སལ་མན་ཁན་ལ་སླར་ཡང་ལོ་ལྔའི་ཁྲིམས་ཐག་བཅད།

སལ་མན་ཁན་ལ་བཙོན་འཇུག་ཁྲིམས་ཐག་ལོ་ལྔ་བཅད་ཡོད་སྟབས་ཁོའི་ཁྲིམས་རྩོད་པས་བཙོན་འཇུག་ཕྱིར་འགྱངས་བྱེད་པར་ཞུ་གཏུགས་བྱེད་ཀྱི་ཡིན་སྐོར་བརྗོད་འདུག

རྒྱ་གར་གྱི་བརྒྱུད་ལམ་ཁག་གི་གནས་ཚུལ་ལྟར་ན། ཁ་སང་རྒྱ་གར་གྱི་(Bollywood)་གློག་བརྙན་འཁྲབ་སྟོན་པ་གྲགས་ཅན་སལ་མན་ཁན་ལ་སླར་ཡང་ཕྱི་ལོ་ ༡༩༩༨ ལོར་གློག་བརྙན་འཁྲབ་སྟོན་བྱེད་སྐབས་རིགས་རྒྱུད་ཆད་ལ་ཉེ་བའི་གཙོད་གཉིས་བསད་པའི་ནག་ཉེས་འོག  རྒྱ་གར་བྱང་ཤར་མངའ་སྡེ་ར་ཇི་སི་ཐན་གྱི་གྲོང་ཁྱེར་ཇོ་ཌི་པོར་ས་གནས་ཁྲིམས་ཁང་ནས་བཙོན་འཇུག་ལོ་ལྔ་དང་། ཉེས་ཆད་ཧིན་སྒོར་ཆིག་ཁྲི་བཅས་བཅད་ཡོད་པ་དང་། ཉེས་དོན་དེ་དང་འབྲེལ་བའི་གློག་བརྙན་འཁྲབ་སྟོན་པ་གཞན་བཞི་ཡི་ནག་ཉེས་གཙང་སེལ་ཆགས་ཡོད་འདུག

 སལ་མན་ཁན་གྱི་ཁྲིམས་རྩོད་པ་ཨེ་ནེན་ཌི་ཌེ་སའེ་(Anand Desai)ལགས་ཀྱིས།  ང་ཚོས་ཁྲིམས་ཁང་གི་ཐག་གཅོད་ལ་བརྩི་བཀུར་བྱེད་ཀྱིན་ཡོད་ཀྱང་།  ཉེས་དོན་འདིའི་མགོ་མཇུག་བར་གསུམ་ལ་བསམ་ཞིབ་བྱེད་སྐབས། གཙོད་གསོད་སྐབས་སལ་མན་ཁན་གཅིག་པོ་ཡིན་པའི་ངོས་འཛིན་བྱུང་ཡོད་སྟབས། ཁོའི་གློག་བརྙན་འཁྲབ་རོགས་མི་བཞི་ཡི་ནག་ཉེས་གཙང་སེལ་བྱུང་པ་ལྟར་སལ་མན་ཁན་གྱི་ནག་ཉེས་ཀྱང་གཙང་སེལ་དགོས་པར་ངོས་འཛིན་བྱེད་ཀྱིན་ཡོད། དེར་བརྟེན། སང་ཉིན་ང་ཚོས་ཁྲིམས་ཁང་ལ་ཁོའི་བཙོན་འཇུག་ཕར་འགྱངས་བྱེད་པར་ཞུ་གཏུགས་བྱ་རྒྱུ་ཡིན། ཞེས་བརྗོད་ཡོད་པ་དང་། ཁྲིམས་རྩོད་པ་ཨེ་ནེན་ཌིས་ཁྲིམས་ཁང་དུ་ཕྱི་ལོ་ ༡༩༩༨ ལོའི་གཙོད་གཉིས་དེ་མིས་བསད་པ་མ་ཡིན་པར་འབྱུང་ཁམས་ཀྱི་རྒྱུ་རྐྱེན་འོག་ཤི་ཡོད་སྐོར་བརྗོད་ཀྱི་ཡོད་འདུག

རྒྱ་གར་གྱི་དེ་རིང་ཚོང་ལས་གསར་ཁང་(Business Today)གི་གསར་འགྱུར་ནང་། ད་ལྟའི་ཆར་སལ་མན་ཁན་གྱིས་འགྲན་རྩལ་ཐེངས་གསུམ་པ་(Race 3)ཞེས་པའི་གློག་བརྙན་ཞིག་ཕབ་བསྐྲུན་བྱས་ཏེ་ཁྲོམ་རར་འཐོན་ལ་ཉེ་སྟབས།  བཙོན་འཇུག་ཁྲིམས་ཐག་བཅད་པ་དེས་ཁོ་ལ་ཨ་སྒོར་ས་ཡ་ ༧༧།༤༨ ཀྱིས་གྱོང་གུད་ཐེབས་ཀྱི་ཡོད་པ་མ་ཟད། ཁོའི་གློག་བརྙན་ལ་དགའ་མོས་བྱེད་མཁན་མང་པོ་ཞིག་ཀྱང་བློ་ཕམ་བྱུང་ཡོད་སྐོར་སོགས་བརྗོད་འདུག

རྒྱ་གར་གྲོས་ཚོགས་འཐུས་མི་ལྕམ་ཇ་ཡ་བྷ་ཆན་(Jaya Bachchan)ལགས་ཀྱིས། སལ་མན་ཁན་གྱིས་ད་བར་སྤྱི་ཚོགས་ཞབས་ཞུའི་ལས་དོན་མང་པོ་ཞིག་བསྒྲུབ་མྱོང་ཡོད་སྟབས། ཁོའི་ཉེས་ཆད་གུ་ཡངས་བཏང་ན་འགྲིག་གི་ཡོད་ཀྱང་། ཐེངས་འདིའི་ཁྲིམས་ཆད་ཐད་ང་རང་དགའ་པོ་བྱུང་མ་སོང་།  ཞེས་བརྗོད་ཡོད་པ་དང་། ད་རེས་ཁྲིམས་ཁང་གི་ཐག་གཅོད་དེ་ནི་སལ་མན་ཁན་ལ་བཙོན་འཇུག་ཁྲིམས་ཐག་བཅད་པ་ཐེངས་བཞི་པ་ཡིན་པ་དང་།  ཕྱི་ལོ་ ༢༠༠༦ ལོར་ར་ཇི་སི་ཐན་ཁྲིམས་ཁང་གིས་སལ་མན་ཁན་ལ་རི་དྭགས་རྔོན་པའི་ཉེས་དོན་གཉིས་བཙུགས་ཏེ། ཉེས་དོན་གཅིག་ལ་ལོ་ལྔ་དང་གཅིག་ལ་ལོ་གཅིག་བཅས་ཁྱོན་བསྡོམས་ལོ་ ༦ གི་བཙོན་འཇུག་ཁྲིམས་ཐག་བཅད་ཡོད་འདུག

ཕྱི་ལོ་ ༢༠༡༧ ལོར་གཙོད་བསད་པའི་ཉེས་དོན་དང་འབྲེལ་ནས་སལ་མན་ཁན་ལ་ཡིག་ཆ་གང་ཡང་མེད་པར་མེ་མདའ་ཉར་ཡོད་པའི་ཉེས་གཞི་གསར་པ་ཞིག་བཙུགས་ཡོད་པ་དང་།  ཕྱི་ལོ་ ༡༩༩༨ ལོར་སལ་མན་ཁན་གྱིས་གཙོད་གཉིས་བསད་པར་ཁྲིམས་གཏུགས་བྱེད་མཁན་གཙོ་བོ་ནི་བྷེ་ཤི་ནོ་(Bishnoi)ས་གནས་ཡུལ་མི་ཡིན་པ་དང་།  ས་གནས་དེའི་ཡུལ་མི་ཚོས་གཙོད་ནི་ལྷ་བཞིན་བཀུར་ཏེ་ཆོས་སྒྲུབ་ཀྱིན་ཡོད་འདུག

ཡང་ཕྱི་ལོ་ ༢༠༠༢ ལོར་སལ་མན་ཁན་གྱིས་མི་ཞིག་ལ་སྲང་ལམ་ནས་རླངས་འཁོར་གྱིས་བརྡུངས་ནས་གྲོངས་ཡོད་པ་དང་། ཉེས་དོན་དེར་ཁྲིམས་གཏུགས་བསྟུད་མར་བྱས་རྗེས་ཕྱི་ལོ་ ༢༠༡༥ ལོར་ཉེས་དོན་གཙང་སེལ་བྱུང་ཡོད་འདུག

སལ་མན་ཁན་ནི་ད་ལྟ་རང་ལོ་ ༥༢ དང་། རྒྱ་གར་གྱི་གློག་བརྙན་བཟོ་གྲྭ་བྷོ་ལི་ཝོ་ཌའི་གློག་བརྙན་འཁྲབ་སྟོན་པ་གྲགས་ཆེ་ཤོས་ཤིག་ཡིན་པ་མ་ཟད། ཁོས་ད་ལྟའི་བར་གློག་བརྙན་མི་འདྲ་བ་ ༡༠༠ ལྷག་འཁྲབ་སྟེ་ད་ལྟ་མ་དངུལ་ཨ་སྒོར་ས་ཡ་ ༣༧ ཙམ་ཡོད་པ་དང་། ངོ་དེབ་གཙོས་སྤྱི་ཚོགས་བརྒྱུད་ལམ་ཁག་ཏུ་ཁོ་ལ་དགའ་མོས་བྱེད་མཁན་མི་གྲངས་ས་ཡ་༣༦ ལྷག་དང་། རྒྱ་གར་གྱི་གློག་བརྙན་གཟེངས་རྟགས་སོགས་མང་པོ་ཐོབ་མྱོང་འདུག ད་ལྟ་ཁོ་ལ་བཟའ་ཟླ་མེད་པ་དང་། ཁོས་ད་བར་གོ་ལའི་མཛངས་མ་ཨ་ཤོ་ཡ་བ་རེ་གཙོས་རྒྱ་གར་ནང་མིང་གྲགས་ཡོད་པའི་བུ་མོ་མང་པོའི་ལྷན་དུ་དགའ་རོགས་སོགས་སྒྲིག་མྱོང་འདུག

གསར་འགོད་པ།  སྐལ་བཟང་སྦྱིན་པ།

བསྐྱར་བཅོས།: ༢༠༡༨/༠༤/༠༦

Leave a Reply

2 thoughts on “སལ་མན་ཁན་ལ་སླར་ཡང་ལོ་ལྔའི་ཁྲིམས་ཐག་བཅད།

  1. གཞུང་པ་ཚེ་དབང་བསོད་ནམས་།

    ངན་པ་ཚར་མ་བཅད་ན་བཟང་པོ་རྒྱུད་ལ་མི་སྐྱེས་།
    བཟང་ངན་དབྱེ་བ་མ་ཆོད་ན་ཚ་ཁའི་ཁྱི་རོ་མཐའ་མ་ཚ་འགྱུར་།

  2. གཞུང་པ་ཚེ་དབང་བསོད་ནམས་།

    ཉེས་པའི་བུ་ལ་ཉེས་པ་མ་བཏང་ན་།
    བྱེད་པོ་ཐམས་བཅས་ཉེས་པའི་རྒྱུ་ལ་འགྲོ་།