ་གཞུང་གིས་བོད་ནང་བཀག་སྡོམ་བྱས་པའི་པར་རིས་ཕྱིར་བསྒྲགས་དང་། དེ་བཞིན་ཉིན་གུང་ཆུ་ཚོད་༢ པའི་སྟེང་རླངས་འཁོར་ས་ཚིགས་སུ་རྒྱལ་སྤྱིའི་ཧི་མ་ལ་ཡའི་དུས་སྟོན་མགོ་འཛུགས་བྱས་སོང་།

གསར་འགོད་པ། ཉི་མ་ཚེ་རིང་། སྐལ་བཟང་སྤྱིན་པ།