འགྲུལ་བ་སྣེ་ལེན་ཞབས་ཞུ་ཚོང་གཉེར་ཁང་ཞིག་གིས་བོད་དང་ཐའེ་ཝན་སོགས་ནས་ཡིན་པའི་མགྲོན་ཁང་མངགས་གཏོང་བ་ཚོར་ཐོ་འགོད་བྱེད་སྐབས་བོད་དང་ཐའེ་ཝན་ཞེས་རྒྱལ་ཁབ་ཅིག་ཏུ་ངོས་འཛིན་བྱས་པ་དེར་རྒྱ་གཞུང་གིས་སྐྱོན་འཛུགས་ཆེན་པོ་བྱས།བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིའི་འགྲུལ་བ་སྣེ་ལེན་ཞབས་ཞུའི་ཚོང་གཉེར་ཁང་མཱ་རོ་ཊི་(Marriott)ཡིས། རྒྱ་ནག་ནང་ཡོད་པའི་ཁོ་རང་ཚོའི་མགྲོན་ཁང་ ༡༠༠ ལྷག་གི་དྲ་རྒྱའི་སྟེང་བོད་དང་། ཐའེ་ཝན། ཧོང་ཀོང་། དེ་བཞིན། མ་ཁོ་བཅས་རྒྱལ་ཁབ་ལ་ངོས་འཛིན་བྱས་ཏེ། མགྲོན་ཁང་མངག་གཏོང་མཁན་ཚོར་དེ་བཞིན་ཐོ་འགོད་བྱས་པར་བརྟེན། རྒྱ་ནག་གཞུང་གིས་འགྲུལ་བ་སྣེ་ལེན་ཞབས་ཞུ་ཚོང་གཉེར་ཁང་དེས་རྒྱ་ནག་གཅིག་གི་སྲིད་ཇུས་ལ་རྡོག་རོལ་བཏང་བའི་སྐྱོན་བརྗོད་བྱས་པ་མ་ཟད། ཚོང་གཉེར་ཁང་དེའི་མགྲོན་ཁང་ཁག་ལ་ཞིབ་བཤེར་དང་དྲ་རྒྱའི་སྒོ་བརྒྱབས་ཏེ་བདུན་གཅིག་ཕྱིན་རྗེས། ཚོང་གཉེར་ཁང་དེའི་སྤྱི་ཁྱབ་འགན་འཛིན་གྱིས་རྒྱ་གཞུང་ལ་དགོངས་སེལ་ཞུས་ཡོད་འདུག

ཁ་སང་ཨ་རིའི་ཚོང་གཉེར་ཁང་དེའི་སྤྱི་ཁྱབ་འགན་འཛིན་སྐུ་ཞབས་ཨར་ནེ་སོ་རེ་ཟན་(Arne Sorenson)ལགས་ཀྱིས། བདུན་འདིའི་ནང་ང་ཚོའི་ཚོང་གཉེར་ཁང་གི་ལས་དོན་སྒྲུབ་ཕྱོགས་ལ་ནོར་འཁྲུལ་རེ་ཟུང་བྱུང་སྟེ། རྒྱ་ནག་གཞུང་གི་ཁ་གཏད་དུ་ལངས་པ་ལྟ་བུ་ཆགས་ཡོད་ཀྱང་། ང་ཚོས་རྒྱ་ནག་ནང་ཁུལ་གྱི་མཐུན་སྒྲིལ་ལ་རྒྱབ་སྐྱོར་དང་གུས་ཞབས་བྱེད་ཀྱིན་ཡོད་པ་མ་ཟད། རྒྱ་ནག་ནང་གི་མཐུན་སྒྲིལ་ལ་གནོད་སྐྱོན་གཏོང་བའི་ཁ་བྲལ་གྱི་མི་སྒེར་ཚོགས་སྡེ་གཅིག་ལའང་རྒྱབ་སྐྱོར་བྱེད་ཀྱིན་མེད་ཅེས་རྒྱ་ནག་གཞུང་ལ་དགོངས་སེལ་ཞུས་ཡོད་པ་དང་སྦྲགས། དགོངས་སེལ་ཞུ་ཡིག་ནང་ཐེངས་འདིའི་གནས་ཚུལ་དང་འབྲེལ་ཡོད་ཀྱི་ལས་མི་སུ་ཞིག་ཡིན་རུང་མགྲོན་ཁང་གི་སྒྲིག་ཁྲིམས་གཞིར་བཞག་ཐོག་ཉེས་ཆད་གཅོད་རྒྱུ་ཡིན་པ་མ་ཟད། མཐའ་ན་ལས་གནས་ནས་གནས་དབྱུང་གཏོང་སྲིད་སྐོར་སོགས་བརྗོད་ཡོད་པ་རེད།

ད་ལྟའི་ཆར་རྒྱ་ནག་གཞུང་གིས་ཨ་རིའི་ཚོང་གཉེར་ཁང་དེར་ཞིབ་བཤེར་བྱེད་བཞིན་ཡོད་པ་དང་། རྒྱ་ནག་གི་སྤྱི་ཚོགས་བརྒྱུད་ལམ་ཝི་པོ་སོགས་ཀྱི་སྟེང་མི་མང་པོ་ཞིག་གིས། ཨ་རིའི་ཚོང་གཉེར་ཁང་དེར་སྐྱོན་བརྗོད་བྱས་ཏེ་མགྲོན་ཁང་མངག་གཏོང་མཚམས་འཇོག་བྱ་དགོས་པའི་ཉེན་བརྡ་གཏོང་གི་ཡོད་པ་དང་། ཧྲང་ཧེ་དྲ་རྒྱ་དོ་དམ་ཁང་ནས་ཨ་རིའི་ཚོང་གཉེར་ཁང་དེའི་རྒྱ་ནག་ནང་ལོགས་ཀྱི་དྲ་ཐོག་ཚོང་ལས་གཙོས་པའི་ཚོང་ལམ་ཡོངས་ལ་ཞིབ་བཤེར་ནན་མོ་བྱས་ཏེ། མི་མང་ལ་ཐེངས་འདིའི་ནོར་འཁྲུལ་ཁ་གསལ་བཟོ་དགོས་པའི་འོས་འགན་ཡོད་སྐོར་བརྗོད་འདུག་ལ། ཚོང་གཉེར་ཁང་དེས་ཕྱི་ཕྱོགས་སུ་སྐྱོད་མཁན་རྒྱ་ནག་གི་མི་སེར་ཚོ་དམིགས་འབེན་གཙོ་བོར་བཟུང་སྟེ་ཞབས་ཞུའི་ཁེ་ལས་གཉེར་གྱི་ཡོད་འདུག

ཚོང་གཉེར་ཁང་གི་སྤྱི་ཁྱབ་སྐུ་ཞབས་སོ་རེན་སན་ཟན་ལགས་ཀྱིས་རྒྱ་ནག་ནི་ཁོའི་ཁྲོམ་ར་ཆེ་ཤོས་དེ་ཡིན་སྐོར་བརྗོད་ཡོད་པ་དང་། ན་ནིང་ཚོང་གཉེར་ཁང་དེས་རྒྱ་ནག་གི་དྲ་ཐོག་ཚོང་གཉེར་ཁང་ཆེ་ཤོས་ཨ་ལི་བྷ་བྷ་དང་ལྷན་དུ་མཉམ་འབྲེལ་འགྲིམ་འགྲུལ་ལྟེ་གནས་ཁང་ཞིག་གསར་དུ་བཙུགས་ཡོད་པ་དང་། ད་ལྟ་རྒྱ་ནག་ནང་མགྲོན་ཁང་ཁག་ ༡༠༠ ལྷག་ཡོད་པ་དང་། རྒྱལ་སྤྱིའི་སྟེང་རྒྱས་སྤྲོས་ལྡན་པའི་མགྲོན་ཁང་སྟོང་ཕྲག་ ༤ ལྷག་ཡོད་ཅིང་། དེ་སྔོན་ཚོང་གཉེར་ཁང་དེར་ཞབས་ཞུ་ཚད་ལྡན་གྱི་གཟེངས་རྟགས་ཐོབ་ཡོད་པ་སོགས་རྒྱལ་སྤྱིའི་སྟེང་སྐད་གྲགས་ཆེན་པོ་ཡོད་འདུག

གསར་འགོད་པ། སྐལ་བཟང་སྦྱིན་པ།