རྒྱལ་ཕྱིའི་གསར་འགོད་པར་འཇིགས་སྐུལ་བྱེད་མཚམས་ཞོག

རྒྱ་ནག་གཞུང་གིས་རྒྱལ་ཕྱིའི་གསར་འགོད་པ་ཚོར་ངེས་མེད་ཞིབ་བཤེར་དང་འཇིགས་སྐུལ་བཀག་སྡོམ་སོགས་རྒྱུན་མ་ཆད་པར་བྱེད་ཀྱི་ཡོད་པས་རྒྱལ་མཚམས་མེད་པའི་གསར་འགོད་མཐུན་ཚོགས་ནས་ཉེན་བརྡ་བཏང་འདུག

ཟླ་འདིའི་ཕྱི་ཚེས་ ༣ ཉིན་རྒྱལ་མཚམས་མེད་པའི་གསར་འགོད་མཐུན་ཚོགས་ནས་རྒྱ་ནག་གཞུང་ལ་ཉེན་བརྡ་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་གིས་ལོ་ལྟར་རྒྱལ་ཕྱིའི་གསར་འགོད་པ་ཚོ་གང་བྱུང་འཛིན་བཟུང་དང་འཇིགས་སྐུལ་གཏོང་བ། རྒྱུན་དུ་ལྟ་རྟོག་འོག་བཞག་སྟེ་གསར་འགོད་རང་དབང་ལ་གནོན་ཤུགས་དང་སུན་བཙེར་བཟོས་ཏེ། གསར་འགོད་པ་ཚོས་ལས་ཀ་སྒྲུབ་མི་ཐུབ་པའི་གནས་སུ་ལྷུང་ནས་དཀའ་ངལ་ཆེན་པོ་འཕྲད་བཞིན་ཡོད་སྟབས། རྒྱ་ནག་གཞུང་གིས་ངེས་པར་དུ་བྱ་སྤྱོད་དེ་དག་མཚམས་འཇོག་བྱེད་དགོས། ཞེས་བརྗོད་འདུག

རྒྱ་ནག་གཞུང་གིས་རྒྱལ་ཕྱིའི་གསར་འགོད་པ་ཚོར་གནོན་ཤུགས་དང་འཇིགས་སྐུལ་བྱེད་ཐབས་མང་པོ་ཞིག་ལག་བསྟར་བྱེད་ཀྱི་ཡོད་པའི་ནང་ནས་མང་ཆེ་ཤོས་ཤིག་ལ་ཕྱི་སྐྱོད་ལག་འཁྱེར་བེད་མེད་གཏོང་བ་དང་། ཕྱི་སྐྱོད་ལག་འཁྱེར་དུས་ཡུན་ཕར་འགྱང་མི་བྱེད་པ། དེ་བཞིན་རྒྱ་ནག་གཞུང་གིས་བཀོད་སྒྲིག་བྱས་པའི་ས་ཆ་ལས་གཞན་གང་ལ་ཡང་འགྲོ་མི་ཆོག་པ་མ་ཟད། ངེས་མེད་ཞིབ་བཤེར་དང་གཅར་རྡུང་བཙོན་འཇུག་གཏོང་བ་སོགས་བྱེད་ཀྱི་ཡོད་འདུག་ལ། རྒྱ་ནག་གཞུང་ནས་གསང་རྒྱའི་འོག་ཡོད་པའི་གསར་འགྱུར་རིགས་སྤེལ་ཐབས་བྱེད་མཁན་གསར་འགོད་པ་དང་། རྒྱ་ནག་གཞུང་དང་མགོ་འཁྲིད་ཚོར་སྐྱོན་བརྗོད་བྱེད་མཁན་རིགས་ལ་དཀའ་ངལ་ཆེ་བ་འཕྲད་ཀྱི་ཡོད་འདུག དམ་དྲག་བཙན་གནོན་ཆེན་པོ་ཐེབས་བཞིན་པའི་རྒྱལ་ཕྱིའི་གསར་ཁང་དག་ནི་བྷི་བྷི་སི་(BBC) དང་དཔལ་འབྱོར་དུས་བབ་(Financial Times)། གྷར་དྷན(Guardian)། ནེའུ་ཡོག་དུས་བབ(New York Times)། ཉི་ཧོང་གི་ཡོ་མེ་རེ་ཤམ་བྷན(Yomiuri Shimbun)དང་སིན་ཀེ་ཤམ་བྷན(Sankei Shimbun)། ཨལ་རྗ་ཛི་རཱ་( Al Jazeera)། ཨ་རིའི་རླུང་འཕྲིན་ཁང་(Voice of America)སོགས་ཡིན་འདུག

འདས་ལོར་ལྷོ་ཀོ་རི་ཡའི་སྲིད་འཛིན་རྒྱ་ནག་ནང་གཟིགས་སྐོར་དུ་ཕྱིན་སྐབས་ལྷོ་ཀོ་རི་ཡའི་གསར་འགོད་པ་ཞིག་ལ་རྒྱ་ནག་བདེ་འཇགས་ལྟ་སྲུང་བ་ཁག་ཅིག་གིས་རུབ་རྡུང་བྱས་ཏེ་རྨས་སྐྱོན་བཟོས་ཡོད་པ་དང་། དེ་བཞིན་རྒྱ་ནག་ཧུའུ་ནན་དུ་ཡོད་པའི་བྷི་བྷི་སི་ཡན་ལག་ལས་ཁུངས་སུ་མི་ཁག་ཅིག་ཡོང་ནས་ལས་བྱེད་ཚོར་རུབ་རྡུང་བཏང་བ་དང་། ཅ་དངོས་འཕྲོག་བཅོམ་བྱས། ཕྱི་ལོ་ ༢༠༡༥ ལོར་ཧྥ་རན་སའི་གསར་འགོད་པ་ཞིག་གིས་རྒྱ་ནག་གཞུང་གི་སྐོར་ལ་སྐྱོན་བརྗོད་ཀྱི་རྩོམ་ཞིག་སྤེལ་བར་བརྟེན། ཁོའི་ཕྱི་སྐྱོད་ལག་འཁྱེར་བེད་མེད་བཏང་ཡོད་པ་སོགས་རྒྱལ་ཕྱིའི་གསར་འགོད་པ་མང་ཆེ་བར་གཅར་རྡུང་དང་བཙན་གནོན་གྱི་དཀའ་ངལ་འཕྲད་བཞིན་ཡོད་འདུག

ཨ་རིའི་(Wall Street Journal)གསར་ཁང་གི་གསར་འགོད་པ་ཇོ་ཤི་ཆན(Josh Chin)གྱིས་རྒྱ་ནག་གཞུང་ནས་རྒྱལ་སྤྱིའི་སྒང་ལ་གསར་འགོད་རང་དབང་ཡིན་པ་དང་བཀག་འགོག་གང་ཡང་མེད་ཚུལ་བརྗོད་ཀྱི་ཡོད་ན་ཡང་། ས་གནས་སུ་སླེབས་སྐབས་མགོ་འཁྲིད་ཚོས་ཆོག་མཆན་མི་སྤྲོད་པ་དང་ཉེན་རྟོག་པས་དམ་དྲག་སོགས་བྱེད་ཀྱི་འདུག་ཅེས་དང་། ཡང་བྷི་བྷི་སིའི་གསར་འགོད་པ་ཁཱ་ཐེ་ལོང་(Kathy Long)ནས་རྒྱ་ནག་གཞུང་གིས་ང་ཚོའི་སུ་ལ་འབྲེལ་བ་བྱས་ན་རྒྱ་ནག་གཞུང་གིས་མི་དེ་དག་རྩད་གཅོད་ཀྱིས་གནོན་ཤུགས་སྤྲོད་ཀྱི་ཡོད་སྟབས། རྒྱ་ནག་ནང་དུ་ཕྱི་རྒྱལ་གསར་འགོད་པར་འབྲེལ་བ་བྱེད་ཕོད་མཁན་ཧ་ཅང་དཀོན་པོ་འདུག ཅེས་བརྗོད་ཡོད་འདུག

ཉེན་བརྡ་འདི་ནི་ཐེངས་དང་པོ་ཙམ་མ་ཡིན་པར་རྒྱལ་མཚམས་མེད་པའི་གསར་འགོད་མཐུན་ཚོགས་ནས་དེ་སྔོན་ཐེངས་མང་ལ་རྒྱ་ནག་གཞུང་གིས་ཕྱི་རྒྱལ་གསར་འགོད་པ་ཚོར་དམ་དྲག་ཤུགས་ཆེར་བྱེད་བཞིན་པའི་སྐོར་ལ་ཉེན་བརྡ་ཐེངས་མང་བཏང་ཡོད་པ་དང་། ཕྱི་ལོ་ ༢༠༡༧ ལོའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་སྙན་ཐོའི་ནང་དུ། འཛམ་གླིང་རྒྱལ་ཁབ་ ༡༨༠ ནང་ནས་གསར་འགོད་རང་དབང་ཡག་ཤོས་ནོར་ཝེ་དང་སི་ཝེ་ཌན། ཧྥིན་ལན། ཌན་མག ནེའུ་ཌར་ལན་བཅས་ཡིན་པ་དང་། གསར་འགོད་རང་དབང་གི་གནས་སྟངས་སྡུག་ཤོས་ནི་བྱང་ཀོ་རི་ཡ་དང་། ཨེ་རི་ཊི་རཱ་(Eritrea)། ཊོར་ཀེ་མི་ནི་སི་ཐན་(Turkmenistan) སི་རི་ཡ་(Syria) རྒྱ་ནག་བཅས་ཡིན་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༢/༠༦

Leave a Reply