ང་ཚོས་ཁྲིམས་འགལ་རིགས་བྱས་ནས་བཙན་བྱོལ་བ་ཆགས་པ་མ་རེད།

༧གོང་ས་རྒྱལ་བ་རིན་པོ་ཆེ་མཆོག་ནས་བོད་མཐོ་སྒང་གི་ཁོར་ཡུག་དང་ས་ཆུ་གཙང་མ་ཞིག་ཡོང་བ་བྱ་རྒྱུ་དེ་ཁོང་གི་ལས་འགན་ཞིག་ཏུ་རྩི་བཞིན་ཡོད་ལ། བོད་མིའི་གཞིས་ཆགས་ཁག་གི་ཁོར་ཡུག་ལ་གཞོན་སྐྱེས་ཚོས་དོ་སྣང་མང་ཙམ་གནང་དགོས་སྐོར་བཀའ་སློབ་གནང་འདུག

ཟླ་འདི་ཕྱི་ཚེས་ ༡༢ ཉིན་ནས་བཟུང་༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་ལྷོ་ཕྱོགས་ཀྱི་གདན་ས་ཆེན་མོ་འབྲས་སྤུངས་སུ་མཛད་འཕྲིན་སྐྱོང་བཞིན་ཡོད་པ་ལྟར། དེ་རིང་ཕྱི་ཚེས་ ༡༤ ཉིན་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་སྒོམ་སྒྲུབ་དང་ཚན་རིག་ལྟེ་གནས་ཁང་གསར་པ་དབུ་འབྱེད་རབ་གནས་གནང་ཡོད་པ་དང་། ཁ་སང་འབྲས་སྤུངས་བླ་སྤྱིའི་ཚོགས་ཁང་ནང་རབ་བྱུང་ཞལ་གྲངས་ ༦༣ ལ་བསྙེན་རྫོགས་ཀྱི་སྡོམ་པ་འབོག་ཆོག་མཛད། ཕྱི་ཚེས་ ༡༢ ཉིན་འབྲས་སྤུངས་བློ་གསལ་གླིང་གྲྭ་ཚང་གི་ཆོས་རྭའི་ནང་སློབ་ཕྲུག་ཚོ་གཙོ་བོར་གྱུར་བའི་སེར་སྐྱ་མི་མང་ ༨༥༠༠ བརྒལ་བར་བཀའ་སློབ་བཀའ་དྲིན་བསྐྱངས་འདུག

དེ་ཡང་བཙན་བྱོལ་བོད་མི་རྣམས་ལྟོ་གོས་འཚོལ་བར་བཙན་བྱོལ་དུ་བསླེབས་མེད་སྐོར་༧གོང་ས་རྒྱལ་བ་རིན་པོ་ཆེ་མཆོག་གིས། ཕྱི་ལོ་ ༡༩༦༠ ལོ་ནས་གཞིས་ཆགས་འདི་བཙུགས་པ་རེད། མི་རབས་བརྗེ་བཞིན་ཡོད། ངོས་རང་འདིར་ཐོག་མ་ཡོང་བའི་སྐབས་ཀྱི་མི་དེ་དག་ཧ་ལམ་རྫོགས་ཟིན་པ་རེད། དེ་བཞིན་གདན་ས་ཁག་གི་དགེ་འདུན་པ་མཁས་པའི་དབང་པོ་བསྟན་པར་བྱ་བ་རྒྱ་ཆེར་མཛད་མཁན་མང་པོ་ཞིག་རྫོགས་ཟིན་པ་རེད། ང་ཚོ་མི་རབས་གསར་པ་ཆགས་ཀྱི་ཡོད། ཁྱེད་རང་ཚོ་ཕྲུ་གུ་དེ་དག་ཆ་བཞག་ན། འདིར་ཐོག་མར་ང་ཚོ་གཞིས་ཆགས་ཚུགས་པའི་སྐབས་ཁྱེད་རང་ཚོ་སྐྱེ་རྒྱུ་རེད། ང་ཚོ་བཙན་བྱོལ་བ་ཆགས་རྒྱུ་དེ་སོ་སོའི་ལུང་པའི་ནང་མུ་གེ་བྱུང་བའི་བཟོ་འདྲ་བོ་དང་། ཁྲིམས་འགལ་རིགས་བྱས་ནས་བཙན་བྱོལ་བ་ཆགས་པ་དེ་འདྲ་མ་རེད། ང་ཚོས་སོ་སོའི་མི་རིགས་ཀྱི་ཐོབ་ཐང་དང་། སོ་སོའི་མི་རིགས་ཀྱི་ཆོས་དང་རིག་གཞུང་དེ་དག་ཤེས་བཞིན་དུ་གཏོར་བཤིག་བཏང་བའི་གནས་ཚུལ་ཆགས་ཡོང་སྐབས་ང་ཚོ་བཙན་བྱོལ་དུ་སླེབས་པ་རེད། བཙན་བྱོལ་དུ་སླེབས་དགོས་པའི་རྒྱུ་མཚན་ནི། སོ་སོའི་འཕྲལ་སེལ་ལྟོ་གོས་རང་མགོ་གང་ཐོན་དོན་དུ་མིན་པར་དམིགས་ཡུལ་ངེས་ཅན་ཞིག་ཡོད་པའི་ཐོག་ནས་བཙན་བྱོལ་དུ་བསླེབས་པ་ཡིན། ཞེས་གསུངས་འདུག

བོད་རྒྱ་ཆེ་མི་མང་ནམ་ཡང་ཐུགས་བློས་གཏོང་རྒྱུ་མིན་སྐོར་ཁོང་གིས། ངོས་ཀྱིས་བོད་རྒྱ་ཆེ་མི་མང་རྣམས་བློས་བཏང་བ་དེ་འདྲ་རྩ་བ་ནས་མ་རེད། ངོས་ཀྱིས་ལོ་རྒྱུས་དཔེ་མཚོན་ཞིག་ཤོད་རྒྱུ་ཡོད། ན་ནིང་ངོས་རང་གྷོ་ཧ་ཊི་ Guwahati ནས་གནམ་གྲུ་ཆུང་ཆུང་ཞིག་གི་ནང་ཕྱིན་པའི་སྐབས་གནམ་གཤིས་དེ་ཙམ་ཡག་པོ་མེད་སྟབས། གནམ་གྲུ་ཕར་ཚུར་ཧ་ཅང་འཁྲུག་ཆེན་པོ་ཐེབས་པ་རེད། འོ་ད་ཡིན་ན་འཆི་མི་ཡོང་ངམ་བསམ་པ་དྲན་བྱུང་། སྐབས་དེར་ངོས་རང་འཆི་ན་མི་གཅིག་རེད། འོན་ཀྱང་བོད་རྒྱ་ཆེའི་མི་མང་ས་ཡ་དྲུག་གིས་ངོས་ལ་རེ་ལྟོས་བྱས་ནས་བསྡད་ཡོད་སྟབས། དེ་དག་བློ་ཕམ་ཡོང་རྒྱུ་རེད་བསམ་པ་དྲན་བྱུང་། དེར་བརྟེན་ངོས་ཀྱིས་བོད་རྒྱ་ཆེ་མི་མང་གི་དོན་དག་དེ་ནམ་ཡང་བརྗེད་ཀྱི་མ་རེད། ངོས་ཀྱིས་ཆབ་སྲིད་ཀྱི་འགན་དབང་བཞག་ཚར་བ་རེད། ད་ཆ་ངོས་ཀྱིས་བོད་ཀྱི་ཁོར་ཡུག་སྲུང་སྐྱོབ་སྐོར་ལ་སྐད་ཆ་ཤོད་ཀྱི་ཡོད། བོད་མཐོ་སྒང་གི་ཁོར་ཡུག་དང་ས་ཆུ་གཙང་མ་ཞིག་ཡོང་བ་བྱ་རྒྱུ་དེ་ངོས་རང་གི་ལས་འགན་ཞིག་ལ་རྩི་བཞིན་ཡོད། བོད་མིའི་གཞིས་ཆགས་ཁག་གི་ཁོར་ཡུག་སྐོར་གཞོན་སྐྱེས་ཚོས་དོ་སྣང་མང་ཙམ་བྱ་དགོས། ཞེས་གསུངས་ཡོད་འདུག

བོད་ཀྱི་ཁོར་ཡུག་སྲུང་སྐྱོབ་བྱེད་དགོས་པ་གལ་ཆེན་ཡིན་སྐོར་ལ་ཁོང་གིས། ལོ་ཁ་ཤས་གོང་རྒྱ་རིགས་ཁོར་ཡུག་མཁས་པ་ཞིག་གིས་བོད་ཀྱི་ཁོར་ཡུག་སྐོར་རྩོམ་ཡིག་གཅིག་སྤེལ་འདུག བོད་ཀྱི་ས་མཐོའི་བྱེ་ཐང་དེ་འཛམ་གླིང་གི་ལྷོ་བྱང་གཉིས་ཀྱི་ཚ་དྲོད་ལ་འབྲེལ་བ་ཡོད་སྟབས། ཁོང་གིས་བོད་ཀྱི་ས་མཐོའི་བྱེ་ཐང་དེ་འཛམ་གླིང་གི་བྱང་སྣེ་གསུམ་པ་རེད། ཅེས་བྲིས་འདུག དེར་བརྟེན་བོད་ཀྱི་ཁོར་ཡུག་གཙང་མ་ཉར་རྒྱུ་དེ་བོད་མི་གཅིག་པོའི་འགན་མ་རེད། བོད་ཀྱི་ཁོར་ཡུག་དེ་འཛམ་གླིང་སྤྱི་ལ་འབྲེལ་བ་ཡོད་པ་ཞིག་རེད་འདུག བོད་ཀྱི་ཡར་ཀླུངས་གཙང་པོ་དང་། རྨ་ཆུ། འབྲི་ཆུ་སོགས་བོད་ཀྱི་ཁྱིམ་མཚེས་རྒྱལ་ཁབ་ཁག་ལ་འབྲེལ་བ་ཆགས་འདུག དེར་བརྟེན་བོད་ཀྱི་ཁོར་ཡུག་བདག་གཅེས་བྱ་རྒྱུར་ངོས་ཀྱིས་ཤུགས་རྒྱག་བཞིན་ཡོད། དེ་ནས་བོད་ཀྱི་ཆོས་དང་རིག་གཞུང་སྐད་ཡིག་བཅས་རེད། ཅེས་སོགས་གསུངས་འདུག

སྐུ་སྒེར་དྲ་བའི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༠ ཉིན་སེ་ར་ཐེག་ཆེན་གླིང་སེར་བྱེས་གྲྭ་ཚང་དུ་རྟ་མགྲིན་ཡང་གསང་གི་བཀའ་དབང་བཀའ་དྲིན་སྩལ་རྒྱུ་དང་། ཚེས་ ༢༡ ཉིན་སྦེལ་ཀོབ་སེར་སྨད་གྲྭ་ཚང་ནས་གསར་བཞེངས་གནང་བའི་ཆོས་གྲྭ་དབུ་འབྱེད་དང་། རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་གསུང་ཆོས་སྩལ་རྒྱུ་ཡིན་འདུག

གསར་འགོད་པ་ཉི་མ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།

བསྐྱར་བཅོས།: ༢༠༡༧/༡༢/༡༤

Leave a Reply