ངོས་ཀྱི་བསམ་པར་ང་ཚོའི་སློབ་གསོས་མཚམས་རེར་བཅོས་མ་ལྟ་བུའི་མི་ཚེ་ཞིག་བཟོ་ཡི་འདུག

༧གོང་ས་རྒྱལ་བ་རིན་པོ་ཆེ་མཆོག་གིས་བདེ་སྐྱིད་ནི་ངེས་པར་དུ་ཆོས་ལུགས་ལས་འབྱུང་དགོས་པ་མ་ཡིན་པར་ཆོས་ལ་མ་དད་ཀྱང་ཚན་རིག་དང་མཐུན་པའི་དངོས་ཡོད་གནས་སྟངས་ལ་གཞི་བཞག་ནས་ཡོང་ཐབས་ཡོད་སྐོར་གསུངས་སོང་།
ཁ་སང་ཕྱི་ཚེས་ ༡༡ ཉིན། ༧གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་དྷ་སའི་རྒྱལ་བའི་ཕོ་བྲང་དུ། ཨ་རིའི་རྩོམ་པ་པོ་དྷི་པེ་ཀཱ་ལགས་ཀྱིས་སྣེ་འཁྲིད་པའི་རྒྱལ་སྤྱིའི་སྟེང་གྲགས་ཆེ་བའི་རྩོམ་པ་པོ་དང་། སྒྱུ་རྩལ་པ། སྨན་པ་དང་འབྱོར་ལྡན་མི་སྣ་སོགས་མི་གྲངས་ ༤༠ ལྷག་ལ་མཇལ་མོལ་གནང་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གིས་མི་རེ་རེ་ནི་འཛམ་གླིང་འདིའི་འགྲོ་བ་མི་དུང་ཕྱུར་ ༧༠ ལྷག་གི་གྲུབ་ཆ་ཡིན་པས་མིང་ཁ་ཁ་ཡོད་པ་ཙམ་ལས་དོན་དམ་པར་མི་ཚང་མ་གཅིག་པ་ཡིན་པ་དང་། འགྲོ་བ་མིའི་གཞི་རྩའི་བསམ་སྤྱོད་བྱམས་སྙིང་རྗེ་ཡིན་པས་བྱམས་རྩེ་དང་བདེ་སྐྱིད་ལྡན་པའི་འཛམ་གླིང་ཞིག་སྐྲུན་རྒྱུ་ང་ཚོ་ཚང་མར་འགན་ཡོད་སྐོར་སོགས་གསུངས་འདུག

དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གིས། དུས་རབས་འདིར་ཕྱི་དངོས་པོ་ཡར་རྒྱས་ཚད་མཐོན་པོ་ཕྱིན་ཡོད་པ་རེད་དེ། ངོས་ཀྱི་ནམ་རྒྱུན་ང་ཚོར་ནང་སེམས་ཀྱི་དཀའ་ངལ་འཕྲད་ཀྱི་ཡོད་པ་བཤད་ཀྱི་ཡོད། འཛམ་གླིང་གི་གནམ་གཤིས་ཚ་དྲོད་རྒྱས་བཞིན་པ་ལ་སོགས་པའི་དཀའ་ངལ་ཆེན་པོ་འདི་ཚོར་ང་ཚོས་ཏིང་འཛིན་བྱེད་ཐབས་མེད་པ་གསལ་པོ་རེད། ཡིན་ནའང་དམག་འཁྲུག་ལ་སོགས་པའི་མཚོན་ཆས་ཕན་ཚུན་གསོད་རེས་བྱེད་པའི་དཀའ་ངལ་འདི་ཚོ་ནི་ཕྱི་དངོས་པོར་ཁ་ཕྱོགས་རྒྱུ་མང་དྲགས་ཏེ། འགྲོ་བ་མིའི་རྩ་བའི་རིན་ཐང་དང་བྱམས་བརྩེ་ལ་དོ་སྣང་མ་བྱས་རྐྱེན་རེད། ཐོག་མར་ང་ཚོ་ཨ་མའི་མངལ་ལས་སྐྱེས་དུས་མཚོན་ཆ་གང་ཡང་བཟུང་ནས་ཡོང་ཡོད་པ་མ་རེད། ད་ལྟ་འགྲོ་བ་མིའི་རིགས་ལ་འཕྲད་བཞིན་པའི་དཀའ་ངལ་མང་པོ་ཞིག་ང་ཚོ་རང་ཉིད་ཀྱིས་བཟོས་པ་ཞིག་རེད། ཚན་རིག་པ་འགས་འགྲོ་བ་མིའི་གཞི་རྩའི་རང་བཞིན་ནི་བྱམས་བརྩེ་དང་ལྡན་པ་ཞིག་རེད་ཅེས་བཤད་ཀྱི་འདུག ང་ཚོ་སྤྱི་ཚོགས་ནང་འདུས་སྡོད་བྱེད་པའི་སྲོག་ཆགས་ཤིག་ཡིན་ལ། བྱམས་བརྩེ་དང་ལྡན་པའི་སེམས་ཤིག་ཡོད་ཚེ་ཕྱི་ལུས་པའི་འཕྲོད་བསྟེན་ལའང་ཕན་ཐོགས་ཡོད་པ་རེད། རྒྱན་ཏུ་ཁྲོང་ཁྲོ་དང་ང་རྒྱལ། ཞེད་སྣང་འོག་འཚོ་བ་རོལ་ཚེ་ལུས་པོའི་ནད་འགོག་སྲུང་གི་ནུས་པ་ཉམས་འགྲོ་ཡི་ཡོད་པས། ང་ཚོས་ཕྱི་དངོས་པོ་ལས་ནང་སེམས་ལ་དེ་ཙམ་དོ་སྣང་སྤྲོད་ཀྱི་མེད་པ་མ་ཟད། ང་ཚོ་དང་ཁོང་ཚོ་ཟེར་ནས་དབྱེ་བ་འབྱེད་ཀྱི་འདུག ཐ་ན་ཆོས་ལུགས་ནང་ཁུལ་དུའང་ང་ཚོ་དང་ཁོང་ཚོ་ལབ་ནས་དབྱེ་འབྱེད་ཀྱིས་གསོད་རེས་བྱེད་ཀྱི་ཡོད་པ་རེད། བྱིས་པ་གསར་སྐྱེས་ཤིག་གིས་རང་ཉིད་རྒྱལ་ཁབ་དང་ཆོས་ལུགས་སོགས་གང་ཡིན་པར་ཁ་ཡ་མི་བྱེད་པར། གདོང་ལ་འཛུམས་ཤིག་འཁྱེར་ནས་མཉམ་དུ་རྩེད་མོ་རྩེ་ནས་འདུག་གི་རེད། ཏོག་ཙམ་འཚར་ལོངས་བྱུང་བ་དང་བསྟུན་གདོང་གི་འཛུམས་དེའང་ཉུང་དུ་སོང་ནས་རང་ཉིད་ཀྱི་ཆོས་ལུགས་གང་ཡིན་པ་དང་ལུང་ཚན་གང་ཡིན་པ་དེ་ཤེས་དགོས་ཀྱི་ཡོད་པ་རེད། གལ་སྲིད་ང་ཚོས་མི་ཞིག་ལ་གྲོགས་པོ་བཟོས་ན་རང་ཉིད་ལ་ཁེ་བཟང་ག་རེ་ཐོབ་ཀྱི་ཡོད་པ་དེ་སྔོན་ལ་རྩིས་རྒྱག་དགོས་ཡོད་པ་རེད། དེ་ནི་དཀའ་ངལ་གྱི་འབྱུང་ཁུངས་རེད། གཞི་རྩའི་ང་ཚོ་ནི་བྱམས་བརྩེ་དང་ལྡན་པའི་སྤྱི་ཚོགས་ནང་འདུས་སྡོད་ཀྱི་སྲོག་ཆགས་རེད་ལ། སུས་ཀྱང་སྡུག་ངལ་འདོད་ཀྱི་མེད་པ་རེད། འོན་ཀྱང་འགྲོ་བ་མི་རང་ཉིད་ཀྱི་བྱས་ཉེས་ལ་བརྟེན་ནས་དཀའ་ངལ་མང་པོར་འཕྲད་བཞིན་པ་རེད། ང་ཚོའི་ཆོས་ལུགས་དང་ལུང་ཚན་ཁ་ཁ་ཡིན་པ་ནི་གལ་ཆེན་མིན་པར། ང་ཚོ་ཚང་མ་འགྲོ་བ་མིའི་རིགས་གཅིག་པ་ཡིན་པ་ནི་ཧ་ཅང་གལ་ཆེན་ཡིན་པས། ཆོས་ལུགས་ཚང་མིའི་སེམས་པ་བཟང་པོ་དང་བྱམས་བརྩེ་གསུང་གི་ཡོད་པ་བཞིན་ཆོས་ལུགས་ཀྱི་དབུ་འཁྲིད་རྣམ་ལ་འགན་འཁྲི་ཡོད་པ་རེད། ཅེས་གསུངས་སོང་།

ཡང་ཁོང་ཉིད་ཀྱིས་དུས་རབས་ ༢༡ དེ་སྔ་མའི་དུས་རབས་ ༢༠ ལྟར་མིའི་རིགས་ཀྱིས་ཕན་ཚུན་གསོད་བཏུབ་བྱེད་པའི་དུས་རབས་ཤིག་ཆགས་མི་ཉན་པར་འབད་བརྩོན་དགོས་པ་སོགས་ཀྱི་སྐོར་ལ། མི་རེ་རེ་ནི་འཛམ་གླིང་འདིའི་འགྲོ་བ་མི་དུང་ཕྱུར་ ༧༠ ལྷག་གི་གྲུབ་ཆ་ཡིན་པས་མིང་ཁ་ཁ་ཡོད་པ་ཙམ་ལས་དོན་དམ་པར་མི་ཚང་མ་གཅིག་པ་རེད། ང་ནི་ཏྭ་ལའི་བླ་མ་རེད་ལ་ནམ་རྒྱུན་ངོས་ལ་༧གོང་ས་ཏཱ་ལའི་བླ་མར་འབོད་ཀྱི་ཡོད་པ་རེད། ང་ཚོ་ཚང་མ་འགྲོ་བ་མིའི་རིགས་ཀྱི་གྲུབ་ཆ་ཞིག་དང་སྤྱི་ཚོགས་ནང་འདུས་སྡོད་བྱེད་པའི་སྲོག་ཆགས་ཤིག་ཡིན་སྟབས།  མི་རེ་རེས་སྤྱི་ཚོགས་ཡར་རྒྱས་དང་སྤྲོ་སྐྱིད་ལྡན་པའི་སྤྱི་ཚོགས་འཛུགས་སྐྲུན་ལ་ནུས་པ་གལ་ཆེན་འདོན་ཐུབ་ཀྱི་ཡོད་པ་རེད། མ་མཐའ་ཡང་དུས་རབས་ཉེར་གཅིག་པ་འདི་དུས་རབས་ཉི་ཤུ་པ་ལྟར་གསོད་གཏུབ་མང་པོ་མི་ཡོང་བར་འབད་དགོས་པ་རེད། དུས་རབས་ཉི་ཤུ་པའི་ནང་སྤྱང་གྲུང་འཛོམས་པའི་ཚན་རིག་པ་ཚོས་ཁོང་ཚོའི་རྣམ་དཔྱོད་དེ་མཚོན་ཆ་བཟོས་དེ་མི་ཅི་ལྟར་གསོད་དགོས་པའི་ཐོག་ལ་བཏང་པ་རེད། ལོ་རྒྱུས་རིག་པ་སྨྲ་བ་འགས་དུས་རབས་ཉི་ཤུའི་ནང་མི་གྲངས་ས་ཡ་ ༢༠༠ ཙམ་དྲག་སྤྱོད་ལ་བརྟེན་ནས་བསད་ཡོད་པ་བརྗོད་ཀྱི་འདུག དྲག་སྤྱོད་ལ་བརྟེན་ནས་མི་དེ་ཙམ་བསད་དེ་འཛམ་གླིང་ཐོག་བདེ་སྐྱིད་ཞིག་འཁྱེར་ཡོང་ཐུབ་ཀྱི་ཡོད་ཚེ་གནས་ཚུལ་ཁ་ཁ་རེད། ངོས་ཀྱི་བསམ་པར་དེང་སྐབས་མི་ཕན་ཚུན་བར་གསོད་རེས་བྱེད་བཞིན་པ་འདི་ནི་དུས་རབས་ཉི་ཤུ་པའི་བག་ཆགས་དང་། དཀའ་ངལ་ཞིག་འཕྲད་མ་ཐག་ལམ་སང་མཚོན་ཆའི་ལམ་ནས་སེལ་ཐབས་བྱེད་ཀྱི་ཡོད་པ་འདི་ཚོ་ནི་གནའ་སྔ་མོའི་བསམ་བློ་གཏོང་སྟངས་རེད། ངོས་ཀྱི་ནམ་རྒྱུན་ནས་བཤད་བསྡད་ཡོད་ལ་ཡིད་ཆེས་ཀྱང་བྱེད་ཀྱི་ཡོད། དུས་རབས་ཉེར་གཅིག་པའི་ནང་དཀའ་ངལ་ཡོད་ཚད་ཕན་ཚུན་ལ་གྲོས་མོལ་གྱི་ལམ་ནས་སེལ་ཐབས་བྱེད་དགོས་པ་དེ་ཡིན། ཇི་སྲིད་འགྲོ་བ་མིའི་རིགས་འཚོ་སྡོད་རིང་དེ་སྲིད་ཚང་མར་འཛུམ་མདངས་དང་བསམ་བློ། འདོད་པ་སོགས་ཁ་ཁ་ཡོད་པ་རེད། སྤྱིར་ང་ཚོའི་འཛུམ་མདངས་གཅིག་པ་ཡིན་རུང་ཀླད་པ་ནི་རྙོག་འཛིང་ཅན་ཞིག་ཡིན་པས་འཛུམ་མདངས་ལའང་རང་བཞིན་དང་ཟུར་ཟ་སོགས་ཀྱི་དབྱེ་བ་འགའ་ཡོད་པ་རེད། རྒྱ་རིགས་ཁ་ཤས་འཛུམ་དམུལ་དམུལ་ཡོད་པ་རེད་དེ་བཅོས་མའི་འཛུམ་འདངས་རེད། བྱིས་པའི་འཛུམ་མདངས་ནི་བཅོས་མ་མ་ཡིན་པ་རེད། ངོས་རང་ནི་ལོ་ ༨༣ ཙམ་རེད་དེ་མཚམས་རེར་བཅོས་མའི་འཛམ་མདངས་ཤོར་གྱི་འདུག ངོས་ཀྱི་བསམ་པར་ང་ཚོའི་སློབ་གསོས་མཚམས་རེར་བཅོས་མ་ལྟ་བུའི་མི་ཚེ་ཞིག་བཟོ་ཡི་འདུག དེ་ནི་ཡག་པོ་མ་རེད། ད་ལྟ་ནི་དུས་རབས་ཉེར་གཅིག་པ་ཡིན་པས་ཕན་ཚུན་བར་གྲོས་མོལ་གྱིས་དཀའ་ངལ་དག་སེལ་ཐབས་བྱེད་དགོས་རེད། ཅེས་གསུངས་སོང་།
༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་དམ་བཅའ་གསུམ་དང་འབྲེལ་ནས་ཆོས་དད་ཡོད་མེད་ཀུན་གྱིས་མི་ཡག་པོ་དང་མི་ཚེའི་བདེ་སྐྱིད་གཅིག་པ་འཚོལ་ཐུབ་པའི་སྐོར་ལ། ངོས་ཀྱི་མི་ཚེ་ནང་དམ་བཅའ་གསུམ་ཡོད་པ་ལས་དང་པོ་ནི་མི་ཞིག་ཡིན་པའི་ཆ་ནས་གཞན་ལ་ཇི་ལྟར་བདེ་སྐྱིད་སྐྲུན་པར་འབད་བརྩོན་བྱ་རྒྱུ་དེ་ཡིན། བདེ་སྐྱིད་ནི་མྱོ་རྫས་དང་ཆང་རག དངུལ་སྒོར་སོགས་ལ་བརྟེན་ནས་འབྱུང་བ་མ་ཡིན་པར། མཐར་ཐུག་གི་བདེ་སྐྱིད་ནི་བསམ་བློ་གཏོང་སྟངས་ལས་འབྱུང་བ་རེད། དེ་ཡང་ངེས་པར་དུ་ཆོས་ལུགས་ལས་འབྱུང་དགོས་པ་མ་ཡིན་པར། ཆོས་ལ་མ་དད་ཀྱང་ཚན་རིག་དང་མཐུན་པའི་དངོས་ཡོད་གནས་སྟངས་ལ་གཞི་བཞག་ནས་ཡོང་ཐབས་ཡོད་པ་རེད། ངེས་པར་དུ་སྟོན་པ་དང་དཀོན་མཆོག་ལ་སྨོན་ལམ་བཏབ་ནས་བདེ་སྐྱིད་ཡོང་དགོས་པ་ཞིག་མ་རེད། དེ་དང་འབྲེལ་ནས་སྟོན་པ་བཅོམ་ལྡན་འདས་ཏོག་ཙམ་སྤྱང་པོ་བྱུང་ཡོད་འདུག སྟོན་པའི་ཕྱག་གིས་འགྲོ་བའི་སྡུག་ངལ་སེལ་མི་ཐུབ་དང་དྲི་མས་སྤག་པའི་བསམ་བློ་འཁྲུས་མི་ཐུབ་པ། དེ་བཞིན་ཁོང་གི་ནང་སེམས་ཀྱི་ཞི་བདེ་དེ་གཞན་ལ་སྤྲོད་མི་ཐུབ་པར། རང་ཉིད་ཀྱི་ཉམས་མྱོང་ལ་བརྟེན་ནས་གཞན་ལ་ལམ་སྟོན་མཛད་ཐུབ་པ་གསུངས་ཡོད་པ་རེད། ལྷ་ཡོད་པར་སྨྲ་བའི་ཆོས་ལུགས་ནང་ཡོད་ཚད་དཀོན་མཆོག་གི་ཕྱག་ན་ཡོད་པར་འདོད་ཀྱི་ཡོད་པ་རེད། དེའང་ཡག་པོ་རེད། དཀོན་མཆོག་གི་གསུང་གཙོ་བོ་ནི་བྱམས་དང་སྙིང་རྗེ་རེད། དཀོན་མཆོག་གི་ངོ་བོ་ཉིད་དེ་ཚད་མེད་ཀྱི་སྙིང་རྗེ་ཅན་ཞིག་དང་ཐམས་ཅད་སྐྲུན་པ་པོ། ང་ཚོའི་ཕ་ཡིན་པར་འདོད་ཀྱི་ཡོད་པ་དེ་ནི་ཧ་ལས་དགོས་པ་ཞིག་ཡིན་པས། ང་ཚོ་ཚང་མ་དཀོན་མཆོག་དེ་འདྲ་ཞིག་གིས་སྐྲུན་པའི་སྤུན་མཆེད་ཡིན་པ་རེད། ཕ་སྙིང་རྗེ་ཚད་མེད་པ་ཞིག་ཡོད་པར་བརྟེན་ང་ཚོའང་སྙིང་རྗེ་ཅན་ཞིག་ཡིན་དགོས་པར་འདོད་ཀྱི་ཡོད། དེ་མིན་རྒྱ་གར་གྱི་སྲུང་མ་ཚུད་པའི་བོད་ཀྱི་ཆོས་སྐྱོང་སྲུང་མ་མང་པོ་དྲག་པོའི་ངང་ཡོད་པ་རེད། ཐེངས་ཤིག་ཉི་ཧོང་བ་ཞིག་བོད་ནང་ཕྱིན་རྗེས་ངོས་ལ། སངས་རྒྱས་ཀྱི་བྱམས་དང་སྙིང་རྗེ་གསུང་གི་ཡོད་ནའང་། ཅིའི་ཕྱིར་བོད་ནང་གི་དགོན་པ་མང་པོའི་ནང་། ལྷག་པར་དུ་འོད་དེ་ཙམ་མེད་པའི་ལྷ་ཁང་ནང་དུ་སྲུང་མ་དྲག་པོ་ཡོད་པ་དྲིས་བྱུང་། ཐེངས་ཤིག་སྲུང་མ་དེ་ཚོ་མཐོང་ནས་མཚན་མོར་གཉིད་ཀྱང་ཁུག་ཐུབ་ཡོད་མི་འདུག བོད་ལ་སྲུང་མ་དྲག་པོ་དེ་འདྲ་ཡོད་པ་རེད། དེ་ནི་དམིགས་ཡུལ་གཞན་ལ་བརྟེན་ནས་བྱུང་བ་རེད་དེ། རྩ་བས་ཆོས་ལུགས་ཚང་མས་བྱམས་བརྩེ་དང་བཟོད་སྒོམ་སོགས་གསུང་གི་ཡོད་པ་རེད། དེང་སྐབས་འཛམ་གླིང་འདིར་ཆོས་ལ་དད་མོས་མེད་མཁན་དུང་ཕྱུར་ ༡༠ ཙམ་ཡོད་པ་རེད། གང་ལྟར་ཚང་མ་འགྲོ་བ་མིའི་རིགས་ཀྱི་སྤུན་མཆེད་རེད། ཁོང་ཚོས་ཁས་བླངས་ཀྱང་རུང་མ་བླངས་ཀྱང་རུང་ཚང་མ་དཀོན་མཆོག་གི་བུ་ཕྲུག་རེད། ཁོང་ཚོར་ཀྱང་འགྲོ་བ་མིའི་བྱམས་བརྩེ་མཁོ་ཡི་ཡོད་པ་རེད། རྒྱ་གར་གྱི་རིས་མེད་ལམ་སྲོལ་ནང་ཆོས་ལ་དད་མཁན་དང་མི་དད་མཁན། དེ་བཞིན་ཆོས་ལུགས་བྱེ་བྲག་གང་ལ་དད་ནའང་ཚང་མ་སྙིང་རྗེ་དང་བྱམས་ལྡན་པར་ངོས་འཛིན་བྱེད་ཀྱི་ཡོད་པ་རེད། རྒྱ་གར་ནང་ལོ་ངོ་སུམ་སྟོང་ལྷག་རིང་བྱམས་བརྩེ་དང་འཚེ་བ་མེད་པ་བསླབ་ཡོད་པ་རེད། འཚེ་བ་མེད་པ་ཡོང་ཐབས་སུ་བྱམས་བརྩེ་དང་གཞན་ལ་གུས་བརྩི་དགོས་པ་རེད། ཅེས་གསུངས།

གཞན་མཇལ་བཅར་བ་ཚོས་ཇི་ལྟར་རང་ཉིད་ཀྱི་ཆོས་ལུགས་དེ་འཚོལ་དགོས་སྐོར་དྲིས་པའི་ལན་དུ། ངོས་ཀྱི་བསམ་པར་སྨན་བཞིན་ཆོས་ལུགས་གཅིག་ཡག་ཤོས་རེད་ལབ་ཐབས་ཡོད་པ་མ་རེད། ནད་པའི་ལུས་པའི་གནས་བབ་དང་ན་ཚ་སོགས་ལ་བརྟག་ནས་སྨན་ཟ་དགོས་པ་བཞིན་གང་ཟག་སྒེར་གྱི་མོས་པ་དང་སེམས་ཁམས་སོགས་ལ་བསྟུན་ནས་ཆོས་ལུགས་གང་ཡག་མིན་ཐག་གི་ཆོད་པ་རེད། ངོས་ཀྱི་དམ་བཅའ་གཞན་གཅིག་ནི་ཆོས་ལུགས་ཕན་ཚུན་བར་མཐུན་སྒྲིལ་ཡོང་བར་འབད་ཀྱི་ཡོད་པ་རེད། དེ་ལྟར་ཡོང་བར་གཙོ་བོ་ནི་ཕན་ཚུན་བརྩི་བཀུར་བྱེད་རྒྱུ་དེ་རེད། དེ་འདྲའི་བསམ་བློ་ཞིག་གི་འོག་ནས་ངོས་ཀྱིས་ནམ་ཡང་ནང་བསྟན་ནི་ཡག་ཤོས་རེད་ཅེས་བརྗོད་ཀྱི་མེད། ངོས་རང་ཉིད་ལ་མཚོན་ན་ནང་བསྟན་ནི་ཡག་ཤོས་རེད། མི་གཞན་ལ་རང་རང་གི་བསམ་བློའི་གནས་བབ་དང་བསྟུན་ནས་ཆོས་ལུགས་གཞན་པས་ཕན་ཐོགས་ཆེ་བ་ཡོང་གི་རེད། དེ་བས་ངོས་ཀྱི་བསམ་པར་ང་ཚོས་ཆོས་ལུགས་གཞན་པའི་གཞུང་ལ་མང་པོ་བལྟ་དགོས་ཀྱི་འདུག ང་ཚོ་ནི་དཔལ་ལེཎྡའི་སློབ་དཔོན་ཚོའི་དགེ་ཕྲུག་རེད་ལ། ཁོང་ཚོའི་གཞུང་ལུགས་ལ་ལྟ་གྲུབ་འདྲ་མིན་ཡོད་པ་ལ་ཕན་ཚུན་བར་རིག་པས་བརྟག་ནས་བགྲོ་གླེང་བྱུང་ཡོད་པ་རེད། ཁུངས་གཅིག་ལ་འཇུས་ནས་དད་པ་བྱས་ནས་སོང་ན་མིའི་རྣམ་དཔྱོད་ཀྱི་རྩལ་ཁྱད་དུ་འཕགས་པ་དེ་བེད་མེད་དུ་ལུས་འགྲོ་བ་རེད། ཅེས་གསུངས་སོང་།

ཡང་མཇལ་བཅར་བ་གཞན་ཞིག་གིས་གལ་སྲིད་གང་ཟག་གཞན་ཞིག་གིས་གནོད་སྐྱེལ་བ་སོགས་བྱུང་ཚེ། རང་ཉིད་ཇི་ལྟར་བཟོད་སྒོམ་དང་བྱམས་བརྩེ་ལྡན་པའི་ངང་གནས་ཐུབ་མིན་དྲིས་པར། རང་ཉིད་འགྲོ་བ་མི་དུང་ཕྱུར་ ༧༠ ལྷག་ནང་གི་གཅིག་ཡིན་པར་ངོས་འཛིན་ཐོབ་དགོས་པ་ལས་མི་རིགས་དང་ཆོས་ལུགས། ལུང་ཚན་སོགས་སུ་མི་བགར་བར་འགྲོ་བ་མི་གཅིག་མཚུངས་ཡིན་པར་བསམ་ཚེ་ངོས་རང་གི་བསམ་བློ་གཏོང་སྟངས་ལ་ཕན་ཐོགས་ཆེན་པོ་ཡོང་གི་འདུག ག་དུས་མི་གཞན་དང་ཐུག་འཕྲད་བྱེད་སྐབས་ང་ཚོ་གཅིག་མཚུངས་ཡིན་པར་བསམ་གྱི་ཡོད་པས། དེ་མ་ཐག་ཏུ་ཁོང་ཚོར་ཆོབ་བསླངས་ན་ཁོང་ཚོས་ཀྱང་ཚུར་ཆོབ་བཤད་བྱེད་ཀྱི་འདུག གལ་སྲིད་ངོས་ཀྱི་རང་ཉིད་བོད་པ་དང་ཏཱ་ལའི་བླ་མ། ནང་པ་ཡིན་པ་སོགས་ལ་གཙོ་འདོན་བྱས་ཚེ་འཛམ་གླིང་འདིར་ཏཱ་ལའི་བླ་མ་གཅིག་མ་གཏོགས་མེད་པས། དེས་རང་ཉིད་ཁེར་རྐྱང་ཡིན་པའི་གཞི་རྩའི་བསམ་བློ་དེ་བསྐྲུན་པ་རེད། རང་ཉིད་འགྲོ་བ་མི་གཅིག་མཚུངས་ཡིན་པའི་བསམ་བློ་དེ་བཟུང་ཚེ་མི་ཚང་མ་རང་ཉིད་ཀྱི་སྤུན་མཆེད་ཡིན་པ་རེད། དེ་བཞིན་མི་ཚང་མས་བདེ་བ་འདོད་པ་ལས་སྡུག་ངལ་མི་འདོད་པ་གཅིག་མཚུངས་ཡིན་དེ་སེམས་ལ་བཟུང་ཚེ་རང་གིས་གཞན་ལ་གནོད་འཚེ་མི་བྱེད་པ་དང་གཞན་གྱིས་ཀྱང་རང་ཉིད་ལ་གནོད་འཚེ་མི་བྱེད་པར་ཕན་ཐོགས་ཡོང་གི་རེད། རྒྱ་ནག་གི་དཔོན་རིགས་ཚོས་བོད་མིར་མནར་གཅོད་གཏོང་གི་ཡོད་པ་རེད། ཁོང་ཚོ་ཆུང་དུས་སུ་དེ་འདྲ་མིན་ནའང་རྒྱ་ནག་གཞུང་གིས་ཁོང་ཚོའི་བསམ་བློ་ནང་ཕྱོགས་གཅིག་གི་གནས་ཚུལ་བླུགས་ཡོད་པས་དེ་འདྲ་ཡིན་པ་རེད། དེར་ངོས་རང་ཁོང་ཁྲོ་ལངས་བ་ཕར་ཞོག་སྙིང་རྗེ་སྐྱེས་ཀྱི་འདུག གོང་དུ་བཤད་པ་བཞིན་རྩ་བའི་མིའི་རང་བཞིན་ནི་བྱམས་བརྩེ་དང་ལྡན་པ་ཞིག་རེད། ང་ཚོ་ཚང་མ་སྤྱི་ཚོགས་འདུས་སྡོད་ཀྱི་སྲོག་ཆགས་ཤིག་ཡིན་སྟབས་གང་ཟག་སྒེར་གྱི་འཚོ་གནས་དེ་གཞན་ལ་རག་ལུས་པ་རེད། ག་ཚད་ཕྱུགས་མིན་ལ་མ་བལྟས་པར་རང་ཉིད་གཅིག་པོ་འཚོ་ཐབས་མེད་པ་རེད། ཅེས་གསུངས།

གསར་འགོད་པ། ཀླུ་མགོན་ཐར།

བསྐྱར་བཅོས།: ༢༠༡༩/༠༢/༡༢

Leave a Reply to པད་མ་དབྱངས་ཅན་ Cancel Reply

One thought on “ངོས་ཀྱི་བསམ་པར་ང་ཚོའི་སློབ་གསོས་མཚམས་རེར་བཅོས་མ་ལྟ་བུའི་མི་ཚེ་ཞིག་བཟོ་ཡི་འདུག

  1. པད་མ་དབྱངས་ཅན་

    ༧གོང་ས་རྒྱལ་བ་རིན་པོ་ཆེ་མཆོག་གིས་འཇིག་རྟེན་འདིའི་སྟིང་གི་མི་ཚང་མ་ལ་སློབ་གསོ་གྲངས་མེད་གནང་ཡོད་།
    འོན་ཀྱང་རང་ཉིང་ཀྱི་ཕ་ཡུལ་ལ་ཡོད་པའི་ན་གཞོན་ཚོ་ཁོང་གི་སློབ་གསོ་གཅིག་ཀྱང་གོ་མ་ཉུང་ ཁོང་ཚོའི་སེམས་ལ་ཡང་གོང་ས་མཆོག་མཇལ་འདོད་ཧ་ཅང་ཆེ་ གོང་ས་མཆོག་བོད་ལ་མྱུར་དུ་ལོག་ཐུབ་པ་ཤོག་།