གྲོང་ཁྱེར་སྤྱི་ཁྱབ་ལ་སྲོག་ཁྲིམས་བཅད།

རྒྱ་ནག་ལོ་ལེན་གྲོང་ཁྱེར་གྱི་སྤྱི་ཁྱབ་གཞོན་པ་ཟུར་པ་ཀྲང་ཀྲུང་ཧིན་ཟེར་བ་ཞིག་གིས་སྔ་གཞུག་ཏུ་རྒྱུ་དངོས་དང་དངུལ་སྨར་བཅས་ཁྱོན་རྒྱ་སྒོར་དུང་ཕྱུར་ ༡ ལྷག་ཧམ་ཟ་བྱས་པར་བརྟེན་སྲོག་ཁྲིམས་བཅད་ཡོད་འདུག

རྒྱ་ནག་གཞུང་འབྲེལ་བརྒྱུད་ལམ་དུ་གནས་ཚུལ་ཐོན་པ་ལྟར་ན། རྒྱ་ནག་ཧྲན་ཞི་ཞིང་ཆེན་ལོ་ལེན་(Luliang)གྲོང་ཁྱེར་གྱི་སྤྱི་ཁྱབ་གཞོན་པ་ཟུར་པ་ཀྲང་ཀྲུང་ཧྲིན་(Zhang Zhongsheng)གྱིས་ལྐོག་ཟ་རུལ་སུངས་དང་། ལྐོག་རྔན་ཨ་སྒོར་ས་ཡ་ ༡༥༩ བླངས་ཏེ་ཁྲིམས་འགལ་གྱི་ནག་ཉེས་ཆེན་པོ་བསགས་ཡོད་སྟབས། དེ་རིང་ཁོ་ལ་སྲོག་ཁྲིམས་བཅད་པ་དང་། སྒེར་གྱི་རྒྱུ་ནོར་ཚང་མ་གཞུང་བཞེས་བཏང་ཡོད་འདུག

ཁྲིམས་ཁང་གིས་ཀྲང་ཀྲུང་ཧྲིན་གྱིས་ཕྱི་ལོ་ ༡༩༩༧ ལོ་ནས་ ༢༠༡༣ ་བར་རྡོ་སོལ་ཕྱིར་ཚོང་བཟོ་གྲྭ་ཞིག་ཏུ་ལས་ཀ་བྱས་པ་དང་། དེའི་རྗེས་ཧྲན་ཞི་ཞིང་ཆེན་ཀྲུང་ཡཱང་རྫོང་གི་རྫོང་དཔོན་བྱས་ཏེ་རིམ་གྱིས་ལོ་ལེན་གྲོང་ཁྱེར་གྱི་སྤྱི་ཁྱབ་གཞོན་པའི་འགན་འཁུར། ཁོས་སྔ་རྗེས་སུ་རྒྱུ་དངོས་དང་དངུལ་སྨར་བཅས་ཁྱོན་རྒྱ་སྒོར་དུང་ཕྱུར་ ༡.༠༤ ལྷག་བླངས་ཡོད་པ་དང་། ཁོས་ལྐོག་དངུལ་ས་ཡ་ ༡༣༠ བླངས་པའི་ཁུངས་བཤད་རྒྱུ་མེད་སྐོར་དང་། ཀྲང་གིས་འདོད་རྔམ་ཆེན་པོས་ལྐོག་དངུལ་འབོར་ཆེན་ཟོས་ཏེ། རྒྱལ་ཁབ་དང་ས་གནས་མི་མང་གི་དཔལ་འབྱོར་ཐོག་གནོད་པ་ཚབས་ཆེན་ཐེབས་ཡོད་སྐོར་བསྒྲགས་འདུག

རྒྱ་ནག་ནང་དཔོན་རིགས་ཚོས་ལྐོག་ཟ་རུལ་སུངས་དང་ལྐོག་རྔན་ལེན་པའི་གནད་དོན་ཧ་ཅང་ཚབས་ཆེ་བ་མ་ཟད།  དེའི་རྒྱབ་ལྗོངས་དང་ཁུངས་སྣེ་དེད་པ་ཡིན་ན་ཀྲུང་ནན་ཧེ་ལ་ཐུག་བསྡད་ཡོད་པར་བཤད། ཞི་ཅིན་ཕིན་གྱིས་སྲིད་དབང་བཟུང་རྗེས་ལྐོག་ཟ་རུལ་སུངས་དང་དབང་ཆ་ལོག་སྤྱོད། ལྐོག་རྔན་སྤྲོད་ལེན་སོགས་ཀྱི་ཉེས་མིང་འོག་དཔོན་རིགས་སྟོང་ཕྲག་མང་པོར་ཁྲིམས་ཆད་ཕོག་པ་མ་ཟད། འདས་པའི་ལོ་ཤས་ནང་ལོ་རེར་ཆ་སྙོམས་བྱས་ན་དཔོན་རིགས་ ༥༠ རེ་ཡིས་རང་ཤི་བརྒྱབས་ཡོད་པ་རེད། ཡིན་ནའང་། ཆབ་སྲིད་དཔྱད་ཞིབ་པ་ཚོས་བརྗོད་ན། ཞི་ཅིན་ཕིན་གྱི་སྲིད་དབང་སྟོབས་ཤུགས་ཡང་རྩེར་སོན་པའི་རྐྱེན་རྩ་གཅིག་ནི་མི་མང་དཀྱུས་མས་ཞི་ཡི་སྟག་དང་སྦྲང་མ་མཉམ་རྡུང་གི་སྲིད་བྱུས་ལ་རྒྱབ་སྐྱོར་ཆེན་པོ་ཐོབ་ཀྱི་ཡོད་འདུག

གསར་འགོད་པ། སངས་རྒྱས་དཀོན་མཆོག

བསྐྱར་བཅོས།: ༢༠༡༨/༠༣/༢༨

Leave a Reply

One thought on “གྲོང་ཁྱེར་སྤྱི་ཁྱབ་ལ་སྲོག་ཁྲིམས་བཅད།

  1. གཞུང་པ་ཚེ་དབང་བསོད་ནམས་།

    ཉེས་པའི་བུ་ལ་ཉེས་པ་མ་བཏང་ན་།
    བྱེད་པོ་ཐམས་བཅས་ཉེས་པའི་རྒྱུ་ལ་འགྲོ་།
    བཟང་པོའི་བྱ་བར་བྱ་དགའ་མ་ཕུལ་ན་།
    བཟང་པོའི་བྱ་བ་སྒྲུབ་མཁན་ས་སྟེང་དཀོན་།
    བཟང་ངན་ངོ་རྟགས་ཐུབ་པའི་སྤྱི་ཚོགསཞིག་།
    ས་སྟེང་འདི་རུ་ཉིན་གྱི་སྐརྨ་ཙམ་།
    ངན་པ་དཔུང་སྒྲིགས་འགོ་འདྲེན་ཕྱོགས་གཏོགས་འོག་།
    སྤྱི་ཚོགས་མཐུན་སྦྲེལ་ནག་པོ་ནག་ཀྱང་བཟོས་།