རྒྱ་ནག་དམར་ཤོག་ཚོགས་པས་ཨ་རིའི་རླུང་འཕྲིན་ཁང་དང་བྷི་བྷི་སི་ལྟ་བུའི་འཛམ་གླིང་ལ་ཁ་ཕྱོགས་པའི་རྒྱ་ནག་རླུང་འཕྲིན་ཁང་ཞེས་པའི་གསར་ཁང་ཆེན་མོ་ཞིག་འཛུགས་རྒྱུ་ཡིན་འདུག

ཉེ་ཆར་རྒྱ་ནག་དམར་ཤོག་ཚོགས་པའི་རྒྱལ་ཡོངས་དམངས་ཆེན་དང་སྲིད་གྲོས་གཉིས་ཚོགས་རྗེས། རྒྱ་ནག་དམར་ཤོག་ཚོགས་པས་རྒྱ་ནག་གཞུང་འབྲེལ་དབུས་བརྙན་འཕྲིན་(CCTV)གསར་ཁང་དང་། རྒྱ་ནག་མི་མང་ཀུན་ཁྱབ་རླུང་འཕྲིན་ལས་ཁང་ (China National Radio)། རྒྱ་ནག་རྒྱལ་སྤྱིའི་རླུང་འཕྲིན་ཁང་ (China Radio Internationa) ཟེར་བ་གསུམ་མཉམ་དུ་བསྡུས་ཏེ། འཛམ་གླིང་ལ་ཁ་ཕྱོགས་པའི་རྒྱ་ནག་རླུང་འཕྲིན་ཁང་(Voice of China )ཞེས་པ་ཞིག་འཛུགས་རྒྱུ་ཡིན་འདུག

རྒྱ་ནག་རླུང་འཕྲིན་ཁང་གསར་འཛུགས་ཆེད་མཉམ་དུ་བསྡུ་འཆར་ཡོད་པའི་དབུས་བརྙན་འཕྲིན་ཁང་ལ་ཁྱོན་ལས་མི་ ༡༠༠༠༠ དང་། དེའི་ནང་དུ་རྒྱ་ནག་གོ་ལའི་བརྙན་འཕྲིན་ཁང་ (China Global Television Network) ཡང་ཚུད་ཡོད་པ་དང་། དེ་བཞིན་རྒྱ་ནག་མི་མང་ཀུན་ཁྱབ་རླུང་འཕྲིན་ལས་ཁུངས་ལ་ཁྱོན་ལས་མི་༢༡༠༠ ལྷག་དང་། རྒྱ་ནག་རྒྱལ་སྤྱིའི་རླུང་འཕྲིན་ཁང་ལ་ཁྱོན་ལས་མི་༢༠༠༠ བཅས་རྒྱ་ནག་རླུང་འཕྲིན་ཁང་དེར་ཁྱོན་བསྡོམས་ལས་མི་ ༡༤༠༠༠ ལྷག་ཡོད་འདུག

རྒྱ་ནག་རླུང་འཕྲིན་ཁང་དེ་ཨ་རིའི་རླུང་འཕྲིན་ཁང་(Voice of America)དང་དབྱིན་ཡུལ་གྱི་བྷི་བྷི་སི་གསར་ཁང་(BBC) ལྟར། རྒྱལ་སྤྱིའི་ཐོག་ཡན་ལག་ཁང་མང་པོ་ཆེད་འཛུགས་ཀྱིས་ས་གནས་གསར་འགོད་པ་སྟོང་ཕྲག་མང་པོ་བསྡུ་འཆར་ཡོད་འདུག་ལ། གསར་ཁང་གི་ལས་རིམ་ཁག་ཆུ་ཚོད་ ༢༤ རིང་མཚམས་མི་ཆད་པར་སྐད་རིགས་མི་འདྲ་བ་མང་པོའི་ནང་རླུང་འཕྲིན་དང་། བརྙན་འཕྲིན་དྲ་རྒྱའི་བརྒྱུད་ལམ་ནས་ཞི་ཅིན་ཕིན་གྱིས་སྣེ་འཁྲིད་པའི་རྒྱ་ནག་དམར་ཤོག་ཚོགས་པ་དྲིལ་བསྒྲགས་བྱེད་སའི་འཛམ་གླིང་གི་སྡིངས་ཆ་ཆེ་ཤོས་ཤིག་ཡིན་སྐོར་བསྒྲགས་ཡོད་པ་རེད།

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ། རྒྱ་ནག་གིས་འཛམ་གླིང་ལ་ཁ་ཕྱོགས་པའི་གསར་ཁང་ཆེན་མོ་ཞིག་འཛུགས་དགོས་དོན་ནི་རྒྱ་ནག་གི་སྣང་བརྙན་རྒྱལ་སྤྱིའི་ཐོག་སྲུང་སྐྱོབ་བྱེད་ཐབས་དང་། རྒྱ་ནག་གི་མགོ་འཁྲིད་ཞི་ཅིན་ཕིན་གྱིས་གསར་གཏོད་བྱས་པའི་རྒྱུད་གཅིག་ལམ་གཅིག་རྒྱལ་སྤྱིའི་རྒྱལ་ཁབ་ཁག་ནང་ཁྱབ་སྤེལ་གཏོང་ཐབས་ཤིག་ཆགས་ཀྱི་ཡོད་སྐོར་བརྗོད་ཀྱི་འདུག

རྒྱ་ནག་གཞུང་གིས་འདས་པའི་ལོ་ངོ་བཅུ་ཕྲག་ཁ་ཤས་རིང་གཞུང་འབྲེལ་གསར་ཁང་ཁག་ལ་ཨ་སྒོར་དུང་ཕྱུར་མང་པོ་བཏང་སྟེ། རྒྱལ་སྤྱིའི་རྒྱལ་ཁབ་མང་པོའི་ནང་ཐབས་ཇུས་ལྡན་པའི་ངང་ནས་སིམ་འཛུལ་བྱེད་ཐབས་དང་། གསར་ཁང་དེ་དག་ལ་བརྟེན་ནས་རྒྱལ་སྤྱིའི་རྒྱལ་ཁབ་ཁག་ཏུ་རིག་གཞུང་ལྟེ་གནས་འཛུགས་ཐབས་དང་། གཞུང་འབྲེལ་སློབ་ཆེན་ཁག་ཏུ་རྒྱ་ནག་གི་སྲིད་ཇུས་བསྒྲགས་ཐབས་ལ་ཕྱོགས་ཡོངས་ནས་འབད་བརྩོན་བྱས་ཏེ་གྲུབ་འབྲས་མི་དམན་པ་བླངས་ཡོད་པ་རེད།

ཕྱི་ལོ་༢༠༡༢ ལོར་ཞི་ཅིན་ཕིན་གྱིས་སྲིད་དབང་བཟུང་བ་ནས་རྒྱ་ནག་གི་གསར་འགྱུར་བརྒྱུད་ལམ་ཁག་ལ་དམ་དྲགས་ཤུགས་ཆེ་རུ་སོང་ཡོད་པ་དང་། ཕྱི་ལོ་༢༠༡༦ ལོར་ཞི་ཅིན་ཕིན་རྒྱ་ནག་གཞུང་འབྲེལ་གསར་ཁང་ཁག་ལ་ལྟ་སྐོར་དུ་ཕྱིན་སྐབས། ཁོས་གསར་ཁང་ཁག་གིས་ངེས་པར་དུ་རྒྱ་ནག་དམར་ཤོག་ཚོགས་པའི་ཁ་ལ་ཉན་དགོས་པ་དང་། རྒྱ་ནག་གཞུང་གི་བཀའ་འཁྲོལ་མེད་པར་གསར་ཁང་སྒེར་ངོས་ནས་གསར་འགྱུར་རིགས་དང་རིག་རྩལ་ལེ་ཚན་གང་ཡང་ཁྱབ་བསྒྲགས་བྱེད་མི་ཆོག་པའི་བཀའ་རྒྱ་བཏང་ཡོད་པ་རེད།

རྒྱ་ནག་གིས་རྒྱུད་གཅིག་ལམ་གཅིག་ཞེས་པའི་ཚོང་འབྲེལ་སྲིད་ཇུས་ཀྱིས་རྒྱལ་སྤྱིའི་རྒྱལ་ཁབ་མང་པོ་ཞིག་རྒྱ་ནག་གི་དཔལ་འབྱོར་ཐབས་ཇུས་ཀྱི་དབང་དུ་བསྡུ་ཐབས་བྱེད་བཞིན་པ་ལྟར། ཨ་རི་དང་འཇར་མན། ཨོ་སི་ཊོ་ལི་ཡ། ཉི་ཧོང་སོགས་ཀྱིས་རྒྱ་ནག་གི་རྒྱུད་གཅིག་ལམ་གཅིག་ཞེས་པའི་ཚོང་འབྲེལ་ལྐོག་ཇུས་འོག་ཕྱིའི་རྒྱལ་ཁབ་ཁག་གི་སྲིད་དབང་ལ་ལག་པ་འཆང་ཐབས་བྱེད་ཀྱིན་པའི་དོགས་གཞི་བསླངས་བ་མ་ཟད། ཚོང་ལས་མཉམ་འབྲེལ་ལ་མོས་མཐུན་མེད་པའི་རྣམ་འགྱུར་གང་འཚམ་ཞིག་བསྟན་ཡོད་པ་རེད།

གསར་འགོད་པ། སངས་རྒྱས་དཀོན་མཆོག